Yesu wasala yilay yivud padingay ni kusal mudimu wend wa kulejan mu Galalia. Pakwez, ndiy walonda anch: “Chifanyidin am [kulejan] rusangu ruwamp ra Want wa Nzamb mu mal makwau kand,” Yesu wading wij anch kafanyinap ching kulejan mu Galalia. Chawiy, ndiy waya kand ‘kulejan mu masinagog ma mu Yudeya’. (Luka 4:43, 44) Chading chisu chiwamp kudi ndiy kuya kwinikwa mulong chading chirung cha kapepil, ni musambu wasalangau mu Yerusalem waseja piswimp.

Anch twafanikesh yom yifundinau mu ma Evanjil piur pa mudimu wasalay Yesu mu Galalia tukuman anch Yesu kasalap yom yivud mu Yudeya. Ap anch antu a mu Yudeya kitiyijap nawamp malejan ma Yesu, pakwez chinech chamukangeshap kudandamen kulejan nich mushiku ni kusal yom yiwamp ndond yadingay.

Pa chisu chinicha Yesu waya mwi ngand ya Yudeya mu musumb wa Yerusalem mulong wa kusal musambu wa Pasak mu muvu wa 31 C.C. Piswimp ni Chis chandaminangau Amikoku kwading dijiy dikweta manguj majim diatazukau anch Betizata. Ayej, amputames ni ayibid avud ezang ku dijiy dined. Mulong wak ezang ku dijiy dined? Mulong antu avud itiyija anch akutwish kuyerik anch andam mu dijiy dined pakuvunduka mem.

Katat pa dichuku dia Sabat, Yesu wamumana muntu umwing wadinga muyej mu mivu 38 wadinga ku dijiy dinidia. Yesu wamwipula muntu winou anch: “Ov, ey usotil kuyerik?” Muyej wamwakula anch: “Mwant, kinikwetap muntu mwin kwingandjik mu dijiy pimakata kuvunduk mem. Yisu yawonsu pinikata kupakish kwandam mu dijiy, muyej mukwau ukat kusambelaku kwandam.”—Yohan 5:6, 7.

Yesu walonda chom chimwing chamushimokisha muntu winou nau antu akwau achitesha anch: “Tumbuk, non [ulal] wey, yang ni kwend.” (Yohan 5:8) Chawiy chom chasalay kamu muntu winou. Kupwa kwa kumok muntu winou, wanona ulal wend ni waya!

Pa ndond pa kusangar piur pa yom yasadika, In Yuda amumana muntu winou ni asambisha kumurumburish anch: ‘Yijil yetu yilondil anch kiukutwishap kusend ulal pa dichuku dia Sabat.’ Muntu winou wayakula anch: “Muntu wangokanga, ndiy wanlejanga anch: ‘Non [ulal] wey, yang ni kwend.’” (Yohan 5:10, 11) In Yuda inay asambisha kulond nayimp piur pa muntu wokanang pa dichuku dia Sabat.

Chad awiy amwipula mulong wa kwijik anch: “Ov, muntu ik winawa wakwelang anch ‘Send ulal wey uya?’” Mulong wak wamwipulau muntu winou mwamu? Mulong Yesu “wadiokalap mulong wa chisak cha antu chadinga pa ndond yiniya,” ni muntu winou wokau kijikap dijin dia Yesu. (Yohan 5:12, 13, TMK) Pakwez, muntu winou watanijana kand ni Yesu kapamp kakwau. Patanijanay muntu winou ni Yesu ku tempel chawiy chajinguninay patok nany wamwoka ku dijiy.

Muntu winou wokau waya kudi In Yuda amwipula mulong wa kwijik nany wamwokina. Wayileja anch Yesu ndiy wamwokina. In Yuda pijikau mwamu aya kumukimb Yesu. Ov, in Yuda inay aya chakin kamu kumutal Yesu mulong wa kwijik yom ik yamukwasha kusal yom yiney yishimokishena? Bwat. Pakwez, aya mulong wa kutan diyingish dia kumufish nich Yesu anch wokanang pa dichuku dia Sabat. Chawiy asambisha kumuzengol!

