Mu Idjibit, dijuku da Yakob adijika mud in Isarel. Kupwa kwa rufu ra Yakob ni ra Jozef, mwadila Farao musu wasambisha kuyikel. Wading ni wom anch in Isarel akwikal ni usu nakash kusutamu in Idjibit. Chawiy Farao winou wayikadisha in Isarel asuk. Wayibudishang matafad ku usu ni kuyisadish midimu yikash ku yir. Ap anch in Idjibit ayisadishang in Isarel midimu ku usu, pakwez in Isarel adandamena kuvul nakash. Mulong Farao kadingap kakatina anch adandamena kuvul, chawiy chapanay mbil anch mwan ikundj ukuvadika wa in Isarel chifanyidin kumujip. Ukutwish kutong mutapu wovau in Isarel wom?

Mband mwin Isarel utazukinau anch Jokebed wavala mwan ikundj muwamp. Mulong wa kumuking, wamuteka mu musans ni wamujindjika mu disaz da Wit wa Nil. Mpanyend Miriam, wading ushich piswimp ni mwan winou chakwel atala yom yikusadika.

Mwan mband wa Farao weza mulong wa kowal mem ku wit ni wamana musans. Mukach mwa musans mwading mwan wadil lel, ni wamovila riy nakash. Miriam wamwipula anch: ‘Ov, nikutwish kuya kukimb mband ukutwisha kukwamwishinangay mwan winou?’ Pakulay mwan mband wa Farao anch yang, Miriam wachirika mau kumulej makwend a mwan, Jokebed. Mwan mband wa Farao wamuleja anch: ‘Musenda mwan winou, sambish kwingamwishinay, am nikukufut.’

Papamay mwan winou, Jokebed wamutwala kud mwan mband wa Farao ni wamupila anch Moses ni wamulila mud mwanend. Moses wapama mud mwan a mwant ni wading ni chom chawonsu chakimbangay. Pakwez Moses kamuvuramenap Yehova. Wading wij anch wading mwin Isarel, kadingap mwin Idjibit. Ni watonda kumusadin Yehova.

Pawanyishay mivu 40, Moses wakwata mupak wa kuyikwash antu end. Pamanay mwin Idjibit ukat kumubul musuk mwin Isarel, Moses wamubula mwin Idjibit nakash ni wamujipa. Moses wajindjika mujimbu wa muntu winou mu usukuril. Pajinguninay Farao yom yiney, wakimba kumujip Moses. Pakwez Moses wachinina mwi ngand ya Madian. Yehova wamulama kwinikwa.

Moses washakama mu Madian mu mivu 40. Watana ni wavala an. Dichuku dimwing wading ulamin amikoku piswimp ni Mukandu wa Sinai, wamana chom chimwing chamushimokisha. Chifukis chazuzuta kasu, pakwez chatemangap! Pasejay Moses piswimp mulong wa kuchital, watesha dizu dadokal mu chifukis dalond anch: ‘Moses! Kangal kusej piswimp. Djol yisapat yey mulong wiminy pa ndond yitumbila.’ Wading Yehova walondang kusutin mwangel.

Moses wova wom, ni wabwika pa mes. Dizu dalonda anch: ‘Nimen mar mamenau in Isarel. Nikuyipandish ku mar mayimeshinau kud in Idjibit ni nikuyitwal mwi ngand yiwamp. Ey yey muntu ukuyitakela antu am chakwel adokala mu Idjibit.’ Utonginap anch yom yiney yafanyina kumushimokish Moses?

Moses wakula anch: ‘Yom ik nikulonda anch antu angipul ang nany wintumina?’ Nzamb wamwakula anch: ‘Ukuyilej anch Yehova, Nzamb wa Aburaham, Nzamb wa Izak, ni Nzamb wa Yakob ndiy wantumang.’ Kupwa Moses walonda anch: ‘Chikwikal nchik anch antu kanteshinap?’ Yehova wamuleja Moses patok anch Ukumukwash. Wamuleja Moses kudjibul mukombu wend pansh. Padjibulay mukombu winou wakarumuka wikal nnak! Moses pamukwatay nnak winou ku mukil, wakarumuka wikal kand mukombu. Yehova wamuleja anch: ‘Anch wasal chilay chinech, chawiy chikumekesha anch yama nakutumang.’

