Yesu wayinkisha atwimbuy end mbil ja pakampwil piur pa mutapu ufanyidinau kuwanyish nawamp mudimu wau wa kulejan payitumay aad aad. Pakwez, ndiy kasalap kusu yom yiney. Ndiy wayibabesha piur pa in kuyipompat anch: “Teshany! Am nakutumany kal en mudi amikoku mukach mwa atwingol . . . Babalany, mulong antu akez kukukwatany chakwel akurumburishany, akez kukubudilany mu [masinagog]. Akez kukutwalany kurutu kwa anyikel ni ant mulong wa kwingambat am.”—Mateu 10:16-18.

Yesu wayinkisha atwimbuy end 12 mbil jiwamp, wayibabesha ni wayikasikesha mutapu uwamp mud ik! Ukutwish kusanger kwijik anch mazu minam madi ma usey kudi antu ipanina mu mudimu wa kulejan kupwa kwa rufu ni kuvumbuk kwa Yesu. Chinech chimekeshin patok payilejay in kwilejend anch “antu awonsu akez kukukisany,” kalondap mwamu kusu mulong wa atwimbuy atumay mu mudimu wa kulejan. Chawiy, kandikal tutangap anch atwimbuy ayitwala kurutu kwa antakel ni ant a mangand payau mu mudimu wau wa kulejan mu Galalia, ap ndond yifundinau anch akimba kuyijip kudi anamakwau.

Chimeken patok anch, Yesu wading ulondin piur pa yom ya kurutu payilejay atwimbuy end. Tushinshikinany mazu mayilejay in kwilejend anch kakezap kupwish midimu yau mu misumb yawonsu “wakad Mwan a Muntu kwez.” Yesu wamekesha anch in kwilejend kakezap kupwish mudimu wa kulejan piur pa Want wa Nzamb kurutu Mwant wa ntumb Yesu Kristu eza mulong wa kuwanyish dirumburish dia Nzamb.