Eliya wamusejina Akab wamwel anch: “Yang, udia ni kuna; mulong kudi chidjimin cha ruval muvud.” (Verse wa 41) Ov, mwant winou muyimp wileja chom kanang kusutil ku yom yamanay pa dichuku dinidia? Rusangu kirilondilap kamu, pakwez kitumenap pinap dizu ap dimwing dia kwit dilikishin, kwikil chimekeshina anch muprofet wamukwasha chakwel amusejina Yehova ni amwita dilikishin. Bwat, Akab “waya akadia ni kuna.” (Verse wa 42) Chadi Eliya wasala nchik?

Nich kutakaman Eliya wasota amana uman ulejena anch Yehova sot asala, chawiy chamutuminay kashalapol wend pa chilik chijim chakwel akashinshikina nawamp chinshinsh chakwel amanaku yijingidij ya ruval usotila kunak. Pachirikay, kashalapol pakadi rusangu risangareshina walond anch: “Kwikil chom.” Chinshinsh chadinga kwau zwang, ni mwiur, kimwadingap madj. Ov, katat wamanany kal chom chimwing chishimokishina? Vurik anch Eliya udiokil pa kumulej Mwant Akab anch: “Kudi chidjimin cha ruval muvud.” Ov, mutapu ik ukulonday muprofet mazu minam oku kwikil kwau madj ma ruval mamekenaku?

Eliya wadinga wij kushilamu kwa Yehova. Mudi muprofet ni ntimesh wa Yehova, wadinga nich kashinsh anch Nzamb wend ukuwanyish dizu Diend. Eliya wadinga nich ruchingej—rijim mu chilik chakwel anch wadinga ni kutesh chidjimin cha ruval. Tukutwish twavurik yilondilay Bibil piur pa Moses: “Ndiy wakasikesha mudi muntu ukata kumuman Nzamb wakad kumekan ku mes.” Ov, Nzamb udi wakin kudi ey? Ndiy waleta mayingishin mavud chakwel twikala nich ritiy ra chilik chimwing mudiay ndiy ni mu yakushilamu yend.—Hebereu 11:1, 27.