Ov, Ikundj Uziyidil Ku Umutu Wa Kristu?

“Mutu wa muntu wawonsu ndiy Kristu.”—1 KOR. 11:3.

1. Chom ik chimemkeshina anch Yehova udi Nzamb ufanyidina?

“KUJINGUNIK 4:11, MN, ulondil anch: “Nsalejetu Nzamb wetu! Ey yey uwanyidina kutambul uyaj, ni katumb, ni ukash.” Mulong yey watanga yom yawonsu, ni yom yawonsu yidiaku yishich mulong wa rusot rey.” Mulong ndiy watanga yom yawonsu, Yehova Nzamb udi mwant mujim mwin mangand mawonsu ni ukwet usu piur pa yom yawonsu. Mulong Yehova “kadiap Nzamb wa kanvundangesh, pakwez udi Nzamb wa chisambu,” Chikutwish kumekan mu mutapu utenchikinay dijuku diend dia angel.—1 Kor. 14:33; Isay 6:1-3; Heb. 12:22, 23.

2, 3. (a) Nany wadinga chitang chakusambish cha Yehova? (b) Ndond ik ya kalimish yikwetay Mwanat kurutu kwa Tatuku?

² Kurutu atanga yom yawonsu, Nzamb wadingaku amwinend mu chisu chakad nsudiel. Chitang chend cha kusambish chadinga chitang cha muspiritu chijikena mudi “Dizu” mulong wadinga Muruu wa Yehova. Yom yawonsu yeza kwikalaku kusutil kudi Dizu. Kupwa, weza pa divu mudi muntu uwanyidina ni kwijikan mudi Yesu Kristu.—Tang Yohan 1:1-3, 14.

³ Yom ik yilondinay Bibil piur pa ndond yikwetay Nzamb ni Mwanat wend? Chafunday ni usu wa spiritu utumbila, kambuy Paul utulejin anch: “Nisotil ing wijikany anch mutu wa muntu wawonsu ndiy Kristu; ni mutu wa mband ndiy ikundj; ni mutu wa Kristu ndiy Nzamb.” (1 Kor. 11:3) Kristu udi mwinshin mwa umutu wa Tatukwend. Umutu ni kuziyil yidi ya usey chakwel kwikala chisambu ni kuburen kanvundangesh pakach pa yitang ya manangu. Ap anch ‘mwi ndiy atanga yom yawonsu’ amwitin kuziyil ku umutu wa Nzamb.—Kol. 1:16.

4, 5. Mutapu ik watongay Yesu piur pa mwikadil wend wa kumulimish Yehova?

⁴ Mutapu ik watongay Yesu piur pa kuziyil ku umutu wa Yehova ni kwez pa divu? Bibil ulondil anch: ‘Yesu Kristu; ndiy wading mu chilik cha Nzamb, pakwez kichindilap kwikal wilikena nend Nzamb mudi chom cha kubwitan, pakwez wilika amwinend, watambula chifu cha kashalapol, wikala mudi antu; ni pakarumukay ndiy wikepisha amwinend, wikal mwin kuziyil ku rufu, inge ku rufu ra pa mutond wa mar.’—Fil. 2:5-8.

⁵ Pa yisu yawonsu, Yesu waziyila nich kwikepish ku rusot ra Tatukwend. Walonda anch: “Kinikutwishap kusal chom ku ulabu wamam amwinam . . . dirumburish diam didi diakin, mulong kinikatilap kusal mudi munisotila, pakwez nisadil mudi musotilay ndiy wantuma.” (Yoh. 5:30, MN) Walonda anch: “Yisu yawonsu nikat kusal yom ya kumusangarish ndiy [Tatukwam],”. (Yoh. 8:29, MN) Piswimp ni nsudiel ya mwom wend pa divu, Yesu walonda mu malembil kudi Tatukwend anch: “Am namekeshin kal uyaj wey pa mangand mulong nawanyishin kal mudimu wanginkisha kusal.” (Yoh. 17:4) Chakin kamu, Yesu kandingap nich mulong ap umwing mu kujingunin ni kwitiyij umutu wa Nzamb piur pend.

Kumuziyil Tatuku Kumuyukishin Mwan

6. Ngikadil ik yipadikena kuwap yamekeshay Yesu?

⁶ Padingay pa divu, Yesu wamekesha ngikadil yipandikena kuwap. Pakach pa ngikadil yiney wamumekeshina Tatukwend rukat rijim nakash. Walonda anch: “Am nimukatil Tatuku”. (Yoh. 14:31) Wamekesha kand rukat rijim mulong wa antu. (Tang Mateu 22:35-40.) Yesu wadinga muntu muwamp ni mwin kubangin, kadingap mwin chisum ap mwin chibud. Walonda anch: “Ezany kudi am, en awonsu uziyinanya mulong wa yisend yikasikena ya mitapu ni mitapu, chad am nikez kakwambulany. Itwikany [mutond wam], wingiyiyany am, chad mipim yen yikwiswedish, mulong am nishimpishin muchim ni kwitudish. Mulong [mutond wam] uswapela kwitwik, ni chisend cham chipipel.” (Mat. 11:28-30, MN) Antu afanikena nich amikoku a yimbu ya mivu yawonsu, pakampwil amena mar, atana dikasikesh dijim mu untu usangareshina wa Yesu ni uruu wend usangareshina.

