Kaifas watwisha kamu kuyilej in Sanedrin akwata mupak wa kumujip Yesu. Ov, Nikodem, muntu wading mu chisak cha in Sanedrin ni wading kand murund wa Yesu wamulejamu Yesu mupak winou? Pakad kulab, Yesu wadiokala mu Yerusalem mulong wa kwiyep kumujip mulong chisu chamutekinau kudi Nzamb chading kandikal chiwanyina.

Pajinguninay mupak wa in Sanedrin anch akimbin kumujip, Yesu waya mu musumb wa Efraim wading kwindum kwa Yerusalem. Washakama kwinikwa pamwing ni in kwilejend mulong wa kwiyep akankuny end. (Yohan 11:54) Chawiy, chisu chakusal musambu wa Pasak wa muvu 33 C.C. chaseja, chawiy Yesu wirijeka mulong wa kuya mu weny. Ndiy waya kwindum kwa Samaria kupwa waya kand mu Galalia, winou wading weny wend wa nsudien kurutu afa.