Moses walonda anch: ‘Am kwam nilondiningap nawamp.’ Yehova washilamu anch: ‘Nikukulej yom ufanyidina kulond, ni nikukutumin mwanamakwey Aron chakwel akukwasha.’ Pijikay anch Yehova ukumukwash, Moses wasenda mukajend ni anend achirika mu Idjibit.

In Isarel ayisadishang midimu ya ku usu mud aswik. Yehova wamutuma Moses ni Aron kumulej Farao mazu manam: ‘Yilikishaku antu am aya chakwel angifukwil mwi mpay.’ Farao wakula kwa chibud anch: ‘Nikuteshap yilondinay Yehova, ni nikuyilikap in Isarel aya.’ Kupwa Farao wayisadisha kand midimu ku usu. Yehova wakwata mupak wa kumulej Farao dilejan. Wij mutapu ik? Waleta Yipupu Dikum mu Idjibit. Yehova wamuleja Moses anch: ‘Farao kanteshinap. Pamanch, Farao ukuya ku Wit wa Nil. Yang umuman ni umulej anch mulong walikin kuyilikishaku antu am kuya, mem mawonsu ma mu Wit wa Nil makukarumuk kwikal mash.’ Moses waziyina ni waya kud Farao. Farao wamumana Aron wabul mukombu wend pa mem, chad mem ma Nil makarumuka kwikal mash. Wit wasambisha kununk madjimb mayimp, ansh afawola, ni kwadingap mem mawamp mafanyidina kuna mu Wit wa Nil. Farao wadandamena kulik kuyilikishaku in Isarel.

Kupwa kwa machuku sambwad, Yehova wamutuma kand Moses kumulej Farao mazu manam: ‘Anch walik kuyilikishaku antu am Idjibit ukwizul ni ayol.’ Aron wazambula mukombu wend, ni ayol asambisha kwizul mwi ngand. Antu atana ayol mu yikumbu yau, pa ma ulal mau, ni pa malong mau. Kwading ayol ndond yin yawonsu! Farao wamuleja Moses kumwilembin Yehova chakwel apwisha chipupu chinech. Farao wakana anch ukuyilikishaku in Isarel chakwel aya. Chawiy Yehova wadosha chipupu, ni in Idjibit asambisha kukumangej ayol afang kal, yisak yisak. Ngand yasambisha kununk. Pakwez, Farao walika kand kapamp kakwau kuyilikishaku in Isarel.

Kupwa Yehova wamuleja Moses anch: ‘Aron ufanyidin kubul mukombu wend pa rufunfut, ni rufunfut rikukarumuk atumu.’ Pakad kulab atumu apalangana ndond yawonsu. Antu amwing a Farao amwela anch: ‘Chipupu chinech chidokil kud Nzamb.’ Pakwez, Farao, wadandamena kulik kuyilikishaku in Isarel.

Moses ni Aron aya kumulej Farao mazu madokila kud Nzamb anch: ‘Anch uyilikinap antu am kuya, nikutum angej mwi ngand.’ Yisak ya angej yizula mu yikumbu ya ampich ni atuzwendj in Idjibit. Ngand yawonsu yizula angej. Pakwez mu Gosen, ngand yading yishichau in Isarel, mwadingap angej. Kusambishin pa chipupu chinech cha kanying, yipupu yayikwatang ching in Idjibit. Farao wilemba anch: ‘Mwilembina Yehova chakwel adosh angej inay. Antwey akutwish kwau kuya.’ Pakwez padoshay Yehova angej inay, Farao waswimpa chitongijok chend. Ov, chom ik chilej Farao pa mulong winou?

Yehova wamuleja anch: ‘Anch Farao ulikin kuyilikishaku antu am, annam awonsu a mu Idjibit akuyel ni kufa.’ Mukwacha, annam asambisha kufa. Pakwez annam a in Isarel kafap. Farao wadandamena kwitutul, ni kayilikishakwap.

Kupwa Yehova wamuleja Moses kuchirik kud Farao ni kudjibul maut mwiur. Maut makarumuka rufunfut mwi ngand yawonsu yading yishichau in Idjibit. Rufunfut raletisha makwalong kud in Idjibit ni kud annam au. Ap mwamu, Farao walika kuyilikishaku in Isarel.

