In Kristu amwing a mu Korint wa pasak kateshap nawamp mulong winou, ni akwau kitiyijap anch kuvumbuk kukez kwikalaku. Mu mukand wa kusambish wafunday kudi in Kristu adinga kwinikwa, kambuy walejana yibudikin yela kwikalaku anch kwikil chakin kamu kuvumbuk. Ndiy wafunda anch: “Chawiy anch kwikil kuvumbuk kwa afu kwikal kand aom, komb Kristu niyend kavumbukap kwend kwikal kand mwom. Anch Kristu kavumbukap kwikal kand mwom, komb etu tukat kurumburil kwetu mazu ma Nzamb chamwamu, niyen kand ukat kwitiyijany kwen chamwamu. Chom chikwau chijim, komb etu tukat kulond yom ya makasu mulong wa Nzamb . . . komb ritiy renen ridi kwau chamwamu, niyen ushadikinany kwen ni katat mu yitil yen. Chad kand in Kristu afila mu ritiy niyau ashadika kwau.”—1 Korint 15:13-18.

Kukwikal kand yibudikin yikwau. Anch Kristu kavumbukap ku rufu, ritiy ra in Kristu rikez kwikal ra chamwamu, rakad usey, ni ra makasu. Chikwau kand, Paul ni akwau ela kulond makasu kangal kusu piur pa kuvumbuk kwa Yesu pakwez kand piur pa muntu wamuvumbula ndiy, Yehova Nzamb. Chikwau kand, dizu dia kwel anch Kristu “wafa mulong wa yitil yetu” diela kwikal dia makasu—mulong anch mwin kuyikwol antu kamukolap amwinend ku rufu, kakutwishap kuyikol akwau. (1 Korint 15:3) Chinech chela kurumburik anch in Kristu afila, ni akwau ajipau, asheshika nich ruchingej ra makasu anch akez kuvumbuk.