Elizabet wading ni mwanamakwend changadim dijin dend Mariy, wading ushicha mu musumb wa Nazaret mwi ngand ya Galaliya. Mariy ading amutondin kal kuday Jozef mwin kusong mabay. Pawanisha madikaj ma Elizabet angond musamban, mwangel Gabriyel wamubudikina Mariy. Wamwela anch: ‘Walank, Mariy. Yehova wakuyukish kal.’ Mariy kateshap kurumburik kwa mazu minam. Gabriyel wamuleja kand anch: ‘Ukwimish ni ukuval mwan ikundj ni ukez kumupil anch Yesu. Ndiy ukez kwikal Mwant. Want wend ukez kikal wa chikupu.’

Mariy wakula anch: ‘Am nid kwam mujik. Mutapu ik nikutwisha kuval?’ Gabriyel wamuleja anch: ‘Kud Yehova yom yawonsu yikasikenap. Spiritu utumbila ukwikal niyey ni ukuval mwan ikundj. Mwanamakwey Elizabet niyend wimishin kal.’ Kupwa Mariy wakula anch: ‘Nidi kwam kashalapol wa Yehova. Yom yawonsu yiwanleja kal yisadika.’

Mariy waya kumutal Elizabet ku musumb wadinga pa mikandu. Pamulangwishau Elizabet kud Mariy, mwan wadinga mwivum mwa Elizabet wanyikeka. Elizabet wizula nich spiritu utumbila wamuleja anch: ‘Mariy, Yehova wakuyukishin kal. Chid chiyukish kud makwend a Nsalejam kwez mu chikumbu cham.’ Mariy walonda anch: ‘Nimutumbishin Yehova ni muchim wam wawonsu.’ Mariy washakama ni Elizabet mu angond asatu kurutu achirika kwol kwend ku Nazaret.

Pateshay Jozef anch Mariy ukwet madikaj, wakimba kumulik. Pakwez, mwangel wamubudikina mu chilat ni wamuleja Jozef anch: ‘Kangal wov wom wa kumwat Mariy. Kasadinap kwend chitil.’ Chawiy, Jozef wamusenda Mariy chakwel ikala mukajend.

Mwant Mujim wa in Rom Kayisar Ogist wapana chijil anch in Yuda awonsu afanyidin kuya mu mal mau ma chivadik mulong wa kwifundikish majin mau. Chawiy Jozef ni Mariy aya ku Betlehem, kwawiy kwadingau anvaj enday Jozef. Pa chisu chinicha Mariy wading piswimp ni kuval.

Pashikau ku Betlehem, ndond yafanyinau kushakam yading mu ditang da annam. Kwi ndond yiniya kwawiy kwamuvadinau Yesu kuday Mariy. Mariy wamuvunga mwanend mu masun ni wamuteka pa ndond yikatau kudil annam.

Piswimp ni Betlehem, atufung amwing ading pol uchuku mulong wa kulam amikoku au. Kukashimuk, mwangel wimana kurutu kwau ni chitokish cha uyaj wa Yehova chayimunyika. Atufung ova wom nakash, pakwez mwangel wayileja anch: ‘Kangal wovany wom. Nikwet rusang risangareshina. Nlel unou Mesiya wavadikang kal mu Betlehem.’ Pa chisu chinicha, angel avud amekana mwiur ni alonda anch: ‘Chifanyidin apana uyaj kud Nzamb mwiur ni chisambu chikal pansh.’ Kupwa, angel kamekanap kand. Mutapu ik mwasalau atufung?

Atufung anunganijana anch: ‘El tuyany katat kamu ak ku Betlehem.’ Pakad kulab aya ni amutana Jozef ni Mariy mu ditang da annam amuladikang kal mwan nau.

Muntu mwawonsu watesha yom yayilejau atufung kud mwangel washimoka nakash. Mariy watonga nakash piur pa mazu malondau angel ni kamavuramenap. Atufung achirika kulam amikoku ni amujikitisha Yehova mulong wa yom yamanau ni yateshau.

Kwingangel kwa Isarel kwadinga antu adinga itiyijina anch atutumbu akutwish kuyitwal kwi ndond kanang. Dichuku dimwing uchuku, antu amwing a Kwingangel amana chom mud katumbu uzazina ukat kushemunik mu madj, ni asambisha kumulondul. Pamulondulau “katumbu” winou, wayishikija mu Yerusalem. Antu inay ayipula antu amwing anch: ‘Kwisu kwavadikinay mwan ukeza kwikal mwant wa in Yuda? Twez kal mulong wa kumwifukwil.’

Pateshay mwant Herod wa mu Yerusalem jinsang piur pa mwant musu, wakama nakash. Wayitazuka in kupesh ni wayipula anch: ‘Kwisu kwavadikinay mwan ulondinau anch ukez kwikal mwant?’ Awiy amwakula anch: ‘Aprofet alonda anch ukuvadikin mu Betlehem.’ Chawiy, Herod wayitazuka antu adokala Kwingangel ni wayileja anch: ‘Yangany ku Betlehem umukimban mwan winou. Kupwa, ukuchirikany chakwel winlejany kuday. Mulong niyam nikuya kumwifukwil.’ Pakwez, wadimbana.

“Katumbu” wasambisha kand kuya. Amakundj inay amulondula kand kushik ni ku Betlehem. “Katumbu” winou waya wiman piur pa chikumbu ni amakundj amulondula andama mu chikumbu. Amutana Yesu pamwing ni makwend Mariy. Amwifukwila mwan winou ni amwinkisha yipan ya utad wa or, diseng da malash ni mira. Ov, Yehova, ndiy wayituma amakundj inay? Bwat.

Uchuku winiwa Yehova wamuleja Jozef mu chilat anch: ‘Herod ukimbin kumujip Yesu. Tumbuk ey, mukajey ni mwan uchinyinany mwin ngand ya Idjibit. Ukushakamany mwinimwa djat ni pinikeza kukulejan kudokalamu.’ Pakad kulab, Jozef ni dijuku dend aya mu Idjibit.

Yehova wayileja antu adokala Kwingangel anch kafanyidinap kuchirik kand kuday Herod. Pijikay Herod anch antu inay kachirikinap kumuman, wajimana nakash. Mulong Herod kijikap ndond yadingay Yesu, chawiy, wakwata mupak anch an awonsu amakundj avadika pa chisu chinicha mu Betlehem afanyidin kuyijip. Pakwez, Yesu ading amuchinishinang kal kulemp nakash mu Idjibit.

Pafay Herod, Yehova wamuleja Jozef anch: ‘Katat chawiy chisu chenen cha kuchirik.’ Jozef, Mariy ni Yesu achirika mu Isarel aya kushakam mu musumb wa Nazaret.

Jozef, Mariy, Yesu ni an akwau amakundj ni amband ading ashich mu Nazaret. Jozef wasalang mudimu wa kusong mabay mulong wa kuwanyish maswir ma dijuku dend ni wafundishang dijuku dend yom piur pa Yehova ni Yijil yend. Dijuku dend dading ni chaku cha kuyang ku sinagog mulong wa difukwil ni ayangang ku Yerusalem mulong wa kusal Musambu wa Pasak muvu wawonsu.

Pawanyishay Yesu mivu 12, dijuku dend daya mu weny ulemp ku Yerusalem mud mwadinga chaku chau. Mu musumb mwading yisak ya antu avud eza kusal Musambu wa Pasak. Padingau ni kuchirik kwol kwau, Jozef ni Mariy atonga anch Yesu ud mu chisak cha antu achirikina. Pakwez, pamukimbau pakach pa anamakwend, kamumanap.