Yehova wamutuma kand Moses kud Farao mulong wa kumulej anch: ‘Ov, udandamedin kulik kuyilikaku antu am? Damashik, ruval wa mayal ukunak mwi ngand yawonsu.’ Mukwacha Yehova wanakisha ruval wa mayal wa yidjimin ya nzaj ni milaylay. Kwading rinkind mukash watuta wakad kal kumekanangap mu Idjibit. Mitond yawonsu ni mbut yayipa, pakwez ya mwi ngand ya Gosen yayipap. Farao walonda anch: ‘Mwilembina Yehova imika ruval winou! Kupwa ukuyany kwen.’ Pakwez chisu chapwa ruval, Farao waswimpa yitongijok yend.

Kupwa Moses walonda anch: ‘Katat atubol akuda mitond yawonsu yashalang pasutang rinkind.’ Ma miliyon ma atubol ada yom yin yawonsu yashala mu yir ni yashala ku mitond. Farao wilemba kand anch: ‘Mwilembina Yehova chakwel adosh atubol inay.’ Pakwez kupwa kwa Yehova kudosh atubol inay, Farao wadandamena kuchinchikish muchim.

Yehova wamuleja Moses anch: ‘Zambul chikas chey mwiur.’ Pakad kulab, diur dawonsu dizula ni mididim. Mu kusut kwa machuku masatu, in Idjibit katwishap kuman chom ap kuman muntu. Ching kwau in Isarel awiy ading ni yitokish mu yikumbu yau.

Farao wamuleja Moses anch: ‘Ey ni antwey ukutwish kuyany. Ching annam en awiy akushala.’ Moses wamwakula anch: ‘Tufanyidin kusend annam etu mulong awiy tukumulambula Nzamb wetu.’ Farao wajimana nakash. Wamubarokina anch: ‘Ndokala kwa! Anch nakuman kand, nikukujip.’

Moses wamukana Farao anch kakupakishap kand kumuman kapamp kakwau. Pakwez kurutu kwa kuya, wamuleja Farao anch: ‘Mukach mwa uchuku, mwan mwawonsu wa kusambish wa mwin Idjibit mwawonsu, kusambishin kud mwan wa Farao kushik ni kud an akusambish a amwilomb ukufa.’

Yehova wayileja in Isarel kwikal ni chakuda cha pakampwil. Walonda anch: ‘Jipany mwan a mukoku ap wa mpemb ikwal wakad ulim, wa muvu umwing ni nonany mash makemp umakusany ku yibamb ya ku yis. Oshany mbij, ni jidany nich mabot makad chivish. Djalany mikab mwi mbund, djalany yisapat ku mend, ni irijekany mulong wa kuya. Uchuku winou nikukukolany.’ Ukutwish kutong mutapu wasangarau in Isarel?

Mukach mwa uchuku, mwangel wa Yehova waya ku chikumbu ni chikumbu mu Idjibit. Yikumbu yading yakad kukus mash ku yibamb, mwan wa kusambish wafa. Pakwez mwangel wasuta ku yikumbu yading yikusinau mash ku yibamb. Ku dijuku din dawonsu da mwin Idjibit, mpich ni kazwendj afisha mwan wa kusambish. Pakwez kwikil mwan ap umwing wa mwin Isarel wafa.

Ap mwan wa kusambish wa Farao wafa. Farao kamanap kand chom chakusal. Pakad kulab wamuleja Moses ni Aron anch: ‘Tumbukany. Dokalany pinap. Yangany ukamwifukwilany Nzamb wen. Sendany annam en yangany!’

Ngond wading uzazin, in Isarel adokala mu Idjibit, irijeka mu majuku ni michid. Kwading amakundj uvud wa 600000 ni amband avud ni an. Chikwau kand, antu akwau avud aya nau mulong wa kumwifukwil Yehova. In Isarel ayikola!

Mulong wa kuvurik mutapu wayikolau kud Yehova, ading ni chakuda chawiy chimwing cha pakampwil muvu win wawonsu. Autazukang musambu winou anch Pasak.

Pateshay Farao anch in Isarel adokal kal mu Idjibit, waswimpa yitongijok yend ya kuyilik an a Isarel aya. Wayileja amasalay end a njit anch: ‘Rijekany matemb ma njit swa ni tuyilondulany! Tufanyidinap kuyilik aya.’ Farao ni antu end asambisha kuyilondul in Isarel.

Yehova wayitakelang antu end, wasadinang didj chisu cha muten ni wasadinang kasu uchuku. Wayishikija ku Karung Musuz, ni wayileja kushakam mu chibeng chading ku karung.

