Amakurump Ilejinany Ku Chilakej cha Gedeyon

1. Kukwatijan ni 1 Pita 5:2, mudimu ik wa usey nakash usadinau amakurump?

AMAKURUMP in Kristu akwet chisend cha kulam amikoku a usey nakash a Yehova. Asangaredin chisend chau mu kuyisadin akadivar ni anambaz nau, ni akat kusal mudimu wa ‘kuyilam antu.’ Nzamb (Jer. 23:4; tang 1 Pita 5:2.) Tujikitishin nakash mulong wa kwikal ni amakundj mud inay mu yikumangen!

2. Yikokujol ik yimwing yikutwishau amakurump amwing kurish nich?

² Mulong wa kuwanyish yisend yau, amakurump akat kurish ni yikokujol yivud nakash. Ku mutambu ukwau, chitining amakurump kusal usu nakash mulong wa kubangin chikumangen. Tony, mukurump wa chikumangen mu Etas- Unis, wasala usu nakash mulong wa kwikal chilakej chiwamp mu mudimu witiyinay. Ulondin anch: “Kwinsambishin kwa chipupu cha KOVID-19, nasala usu nakash mulong wa kurijek yikumangan ni mudimu wa kulejan. Chikalap nchik yom nasala, pakwez kwading kuchid kal yom yivud ya kusal. Chakin kamu, nakwatakana nakash kushik mu chilik cha kuburen chisu cha kutang Bibil, kwilej kwa pakampwil ni kulembil.” Ilir, mukurump wa chikumangen mu Kosovo, warisha ni chikokujol chikwau. Padingay kwindond kwading njit, chamukasikena kuziyin kwi mbil yidiokila ku dirijek. Ulondin anch: “Kutakaman kwam akupaka chisu cha ngikishau chisend ku mutiy mulong wakuya kuyikwash akadivar nau anambaz kwi ndond kwadinga njit. Nova wom, ni umutakel winou wamekana mud udiap kwau uwamp.” Tim, udia mishoner mu Aziy, kadingap ni musangar dichuku diawonsu. Ulondin anch: “Yisu yimwing, Novang kuziy nakash ku mujimbu ni mu manangu.” Yom ik yikutwisha kuyikwash amakurump arishina ni yikokujol mud yiney?

3. Mutapu ik ukutwishau antu awonsu kutaninamu mu chilakej cha Nkalansambu Gedeyon?

³ Amakurump akutwish kwilejin ku chilakej cha Nkalansambu Gedeyon. (Heb. 6:12; 11:32) Wadinga ntakel ni mwin kuchidij antu a Nzamb. (Ank. 2:16; 1 Jsng. 17:6) Mud Gedeyon, amakurump ayitonda mulong wa kulam antu a Nzamb pa chirung chikash. (Mid. 20:28; 2 Tim. 3:1) Tukutwish kwilejin ku chilakej cha kwikepish ni cha kuziyin cha Gedeyon. Kujijaman kwend akupaka pa chisu chading chisotinay kuwanyish yisend yend. Anch tusadin mud mukurump wa chikumangen ap bwat, tukutwish kuyijikish nakash amakurump. Tufanyidin kuyikwash amakundj inay a mu spiritu mulong wa mudimu ukash usadinau.​—Heb. 13:17.

CHISU CHIPAKINAU MWIKADIL WEY WA KWIKEPISH NI WA KWIJIK MIMBU YEY

4. Mutapu ik wamekeshay Gedeyon anch wikepishin ni wij mimbu yend?

⁴ Gedeyon wading ikundj wikepishina ni wija mimbu yend.b Pamulejau Gedeyon kud mwangel wa Yehova anch amutondin mulong wa kuyikol in Isarel mu makas ma in Madian, ikundj winou wikepishina wakula anch: “Dijuku diam diburedin yom mu muchid wa Manase, niyam nidi kwam wa kwinsudiel mu dijuku diam.” (Ank. 6:15) Wiyova anch kawanyidinap kusend chisend chinech, pakwez Yehova wading wij nawamp anch ukutwish kamu. Nich ukwash wa Yehova, Gedeyon watwisha kuwanyish chisend chamwinkishau.

