Yitot ya mivu kurutu, uprofet wa Bibil wasambela kulond piur pa ndond yikeza kuvadikin Yesu anch: “Ey, ul wa Betlehem Eferata, ey udi ka ul kakemp mwin ngand ya Yuda, mukach mwa antwey nikez kamubudish mwin kutakel wa in Isarel.”a (Mike 5:1) Chimeken anch Betlehem wading ul ukemp pakach pa misumb ya in Yuda. Chikwau kand, ul winou ukemp wafanyina kwez kwikal nich katumb ka pakampwil. Mesia washilaumu, ap Kristu wafanyidina kudiokal mu Betlehem.​—Mateu 2:3-6; Yohan 7:40-42.