7, 8. Mu chijil, mipak ya mutapu ik yadingay nich mband mwin musong wa rulong ra mash, ni mutapu ik wasalay Yesu piur pend?

⁷ Shinshikin mutapu wadingay Yesu ni kuyisadil amband. Mu rusangu ra pasak, amakundj avud ayisadila amband nayimp nakash. Chinech chadinga chakin pantaliken ni anyikel a chirelijon mu Isarel wa pasak. Pakwez Yesu wasadila amband nich kalimish. Chinech chimekedin mu yisal yend nich mband umwing wadinga uyedila musong wa rulong ra mash mivu 12. “Ndiy wamana mar nakash” pamwokangau kudi amingang ni washesha yom yend yawonsu yadingay nich chakwel ayerika. Chikalap nchik usu wasalay, “musong wapandakana lel nakash.” Mu chijil, ading amumen wijondila. Muntu mwawonsu ukumupukuna niyend ukwikal wijondila.—In Levi 15:19, 25.

⁸ Pateshay mband winou anch Yesu wading ni kuyeril ayej, wandama mu chisak cha antu adinga amuyingumukina Yesu, walonda anch: “Anch namupukun kusu ku maswin mend, nikuyerik kwam.” Wamupukuna Yesu, ni kapamp kamwing wayerika. Yesu wading wij anch kafanyidinap kupukun ku diswin diend. Pakwez, kamuswejinap bwat. Chinyim ni chinech, wamutesha nich rukat. Watesha mutapu wadingay wovil kupwa kwa mivu yiney yawonsu ya mayej ni wajingunina anch wading usotil nakash kumukwash. Nich ranaken, Yesu wamuleja anch: “Mwan mband, ey wayerik kal mulong wa ritiy rey. Yang kwey nich chisambu musong wey wapwa kal kamu chikupu.”—Mar. 5:25-34, MN.

9. Chisu chasotau in kwilej a Yesu kuyikangesh an kwez kudi ndiy, ov, wakula nchik?

⁹ Ap an atwisha kwiyov nawamp mu kwikal pamwing ni Yesu. Pa chisu chimwing chamuletinau an kudi antu, in kwilej end ayikangesha, atonga chakin anch kakusotap amuvundangesha kudi an. Pakwez Yesu katongap mutapu winou. Rusangu ra Bibil ritulejin anch: “Chad Yesu, chamanay mwamu, wajimana, wayel [in kwilejend] anch: ‘Likany anikanch eza kwau kudi am, kangal wayikangeshany, mulong Want wa Nzamb udi wa antu adia mudi anikanch inay.’” chikwau kand, “Yesu wayisendola anikanch wayanzwok makas umwing umwing mulong wa kuyiyukish.” Yesu kayitiyap ching kusu an, pakwez wayaka nich musangar nakash.—Mar. 10:13-16, MN.

10. Mutapu ik washikenay Yesu ku kwikal nich ngikadil yamekeshay?

¹⁰ Ov, mutapu ik washikenay Yesu ku kwikal nich ngikadil yiney yamekeshay pa chisu cha mwom wend pa divu? Mu mwom wend kurutu ikala muntu, wamushinshikina Tatukwend wa mwiur mu chirung cha mivu yivud ni wileja jinjil jend. (Tang Jinswir 8:22, 23, 30) Mwiur, wamana mutapu ukatay Yehova kusadil nich rukat umutu wend piur pa yitang Yend yawonsu ni wasala wikala iwend. Ov, Yesu wela kutwish kusal mwamu anch kadingap mwin kuziyil? Chading cha musangar kudi ndiy kwikal uziyidila kudi Tatukwend, ni chadinga cha musangar kudi Yehova kwikal nich Mwan mudi winou. Padingay pa divu, Yesu wamekesha mu mutapu uwanyidina ngikadil yipandakena kuwap ya Tatukwend wa mwiur. Chidi cha katumb mudi ik kudi etu kwikal in kumuziyil Kristu, Nyikel wa Want wa mwiur watonday Nzamb!

Imburij Ngikadil ya Kristu

11. (a) Ov, tufanyidin kusal nakash chakwel kumwimburij nany? (b) Mulong wak amakundj afanyidin pakampwil kusal usu nakash chakwel amwimburija Yesu?

