Tushinshikinany mwikadil. Job, ikundj ushinshamena mu ritiy, watanijana ni yikokujol yikash​—pamwing ni kushadish yom yend ya ku mujimbu yadingay nich, rufu ra anend akatish awonsu, ni wamana mar nakash nich mayej. Mu chisu chend cha mar makash mamanay, ndiy wamutazuka Nzamb ni walonda anch: “A! Ing njindjika kwam kwi ndond ya afu.” (Verse 13) Job wamana Ndond ya afu mudi ndond yiwamp ya kwitudishin. Ndond yiney yidi mudi chipan cha usey cha Nzamb, ndiy ukez kwikal ni wanipau wa mashakamin mayimp ni mar.a

Ov, Nzay ya Chivurikish yikala ndond ya Job kushakat rawonsu? Job witiyijanga anch chom chinech chikezap kumushiken. Ndiy udandamedin mu malembil mend anch: “Chad ntekina machuku mulong wa kwimvurik kand am.” Job wadinga nich ruchingej anch ndiy wadi ufanyidina kushakam Mwinzay ya Chivurikish chisu chikemp ni anch Yehova kakezap kumuvuramen. Job wafanyikesha chisu chadingay ufanyidin kusutish Mwinzay ya Chivurikish nich “mudimu wa uswik”​—chisu chikash cha kuchingel. Ov, cha machuku minch? Ndiy walonda anch: “djat ni pinikeza kapizurik.”. (Verse 14) Kupizurik kwinoku kurumburikin kudiokal Mwinzay ya Chivuriish​—mu mutapu ukwau, kusanguk ku rufu!