16, 17. (a) Ov, yom ik ya nsudiel yijimbwilay Yesu mu chishimu chend? (b) Ov, mulong wak tulondin anch kuwanyin kwa yom yiney kudi kwa machuku ma kurutu?

¹⁶ Chakatan, kuzut mudi muten. Yesu wapwisha uprofet wend ni kulond anch: “Pakwez antu atentamina akez kuzut mudi muten mu Want wa Tatukwau.” (Mat. 13:43) Ov, yom yiney yikusadik chisu ik ni ndond ik? Mazu minam makez kuwanyin mu machuku ma kurutu oku. Yesu wasambela kulond, kangal piur pa mujikit usadikina pa divu, pakwez wisambina piur pa yom yikushikena mwiur mu machuku ma kurutu.f Shinshikin mayingish maad madia mu mazu minam mansudiel.

¹⁷ Chakusambish, kwipul anch “chisu ik.” Yesu walonda anch: “Pakwez [pa chisu chinicha] antu atentamina akez kuzut.” Dizu ‘pa chisu chinicha’ disambidin kamu pa yom yajimbulay Yesu, piur pa, ‘kuyidjibwil yinfananfan mu dibuku dia kasu.’ Kuyidjibwil kwinoku kukez kushiken pa chikunku cha nsudiel cha mar makash. Chawiy lel, ‘kuzut’ kwa antu azizidilau many kufanyidin kushiken mu machuku ma kurutu. Chakaad, kwipul anch “ndond ik”. Yesu walonda anch antu atentamina akez ‘kuzut mu want.’ Ov, chirumburikin ik? Azizidilau many awonsu ashinshamena achidia pa divu kupwa kwa kusut kwa chikunku chakusambish cha mar makash akwikal atambwil kal chijingidij chau chansudiel. Chawiy lel, mudi mwalejanau mu uprofet wa Yesu piur pa mar makash, awiy akez kuyikumangej mwiur. (Mat. 24:31) Kwinikwa kwawiy kukezau kuzutin “mu want wa Tatukwau,” ni piswimp ap kupwa kwa njit ja Armagedon, akez kwikal mudi ngachik wa Yesu usangera mu “uruu wa Mwan a Mukoku.”​—Kuj. 19:6-9, TMK.