Anvaj end achirika ku Yerusalem, asambisha kumukimb mwanau mu machuku masatu. Kupwa, amutana ud mu tempel. Yesu wading ushich mukach mwa alej a yijil ukat kuyitesh nawamp ni ukat kuyipul yipul yiwamp. Alej inay amushimoka nakash Yesu ni asambisha kumwipul yipul. Ashimoka kand nakash mutapu wadingay Yesu kuyakul. Ashikena kukwijik anch Yesu wading wij nawamp Yijil ya Yehova.

Jozef ni Mariy akama nakash. Mariy wamwipula mwanend anch: ‘Mwanam twading tukukimbin ndond yawonsu! Kwisu wadinga?’ Yesu wakula anch: ‘Kiwijanyap anch nading nifanyidin kwikal mu chikumbu cha Tatukwam?’

Yesu wachirika pamwing nau anvaj end ku Nazaret. Jozef wamufundisha Yesu mudimu wa kusong mabay. Utongin nchik, Yesu wading muntu wa mutapu ik padingay nsand? Papamangay Yesu, wading upamin mu manang ku ukwash wa Yehova ni wa antu.

Yohan mwan ikundj wa Zakariy ni Elizabet wikala muprofet papamay. Yehova wamusadina Yohan chakwel ayileja antu anch Mesiya ukwez. Yohan kafundishap mu masinagog ap mu misumb yijim, pakwez wafundisha mwi mpay. Antu adokala mu Yerusalem ni mu Yudeya, eza kutesh yom yalondangay Yohan. Wayifundisha antu inay anch chakwel amusangaresha Nzamb, afanyidin kulik kusal yom yiyimp. Antu avud pamuteshau Yohan, akarumuka ni alika kusal yitil, kupwa Yohan wayibatisha mu Wit wa Yordan.

Yohan kadingap mpich. Wadjalang masun masalau nich mavuj ma kamel ni wadangang ampasu ni woch. Antu avud ashimwoka nakash piur pa yom yalondangay Yohan. Ap Afaris nau Asadus in kwitutul eza niyawiy kumutesh Yohan. Yohan wayileja anch: ‘Ufanyidinany kuswimp yaku yen ni kukarumuk ku yitil. Kangal watongany anch udany antu a usey nakash mulong udany antu a mu muchid wa Aburaham. Chinech chirumburikinap anch udany an a Nzamb.’

Antu avud eza kumwipul Yohan anch: ‘Yom ik tufanyidina kusal chakwel tumusangaresha Nzamb?’ Yohan wayileja in Yuda anch: ‘Anch ukwet atubwik aad, ufanyidin kupan umwing kud muntu uburedina.’ Wij kurumburik kwa mazu minam? Yohan wakimba in kwilej end ijika anch, chakwel amusangaresha Nzamb, afanyidin kuyikat antu akwau.

Yohan wayileja in kulambwish yitad anch: ‘Ikalany in kashinsh ni kangal wayiyany antu.’ Wayileja kand amasalay anch: ‘Kangal witiyany akukatulany milamu ap kulond makasu.’

In kupesh ni in Levi eza niyawiy kumwipul Yohan anch: ‘Ey ud nany? Antu awonsu akimbin ijika.’ Yohan wayakula anch: ‘Am nid mwin komb rubil mwi mpay mulong wa kuyikwash antu amwijika Yehova mud mwalonday Isay.’

Antu akata nakash yom yayifundishau kud Yohan. Antu avud atonga pamwing ap anch Yohan wading Mesiya. Pakwez, ndiy wayileja anch: ‘Muntu wimpandakenamu ukwez. Pakwez, am kinidap muwamp uwanyidina mulong wa kusubul moj ya ma sandal mend. Am nikat kubatish nich mem, pakwez, ndiy ukubatish nich spiritu utumbila.’

Yohan walejana anch: ‘Muntu wimpandakenamu wezin.’ Pawanyishay Yesu mivu 30, wadokala ku Galaliya ni waya ku Wit wa Yordan kwadingay Yohan ukat kuyibatish antu. Yesu wakimba anch Yohan amubatisha pakwez, Yohan walonda anch: ‘Niwanyidinap kukubatish. Yeya ufanyidina kwimbatish.’ Yesu wamwakula Yohan anch: ‘Yehova ukatin anch ey wimbatisha.’ Chawiy chandamau mu Wit wa Yordan, kupwa Yohan wamwandjika jimu Yesu mu mem.

Kupwa Yesu watuntuka mu mem ni walembila. Pa chisu chinicha, diur dazurika, ni spiritu wa Nzamb washirika paday Yesu mud iyemb. Chawiy dizu da Yehova dadokala mwiur dalond anch: “Ey, ud Mwanam unikatina nakash, am nikat kusangar mulong weyey.”

Pashirika spiritu wa Yehova paday Yesu, Yesu wikala Kristu ap Mesiya. Pawiy pasambishay kusal mudimu wamutuminau pansh kud Yehova.

Kapamp kamwing kupwa kwa dibatish dend, Yesu waya mwi mpay ni wasala mwinimwa machuku 40. Pachirikay, waya kumutal Yohan. Pashikay Yesu kuday Yohan, Yohan walonda anch: ‘Talany Mwan a Mukoku wa Nzamb ukata kudosh yitil ya mu mangand.’ Kusutil ku mazu minam, Yohan wayileja antu patok anch Yesu ud Mesiya. Ov, wij yom yamushikena Yesu padingay mwi mpay? El tujingunina yom yiney.

Kupwa kwa kumubatish Yesu, spiritu utumbila wamubachika kuya mwi mpay. Kadap chom ap chimwing mu machuku 40 chawiy wova nzal nakash. Pawiy pezay Djabul mulong wa kumupak Yesu ni wamuleja anch: ‘Anch ey ud kamu Mwan a Nzamb, maleja mayal minam chakwel makarumuka kwikal mabot [mukat].’ Pakwez, Yesu wakula kusutil ku kujimbul maverse anch: ‘Afundin anch muntu kakutwishap kwikal mwom mulong wa yakuda kusu. Pakwez, ukwet kuswir kwa kutesh dizu dawonsu dilondinay Yehova.’

Kupwa Djabul wamupaka kand Yesu, wamwela anch:‘Anch ey ud kamu Mwan a Nzamb dokal piur pa tempel widjibula pansh. Afundin kal anch Nzamb ukez katum angel end mulong akwakina pa makas mau.’ Pakwez, Yesu wakula kand kusutil ku kujimbul maverse anch: ‘Afundin anch kangal wamupak Yehova.’

Kupwa, Satan wamuleja Yesu mant mawonsu ma pa mangand, mapit mau ni uyaj wau ni wamuleja anch: ‘Am nikukwinkish mant mawonsu ni uyaj wau anch wangifukwil .’ Yesu wamwakula anch: ‘Dokal kwa Satan! Afundin kal anch chifanyidin kumwifukwil ching Yehova.’

Chawiy Djabul waya, kupwa angel amuletina Yesu yakuda. Kusambishin pinipa, Yesu walejana rusang ruwamp ra Want. Wawiy mudimu wamutumau kusal pa mangand. Antu akata nakash mafundish ma Yesu ni amulondula ndond yawonsu yayangay.

Pa kapepil ka muvu wa 30 C.C., Yesu waya ku Yerusalem. Antu avud eza mu musumb winou mulong wa kusal musambu wa Pasak. Pasalangau musambu wau, awiy alambula annam mu tempel. Antu amwing eza ni annam au pakwez akwau alandang annam ezau nich mu Yerusalem.