In Isarel amumana Farao nau amasalay end akat kuyilondul. In Isarel ading pakach, kurutu karung musunz, kwinyim amasalay a in Idjibit. Asambisha kumudidin Moses anch: ‘Tukimbin kufa! Wafanyidin kutusha mu Idjibit.’ Pakwez Moses walonda anch: ‘Kangal wovany wom. Chingelany umanany mutapu ukimbinay Yehova kutupandish.’ Moses wamuchingejina kamu Yehova, kimwawiyap?

Yehova wayileja in Isarel kudokal pa chibeng. Uchuku winiwa, Yehova wateka madj pakach pa in Idjibit nau in Isarel. Ndond yadingau in Idjibit yading mididim. Pakwez ndond yadingau in Isarel yading ni chitokish.

Yehova wamuleja Moses anch atandjek chikas chend pa karung. Kupwa, Yehova watutisha rinkind mukash uchuku wa kabuj. Karung waurika mu yikunku yaad washa njil pakach. Ma miliyon ma in Isarel asambisha kwauk mu Karung Musunz ni endina pa divu diumina, mutambu ni mutambu kwading mbumbu ja mem.

Amasalay a Farao ayilondula in Isarel mwi njil yaukinau pa Karung Musunz. Yehova wayiteka amasalay a in Idjibit mu kanrumbangesh. Makar masambisha kuzakok ku matemb. Amasalay atoya ni dizu da piur anch: ‘Tubudikan mau mwinomu! Yehova uyirishidin.’

Yehova wamuleja Moses anch: ‘Tandjek kand chikas chey pa karung.’ Kapamp kamwing, mbumbu ja mem jasankanijana ni jayibwik amasalay a in Idjibit. Farao ni antwend awonsu afa. Kwikil muntu ap umwing wapanda.

Mutambu ukwau wa karung, chisak chijim cha antu chasambisha kumutumbish Nzamb ni muminy anch: ‘Muwangilany Yehova, mulong ndiy wapandakan kal ni uyaj. Kabar ni mwin kukandamap wayidjibula mu karung.’ Pading pawanginau antu, amband ajangang maj ni abulang jingam. Awonsu ading ni musangar mulong ayikola.

Angond piswimp aad kupwa kwa kudokal mu Idjibit, in Isarel ashika ku Mukandu wa Sinay ni asala chibeng. Yehova wamutazuka Moses kuya pa mukandu ni wamuleja anch: ‘Nayipandish kal in Isarel. Anch adandamen kwinziyin ni kuziyil ku yijil yam, akwikal antu am a pakampwil.’ Moses washirika ku mukandu wayilej in Isarel yom yamulejau kud Yehova. Mutapu ik wakulau? Akula anch: ‘Tukusal yom yawonsu yalonday kal Yehova kusal.’

Moses waya kand ku mukandu. Kwinikwa Yehova walonda anch: ‘Nikwambamb ney dichuku da kasatu. Yileja antu anch kangal ez ku Mukandu wa Sinay.’ Moses washirika ku mukandu wayileja in Isarel mulong irijeka chakwel amutesha Yehova.

Kupwa kwa machuku masatu, in Isarel amana milayilay ni didj dilimina dabwika pa mukandu. Atesha kand dizu dikash ni chidjimin cha mpuny. Kupwa Yehova washirika pa mukandu mu kasu. In Isarel ova wom ni azala. Mukandu wawonsu wanyikeka nakash ni mish yaunyingumuka. Chidjimin cha mpuny chadjima nakash. Nzamb walonda anch: ‘Yam Yehova. Ufanyidinanap kuyifukwil anzamb akwau.’

Moses waya kand pa mukandu, ni Yehova wamwinkisha yijil piur pa mutapu ufanyidinau antu Kumwifukwil, ni mutapu ufanyidina kwikal yisal yau. Moses wafunda yijil yiney, kupwa wayitanginay in Isarel. Awiy alonda anch: ‘Tukusal yawonsu yatulejay kal Yehova kusal.’ Mwawiy, ashilamu kud Nzamb. Ov, awanyisha kushilamu kwinoku?

Yehova wamuleja Moses anch: ‘Kaninik weza kud am panap pa mukandu. Nikufund yijil yam pa mayal ni nikukwinkishay.’ Moses wakandama pa mukandu ni wasalap machuku 40. Padingay pa mukandu, Yehova wafunda Yijil Dikum pa mayal maad ni wamwinkisham Moses.

