Piswimp ni musumb wa Babel kwading musumb umwing utazukinau anch Ur, mwinimwa mwading antu ifukwilang anzamb akwau pa ndond pa kumwifukwil Yehova. Pakwez mwading muntu umwing wamwifukwilang Yehova. Dijin dend Aburaham.

Yehova wamuleja Aburaham anch: ‘Dokal mwi ngand yey, ni kud anamakwey, uya mwi ngand yinikukuleja.’ Nzamb wamukana anch: ‘Ukez kwikal muchid ujim, ni nikez kayisadin antu awonsu a pa mangand yom yiwamp mulong weyey.’

Aburaham kijikap ndond yamulejau kuya kushakam kud Yehova, pakwez wamuchingejina Yehova. Chawiy Aburaham, Sar mukajend, tatukwend Tera, ni mwipwend Lot akasa mafund mau ni aziyina ni aya mu weny ulemp.

Aburaham wading ni mivu 75 chisu chashikay ni dijuku dend mwi ngand yayikanau kud Yehova. Ngand yiney ayitazuka anch ngand ya Kanaan. Kwinikwa Nzamb wambamba ni Aburaham ni wamukana anch: ‘Ngand yiney yawonsu umena ey nikez kuyipan kud aney.’ Pakwez, Aburaham ni Sar ading amapal ni kadingap afanyidina kuval an. Chawiy, mutapu ik Yehova wawanyishay mazu minam?

Aburaham ni Sar asala mivu yivud mu uruw. Asha chikumbu chau chiwamp mu Ur mulong wa kuya kushakam mu mwinkand. Pakwez, Sar kinanap, mulong wamuchingejina Yehova.

Sar wakata nakash kwikal ni mwan, chawiy chamulejay Aburaham anch: ‘Anch waval ni mwilomb wam, mwan winou ukwikal mud mwanam.’ Kupwa, Hagar wavala mwan ikundj. Dijin dend dading Isamayel.

Mivu yivud yasuta, chisu chawanyishay Aburaham mivu 99 ni Sar wawanyisha mivu 89, ayendina kud angendj asatu. Aburaham wayileja angendj inay anch eza apimaku mu urel ni adaku yakuda. Ov, angendj inay ading anany? Ading angel! Amuleja Aburaham anch: ‘Muvu ukwezap ou, mu chisu chinech, ey ni mukajey ukuvalany mwan ikundj.’ Sar wading uteshin padingay mu mwinkand. Wasipaku ni walondang anch: ‘Chakin kamu nikutwish kwikal ni mwan ing munida ipal omu?’

Kupwa kwa muvu winiwa, Sar wavala mwan ikundj, mud kamu mwamukanau kud mwangel wa Yehova. Aburaham wamupila anch Izak, dijin dirumburikina anch “Masip.”

Pawanyishay Izak mivu yitan, Sar wamumana Isamayel anch wading kumuswingish mwanend. Wakata kumuchidij mwanend ikundj, chawiy wamwita Aburaham chakwel amwopata Hagar ni Isamayel. Chakusambish, Aburaham kasangerap kusal mwamu. Pakwez, Yehova wamuleja Aburaham anch: ‘Tesh kwey yom yawonsu yikukulejau kud Sar. Nikez kumulam Isamayel. Pakwez, nikuwanyish yom yawonsu nakana kusutil Izak.’

Lot wading ushich pamwing ni mantwend Aburaham, mwi ngand ya Kanaan. Pakemp pakemp, annam a Aburaham ni a Lot avulijana ni kwadingap ndond ya kuyilamin. Aburaham wamuleja Lot anch: ‘Tukutwishap kand kushakam pamwing machuku mavud. Tond mutambu ukatina kuya am ni kuya mutambu ukwau.’ Aburaham kadingap ni choy, kimwawiyap?

Lot wamana mutambu uwamp mwi ngand piswimp ni musumb wa Sodom. Yading ndond yikweta atuwit ni divu dading difukin kamu. Chawiy watonda ndond yiniya ni waya ni dijuku dend kushakam kwinikwa.