Payay Yesu mu tempel, watanamu antu akat kulandish annam. Ading kwisakin pa ndond yadinga ya kumwifukwil Yehova! Mutapu ik wasalay Yesu? Wasala nfimbu ya moj wayopata antu mu tempel pamwing ni amikoku au ni angomb. Wabumburola ma tebur ma in kuswimpish nfalang ni nfalang jau japalangana. Yesu wayileja antu adinga ni kulandish atwinkudimb anch: ‘Doshany yom yiney mwinomu! Kangal wasalany chikumbu cha Tatukwam kwikal ndond ya kwisakin!’

Antu adinga mu tempel ashimoka nakash piur pa yom yasalay Yesu. In kwilej end avurika uprofet walondau piur pa Mesiya anch: ‘Kutakaman mulong wa chikumbu cha Yehova kukez kwimpandaken.’

Kupwa mu muvu wa 33 C.C., Yesu watokisha kand tempel. Kitiyap muntu ap umwing aburena kumekesh kalimish mulong wa chikumbu cha Tatukwend.

Kupwa kwa musambu wa Pasak, Yesu ni in kwilej end asutina mu Samariya padingau nikuchirik ku Galaliya. Piswimp ni musumb wa Sikar, Yesu wimana pa ndond yimwing yatazukangau anch dijiy da Yakob. Padingay ni kupim, in kwilej end aya mu musumb mulong wa kuland yakuda.

Mband umwing weza ku dijiy dined mulong wa kuvit mem. Yesu wamuleja mband winou anch: “Nginkishaku amboku mem ma kuna.” Mband wamwakula anch: ‘Mulong wak winlondishina? Am nid mwin Samariya. In Yuda kakatap kwambamb nau in Samariya.’ Yesu wamwakula anch: ‘Anch wading wingij ang nid nany, oku yeya wakimbang kwingit mem ni nikukwinkish mem ma mwom.’ Mband wamwipula anch, ‘yom ik ukimbina kulond?, Ukwetap kwey mbekech.’ Yesu wamwakula anch: ‘Muntu mwawonsu ukeza kuna mem nikumwinkisha kakezap kand kwov impu.’ Mband wamwakula anch: “Mwant, nginkishaku amboku mem minam.”

Yesu wamwakula mband winou anch: ‘Yang umutazuk nfumwey weza nend kunoku.’ Mband wakula anch: ‘Kinikwetap kwam ikundj.’ Yesu wamuleja anch: ‘Ey ulondin kwey uyakin. Akwatin kal tupamp tutan, ni ikundj uda nend katat kadap kwend nfumwey.’ Mband wakula anch: ‘Naman kal anch ey ud muprofet. Antu avud akat kwitiyij anch tukutwish kumwifukwil Nzamb pa mukandu winou, pakwez, in Yuda akat kulond anch chifanyidin kumwifukwil Nzamb ching ku Yerusalem. Nitiyijin anch, ang Mesiya wez, ndiy ukutuleja mutapu tufanyidina kumwifukwil Nzamb.’ Kupwa Yesu wamuleja mband winou yom yalikay kuyilej antu akwau anch: ‘Yam Mesiya.’

Mband winou wachirika mau mu musumb ni wayileja in Samariya anch: ‘Nitongin anch namutan kal Mesiya. Muntu winou wij yom yawonsu piur pam. Ez tuyany tumutalany!’ In Samariya amulondula mband winou ku dijiy chakwel atesha malejan ma Yesu.

In Samariya amutazuka Yesu chakwel eza ashakama mu musamb wau. Mu machuku maad, Yesu wayifundisha antu mu musumb winiwa ni antu avud ateka ritiy rau muday ndiy. In Samariya amuleja mband winou anch: ‘Kupwa kwa kumutesh muntu winou, twijik kal chakin anch ndiy ud mupandish wa mangand.’

Machuku makemp kupwa kwa kumubatish, Yesu wasambisha kulejan anch: ‘Want wa Nzamb ud piswimp.’ In kwilej end aya nend pamwing mu Galaliya ni mu Yudeya. Pachirikay Yesu ku Nazaret, waya ku sinagog mulong wa kutang muvungur wa Isay, wautanga nich dizu da piur anch: ‘Yehova wanginkishin kal spiritu wend utumbila mulong nilejana rusang ruwamp.’ Mazu minam marumburikin ik? Marumburikin anch, ap anch antu akimba kuman yilay yivud yasalay Yesu, pakwez, chitongijok chend cha kusambish chatambwilay spiritu utumbila chading cha kulejan rusang ruwamp. Chawiy chayilejay antu eza kumutesh anch: ‘Nlel unou uprofet winou wawanyin kal.’

Dichuku dikwau, Yesu waya ku Karung wa Galaliya, kwawiy kwatanay in kwilej anying ading ayibind a ansh. Wayileja anch: ‘Nlondulany, nikukwikadishany ayibind a antu.’ In kwilej inay ading Pita, Andre, Yakobu ni Yohan. Alika kapamp kamwing mudimu wau wa kuta ansh ni amulondula. Awonsu aya mu Galaliya mulong wa kulejan rusang ra Want wa Yehova. Alejana mu ma sinagog, mu sok ni mu mabalibal. Chisak cha antu chayilondula ndond yawonsu yayangau. Rusang piur pa Yesu rapalangana ndond yawonsu kushik ni ku Siriya.

Pa chisu chimwing, Yesu wayinkisha in kwilej end amwing usu wa kwok ayej ni wa kwopat ayilembil. Akwau aya nend pamwing mu mudimu wa kulejan wa musumb ni musumb ni ul ni ul. Amband amwing ashinshamena mud Mariy Mandalen, Yohana, Suzan ni amband akwau avud awanyisha maswir ma Yesu ni ma in kwilej end.

Kupwa kwa kuyifumb in kwilej end, Yesu wayituma mulong wa kuya kulejan. Pasambishau kulejan mu Galaliya, antu avud ikala in kwilej ni ayibatisha. Chawiy, antu akwau avud akimba kwikal in kwilej a Yesu, chad Yesu wayifanikesha ni chir chaswila kal chidau piswimp ni kwangul. Wayileja in kwilej end anch: ‘Mulembilany Yehova chakwel atuma in kwangul mbut avud.’ Watonda kand in kwilej 70 ni wayituma aad aad mulong wa kuya kulejan mu Yudeya mwawonsu. In kwilej end ayileja antu a mitapu yawonsu piur pa Want. Pachirikau in kwilej kuday Yesu, asangara nakash kumulej yom yamanau. Alond anch ap Djabul katwishangap kutukangesh kusal mudimu wa kulejan.

Yesu wikala nich kashinsh anch in kwilej end akez kudandamen kusal mudimu winou wa usey anch wachirik mwiur. Wayileja anch: ‘Lejanany rusang ruwamp pa mangand mawonsu. Yifundishany antu Dizu da Nzamb ni yibatishany.’

Yesu weza pa mangand mulong wa kulejan rusang ruwamp ra Want wa Nzamb. Yehova wamwinkisha Yesu spiritu utumbila mulong wa kusal yilay, yawiy yamekesha yom yikezay kusal Yesu mud Mwant. Yesu woka mayej ma mitapu yin yawonsu. Kwi ndond yawonsu yadingay kuya, ayej ading kwez kuday ndiy mulong ayoka chawiy ndiy wayoka. Amputames amana, atujik a matu atesha, ayibid enda, antu adinga ni ayilembil ayidoshau pakad kufut chom ap chimwing. Ap antu akwata kwau ku masun mend ayerika. Antu amulondula Yesu ndond yawonsu yayangangay. Ap anch wakimba ikala pa ndond yend amwinend, Yesu kayopatap antu.

