Mwaning, in kwilej a Yesu afanyina kurish nich kuzengol kukash, chawiy Yesu wayikasikesha payikanay anch: “Pakukutwalanyau ku dirumburish kangal wiyakamishany kwen mulong wa mazu miukulondanya ap mutapu wa kumalond. Pa chisu chinicha kamu akez kukwinkishany mazu ma kulond. Mazu miukeza kulondany kimakudiokalap kudi en, makez kudiokal ku [spiritu] wa Tatukwen ukeza kulondil mu en.” Yesu walonda kand anch: “An a divumu dimwing, umwing ukez kumupan mukwau mulong wa kumujip. Atatuku akez kusal kand mwamu kudi anau. An niyau akez kuyikarumukin anvajau chakwel ayijipesh. Antu awonsu akez kukukisany mulong wa kwingambat am. Pakwez muntu mwawonsu ukeza kujijaman djat ni ku rufu rend, [ndiy ukeza kupand].”—Mateu 10:19-22.

Yesu wayinkisha atwimbuy end 12 mbil jiwamp, wayibabesha ni wayikasikesha mutapu uwamp mud ik! Ukutwish kusanger kwijik anch mazu minam madi ma usey kudi antu ipanina mu mudimu wa kulejan kupwa kwa rufu ni kuvumbuk kwa Yesu. Chinech chimekeshin patok payilejay in kwilejend anch “antu awonsu akez kukukisany,” kalondap mwamu kusu mulong wa atwimbuy atumay mu mudimu wa kulejan. Chawiy, kandikal tutangap anch atwimbuy ayitwala kurutu kwa antakel ni ant a mangand payau mu mudimu wau wa kulejan mu Galalia, ap ndond yifundinau anch akimba kuyijip kudi anamakwau.

Chimeken patok anch, Yesu wading ulondin piur pa yom ya kurutu payilejay atwimbuy end. Tushinshikinany mazu mayilejay in kwilejend anch kakezap kupwish midimu yau mu misumb yawonsu “wakad Mwan a Muntu kwez.” Yesu wamekesha anch in kwilejend kakezap kupwish mudimu wa kulejan piur pa Want wa Nzamb kurutu Mwant wa ntumb Yesu Kristu eza mulong wa kuwanyish dirumburish dia Nzamb.