17. Ov, mutapu ik wasalay Yehova chom ‘chiyimp’?

¹⁷ Yehova wasala chom chimwing chakad kuchingejin kudi antu avud. Paul walejana chom chashikena mudi “kuyip.” (Rom 11:24) Ov, mutapu ik chadinga mwamu? Mwaning, chela kumekan cha kushimokish, chiyimp, kunung mutiy wa mwisuku ku mutond wakunau, andim amwing a mu mivu chitot ya kusambish ading asadina mwamu.b Chilik chimwing, Yehova wasala chom chimwing cha kushimokish. Kwambatan nich in Yuda, in Michid kelap kutwish kubudish dibuj ditiyikina. Pakwez Yehova wasala anch antu inay ikala chikunku cha “muchid” ukata kusong mabuj ma Want. (Mat 21:43) Kusambish ni kuzizil many kwa Korney​—mwin Michid wa kusambish wakad kuya kumukand wakarumuka​—mu muvu wa 36 C.C., Akad kuya kumukand ni akad kwikal in Yuda ayinkisha chisu cha kwinung ku mutond wa mpash wa chifanikesh.​—Mid. 10:44-48.c

18. Ov, chisu ik chadingau nich in Yuda a ku mujimbu kupwa kwa muvu wa 36 C.C.?

¹⁸ Ov, chinech chirumburikin anch kupwa kwa muvu wa 36 C.C. in Yuda a ku mujimbu kadingap nich chisu cha kwikal mbut ya Aburaham? Bwat. Paul urumburil anch: “Anch in Yuda akarumuk, itiyij, akuyichirish pa ndond yadingau, mulong Nzamb ukutwish kuyinung kand. En in michid yikwau, udiany mudi mitiy ya mutond wa mpach wa mwisuku yakatulau chad ayinung ku mutond windj wa mpach wakunau wakad wau. In Yuda, awiy adi mudi mutond winou wa mpach wakunau. Chawiy chiswakela kudi Nzamb kuyinung mitiy yiney yakatulau kapamp kakwau ku mutond wau.”d​—Rom 11:23, 24.