Kaisar Augusta mwant mujim wa in Rom, wapana chijil anch muntu mwawonsu ufanyidin kufundikish dijin. Chawiy, Josef ni Mariy afanyina kuya ku musumb wa Betlehem kwindum kwa Yerusalem, kwawiy kwafanyinay Mariy kuvadin.

Antu avud aya ku Betlehem mulong wa kwifundikish majin. Ndond yatanay Josef ni Mariy ya kushakam yading kwau ching mu diyind dia annam, mwadingau kulamin ayimbur ni annam akwau. Yawiy ndond yavadikinay Yesu. Mariy wamuvunga mwanend mu yibel ya masun ni wamuladika pa ndond yadilangau annam.

Nzamb washinshikina chakwel Sezar Augusta apana chijil cha kufundikish majin chakwel Yesu avadikina ndond yiniya. Mulong wak? Mulong chinech chasala anch Yesu avadikina mu Betlehem musumb wa ngakiril wend Mwant David. Bibil wasambela kulejan musumb wafanyinay kuvadikin Mwant washilayimu.—Mike 5:2.

Nlel unou, antu avud akat kwitiyij anch Yesu wavadika dichuku dia 25 Ngond wa 12. Pakwez, mu Betlehem ngond wa 12 kuding ruval nakash ni mashik. Pa yisu yimwing kand kuding mbundu jikash. Pa chirung chinicha, chading chikasiken kudi atufung kushakam mu masuku pamutaj mulong wa kulam yisak yau ya annam. Chikwau kand, chading chikasiken kudi mwant mujim wa in Rom kuyilej antu chakwel asala weny ulemp wa machuku mavud mulong wa kufundikish majim mau pa chirung cha ruval. Chimeken anch pamwing ap Yesu wavadika mwi Ngond wa 10.