5. Chisu ik chikutwisha kumukasiken mukurump kwijik mimbu yend ni kwikal wikepishina?

⁵ Amakurump asadin usu wau wawonsu mulong wa kumekesh mimbu yau ni kwikepish mu yom yawonsu. (Mike 6:8; Mid. 20:18, 19) Kakatap kwibaz mulong wa ukaliweny wau ap mulong wa yom yisadinau; kakatap kand kwinan mulong wa kurumbok kwau ap mulong wa yom yikangenyau kusal. Pakwez chisu chimwing, chikutwish kumukasiken mukurump kwikepish ap kwijik mimbu yend. Chilakej, ukutwish kwitiyin yisend yivud ni kupwa watan anch chimukasikedin kuyiwanyish yawonsu. Akutwish kumunyinyit kud antu akwau mulong wa chisend chimwing chawanyishangay ap kumubaz mulong wa chisend chikwau chasalangay nawamp. Yom ik yikutwishau amakurump kwilejin ku chilakej cha Gedeyon mulong wa kuyikwash anch kwashiken yom mud yiney?

6. Yom ik yikutwishau amakurump kwilejin kud Gedeyon piur pa kwijik mimbu yau? (Tal kand chipich.)

⁶ It ukwash. Muntu wikepisha wijing yom yikutwishay kusal ni yimukasikedina kusal. Gedeyon wamekesha anch ud muntu wija mimbu yend mulong wita ukwash kud antu akwau. (Ank. 6:27, 35; 7:24) Amakurump akweta manangu akat kusal mwamu. Tony, twisambina kwiur oku, ulondin anch: “Mulong wa mutapu wanlilau, nikatining kwitiyin midimu yivud pamwingap yikwau nikutwishap kwam kuyisal. Chawiy nakwata mupak wa kwisambin piur pa mwikadil wa kwijik mimbu mu difukwil dietu dia mu dijuku ni namuleja mukajam kulond piur pa yom yading yitonginay. Natala kand video pa jw.org wading ulondina anch Comme Jésus, formons les autres, faisons-leur confiance et rendons-les capables” Tony wasambisha kuyit antu akwau mulong wa kwambulijan nau mudimu. Kwikal chibudikin ik? Tony ulondin anch: “Mu chikumangen mudimu wenda nawamp, ni Nikwet chisu cha kukasikesh urund wam ni Yehova.”

7. Mutapu ik ukutwishau amakurump kwimburij chilakej cha Gedeyon anch ayilond nayimp? (Jakobu 3:13)

⁷ Kangal wajiman anch muntu wakulond nayimp. Amakurump akutwish niyau kuyipak anch ayilond nayimp. Chilakej cha Gedeyon chikutwish kand kuyikwash. Chakin kamu ap anch wading muntu wakad kuwanyin, pakwez wakulang ni kwitudish pamulondangau nayimp kud in Eferayim. (Ank. 8:1-3) Gedeyon kayichirilangap. Wamekeshang anch ud muntu wikepishina kusutil kuyitesh nawamp, wasalang nich nkeu mulong wa kukangesh yom yafanyina kuletish matend. Amakurump akweta manangu akat kwimburij chilakej cha Gedeyon ni kwakul nich kwitudish anch ayilond nayimp. (Tang Jakobu 3:13.) Mwamu akat kukasikesh chisambu mu chikumangen.