¹¹ Antu awonsu adia mu chikumangen, pakampwil amakundj, afanyidin kudandamen kusal nakash chakwel kwimburij ngikadil ya Kristu. Mudi kamu mwafundau, Bibil ulondin anch: “mutu wa muntu wawonsu ndiy Kristu.” Mudi kamu mwimburijay Kristu Mutu wend, Nzamb wakin, amakundj in Kristu afanyidin kusal nakash chakwel kwimburij mutu wau—Kristu. Pashikenay kwikal mwin Kristu, kambuy Paul wasala mwamu. Wayikasikesha ambay end in Kristu anch: “Ingilakejany am mudi niyam munikata kumwilakej Kristu.” (1 Kor. 11:1, MN) Ni kambuy Pita walonda anch: “Chawiy chom chinech chakutazukinanyau kudi Nzamb, mulong Kristu amwinend wamana mar mulong wa kukwambatany en. Ndiy wakushilanya chilakej chakwel ulondulany yom yasalay.” (1 Pita 2:21, MN) Kubabesh kwa kumwimburij Kristu kukwet usey wa pakampwil kudi amakundj mulong wa diyingishil dikwau. Awiy akata kwikal amakurump ap ankwash a mudimu. Mudi kamu mwatanay Yesu musangar mu kumwimburij Yehova, amakundj in Kristu afanyidin kusangar mu kumwimburij Kristu ni ngikadil yend.

12, 13. Mutapu ik ufanyidinau amakurump kuyisadil amikoku alaminau?

¹² Amakurump mu chikumangen cha in Kristu akwet chisend cha kwilej kwikal mudi Kristu. Pita wayikasikesha amapal, ap amakurump anch: “Yilamany yisak ya amikoku a Nzamb akwinkishanyau. Kangal wasalany mulong wakukushindilany, pakwez salany mudi mudia rusot ra Nzamb. Kangal wasalany kusu mulong wa kupit nfalang, pakwez salany nich mushiku. Kangal wayikelany nich usu antu iulaminanya, pakwez ikalany chilik chiwamp kudi yisak ya amikoku a Nzamb.” (1 Pita 5:1-3) Amakurump in Kristu kadingap in kusadishan ku usu, in kuyikel antu ku usu, akad kubangin maswir ma yisak ya amikoku, ap aburedina rukat. Mu kwimburij chilikej cha Kristu, ikasikeshin chakwel kwikal in rukat, in kubangin, ikepishina, ni awamp mu mutapu uyisadidilau amikoku ayinkishinau kulam.

¹³ Antu atakedila mu chikumangen adi amakundj akad kuwanyin, ni afanyidin chisu chawonsu kwijik mupak winou. (Rom 3:23) Chawiy lel afanyidin kwikal nich chirungul cha kwilej piur pa Yesu ni kwimburij rukat rend. Afanyidin kutongijokin pa mutapu ukatay Nzamb ni Kristu kuyisadil antu ni kukasikesh kuyimburij. Pita utukasikeshin anch: “En awonsu, djalany kwitudish, mulong Mukand wa Nzamb ulondin anch: Nzamb uyipompatin in kwibaz, pakwez ukat kuyanaken in kwitudish.”—1 Pita 5:5, MN.

14. Mu chilik ik chifanyidinau amakurump kumekesh kalimish kudi akwau?

¹⁴ Mu kuchisadil kwau chisak cha amikoku a Nzamb, amakundj atondinau mu chikumangen afanyidin kumekesh ngikadil yiwamp. Rom 12:10 (MN) ulondil anch: “Katijanany amwing ni akwau mudi mufanyidinau akadivar kukatijan. Chifanyidin kukasikesh kulimishijan amwing ni akwau.” Amakurump ni ankwash a mudimu akat kumekesh kalimish kudi akwau. Mudi in kristu awonsu, amakundj inay kafanyidinap ‘kusal yom mulong wa kwitong ayinau ap mulong wa kwibaz, pakwez ikepishin, muntu ni muntu umumen mukwau mudi udi muwamp kumupandakanamu.’ (Fil. 2:3) Chakin kamu atakedila afanyidin kuyiman akwau mudi antu ayipandakenamu. Mu kusal mwamu, amakundj inay atondau akulondul chiyul cha Paul anch: “Etu tukasikena mu ritiy tuyikwash aziyina mu ritiy kusend yisend yau. Kangal twisangarish ching kusu ayinetu, bwat. Pakwez etu awonsu tufanyidin muntu ni muntu kumusangarish mwanamakwend mwin Kristu mu yom yiwamp, mulong wa kumukasikesh kukul mu ritiy. Mulong Kristu kisangarishap amwinend.”—Rom 15:1-3.