Mu kusut kwa chisu, in Isarel atonga anch Moses wayichin kal. Amuleja Aron anch: ‘Tukimbin muntu mwin kututakel. Tusadina nzamb!’ Aron wayakula anch: ‘Letany yom yen ya or.’ Wengurila or ni wasala chirumbidij cha musamb a ngomb. Antu alonda anch: ‘Musamb a ngomb winou ndiy Nzamb wetu watubudishina mu Idjibit!’ Asambisha kwifukwil musamb a ngomb wa or ni asala musambu. Ov, chading chiyimp? Mwaning, mulong ashilamu kumwifukwil ching Yehova. Pakwez kalimishap kushilamu kwau.

Yehova wamana Yom yashikena ni wamuleja Moses anch: ‘Chirik kudau antu. Ambwambwilang kal ni ifukwidin nzamb wa makasu.’ Moses washirika ku mukandu, wading usendin mayal maad ku makas.

Pasejay piswimp ni chibeng, Moses watesha antu awang lel. Wayimana akat kuja ni kwas manungin ku musamb a ngomb. Moses wajimana nakash. Wadjibula mayal ni mabaroka tuyikunku. Pakad kulab wapuchola chirumbidij. Kupwa wamwipula Aron anch: ‘Ov, antu inay akusalang nchik chakwel witiya kusal yom yiyimp mud yiney?’ Aron wakula anch: ‘Kangal wajiman. Ey wij mutapu udau antu inay. Akimbin kwikal ni nzamb, chawiy natambwila or wadau nich namukarumun kwikal musamb a ngomb!’ Aron kafanyinap kusal mwamu. Moses waya kand ku mukandu kumwilembin Yehova chakwel ayilikishina antu.

Yehova wayilikishina antu ading akweta muchim wa kuziyin. Ukutwish kuman mutapu chading cha usey kud in Isarel kulondul wintakel wa Moses?

Padingay Moses ku Mukandu wa Sinay, Yehova wamuleja kutung mwinkand wa pakampwil utazukinau anch dizang, kwafanyinau in Isarel kumwifukwil Yehova. Ading kudizambulang mulong wa kudiya nich kuyilau.

Yehova walonda anch: ‘Yileja antu apan yawonsu yikwetau mulong wa kukwash kutung dizang.’ In Isarel apana utad wa or, wa argent, wa kwivre, mayal ma usey, ni usang. Apana mavuj ma amikoku, ndand muwamp, yikit ya annam, ni yom yikwau yivud. Apana ni musangar nakash chawiy chayilejau kud Moses anch: ‘Yawanyin kal! Kangal kuletany kand.’

Antu avud amakundj nau amband ading ija kutung akwasha kutung dizang. Yehova wayinkisha manangu ma kusal mudimu. Amwing achimang masun, akwau apwatang moj ya mavuj ma annam. Akwau ading kuwapish mayal, asalang yom ya or, ni asongang mabay.

Antu atunga dizang mud kamu mwayilejau kud Yehova. Asala disun diwamp da kwauril nich dizang mu yikunku yaad, chikunku Chitumbila ni Chitumbila Nakash. Mu chikunku Chitumbila Nakash mwading mushet wa manswik, wasalau ni mabay ma mutond mud wa mukamb ni utad wa or. Mwi Ndond Yitumbila mwading chom cha or cha kutek lamp, tebur, ni chintamb. Mu chipang mwading dilong dijim ni chintamb chijim cha kupeshin. Mushet wa manswik wayivurishang in Isarel kushilamu kwau mulong wa kumuziyin Yehova. Wij manswik chom ik? Udi mutapu wa kushilamu wa pakampwil.

Yehova wamutonda Aron ni anend amakundj mulong wa kusadin mu dizang mudi in kupesh. Afanyina kudilam ni kupaninamu yakupesh kud Yehova. Ching Aron mwin kupesh mujim, ndiy wading ni mbil ya kwandam mwi ndond Yitumbila Nakash. Wasalang mwamu kapamp kamwing pa muvu mulong wa kupan mulambu wa yitil yend, ya dijuku dend, ni ya muchid wawonsu wa in Isarel.

In Isarel atunga dizang mu muvu umwing kupwa kwa kubudik mu Idjibit. Ikala ni ndond ya kumwifukwil Yehova.

Yehova wizwisha dizang nich uyaj wend ni didj dabwikang dizang. Padinga didj kubwik dizang, in Isarel avurikang ndond yadingau. Pakwez anch didj dashemunik, ijikang anch afanyidin kushemunik. Afanyina kusend dizang ni kulondul didj.