8. Yom ik yifanyidinau amukurump kusal anch ayibaz? Let chilakej.

⁸ Pan ntumb kud Yehova. Chisu chamubazau Gedeyon payipandakanay in Madian, wapan ntumb yiney kud Yehova. (Ank. 8:22, 23) Mutapu ik ukutwishau amakundj akweta yisend kumwimburij Gedeyon? Akutwish kusal mwamu kusutil kumutumbish Yehova mulong wa yom yisadinau. (1 Kor. 4:6, 7) Chilakej, anch mukurump amujikitish mulong wa ukaliweny wend wa kufundish, ufanyidin kupwitin nkeu pa dizu dia Nzamb, didia musul wa mafundish, ap kupwitin nkeu pa kufumb tutambwila mu dirijek dia Yehova. Amakurump akutwish kand kwishinshikin anch yom yifundishinau yid mulong wa kumutumbish nich Yehova kadiap mulong wa kupwitin nkeu pad ayinau. Shinshikin yom yamushikena mukurump umwing utazukinau anch Timothy. Pasambishay kusal mud mukurump, Timothy wakatang kusal madiskur nakash. Ulondin anch: “Nasambisha kutek mbil ni yilakej. Antu asambisha kwimbaz mulong wa kufundish kwam. Chinech chasala anch antu ashinshikina kwau pad am, pa ndond pa kushinshikin pa Bibil ap padiay Yehova.” Mu kusut kwa chisu, Timothy wamana anch ufanyidin kuswimp mutapu wend wa kufundish mulong wading upwitidin nkeu ja antu pad ndiy. (Jnsw. 27:21) Chibudikin ik chikalaku? Urumburil anch: “ Antu avud anleja mutapu wayikwasha diskur diam kurish nich milong kushalijan, kujijamen chikokujol, ap kand kusej piswimp ni Yehova. Nasangara nakash panatesha yom mud yiney kusutamu chisu chambazangau mivu yasutina ey.”

ANCH APAK KUZIYIN NI KUTAKAMAN KWEY

9. Mutapu ik wapakau kuziyin ni kutakaman kwa Gedeyon? (Tal chipich cha pa chibur.)

⁹ Kupwa kwa kumutond Gedeyon mud nkalansambu, kuziyin ni kutakaman kwend akupaka. Amwinkisha chisend chikash cha kushesh chintamb cha baal chapeshinangay tatukwend (Ank. 6:25, 26) Kupwa kwa kukumangej amasalay, amuleja tupamp twaad kukepish uvud wa amasalay. (Ank. 7:2-7) Kupwa, amuleja kurishikish akankuny nend mu mapep ma uchuku.​—Ank. 7:9-11.

10. Mutapu ik ukutwishau kupak kuziyin kwa mukurump?

¹⁰ Amakurump afanyidin kwikal in ‘kuziyin pakad kulab.’ (Jak. 3:17) Mukurump uziyidina ufanyidin kuziyin pakad kulab kwi mbil yilondinay Bibil ni ku umutakel udiokila ku dirijek dia Nzamb. Mwamu ukat kwikal chilakej chiwamp kud antu akwau. Pakwez chikutwish kumukasiken ndiy kuziyin. Chilakej, ukutwish kutambul mbil jivud pa kapamp kamwing ni chikutwish kumukasiken kuziyin kwi mbil jinej. Mu yisu yimwing, ukutwish kwiyipul anch mbil jimwing jatambulangay jading kamu ja usey ap ja manangu. Ap akutwish kumwit kusal chom chikutwisha kutek want ipend mu ubaj. Mutapu ik ukutwishau amakurump kwimburij chilakej cha Gedeyon mu yishiken mud yiney?

11. Yom ik yikutwisha kuyikwash amakurump kuziyin?

¹¹ Tesh mbil nawamp ni jisadina. Nzamb wamuleja Gedeyon mutapu wa kushesh chintamb cha baal chapeshilangay tatukwend, ni ndond ya kutung chintamb chisu cha Yehova, ni nnam wafanyinay kupeshinap. Gedeyon kidjidjekap mulong wa umutakel winou, pakwez wasala mud mwa mulejau kud Yehova. Nlel unou, amakurump akat kutambul umutakel ku dirijek dia Yehova, kusutil mikand, yijikish, ni mbil jitukwashina kwikal piswimp ni Yehova ni jikata kutuking. Tuyikatin kamu amakurump etu mulong akat kulondul umutakel udiokila kud Nzamb. Chikumangen chakabuj chikat kutaninamu.​—Kus. 119:112.