Chisu chimwing antu amuletina Yesu ku chikumbu chadingay muntu umwing wadinga chibid. Pakwez, mu chikumbu mwading mwizulang kal antu chawiy chading chikasiken kwandam. Chad, antu inay abuza dipan piur pa chikumbu ni amudjibwila muntu winou mukach mwadingay Yesu. Kupwa Yesu wamwela anch: ‘Tumbuk uya.’ Penday muntu winou antu ashimoka nakash.

Chisu chikwau, pandamay Yesu mu ul umwing antu dikum ading ni musong wa kasu imana kulemp ni amuleja anch: ‘Yesu tukwashaku amboku!’ Pa chirung chinicha, antu adinga ni musong wa kasu kafanyinap kuyisejin antu akwau. Yesu wayileja antu inay chakwel aya ku tempel, ap anch Chijil cha Yehova chalejana anch muntu ukweta musong wa mak wafanyina kuya ku tempel ching anch wayerik. Pading payilau antu inay ku tempel, awiy ayerika. Payerikay muntu umwing wadinga ni musong wa kasu, wachirika mulong wa kuya kumujikitish Yesu ni wamushimana Nzamb. Pakach pa antu inay dikum adinga ni musong wa mak, muntu umwing kusu ndiy wamujikitisha Yesu.

Mband umwing wasala mivu 12 mu mayej kadingap nich ruchingej ra kuyerik. Weza kwinyim kwa Yesu mu chisak cha antu ni wakwata ku rizez ra disun da Yesu. Kapamp kamwing mband winou wayerika. Pashikena yom yiney Yesu wipula anch: “Nany wankwata kal ku masun?” Mband wova wom nakash, chawiy chezay kurutu kwa Yesu ni wamuleja uyakin. Yesu wamukasikesha mband winou pamulejay anch: ‘Mwan mband yang kwey ni chisambu.’

Mukurump umwing wa amasalay Yayirus wamwilembila Yesu anch: ‘Ez tuya kwol kwam! Mwanam changadim uyedin nakash.’ Kurutu Yesu ashika ku chikumbu cha Yayirus mwanend mband wading wafang kal. Pashikay Yesu kwinikwa, watana antu avud ezang kal ku chidil. Yesu wayileja antu inay anch: ‘Likany kudil, ulel kwend tul.’ Kupwa, wamukwata mwan winou ku makas ni wamuleja anch: “Mwan, lank!” Mwan winou walanka kapamp kamwing kupwa Yesu wayileja anvaj end anch mwinkishany yakuda. Tong mutapu wiyovau anvaj end!

Kupwa kwa kusal mudimu wend wa kulejan mu muvu umwing ni chikunku Yesu wading ni mupak ujim wafanyinay kukwat. Nany wafanyinay kutond chakwel asala nend pamwing? Nany wafanyinay kufumb chakwel atakela chikumangen cha win Kristu? Chakwel atwisha kukwat mipak yiney, Yesu waswirikena wintakel wa Yehova. Chawiy, chayay ku mukandu amwinend mulong wa kulembil uchuku wa kabuj. Pikwacha, Yesu wayitazuka in kwilej end amwing ni watonda pakach pau atwimbuy 12. Ov, uvurikin majin mau? Majin mau mawiy manam: Pita, Andre, Yakobu, Yohan, Filip, Baritelemi, Tomas, Mateu, Yakobu mwan ikundj wa Alfe, Tadeu, Simon ni Yudas Isakariyot.

Atwimbuy Dikum ni aad awiy aya nend mu weny pamwing. Kupwa kwa kuyifumb, ayituma kuya kulejan ayinau. Yehova wayinkisha usu wa kudosh ayilembil ni wa kwok ayej.

Yesu wayitazuka atwimbuy Dikum ni aad anch arunend ni wayichingejina. Afaris afundishanga anch atwimbuy ading antu akad kwilej ni akad usey. Pakwez, Yesu wayifumba mulong wa kuwanyish mudimu wau. Asutisha chisu chilemp pamwing ni Yesu mu mudimu wa usey nakash, kushik ni kurutu kwa rufu rend ni pavumbukay. Mud mwadingay Yesu, atwimbuy Dikum ni aad pakach pau adokala mu Galaliya. Amwing pakach pau ading aten kal.

Atwimbuy ading antu akad kuwanyin ni arumbukanga. Yisu yimwing alondanga yom pakad kutong ni akwatang mipak yiyimp. Yisu yimwing akanganya kushimpish michim yau. Yisu yikwau kand apwitijanang pa yom yakad usey. Pakwez, ading antu awamp amukata Yehova. Awiy ikala dishin da chikumangen cha win Kristu pachirikay Yesu mwiur.

Kupwa kwa kuyitond atwimbuy 12, Yesu washirika pa mukandu ni waya ndond yading yikumangena yisak ya antu. Antu inay adokala ku Galaliya, ku Yudeya, ku Tir, ku Sidon, ku Siriya ni mutambu ukwau wa Yordan. Eza ni antu amwing ading ayedina ni akwau adinga nau ayilembil. Yesu wayoka antu inay awonsu. Kupwa Yesu washakama pa mukandu ni wasambisha kufundish. Warumburila yom yitufanyidina kusal mulong wa kwikal arund a Nzamb. Tufanyidin kumwijik Yehova ni kumukat. Pakwez, chikasiken kumukat Nzamb anch tuyikatinap antu akwau. Tufanyidin kwikal antu awamp ni kuyikat antu awonsu ap akankuny netu.

Yesu walonda anch: ‘Chifanyidinap kuyikat ching arund ney. Ufanyidin kand kuyikat akankuny ney ni kuyilikishin antu ni muchim wey wawonsu. Anch muntu kanang wakurumbukin ap wamurumbukin, yang mu mutapu uwamp chakwel umwita dilikishin. Yisadina antu akwau mu mutapu ukatina anch niyey akusadin mwamu.’

Yesu wayibabesha kand antu piur pa yom ya kumujimbu. Wayileja anch: ‘Chid cha usey kwikal murund wa Yehova pa ndond pa kwikal ni nfalang jivud. Mwij ukutwish kwiy nfalang jey pakwez, kakutwishap kwiy urund wey wa piswimp ni Yehova. Kangal wiyakamishany piur pa yom ukudanya, ukunanya ap masun ukudjalanya. Talany atujil. Nzamb ukat kuyinkish yisu yawonsu yakuda. Kwinan kukutwishap kuwejin machuku ku mwom wa muntu. Vurikany anch Yehova wij maswir men.’

Antu inay ading kand kal ateshap muntu ulondina mud mwalonday Yesu. Antakel au a marelijon kayifundishap yom ya mutapu mud winou. Mulong wak Yesu wading mulej mujim? Mulong yom yawonsu yafundishangay yadokala kud Yehova.

Yom yawonsu yasalangau Afaris yading kwau mulong wa kuyibaz kud antu. Anch asal chom chimwing chiwamp, chom chinech afanyina kuchijik kud antu akwau. Alembilanga pa jindond jadingau antu avud chakwel ayimana. Afaris alamanga mu manang malembil malemp ni amachirikinanga mu ma sinagog ni mu mabalibal chakwel ayitesha kud antu. Pakwez, antu ashimoka nakash payilejau kud Yesu anch: ‘Kangal walembilany mud Afaris. Atongining anch Nzamb ukuyitesh mulong wa mazu mau mavud malondinau, pakwez kimwawiyap. Malembil mad mambamb pakach pey ni Yehova. Kangal wachirikinany yom yimwing yimwing. Yehova ukatina umulejany yom yakin kamu yida mu michim yen.’

‘Ufanyidinany kulembil mwamu: “Tatukwetu uda mwiur, dijin dey aditumbish. Want wey weza. Rusot rey risadika pansh mud mwiur.”’ Yesu wayileja kand kulembil mulong wa yakuda ya pichuku pichuku, mulong wa dilikishin da yitil yau ni milong yikwau yiyitadina.