In Isarel adokala ku Mukandu wa Sinay, pading payilau, asutina mwi mpay ya Paran kwi ndond kutazukinau anch Kades. Kwinikwa Yehova wamuleja Moses anch: ‘Tum antu amakundj 12, ku muchid wawonsu tond muntu umwing chakwel aya kutentish (kwendish ngand) mwi ngand ya Kanan, ngand yinikuyinkisha in Isarel.’ Chawiy Moses watonda antu 12 wayilej anch: ‘Yangan mu Kanan ni umanany anch ngand yiwapin ap yiyipin mulong wa yakuda. Talany kand anch antu ashicha mwinimwa akwet usu ap bwat, anch ashich mu misumb ap mu yibeng.’ Pakach pa in kutentish 12 aya mu Kanan, pading Yoshua ni Kaleb.

Kupwa kwa machuku 40, in Kutentish achirika, ading ni chizakas cha mabuj ma nviny, ni ma nfung. In kutentish alonda anch: ‘Yid ngand yiwamp, pakwez antu akwet usu nakash ni misumb yau yikwet mbumbu jilemp.’ Kupwa Kaleb walonda anch: ‘Tukutwish kuyiwin. El tuyany pakad kulab!’ Wij mulong wak Kaleb walonda mwamu? Mulong ndiy ni Joshua ading amuchingejidin Yehova. Pakwez in kutentish 10 alonda anch: ‘Bwat! Mud antu ajim, ayitabutabu! Tud mud ampasu ku mes mau.’

In Isarel aziya. Asambisha kunyinyit ni kulond umwing ni mukwau anch: ‘El tutonda ntakel mukwau ni tuchirikany mu Idjibit. Mulong wak kuya kwinikwa chakwel akatujip?’ Yoshua ni Kaleb alonda anch: ‘Kangal kumubwambwil Yehova ni kangal kwov wom. Yehova ukutulamany.’ Pakwez in Isarel kateshap. Akimba kumujip Kaleb ni Yoshua!

Yom ik yasalay Yehova? Wamuleja Moses anch: ‘Yom yiney yawonsu nayisadidina in Isarel, adandamedin kwimbwambwil. Mwamu, akushakam mwi mpay mivu 40 ni akufil mwinomu. Ching anau ni Kaleb, ni Yoshua, awiy akushakama mwi ngand yinashilamu kuyinkish.’

Chisu chimwing padingau in Isarel mwi mpay, Kore, Datan, Abiram, ni antu akwau 250 amubwambwila Moses. Amwela anch: ‘Watuziyish kal! Mulong wak uda ntakel wetu ni mulong wak Aron ud mwin kupesh mujim? Yehova ud niyetwetu awonsu, kadap ching niyeyey ni Aron.’ Yehova kasangarap. Wamana anch winou wading wimbwambol kud ndiy!

Moses wamuleja Kore ni antu ading ku mutambu wend anch: ‘Damashik ezany ku dizang, ni sendany malong men makwoshin malash. Yehova ukutulej nany uda wendendiy.’

Mu kwacha, Kore ni antu 250 aya kutanijan ni Moses ku dizang. Kwinikwa osha malash mud in kupesh. Yehova wamuleja Moses ni Aron anch: ‘Aurikany ni Kore ni antwend.’

Ap anch Kore waya kud Moses ku dizang, Datan, Abiram, ni majuku mau alika kuya. Yehova wayileja in Isarel kwikal kulemp ni minkand ya Kore, Datan, ni Abiram. Pakad kulab, in Isarel aurika nau. Datan, Abiram, ni majuku mau aya pol pa dizang dau. Divu dasambisha kuzal pakad kulab dabarika dayibwik! Ku dizang, kweza kasu ni kamwosha Kore ni antwend 250.

Yehova wamuleja Moses anch: ‘Ku muchid ni muchid sendaku mukombu wa mwin kutakel, ni fund majin mau. Pakwez ku mukombu wa muchid wa in Levi, fundap dijin da Aron. Yiteka mu dizang, ku mukombu wa muntu nikutonda kukuminy yisalamb.’

Mukwacha Moses wakumangeja mikombu yawonsu ni wayimekesha kudi in kutakel. Ku mukombu wa Aron kwaminya yisalamb ni yabwika mukobu wawonsu. Mwamu, Yehova wamekesha patok anch wamutonda Aron kwikal mwin kupesh mujim.