12. Mutapu ik ukutwishau amakurump kusadin Hebereu 13:17 anch kwikal kuswimp mu dirijek dia Yehova?

¹² Ikal mwin kuswimp swa. Vurikany anch Yehova wamuleja Gedeyon kukepish uvud wa amasalay tupamp 99 pa chitot. (Ank. 7:8) Wafanyina kwiyipul anch: ov, ‘Kuswimp kwinoku kud kamu kwa usey? Kukutukwash?’ Chikalap nchik mwamu, Gedeyon waziyina. Nlel, amakurump akat kumwimburij Gedeyon kusutil kuziyin anch dirijek diayilej kusal yom mutapu windjing. (Tang Hebereu 13:17.) Chilakej, mu 2014 Chisak Chitakedila chaswimpa musul kwafanyina kudiokal nfalang ja kutung nich Yot ya Want ni Yot ya Yitentam. (2 Kor. 8:12-14) Chikumangen chafanyinap kand kusang nfalang chakwel achitungina Chot. Pakwez yikumangen ya pa mangand mawonsu, yafanyina kusang nfalang kujitek pamwing mulong wa kukwash ma proje ma kutung chikalap nchik kwindond kwafanyinau kutung, chikalap nchik uvud wa nfalang jidia mu chikumangen chitungidinau chot. Pateshay José kuswimp kwinoku, widjidjeka ni kwiyipul anch yom yafanyina kwend nawamp, watonga anch: ‘Chafanyina kukasikan kutung ap Chot cha Want chimwing kwau. Kimwawiyap musadiningau yom kunoku kwol kwetu.’ Yom ik yamukwasha José kuziyin ku mupak winou? Ulondin anch: “Mazu madia mu Jinswir 3:5, 6 Manvurisha kumuchingejin Yehova. Ni yibudikin yading kamu yiwamp nakash! Ap anch tutunginap Yot ya Want yivud pakwez twilejin kupan mu mitapu kushalijan chakwel kangal amwing ayisutamu akwau.”

13.. (a) Gedeyon wikala ni kashinsh ik? (b) Mutapu ik ukutwishau amakurump kumwimburij Gedeyon? (Tal kand chipich.)

¹³ Sal rusot ra Yehova nich kutakaman. Gedeyon wamuziyina Yehova chisu chadingay ni wom ni chikalap nchik ubaj wafanyina kumushiken mu chisend chamwinkishau. (Ank. 9:17) Kupwa kwa kumwinkish kashinsh kud Yehova, Gedeyon wamana chad anch Nzamb ukumukwash pa kuyichidijay antwend. Amakurump ashicha mu jingand mukangeshinau mudimu wa kulejan akat kumwimburij Gedeyon. Akat kutakel Yikumangan ni mudimu wa kulejan nich kutakaman chikalap nchik kuyikas, kuyipol yipul, kushadish midimu yau, ap chisum chiyimekeshidinau.c Pa chisu cha mar makash, amakurump akwikal nich kuswir kwa kutakaman mulong wa kuziyin ku umutakel ukutambulau​—kuziyin umutakel winou kukutwish kuyitek pamwing ap mu ubaj. Umutakel winou ukutwish kwikal wa kupan uman ukash ufanijadina ni mayal ma ruval ni mulong wa kupand kukurishikish kwa Gog wa Magog.​—Ezek. 38:18; Kuj. 16:21.