Pamufishau nich Yesu kudi in Yuda amwing anch wajipa kal chijil cha Sabat mulong wamwoka muntu umwing, chawiy Yesu wayakula anch: “Tatukwam uchikat kusal mudimu ni katat, niyam nikat [kudandamen] kusal mudimu.”—Yohan 5:17, TMK.

Chakin kamu, Yesu kasalap chom chajidikau mu chijil cha Nzamb piur pa Sabat. Mudimu wend wa kulejan ni wa kwokan wasalay wading mulong wa kwimburij yom yiwamp yasalay Nzamb. Chawiy, chadandamenay Yesu kusal yom yiwamp dichuku diawonsu. Pakwez, mutapu wayakulay in kumufish nich wayovisha ujim nakash chawiy chakimbau kumujip Yesu. Mulong wak wasalau mwamu?

Kudioshaku chitongijok chau chiyimp chadingau nich anch Yesu wajipa Sabat mulong wamwoka muntu, awiy ajimana nakash kand palonday Yesu anch udi Mwan a Nzamb. Awiy atesha mazu minam anch mading masaal pateshau anch Nzamb udi Tatukwend, mulong chisu chalonday Yesu anch Yehova ndiy Tatukwend chimeken mudi anch ndiy wimekesha kwikal wisikena ni Nzamb. Pakwez, Yesu wayakula pakad wom pa mulong utadina urund wa pakampwil ukwetay ni Nzamb. Ndiy walonda anch: “Tatuku umukatin Mwan, ukat kumulej yom yawonsu yikata kusalay amwinend.”—Yohan 5:20, TMK.

Mulong Tatuku ndiy ukata Kupan Mwom, ndiy wamekesha mwamu pakur payinkishay antu amwing ukash wa kuvumbul nich antu afa. Yesu wadandamena kulond anch: “Mudi Tatuku chikat kuyilangwishay antu afila ni kuyikadish aom, chawiy chimwing ni Mwanend ukat kupan mwom kudi antu mudi musotilay.” (Yohan 5:21) Ruchingej mud ik ra mu machuku ma kurutu ridiokila ku mazu minam! Ap katat Mwan udandamedin kuvumbul antu mu mutapu wa muspiritu. Chawiy Yesu walonda kand anch: “Nakulejany chakin, muntu mwawonsu ukata kutesh mazu mam ni kumaziyil, chad wamwitiyij Nzamb wantuma am, ukwet mwom wa chikupu. Ndiy kakez kumurumburishap, pakwez wadiokal kal mu rufu, [wikal kal] mwom.”—Yohan 5:24.

Kwikil ndond ap yimwing yafundau yilejena anch antu awonsu avumbulau kudi Yesu ikala aom chikupu, pakwez wayileja in kumufish nich anch divumbuk dia mutapu winou dikez kusadik. Ndiy walonda anch: ‘Chisu chikat kwez chikez kuteshau afu awonsu adia mwi nzay ya chivurikish dizu diend, chad akez kuvumbuk kwikal kand aom.’—Yohan 5:28, 29.

Chikalap nchik chisend chipandakena kujimb chikwetay Yesu, ndiy wamekesha patok anch ading amutakedin kudi Nzamb palonday anch: “Kinikutwishap kusal chom ku ulabu wamam amwinam. . . mulong kinikatilap kusal mudi munisotila, pakwez nisadil mudi musotilay ndiy wantuma.” (Yohan 5:30) Pakwez, Yesu wamekesha chisend cha usey kukwatijan ni chitongijok cha Nzamb, pakwez kasalap mwamu kudi antu awonsu. Chikwau kand, antu amufisha nich Yesu imenap ayinau yom yiney. Yesu wayivurisha anch: “En watumanya aruu en kudi Yohan [Mubatish], ndiy walejana uman wakin mulong wamam.”—Yohan 5:33.

Antu amufisha nich Yesu atesha yom yimwing piur pend mu mivu yaad kurutu kwa kuvadik kwend, mulong Yohan wayileja antakel a chirelijon a in Yuda piur pa kwez kwa Yesu—Yohan wapwisha ni mazu am “Muprofet” ni “Kristu.” (Yohan 1:20-25, TMK) Payivurishay in kumufish nich chisu chadingay Yohan mu rukan, Yesu walonda anch: “Mu chisu chikemp en wasangaranya nakash mulong witiyanya kutesh mazu mend mading mudi chimunyik.” (Yohan 5:35) Chakin kamu, Yesu wamekesha uman ujim kusutamu wa Yohan Mubatish.