Yesu walonda anch: ‘Dandamenany kulembil. Dandamenany kumwit Tatukwen Yehova, yom yiwamp. Nvaj mwawonsu ukat kumwinkish mwanend yom yiwamp. Anch mwan wakwit mukat, ov, ukumwinkish diyal? Anch wit insh, ov, ukumwinkish nnak?’

Kupwa Yesu warumburila malejan makusadin: ‘Anch wijany kupan yom yiwamp kud anen, chawiy Tatukwen Yehova, ukupandakesh kukwinkishany spiritu utumbila. Yom yawonsu ufanyidinanya kusal ufanyidinany kumwit.’ Ulondwiling chiyul cha Yesu? Ufanyidin kulembil piur pa yom ik?

Piswimp ni kusal musambu wa Pasak mu muvu wa 32 C.C., atwimbuy adokala mu mudimu wau wa kulejan. Ading aziyang kal, chawiy Yesu wandama nau mu waat mulong wa kuya ku Betsayida chakwel apima. Pakwez, pashikau piswimp ni ku chikum, Yesu wamana tunan twa antu twading tuyilondwil kwinikwa. Ap anch Yesu wakata anch ashala nau atwimbuy end, pakwez, ndiy wayitazuka antu inay mu mutapu uwamp. Wayoka ni wasambisha kuyifundish. Dichuku da kabuj, Yesu wading uyifundishin yom piur pa Want wa Nzamb. Kushik urel, atwimbuy end eza kumulej anch: ‘Antu ovankal nzal. Yileja aya chakwel akimba yom yikudau.’

Yesu wayakula anch: ‘Kakuyap. Yinkishany yakuda.’ Atwimbuy amwipula anch: ‘Ukimbin tuya tulanda mikat yifanyidinau kuda?’ Filip wakula anch: ‘Ap anch tukwet nfalang jivud tukutwishap kuland mikat yivud yiwanyidina kuyidish antu inay awonsu.’

Yesu wayipula anch: ‘Yakuda ik tukweta?’ Andre wakula anch: ‘Tukwet mikat yitan ni ansh aad. Yikepin nakash.’ Yesu wayileja anch: ‘Nletinany mikat ni ansh.’ Wayileja antu chakwel ashakama pa masuku mu yisak ya antu 50 ni yisak ya antu 100. Yesu wasenda mikat ni ansh kupwa watala mwiur ni walembila. Chawiy, wayinkisha atwimbuy yakuda mulong wa kuyangen antu. Amakundj awonsu 5 000 ni amband pamwing ni an ada ikut. Chad, atwimbuy akumangeja yakuda yawonsu yashalaku, kwikil yakuda yasheshika. Yakuda yiney yakumangejau yizula too mu yimpay 12! Ov, chadingap chilay chishimokishina?

Antu asangara nakash ni akata anch Yesu ikala mwant wau. Pakwez, Yesu wading wij anch Yehova ndiy wija chisu chikezay kumutek kwikal mwant. Chawiy, wayileja yisak ya antu chakwel achirika ni wayileja kand atwimbuy end chakwel aya ushad ukwau wa Karung ka Galaliya. Aya ni waat wau, kupwa Yesu wakandama pa mukandu amwinend. Mulong wak waya amwinend? Mulong wading ukwet kuswir kwa kumulembil Tatukwend. Ap anch wading ukwatiken nakash, pakwez, Yesu witekinang chisu cha kulembil.

Yesu kayokap ching kusu ayej ap kuyivumbul afu, pakwez wading kand ni usu wa kuninetish rinkind ap ruval. Papwishay kulembil ku mukandu, Yesu wamana rinkind mukash ukat kutut mu Karung ka Galaliya. Atwimbuy end ading mu waat padinga ni kutut rinkind winou mukash. Yesu washirika ku mukandu ni wasambisha kwendin pa mem ni waya ku mutambu wadinga waat. Pamanau atwimbuy muntu kanang ukat kwend pa mem, ova wom nakash. Pakwez, Yesu wayileja anch: ‘Yama. Kangal wovany wom.’

Pita walonda anch: ‘Nsalejam yeya kamu, nleja niyam neza kud ey.’ Yesu wamuleja Pita anch: ‘Ez kwey.’ Chawiy, padinga ni kutut rinkind, Pita washirika mu waat ni wasambisha kwendin pa mem chakwel aya kuday Yesu. Padingay ni kusej piswimp ni Yesu, Pita washinshikina nakash pa rinkind wadinga ututina, wova wom nakash ni wasambisha kujiy. Pita watoya anch: ‘Nsalejam mpandisha!’ Yesu wamukwata ku chikas ni wamwela anch: ‘Mulong wak widjidjekina? Ritiy rey rid kwisu?’

Yesu ni Pita andama mu waat, kapamp kamwing rinkind waduta. Ukutwish kutong mutapu wiyovau atwimbuy? Alonda anch: “Chakin kamu ey ud Mwan a Nzamb.”

Kadap kapamp ka kusambish kud Yesu kakuninetish rinkind mukash mud winou. Chisu chikwau, Yesu ni atwimbuy end ading akat kwauk pa karung, chad Yesu wading ulel tul mu waat. Padingay Yesu ulel, rinkind mukwau watuta nakash kand. Mambek makash mabula ku waat ni makimba kujiyish waat. Atwimbuy amulangwisha Yesu ni asambisha kudil anch: ‘Mulej tukimbin kufa! Tukwasha!’ Yesu walanka pa tul ni wamel mambek anch: “Ikuchika kamu kwey zoong!” Pakad kulab rinkind ni mambek madinga ni kutut pa karung maduta. Yesu wayipula atwimbuy end anch: ‘Ritiy ren rid kwisu?’ Atwimbuy anunganijana anch: ‘Muntu winou amuziyidin ap kud rinkind ni mambek.’ Atwimbuy ashikena ku kwijik anch, ang amuchingejin kamu Yesu, kakutwishap kwov wom wa chom ap chimwing.

Afaris amukisa Yesu ni ading akimbin mitapu kanang ya kumukwatin. Alonda anch kafanyidinap kwok antu pa dichuku da Sabat. Pa dichuku da Sabat, Yesu wamumana mputames mwi njil ukat kwit yom. Wayileja in kwilej end anch: ‘El umanany usu wa Nzamb mutapu ukimbina kumukwash muntu winou.’ Yesu wasampa divu ni mat mend, kupwa wamupana mputames winou pa mes mend. Yesu wamuleja anch: ‘Yang ku dijiy da Silowe wowala mu mes.’ Chad mputames waya kwowal ni wamana kapamp ka kusambish mu mwom wend.

Antu ashimoka, ni alonda anch: ‘Ov, kindiyap muntu wading ushicha ku balibal mulong wa kwit, ufaniken kamu nend?’ Muntu winou wakula anch: ‘Navadika mputames!’ Antu amwipul anch: ‘Mutapu ik washikenanga ku kuman?’ Payilejau yom yamushikenang, antu inay amutwala kud Afaris.

Muntu winou wayileja Afaris anch: ‘Yesu wasampang divu ni mat mend, kupwa wampanang pa mes ni wanlejang kuya kowal. Nasalang yom yanlejangay, katat nimen.’ Afaris amuleja anch: ‘Anch Yesu wokanang pa dichuku da Sabat, komb usu wend udokilap kuday Nzamb.’ Pakwez, antu akwau alonda anch: ‘Anch usu wend kiudokilap kud Nzamb, kakutwishap kwok mayej mawonsu.’