ANCH APAK KUJIJAMAN KWEY

14. Mutapu ik wapakau kujijaman kwa Gedeyon?

¹⁴ Mudimu wa winkalansambu wasalay Gedeyon wamwita usu nakash. Chisu chezau in Madian kumurishikish mu mapep ma uchuku, Gedeyon wayopata kudokal mwinkurubuk ya Jezarel djat ku wit wa Yordan, wadinga unyimburikinau kud mitond yijim yijim. (Ank. 7:22) Ov, Gedeyon wimena kwend ku yordan? Bwat! Ap anch wading waziyang kal, ndiy ni antwend 300 awuka wit ni adandamena kuyilondul. Kupwa, ayikwata in Madian ni kuyipandakan.​—Ank. 8:4-12.

15. Chisu ik chikutwishau kupak kujijaman kwa mukurump?

¹⁵ Yisu yimwing mukurump ukutwish kuziy ku mujimbu, mu manangu, ap mu yitongijok chisu chikwatikenay ni milong ya kubangin chikumangen ap dijuku diend. Mu yishiken mud yiney, mutapu ik ukutwishau amakurump kumwimburij Gedeyon?

16-17. Yom ik yamukwasha Gedeyon kujijaman, ni kashinsh ik kafanyidinau amakurump kwikal nich? (Isay 40:28-31) (Tal kand chipich.)

¹⁶ Ikal nich kashinsh anch Yehova ukukukasikesh. Gedeyon wikala ni kashinsh anch Yehova ukumwinkish usu, ni anch kakumulikap. (Ank. 6:14, 34) Kupwa, Gedeyon ni antwend ayilondula rapansh ant aad a in Madian adinga pa atumel. (Ank. 8:12, 21) Chawiy, nich ukwash wa Nzamb, in Isarel apandakana njit. Amakurump akutwish niyau kumuchingejin Yehova, muntu ‘wakad kuziyang ap kuzel tul.’ Ndiy ukuyinkish usu ukwetau nich kuswir.​—Tang Isay 40:28-31.

¹⁷ Shinshikin yom yamushikena Matthew, wa mu chisak cha Komite wa Kupan Ukwash ku Milong ya Opital (CLH). Yom ik yamukwasha kujijaman? Matthew ulondin anch: “Nikala ni usu udiokila kud Yehova mud mulondinay Filip 4:13. Yisu yivud anch naziy nikat kumulembil ni kumwilembin Nzamb chakwel anginkisha usu niswirikedina chisu niziyina mulong wa kuyikwash akadivar. Mu yisu mud yiney, Nikat kwiyov mud spiritu wa Yehova wanginkish kal usu, ukata kwinkwash kujijaman.” Mud Gedeyon, amakurump etu ipanina kwa kwikatil mulong wa kubangin antu a Yehova chikutwishap kamu kuyiswapel chisu chin chawonsu kusal mwamu. Chakin kamu, afanyidin kwijik mimbu ya usu ukwetau ku mujimbu ni mu manangu ni kusal kukwatijan ni usu wau. Chawiy, afanyidin kuchingej anch Yehova ukutesh kwit kwau mulong wa kuyinkish usu uswirikedinau ni kuyikasikesh mulong wa kujijaman.​—Kus. 116:1; Fil. 2:13.

18. Mu yawonsu twamana kal, mutapu ik ukutwishau amakurump kumwimburij Gedeyon?

¹⁸ Amakurump akutwish kwilej yom yivud nakash kusutin chilakej cha Gedeyon. Amakurump afanyidin kwijik mimbu yau ni kwikepish piur pa yom yifanyidinau kusal ap anch ayibaz ap ayilond nayimp. Afanyidin kand kwikepish ni kumekesh kutakaman, pakampwil pasejina disudien dia mangand piswimp. Ni akutwish kwikal ni kashinsh anch chikalap nchik yikokujol yikurishau nich, Nzamb ukuyikasikesh. Chakin kamu, tukwet musangar mulong wa mudimu ukash usadinau atufung inay ni “chifanyidin kuyilimish antu awonsu a mutapu winou.”​—Fil. 2:29.