Padingay Yesu ukat kuyifundish antu mwi ngand ya Sezarey wa ku Filip wadinga mu akilometre 25 ni kushik ku Mukandu wa Herimon, Yesu wayijikisha patok atwimbuy end anch: “Nakulejany chakin kamu anch, antu amwing adia pinap ay kakufap, ching kamu amuman Mwan a muntu ukat kwez mu [Want wend].”—Mateu 16:28.

In kwilej afanyina kwiyipul piur pa yom yakimbay Yesu kurumburil. Kupwa kwa rubing rumwing, Yesu waya pamwing ni atwimbuy asatu—Pita, Jakobu ni Yohan—pa mukandu. Chimeken anch wading uchuku, mulong atwimbuy inay ading azedin tul. Pading palembilay Yesu, ndiy waswimpa chifu kapamp kamwing kurutu kwau. Atwimbuy amana chifu chend chikat kulay mudi muten ni masun mend matoka too, kupwa masambish kulaylay.

Chishimushimu chinech chamukasikesha mud ik Yesu nau atwimbuy end! Chishimushimu chinech chamekesha uyaj ukwikalay nich Kristu mu Want. Kupwa, in kwilej amana “Mwan a muntu ukat kwez mu [Want wend],” mudi mwayikanay. (Mateu 16:28) Padingau pa mukandu, atwimbuy ading ‘atuman a uyaj wend imenap ayinau yom yishimokishina.’ Ap anch Afaris ading akimbin kuman chilay chikumekesha patok anch Yesu udi Mwant watondau kudi Nzamb, pakwez Yesu kayisadinap chilay ap chimwing. Pakwez, in kwilej ading pamwing ni Yesu amana mutapu Yesu waswimpay chifu chend, yawiy yom yamekesha kuwanyin kwa uprofet piur pa Want. Chawiy Pita washikena kufund anch: “Katat etu tushinshikin nakash anch, mazu malejanau [aprofet] a Nzamb madi kamu makin.”—2 Pita 1:16-19.