Antu a mu Sodom ni antu adinga piswimp ni musumb wa Gomor ading antu ayimp nakash. Antu inay ading ni yisal yiyimp chawiy chakwatay Yehova mupak wa kushesh misumb yiney. Pakwez Nzamb wakata kumupandish Lot ni dijuku dend, chawiy chatumay angel aad mulong wa kuyibabesh anch: ‘Swakalanyaku! Dokalany mu musumb! Yehova ukimbin kuushesh.’

Lot kadokalap kapamp kamwing. Walabijoka. Chawiy, angel amukwata Lot, mukajend, an aad ayangadim ku makas ni ayibudisha mu musumb pakad kulab ni alondang anch: ‘Tuyan mau! Pandishany mwom yen! Kangal wakarumukany kutal kwinyim, anch watalany kwinyim, ukufany!’

Pashikau mu musumb wa Zowar, chad Yehova watuma kasu ni sufre mud ruval mu Sodom ni Gomor. Misumb yiney yawonsu yaad yatema shitit. Patalay kwinyim, mband wa Lot wamubwambwila Yehova, chawiy wikala dinguj da mung! Pakwez, Lot ni anend amband apanda mulong amuziyina Yehova. Afanyina kwov ushon mulong mband wa Lot wabwambwila. Pakwez ova musangar mulong alondula mbil ja Yehova.

Aburaham wamufundisha mwanend Izak kumukat Yehova ni kutek ruchingej rend rawonsu mu kushilamu kwa Yehova. Pakwez padingay Izak ni mivu piswimp 25, Yehova wamwita Aburaham kusal chom chimwing chading chikasikena nakash kuchisal. Chading chom ik?

Nzamb wamuleja Aburaham anch: ‘Musenda mwaney ikundj kapokal ukatila, ndiy kamu Izak, chad yang nend ku mukandu mwi ngand ya Moriya.’ Aburaham kijikap mulong wak Yehova wamuleja kusal mwamu. Pakwez wadandamena kumuziyin Yehova.

Mu kwacha pamanch, Aburaham wamusenda Izak ni atushalapol end aad ni waya nau mu ul wa Moriya. Kupwa kwa machuku masatu ma weny, ayimena mikandu kulemp. Aburaham wayileja atushalapol end kuyichingel chisu chiyilay ndiy ni Izak kupesh mulambu. Aburaham wamuleja Izak kusend nkuny, ni Aburaham wasenda mpak. Izak wamwipula tatukwend anch: ‘Ing nnam tukupesha ud kwisu?’ Aburaham wakula anch: ‘Mwanam, Yehova amwinend ukumumekesh.’

Pashikau ku mukandu, atunga chintamb. Kupwa, Aburaham wamukasa Izak ku makas ni ku mend ni wamuteka pa chintamb.

Aburaham wanona mpak. Pa chisu chinicha, mwangel wa Yehova wamutazuka kudokal mwiur anch: ‘Aburaham kangal wamusal mwaney chom chiyimp! Katat nijik kal anch komb ey ukwet ritiy muday Nzamb, mulong kiwankishangap mwaney kapokal.’ Kupwa Aburaham wamana ikwal a mukoku wikasikasang kal miseng mu chifukis. Wamusuburila Izak kapamp kamwing ni wapesha ikwal amukoku pa ndond ya Izak.

Kudokal dichuku dinida, Yehova wasambisha kumutazuk Aburaham anch murunend. Wij mulong wak? Mulong Aburaham wasala kamu mud mwamulejau kusal kud Yehova, ap anch kadingap kija mulong wak Yehova wamuleja kusal mwamu.

Yehova wachirikinamu kand kukan kwend kud Aburaham anch: ‘Nikez kukuyukish, nikez kuvudish aney ap mbut jey.’ Chinech chading chirumburikin anch Yehova ukez kayukish antu awonsu awamp kusutin dijuku da Aburaham.