9. Ov, chitongijok ik chiyimp chikwetingau antu amwing piur pa dibot diasadinay Yesu?

⁹ Antu amwing akata kuyang mu maegliz alondining anch walonda kwend anch: ‘Winou wawiy mujimbu wam,’ mulong akat kwitiyij anch dibot diakarumuka dikal mujimbu wend wa mbij. Pakwez, chinech chidi chinyim nakash nich uyakin.a Mujimbu wa Yesu wading pinapa kurutu kwa atwimbuy ashinshamena, pakwez afanyina kudia dibot diakad chivish. Chakin kamu, Yesu wisambina mu chifanikesh, mudi mwasalangay yisu yikwau.​—Yoh. 2:19-21; 4:13, 14; 10:7; 15:1.

10. Ov, dibot diasadilau pa Yakudia ya Urel ya Mwant adifanikesha ni chom ik?

¹⁰ Dibot diatwishau atwimbuy kuman ni kudia diading dirumburikina mujimbu wa Yesu. Mujimbu wa mutapu ik? Chisu chimwing, atushalapol a Nzamb atonga anch mulong Yesu wabukuna dibot pakwez kwikil difup diend ap dimwing diabukuka, dibot dirumburikin “mujimbu wa Kristu,” chikumangen cha azizidilau many. (Efes 4:12; Rom 12:4, 5; 1 Kor. 10:16, 17; 12:27) Pakwez, kupwa, chasangaresha anch mayingish mawonsu maad ni Mifund yamekesha anch dibot diadinga chifanikesh cha mujimbu wa untu wa Yesu, warijekau mulong wendendiy. Yesu “wamana mar ku mujimbu,” pamupampau ku mutond. Chawiy lel, ku Yakudia ya Urel ya Mwant, dibot adifanikesha ni mujimbu wa Yesu “wasenda yitil yetu.”​—1 Pita 2:21-24; 4:1; Yoh. 19:33-36; Heb. 10:5-7.

15, 16. Chom ik chikata kusadik pa chirung cha Yakudia ya Urel ya Mwant?

¹⁵ Piswimp ni kwisudiel kwa diskur, mwin kusal diskur ukwijikish anch chisu chawanyin kal cha kusal yayilejay Yesu in kwilejend kusal. Mudi mulejenau kwiur oku, akusadin yijingidij yaad, dibot diakad chivish ni maar ma nviny musuz. Yifanyidin kwikal pa tebur piswimp ni mwin kusal diskur. Ukupwitin manangu ma antu pa rusangu ra Bibil rilejen yalonday Yesu ni yasalay pasambishay musambu winou. Chilakej, mu rusangu ra Mateu tutanginamu anch: “Yesu wanona dibot, walembil mulong wa kumujikitish Nzamb, chad wadiumbwol, wayinkish in kwilejend. Wayileja anch: ‘Tambulany, diangany dibot dined, difanikeshin mujimbu wam.’” (Mat. 26:26) Yesu wadiumbola dibot diakad chivish ni kudisutish kudi atwimbuy ading ku mutambu ni mutambu wend. Ukumanany ku chikumangan cha pa Ndol 14 dibot dimwing diakad chivish diakukatwol tukemp tukemp ni ditekinau mu dilong dialalela.