Yesu walonda anch: “Yom yinisadila [kuwejinaku yilay ya kwokan yasalay] yimekeshin anch, Tatuku [ndiy] wantuma.” Chikwau kand Yesu wadandamena kulond anch: “Tatuku wantuma am ukat kulejan kand uman wamam.” (Yohan 5:36, 37) Chilakej, Nzamb wamekesha uman wa Yesu patok chisu chamubatishau Yesu.—Mateu 3:17.

Chakin kamu, antu amufisha nich Yesu kadingap nich diyingishin ap dimwing dia kumulik. Chikwau kand, Maverse madingau ni kutang mamekesha kand uman wa Yesu. Yesu wayakula kapamp ka nsudien anch: “Anch en wamwitiyanya Moses chakin, ing wangitiyanya kand niyam, mulong Moses wafunda mulong wamam. Pakwez anch en walikany kwitiy yom yafunday, ing ukwitiyany nchik mazu minilondila am?”—Yohon 5:46, 47.

Yesu nau in kwilej ayil kwinkaj kwa Galalia. Chading chirung cha ruval ni tidiku wading waswil kal mu yir. In kwilej ova nzal chawiy chapurilau tidiku mulong wa kudia. Pakwez, asala mwamu pa dichuku dia Sabat ni Afaris amana yom yasalau.

Vurik anch, in Yuda amwing adinga mu Yerusalem akimba kumujip Yesu anch mulong wajipa chijil cha Sabat. Katat, Afaris aman kal kand diyingishin dikwau dia kuyifish nich in kwilej a Yesu pa yom yasalau kal. Afaris alonda anch: ‘Tal bil, in kwilej ey akat kusal chom chilikishinau mu chijil cha Sabat!’—Mateu 12:2.

Afaris alonda anch kupuril tidiku ni kumunyikis mu makas mulong wa kumudia chading mudi kwangul ni kumutwa. (Kubudik 34:21) Mutapu wau uyimp wa kurumburil piur pa kusal mudimu pa dichuku dia Sabat kwasala anch dichuku dined dikala mudi diyimp nakash, pakwez dichuku dined diafanyina kwikal dichuku dia musangar ni dia kukasikeshijan muspiritu. Yesu wayileja patok mulong wa yitongijok yau yiyimp yadingau nich pasadinay yilakej yamekesha anch Yehova Nzamb kasalap anch chijil Chend cha Sabat achisadina mu mutapu uyimp mudi winou.

Chilakej cha kusambish chapanay Yesu chading cha David pamwing ni atushalapol end. Povau nzal, awiy imana mu mwinkand ni adia mabot ma patok. Mabot minam mading mayen ma kumulambul Yehova ni amaswinkesha nich mabot masu madingau kudia ching kudi in kupesh. Pakwez, kukwatijan nich mwikadil winou, David nau atushalapol end kayifishap nich anch mulong adia mabot minam.—In Levi 24:5-9; 1 Samwel 21:1-6.

Mu chilakej cha kaad, Yesu walonda anch: ‘Ov, kand kal utanganyap mu Yijil anch machuku ma Sabat in kupesh ajipanga chijil cha Sabat mu tempel, pakwez kafap nich?’ Yesu wakimba kulond anch pa dichuku dia Sabat in kupesh ajipanga annam mulong wa kupesh ni asalang kand midimu yikwau mu tempel. Kupwa, Yesu walonda anch: ‘Chawiy nakulejany anch pinap padi chom chijim kupandakanamu tempel winou.’—Mateu 12:5, 6; Kuchind Michid 28:9.

Yesu wasadina kand Bibil mulong wa kuyilej patok anch: “Anch en wijany kurumburik kwa mazu minam anch, ‘Am nikatil antu akweta riy, kupandakanamu yakupesh ya annam,’ ing kiukufishanyap nich antu akad mulong.” Kupwa wayileja kand anch: “Mulong Mwan a muntu udi Mwant wa [Sabat].” Yesu wisambina piur pa kwez kwa Want wend ukuleta chisambu ni ukuyikela mu mivu kanan.—Mateu 12:7, 8; Ozey 6:6.