Afaris ayitazuka anvaj a muntu winou ni ayipula anch: ‘Mutapu ik washikenangay mwanen kuman?’ Anvaj end ova wom nakash, mulong Afaris alonda anch muntu mwawonsu ukuteka ritiy muday Yesu afanyidin kumwopat mu sinagog. Chawiy alonda anch: ‘Twijap kwetu. Mwipulany amwinend.’ Afaris amwipula muntu winou yipul yivud nakash chawiy muntu winou wayakula anch: ‘Nakulejany kal yom yawonsu yinija. Ov, mulong wak udandamedinanya kwingipul?’ Afaris ajimana nakash ni amubudisha pol.

Yesu waya kumuman muntu winou ni wamwipula anch: ‘Ov, utekin ritiy rey muday Mesiya?’ Muntu winou wakula anch: ‘Nikutwish kutek ritiy muday ndiy ching anch nijik anch muntu winou ud nany.’ Yesu wakula anch: ‘Yama Mesiya.’ Yesu wading muntu wa mutapu ik? Kayokap antu kusu pakwez, wayikwasha kand kwikal ni ritiy.

Yesu wading nau arund nend a piswimp asatu ading ku Betaniya. Arund inay ading Lazar ni ampanyend aad, Mariy ni Mart. Dichuku dimwing, padingay Yesu ushad wa Wit wa Yordan, Mariy ni Mart amutumina mazu anch: ‘Lazar uyedin nakash. Ez amboku pakad kulab!’ Pakwez, Yesu kayap kapamp kamwing. Wasala machuku maad kupwa wayileja in kwilej end anch: ‘Ez tuyany ku Betaniya. Lazar ulel, chawiy niyil chakwel nimulangwisha.’ Atwimbuy amwakula anch: ‘Ang Lazar ulela, chawiy chikumukwasha ayerika.’ Chad Yesu wayileja patok anch: ‘Lazar wafang kal.’

Pashikay Yesu ku Betaniya, Lazar ading amujikang kal pasutin kal machuku manying. Antu avud ezang kumwongoj Mariy ni Mart. Pateshay Mart anch Yesu, ukat kwez, ndiy waya mau chakwel amusankana. Mart wamuleja Yesu anch: “Nsalejam, anch ey wad kunoku ing mpanyam kafilap kwend.” Yesu wamwakula anch: ‘Mpanyey ukuvumbuk. Ov, Mart witiyijin mazu minam?’ Wakula anch: ‘Nitiyijin anch ukuvumbuk pa dichuku da divumbuk.’ Yesu wamwakula anch: “Am yam divumbuk ni mwom”

Chawiy, Mart waya kuday Mariy ni wamuleja anch: ‘Yesu wez kal.’ Mariy waya mau kud Yesu kupwa yisak ya antu yamulondula. Wawa pansh ni wadandamena kudil. Walonda anch: ‘Nsalejam, anch ey wad kunoku ing mpanyam kafilap kwend!’ Yesu wova ushon wovay Mariy, chawiy niyend wasambisha kudil. Antu pamanau anch Yesu ukat kudil, alonda anch: ‘Komb Yesu wading umukatin Lazar.’ Pakwez, antu akwau ashimoka ni alonda anch: ‘Mulong wak kamupandishangap murund nend?’ Yom ik yasalay Yesu?

Yesu waya kwi nzay kwapatau nich diyal dijim nakash. Wapana mbil anch: ‘Doshany diyal.’ Mart wakula anch: ‘Pakwez, wafil pasut kal machuku manying! Mujimbu wend wasambishang kal kuvund.’ Pakwez, antu adosha diyal dined kupwa Yesu walembila anch: ‘Tatuku nikujikitishin mulong winteshin. Nij anch winteshining yisu yawonsu, pakwez, nilondin nich dizu da piur mulong antu inay ijika anch yeya wantuma.’ Kupwa watazuka nich dizu da piur anch: “Lazar budik!” Chom chimwing chishimokishina chasadika: Lazar wabudika mwi nzay ni masun mamuvungau pamujikau. Yesu walonda anch: “Musuburilany ni mulikany aya.”

Antu avud amana chilay chinech ateka ritiy rau muday Yesu. Pakwez antu amwing amana yom yiney aya kuyilej Afaris. Kusambish pinipa, Afaris akimba mutapu wa kumujip Lazar pamwing ni Yesu. Yudas Isakariyot umwing wa pakach pa atwimbuy 12, waya ku ujindj kud Afaris ni wayipula anch: ‘Anch nakulejany mutapu wa kumukwat Yesu ukwinfutan nfalang jinch?’ Itiya kumufut nfalang 30 ja utad wa argent chawiy Yudas wasambisha kukimb mitapu ya kumupan Yesu mu makas ma Afaris.

In Yuda ading kusalang Musambu wa Pasak kapamp kamwing pa muvu pa dichuku da 14 da ngond wa Nisan. Musambu winou wayivurishang mutapu wayikwolau mu uswik mu Idjibit kuday Yehova ni kuyitwal Mwi Ngand ya Kushilamu. Mu muvu wa 33 C.C., Yesu nau atwimbuy end asala Musambu wa Pasak mu kapalikany ka piur ka chikumbu chimwing chading mu Yerusalem. Kurutu apwisha kuda, Yesu wayileja anch: ‘Umwing wa pakach pen ukwimpan.’ Atwimbuy inana nakash ni amwipula Yesu anch: ‘Muntu winou nany?’ Yesu wakula anch: ‘Ud muntu nikwinkisha mukat.’ Kupwa wamwinkisha Yudas Isakariyot chikunku cha mukat. Pakad kulab, Yudas wabudika pol waya.

Chawiy Yesu walembila kupwa waumbwola mukat mu tuyikunku ni wayinkisha atwimbuy end ashinshamena. Walonda anch: ‘Dangany mukat winou. Mukat winou umekeshin mujimbu wam, unikupana mulong wenen.’ Kupwa walembila kand mulong wa nviny ni wayinkisha atwimbuy end. Walonda kand anch: ‘Nangany nviny winou. Nviny winou umekeshin mash mam, makwichika mulong wa kulikishin yitil. Nakukanany kal anch ukwikalany ant pamwing ni yamam mwiur. Salany mwamu mulong wa kwinvurik am.’ In kwilej a Yesu adandamedining kusal mwamu kapamp kamwing pa muvu chisu cha urel. Kukumangan kwinoku akutazukining anch Musambu wa Yakuda ya Urel ya Mwant.

Papwishau kuda, atwimbuy asambisha kutadikijan chakwel ijika nany uda wa usey nakash pakach pau. Pakwez, Yesu wayileja anch: ‘Muntu uda mujim nakash pakach pen ufanyidin kwiman amwinend mud mwanikanch, wakad usey.’

‘En udan arund nam. Nakulejany kal yom yawonsu yanlejay Tatuku kukulejany. Piswimp ap nikuya kud Tatukwam mwiur. Ukushalany chakwel antu akwijik anch udan in kwilej am anch wamekeshany rukat umwing ni mukwau. Ufanyidinany kukatijan umwing ni mukwau mud munakukatanya en.’

Kupwa, Yesu wamulembila Yehova chakwel ayilama in kwilej end awonsu. Wamwita Yehova chakwel ayikwasha asalang mudimu pamwing mu chisambu. Walembila chakwel dijin da Yehova aditumbisha. Chawiy, Yesu ni atwimbuy end awanga miminy mulong wa kumutumbish Yehova kupwa abudika aya. Chisu chading chisejin piswimp cha kumukwat Yesu.

