13. Ov, chom ik chimekeshinau mu Kujingunik 18:7 piur pa mwikadil wa katat wa mband wa kusotan, ap Babilon Mujim, kuwejaku ni Kristendom?

¹³ Chakasatu, kudil ni kudia ku mazeu. Kupwa kwa angel kuyikas yinfananfan yit yit, chom ik chikusadika? Pisambinay piur pa mwikadil wa chisak cha antu afanikeshinau nich yinfananfan, Yesu walonda anch: “Mwinimwa akez kudil ni kwidia ku mazeu.” (Mat. 13:42) Ov, chinech chisadikin nlel unou? Bwat. Nlel, Kristendom, udia chikunku cha mband wa kusotan, wilondidin amwinend anch: “Am nidi mwant mband, niyikedin! Am kinidiap mwadiamufu, chad kinikez kudilap rufu, bwat.” (Kuj. 18:7) Chakin, Kristendom wiyovil kwikal nich chisend chijim, ni kulond anch ‘udi mwant mband’ piur pa chisak cha antakel a chipolitik. Katat antu afanikeshinau nich yinfananfan akat kwitutul, kakatap kudil. Pakwez chinech chidi piswimp ni kukarumuk.

14. (a) Ov, chisu ik ni mutapu ik ukezau in Kristu a makasu ‘kudia ku mazeu mau’? (b) Ov, kutesh kwetu kwa katat kwa Mateu 13:42 kukwatijadin nchik ni chitongijok chilejenau mu Kuseng 112:10? (Talany mazu ma kwinsudiel)

¹⁴ Pa chisu cha mar makash, kupwa kwa kusheshik kwa dirijek diawonsu dia relijon wa makasu, atubwebu end akez kukimb kwa kuchinin pakwez kakezap kutan ndond ya diking. (Luka 23:30; Kuj. 6:15-17) Kupwa, akuman anch kwikil mutapu wa kwiyep ku kusheshik, akez kudil pakad kuchingejin ni ‘kudia ku mazeu mau’ ni ujim. Mudi mwasambelay Yesu kulejan mu uprofet wend piur pa mar makash, pa chisu chinicha cha mididim yikash, awiy “akez kudil.”e​—Mat. 24:30; Kuj. 1:7.

15. Ov, chom ik chikuyishikena yinfananfan, ni chisu ik chikusadika yom yiney?

¹⁵ Chakanying, kuyidjibwil mu kasu. Ov, chom ik chikuyishikena yit yit ya yinfananfan? Angel “Akez kayidjibwil mu dibuku dia kasu.” (Mat. 13:42, Testament Musu ni Kuseng) Chinech chirumburikin kujiy rawonsu. Chawiy lel, atubwebu inay a pasak a yirijek ya marelijon ma makasu akuyishesh ku chikunku cha nsudiel cha mar makash, ku Armagedon.​—Mal. 4:1.