6, 7. (a) Wisu mutapu umwing ukutwishau atulam kwimburij Yesu, Paul, ni atushalapol akwau a Nzamb? (b) Ov, mulong wak kuvurik majin ma akadivar kuwejidin ku musangar wau?

⁶ Akadivar ni anambaz avud alondining anch musangar wau uding ujim anch atulam amekesh kubangin kudi muntu ni muntu. Mutapu umwing wa usey ukutwishau atulam kusal mwamu chidi kusutil ku kulondul chilakej chashay David, Elihu, ni Yesu amwinend. (Tang 2 Samwel 9:6; Job 33:1; Luka 19:5.) Umwing ni umwing wa atushalapol inay a Yehova wamekesha kubangin kwa kashinsh kudiay muntu mukwau kusutil ku kumutazuk muntu pa dijin diend kamu. Paul niyend wasangera usey wa kuvurik ni kuyitazuk ambay akaritiy pa majin mau. Wapwisha umwing wa mikand yend nich kuyilangwish akadivar ni anambaz 25 ni kusut pa majin mau, kuwejinaku Perisid, nambaz mwin Kristu ni piur penday Paul walonda anch: “Namulangwish kand mukarukat nam.”—Rom 16:3-15.

8. Wisu wadinga mutapu umwing wa usey walondulay Paul chilakej cha Yehova ni Yesu?

⁸ Paul wamekesha kand kuyibangin kwend akwau kusutil ku kujikitish kwakin, kudia mutapu ukwau wa usey wa kujimbish musangar wa ambay netu akaritiy. Chawiy lel, mu mikand yikwau mulejenay maswir mend ma kusal mulong wa musangar wa akadivar nend, Paul wafunda anch: “Nibazin mulong wenen.” (2 Kor. 7:4) Mazu minam ma kujikitish mafanyina kusangaresh muchim wa akadivar in Korint. Paul umekeshin yovil ya chilik chimwing ku yikumangen yikwau. (Rom 1:8; Fil. 1:3-5; 1 Tes. 1:8) Chakin, kupwa kwendendiy kujimbul Perisid mu mukand wend ku chikumangen mu Rom, Paul wawejinaku anch: “Wasala mudimu ujim wa Nsalejetu.” (Rom 16:12) Kujikitish kwinoku kwafanyina kwikal kukasikeshina mud ik kudi nambaz winou mwin kushinshaman! Mu kuyijikitish antu akwau, Paul walondula chilakej chashay Yehova ni Yesu.—Tang Marko 1:9-11; Yohan 1:47; Kuj. 2:2, 13, 19.