Yesu ni atwimbuy end asutina Mwi Nkurubuk ya Kidron mulong wa kuya ku Mukandu wa Mitond ya Oliv. Wading uchuku ni ngond wading uzazin. Pashikau mu chir cha Getiseman, Yesu wayileja anch: ‘Shakamany pinap ni chishany ku mes.’ Kupwa Yesu waya pakemp pakemp mu chir ni wasa manungin mend pansh. Wading ni ushon nakash pamulembilay Yehova anch: “El rusot rey risadika.” Chawiy, Yehova watuma mwangel mulong wa kuya kumukasikesh Yesu. Pachirikay Yesu, wayitana atwimbuy end asatu alalang kal. Wayileja anch: ‘Lankany! Chinech chidap chisu cha kulal! Chisu chawanyin kal cha kwimpan mu makas ma akankuny nam.’

Pakad kulab Yudas washika pamwing ni yisak ya amasalay ading ni jimpak ja musamun. Yudas wading wij ndond ya kumutanin Yesu mulong ading ni chaku cha kuyang mu chir chinicha. Yudas wading wayilejang kal amasalay chijingidij cha kumumekesh nich Yesu. Waya kapamp kamwing kuday Yesu wamwel anch: ‘Walank Mulej,’ ni wamubwikat. Yesu walonda anch: ‘Yudas wampan kal kusutil ku kwimbwikat?’

Yesu wimana kurutu kwa amasalay inay wayipul anch: “Nany ukimbinanya?” Amwakula anch: “Tumukimbin Yesu wa ku Nazaret.” Kupwa wayakula anch: “Yam unou,” amakundj inay awa pansh. Yesu wayipula kand anch: “Nany ukimbinanya?” Amwakula kand anch: “Tumukimbin Yesu wa ku Nazaret.” Yesu wayakula anch: ‘Nikulejinany anch yam unou. Likany antu inay aya kwau.’

Pamanay Pita yom yiney yashikena, wanona mpak yend ni wamukatula Malikus kashalapol wa mwin kupesh mujim ditu. Pakwez, Yesu wamwoka ditu dend. Kupwa wamuleja Pita anch: ‘Andjik mpak yey mu chindal. Anch warish ni mpak, niyey ukufa kwi mpak.’ Amasalay amukwata Yesu ni amukasa moj ku makas, pinipa atwimbuy achina mau. Amasalay inay amutwala kuday Anas ntakel wa in kupesh. Anas wamwipula Yesu ni wamutwala ku chikumbu cha Mwin Kupesh Mujim Kayifas. Yom ik yayishikena atwimbuy?

Padingay Yesu nau atwimbuy end mu kapalikany ka piur, wayileja anch: ‘Uchuku winou en awonsu ukwinchinany.’ Pita wakula anch: ‘Am kinikukuchinap! Ap anch akwetu awonsu akuchin am nikutwishap kusal mwamu.’ Pakwez, Yesu wamuleja Pita anch: ‘Kurutu kwa chikalambol kutend, ey ukwintun tupamp tusatu.’

Chisu chamukwatau Yesu chakwel amutwala ku chikumbu cha Kayifas, atwimbuy end amwing achina. Pakwez, atwimbuy aad alondula mu yisak ya antu. Pakach pa atwimbuy inay aad Pita nindiy wadingap. Waya mu chipang cha Kayifas ni wading wotin kasu. Kashalapol umwing mband wamumana Pita ukat kwot kasu ni wamwela anch: ‘Nikwij! Wading pamwing ni Yesu!’

Pita wakula anch: ‘Bwat kinadingap nend! Kinijap kwam yom yiulondina!’ Watumbuka waya wiman ku chis cha chipang. Kupwa kashalapol mukwau mband wamumana ni wayileja antu anch: ‘Muntu winou wading mwin kwilej wa Yesu!’ Pita wakula anch: ‘Kinimwijap kwam Yesu!’ Muntu mukwau walonda niyend anch: ‘Niyey ud umwing wa antu inay! Kulond kwey kwoviken kamu anch ud mwin Galaliya mud muday Yesu.’ Pakwez, Pita wachipa anch: ‘Kinimwijap kwam!’

Pa chisu chinicha, chikalambol watenda. Pita wamumana Yesu wakarumuk wamutalaku. Pita wavurika mazu malonday Yesu kupwa wabudika pol ni wasambisha kudil nakash.

Mu chisu chikemp, in Sanedrin ovijana chakwel amufisha nich Yesu padingay mu chikumbu cha Kayifas. Ading akwatang kal mupak wa kumujip Yesu ni ading akimbin diyingishin da kumujipin. Pakwez, katanap chom chiyimp chasalay. Kupwa Kayifas, wamwipula Yesu anch: ‘Ov, ud Mwan a Nzamb?’ Yesu wakula anch: ‘Mwawiy yam kamu. Kayifas walonda anch: Tukwetap kand kuswir kwa uman ukwau. Minam mad masaal!’ Antu awonsu ading mu chipang alonda anch: ‘Muntu winou afanyidin kamu kumujip.’ Asambisha kumuchidin Yesu mat, amukasa chibel pa mes, amubula yinkany ni amwela anch: ‘Anch ud muprofet, bwak muntu wakubula kal!’

Pikwacha amutwala kand Yesu mu chipang cha in Sanedrin ni amwipula kand anch: ‘Ov, ud Mwan a Nzamb?’ Yesu wayakula anch: ‘Yey ulondina mwamu.’ Amufisha nich kupwa amutwala kand mu chipang cha Pons Pilat mwant wa in Rom. Yom ik yikwau yasadika dichuku dikwau? El tujingunina yom yiney mu shapitre mukwau.

In kupesh ajim amutwala Yesu mu chipang cha mwant. Pilat wayipula antu amutwala anch: ‘Mulong ik wasalangay muntu winou?’ Antu amwakula anch: ‘Ulejen anch ud mwant!’ Pilat wamwipula Yesu anch: “Ov, ey ud mwant wa in Yuda?” Yesu wamwakula anch: “Want wam udap wa mangand minam.”

Kupwa Pilat walejana kumutwal Yesu kud Herod, mwant wa mu Galaliya, mulong wa kuman anch kud chom chiyimp chasadinay Yesu. Herod kamanap chom chiyimp chasalay Yesu chawiy wamuchirisha kud Pilat. Kupwa Pilat wayileja antu anch: ‘Ap Herod, ap am tutaninap kwetu chom chiyimp chasadinay muntu winou. Nikimbin nimulikishaku.’ Antu atoya anch: ‘Mujipa! Mujipa!’ Amasalay amubula Yesu nfimbu, amuchidina mat, ni kumubul yinkany. Amudjika chibangul cha miy ku mutu wend ni amusipa anch: ‘Kalombu, Mwant wa in Yuda.’ Pilat wayileja kand antu anch: ‘Nimenap kwam chom chiyimp chasadinay muntu winou.’ Pakwez antu atoya anch: ‘Mupampina pa mutond!’ Chawiy Pilat wayinkishay chakwel aya amujip.

Amutwala Yesu kwi ndond kutazukinau anch Golgota, amupampa pa mutond ni awimika. Yesu walembila anch: ‘Tatuku yilikishina, mulong kijap yom yisadinau.’ Antu asambisha kumuswingish Yesu ni kumwel anch: ‘Anch ud Mwan a Nzamb, dokal pa mutond winou! Ipandisha amwiney.’

Mwin kujipan umwing wamupampau nend wamuleja anch: ‘Wanvurikaku chisu ukweza mu Want wey.’ Yesu wamushilamu anch: ‘Ukwikal niyamam mu Paradis.’ Kupwa kwa midi, kwakurika mididim mu mangand mawonsu mu a saa asatu. Mariy makwend a Yesu wading nau in kwilej amwing ading iminya piswimp ni mutond wamupampinau Yesu. Yesu wamuleja Yohan kumulam Mariy mud makwend.

