Mulong mudimu wa kulejan wading ni usey nakash, chawiy Yesu wayileja in kwilej end anch afanyidina kudimuk chakwel awanyisha nawamp mudimu wau pakad mulong. Wayileja anch: “Anch akuzengolany mu ul umwing, chinyinany mu ul ukwau. Nakulejany chakin, kiukez kupwishanyap midimu yen mu misumb yawonsu ya in Isarel wakad Mwan a Muntu kwez.”—Mateu 10:23.

Chimeken patok anch, Yesu wading ulondin piur pa yom ya kurutu payilejay atwimbuy end. Tushinshikinany mazu mayilejay in kwilejend anch kakezap kupwish midimu yau mu misumb yawonsu “wakad Mwan a Muntu kwez.” Yesu wamekesha anch in kwilejend kakezap kupwish mudimu wa kulejan piur pa Want wa Nzamb kurutu Mwant wa ntumb Yesu Kristu eza mulong wa kuwanyish dirumburish dia Nzamb.