Antu adandamedin kuman mar mu mivu yivud mu uswik wa Satan, mulong chisum ni njit yipandiken nakash. Kushalijan kujim mud ik kukwikalaku pa dichuku dia Sabat mujim ukuyikelau kudi Kristu, ukuleta chisu chilemp tuswirikedina cha kwiswedish!

Dichuku dikwau dia Sabat, Yesu waya mu sinagog, pamwing ap wading wa mu Galalia. Mwinimwa mwawiy mwatanay muntu umwing wading uyedina kalip ku chikas cha katatuku. (Luka 6:6) Alej a yijil nau Afaris amushinshikina kamu nawamp Yesu. Mulong wak? Awiy amekesha patok yom yading yitonginau pamwipulau anch: ‘Ov, chitiyikin kwokan pa dichuku dia Sabat?’—Mateu 12:10.

Antakel a chirelijon in Yuda ading kutong anch chitiyikin kumwok muntu pa dichuku dia Sabat ching anch mwom wend udi mu ubaj. Chilakej, pa dichuku dia Sabat chadingap chitiyikin kumutek sima muntu wabukukang difup ap kumukas bandaj muntu waturumukang mulong awiy alonda anch mwom wa muntu winou wadingap mu ubaj. Chimeken patok anch alej a yijil nau Afaris kamwipulap Yesu mulong wa kumekesh runeng rau piur muntu winou wading uyedina. Pakwez, awiy ading akimbin diyingishin dia kumufish nich Yesu.

Pakwez, Yesu wading wij nawamp yitongijok yau yiyimp. Wading wij kand anch antu inay ading ni yitongijok yiyimp nakash yakad kukwatijan ni yom yafundau mu Bibil pa mulong utadina kujip chijil chijidikina kusal mudimu pa dichuku dia Sabat. (Kubudik 20:8-10) Kadiap kapamp ka kusambish kudi Yesu ka kurish nich milong yiney piur pa midimu yend yiwamp. Chawiy, Yesu wasala chom chimwing chela kulet kupwitijan pakach pau pamulejay muyej ukweta kalip anch: “Tumbuk, sut kurutu.”—Marko 3:3.

Yesu wakarumuka wayital alej ayijil nau Afaris kupwa walonda anch: “Anch muntu umwing wa pakach penen ukwet mukoku wawil mu dibuku dilemp pa dichuku dia [Sabat], ov, ndiy kakutwishap kumudioshamu?” (Mateu 12:11) Mulong mukoku amulandishang nfalang jivud, chawiy awiy kafanyinap kumusha mukoku winou mu dibuku kushik ni pa kupwila Sabat, mulong anch mukoku winou wafa muntu ukutwish kushadish nfalang jend. Chawiy, Bibil ulondin anch: “Mwin kutentam ukat kulam mom ya yivam yend.”—Jinswir 12:10.

Pasadinay chilakej cha mutapu winou, Yesu wadandamena kulond anch: ‘Muntu ukwet usey ujim nakash kupandakanamu mukoku! Chawiy chijil chetu chitiyijin kusal yom yiwamp pa dichuku dia Sabat.’ (Mateu 12:12) Chakin kamu, Yesu kajipap chijil cha Sabat pamwokay muyej winou wa kalip. Antakel a chirelijon akanganya kamu kutadik mazu minam movikena mamekeshina ranaken. Chawiy akanganya kamu chom cha kulond.

Pajimanay mulong wa yitongijok yau ya usup yadingau nich Yesu wayitala. Kupwa wamuleja muyej anch: “Onan chikas chey.” (Mateu 12:13) Ponanay muyej winou chisak chikweta kalip chikas chend chonika. Chom chinech chamusangaresha nakash muyej wayerika, pakwez mutapu ik wovau antu akimba diyingishin dia kumukwatin Yesu?

Pa ndond pa kusangar mulong chikas cha muyej wadinga ni kalip chonik kal, Afaris aya kapamp kamwing kukwat mpung “nau in chisak cha Herod, awonsu pamwing amupungana Yesu mulong wa kumujip.” (Marko 3:6) Mu chisak chinech cha in mafef mwadinga kand antakel a chirelijon atazukau anch Asadus. Chisu chawonsu, Asadus kwovijanangap nau Afaris, pakwez pa chisu chinech abombakana pamwing mulong wa kumujip Yesu.