Kupwa, Yesu walonda anch: “Katat yom yawonsu yawanyin kal!” Wazendjika mutu wend ni wafa. Chisu chinicha, divu dazala nakash. Mu tempel, disun dading daurila ndond Yitumbila ni Yitumbila Nakash dapuka mu yikunku yaad. Mukurump wa amasalay walonda anch: ‘Winou wading chakin kamu Mwan wa Nzamb.’

Pafay Yesu, mpich umwing utazukinau anch Jozef wamwita Pilat chakwel adosha mujimbu wa Yesu pa mutond. Jozef wabwika mujimbu wa Yesu nich disun ni wamupana malash kupwa wamujika mwi nzay yisu. Wateka diyal dijim ku chis cha nzay. In kupesh ajim amuleja Pilat anch: ‘Tukwet wom mulong in kwilej amwing a Yesu akutwish kuya kudosh mujimbu wend ni kulond anch wavumbukang kal.’ Chawiy Pilat wayileja anch: ‘Tekany chijingidij kwi nzay ni kuyilam.’

Kupwa kwa machuku masatu, pamanch nakash, amband amwing aya kwi nzay ni atana diyal dading kwi nzay adidoshang kal. Mwangel wading mukach mwa nzay wayileja amband inay anch: ‘Kangal wovany wom. Yesu amuvumbulang kal. Yangany uyilejany in kwilejend anch akutanijan nend ku Galaliya.’

Mariy Mandalen waya mau wamutan Pita ni Yohan. Wayileja anch: ‘Muntu kanang wasendang kal mujimbu wa Yesu!’ Pita ni Yohan aya mau kwi nzay. Pamanau anch mwi nzay mud mwamwamu achirika ku yikumbu yau.

Pachirikay Mariy kwi nzay, wamana angel aad iminy mwi nzay ni wayileja anch: ‘Nijap kwamutwalangau kal Nsalejam.’ Kupwa wamana muntu, ni watonga anch muntu winou wading mwin kulam jinzay, chawiy chamwelay anch: ‘Nilemb amboku, nlejaku kwisu watwalangana kal mujimbu wa Yesu.’ Pakwez palonday muntu anch ‘Mariy,’ Mariy wijika anch muntu winou wading Yesu. Watoya anch: ‘Mulej!’ ni waseja kuday ndiy. Yesu wamuleja anch: ‘Yang ni yileja in kwilejam anch waman kal.’ Kapamp kamwing, Mariy waya mau wayitan in kwilej ni wayilej anch namuman kal Yesu.

Kupwa dichuku dawiy dinida, in kwilej aad ading adokil ku Yerusalem ayil ku Emaus. Muntu umwing wayitana mwi njil ni wayipula piur pa yom yading yambambinau. Alonda anch: ‘Ov, kand kal uteshap? Machuku masatu masutina am, in kupesh ajim amujipin Yesu. Pakwez katat amband amwing alondin anch Yesu ud mwom!’ Muntu winou wayipula anch: ‘En uyitiyijinanyap kwen aprofet? Amwakula anch Kristu wafanyina kufa ni kupwa wavumbuk.’ Ndiy wadandamena kuyirumburil Mifund. Pashikau ku Emaus, in kwilej amuleja muntu winou kushakam nau. Kurutu kwa kuda, muntu winou walembila, chawiy, ijika kapamp kamwing anch wading Yesu. Kupwa wayishadika.

In kwilej aad achirika mau ku Yerusalem mu chikumbu mwadingau atwimbuy ni ayileja yom yamanau kal. Padingau mukach mwa chikumbu, Yesu wayibudikina awonsu. Chakusambish, atwimbuy kitiyijap anch wading Yesu. Kupwa wayileja anch: ‘Talany bil makas mam; nkwatanyaku. Mulong achifunda anch Kristu ukez kavumbuk mukach mwa afu.’

Chisu chikemp chasuta kupwa kwa Yesu kuyimeken atwimbuy, Pita wakwata mupak wa kuya ku Karung ka Galaliya kuta ansh. Tomas, Yakobu, Yohan, ni in kwilej akwau aya nend. Ata ansh uchuku wa kabuj pakwez kakwatap insh ap umwing.

Kushik pamanch, amana muntu wimanang kal ku chikum. Wayipula antu ading atila ansh anch: ‘Wakwatanganap kal insh?’ Amuleja anch: “Bwat!” Muntu winou walonda anch: “Djubwilany wand ku chikas cha katatuku cha waat.” Pasalau mwamu, wand wizula ni ansh avud ni katwishap kuutek mu waat. Yohan wijika anch muntu winou wading Yesu ni walonda anch: “Komb, Nsalejetu!” Kapamp kamwing, Pita wamatikina mu mem ni wasambisha kwisay chakwel aya ku chikum. In kwilej akwau alondula mu waat.

Pashikau ku chikum, amana muntu winou ukat kwosh mukat ni insh. Yesu wayileja kulet ansh mulong awejin pa yakuda yiney. Kupwa walonda anch: ‘Ezany udany.’

Papwishau kuda, Yesu wamwipula Pita anch: ‘Winkatin nakash kusutamu kuta ansh?’ Pita wamwakula anch: ‘Mwaning Nsalejam, wij anch nikukatin.’ Yesu wamuleja anch: ‘Dish amikoku am.’ Yesu wamwipula kand anch: ‘Pita winkatin?’ Pita wakula anch: ‘Nsalejam wij anch nikukatin.’ Yesu wamuleja anch: “Lam amikoku am akemp.” Yesu wamwipula kapamp ka kasatu. Pita wova ushon nakash, ni walonda anch: ‘Nsalejam, ey wij yom yawonsu. Wij anch nikukatin.’ Yesu wamwela anch: “Dish amikoku am akemp.” Kupwa wamuleja Pita anch: ‘Dandamen kwinlondul.’

Yesu wamanijana nau in kwile jend mu Galaliya. Wayinkisha mbil ya usey nakash anch: ‘Yangany kud antu a ngand yawonsu, yikadishany in kwilejam. Yifundishany yom yinakufundishanya ni yibatishany.’ Kupwa wayikana anch: ‘Ijikany anch nikwikal niyenen chisu chawonsu.’

Mu machuku 40 kupwa kwa kuvumbuk kwend, Yesu wayimekena yitot ya in kwilej end mu Galaliya ni mu Yerusalem. Wayifundisha malejan ma usey ni wasala yilay yivud. Kupwa Yesu watanijana nau atwimbuy end kapamp kansuden ku Mukandu wa Mitond ya Oliv. Wayela anch: ‘Kangal wadokalany mu Yerusalem. Dandamenany kuchingel yom yakanay Tatuku.’

Atwimbuy kovap kurumburik kwa yom yalonday Yesu. Amwipula anch: ‘Ukimbin katat kwikal Mwant wa Isarel?’ Yesu wakula anch: ‘Chawiyap chisu chatekay Yehova mulong wamam kwikal Mwant. Piswimp ap ukutambulany usu kusutin spiritu utumbila ni ukwikalany atuman am. Yangany ulejanany mu Yerusalem, Yudeya, Samariya, djat ni kusudedina mangand.’

Kupwa amuzambula Yesu mu madj ni madj mamubwika. In kwilej end adandamena kutal mwiur, pakwez wading wayang kal.

In kwilej adokala ku Mukandu wa Mitond ya Oliv ni aya ku Yerusalem. Akumanganang yisu yivud mu kapalikany ka piur mulong wa kulembil. Ading achingedin Yesu ayinkish mbil jikwau.