‘Yilimishany Akajen’

15. Mutapu ik ufanyidinau amakundj kuyisadil akajau?

¹⁵ Shinshikin katat chiyul cha Pita kudi amakundj angatan. Wafunda anch: “Ni yen amakundj kand chawiy chimwing, sokany nau akajen mudi mudia ronganyin, panangany kalimish kudi amband mudi chiwijany anch awiy anipandiken en.” (1 Pita 3:7) Kumulimish muntu kurumburikin kumukwat muntu winou nich usey ujim. Chawiy lel, ukushinshikin yitongijok, maswir, ni yisotilay muntu winou ni kwitiy kusal yisotilay kusal ap anch ukwetap diyingishil dia usey dia kusal mwam. Wawiy mutapu ufanyidinay ikundj kumusadil mukajend.

16. Ov, Dizu dia Nzamb diyinkishin amakundj kubabesh ik piur pa kuyilimish akajau?

¹⁶ Payilejinau amakundj kuyilimish akajau, Pita wawejinaku kubabesh anch: “Chawiy kulembil kwen kukukanganyip.” (1 Pita 3:7) Chinech chimekeshin patok chitongijok chakin cha Yehova piur pa mutapu ukatay ikundj kumusadil mukajend. Kulik kumulimish kukutwish kukangesh malembil mend. Chikwau kand, ov, kadiap amband awonsu akata kusanger kuyilimish kudi anfumwau?

17. Mu chilik cha mutapu ik chifanyidinay ikundj kumukat mukajend?

¹⁷ Piur pa mulong wa kumukat mukajey, Dizu dia Nzamb diyudil anch: “Amakundj ni yau ayikata akajau mudi mijimbu yau ayinau. . . . Mulong kwikiling muntu ukisiling mujimbu amwinend; pakwez ukat kuudish ni kuulam mudi mukat kulamay Kristu chikumbu cha Nzamb . . . Chawiy niyen kand muntu ni muntu amukata mukajend mudi mwikatilay amwinend.” (Efes 5:28, 29, 33) Mu chilik ik chifanyidinau amakundj kuyikat akajau? Paul wafunda anch: “Amakundj, yikatany akajen mudi Kristu chikatilay chikumbu cha Nzamb ni kwipaniku amwinend.” (Efes 5:25) Mwawiy, ikundj ufanyidin kwikal tayad ap kufa mulong wa mukajend, mudi kamu mwasalay Yesu mulong wa akwau. Pamusadidilay ikundj mwin Kristu mukajend nich rukat, nich kalimish, nich kumutesh, pakad kwitongin amwinend, chiswapeling kudi mukajend kuziyil ku umutu wend.

18. Amakundj akwet ukwash ik mu kuwanyish yisend yau mu uruw?

¹⁸ Ov, kuyilimish amband mu mutapu winou kudi kuyit amakundj kusal yom yipandakenamu? Bwat, Yehova kakutwishap ap pakemp kuyit kusal chom chiyipandakenamu. Chikwau kand, atushalapol a Yehova atambwiling usu ujim nakash pa mangand—spiritu utumbila wa Nzamb. Yesu walonda anch: “Anch en lel ayimp wijany mwa kupan yom yiwamp kudi anen, ing lel Tatukwen wa mwiur kakupandikeshimup kupan spiritu utumbila kudi awiy akata kumwit?” (Luka 11:13) Mu malembil mau, amakundj akutwish kwit chinech kusutil ku spiritu, Yehova ukuyikwash mu kuyisadil akwau, kuwejinaku ni akajau.—Tang Midimu. 5:32.

19. Mutu wa mulong wa kwilej ulondwilap ou ukushinshikin yom ik?

¹⁹ Chakin kamu, amakundj akwet chisend chijim cha kwilej mutapu wa kwikal amuziyidila Kristu ni kwimburij umutu wend. Pakwez chidi nchik piur pa amband, pakampwil ambay a uruw? Mutu wa mulong ulondwilap ou ukwisambin pa mutapu ufanyidinau kuman mudimu wau mu ditenchik dia Yehova.

Amband, Mulong Wak Kuziyil Ku Umutu?

“Mutu wa mband ndiy ikundj.”—1 KOR. 11:3.

1, 2. (a) Yom ik yafunday kambuy Paul piur pa kutenchik kwa Yehova kwa umutu ni kuziyil? (b) Yipul ik tukushinshikina mu mutu wa mulong winou?

YEHOVA watenchika yom mu mutapu ulondulijadina wajimbulay kambuy Paul pafunday anch: “mutu wa muntu wawonsu ndiy Kristu” ni “mutu wa Kristu ndiy Nzamb.” (1 Kor. 11:3) Mutu wa mulong wasambela walonda anch Yesu wamana anch chidi cha katumb ni cha musangar kwikal uziyidila ku umutu wend, Yehova Nzamb, ni anch mutu wa amakundj in Kristu ndiy Kristu. Kristu wading muwamp, mwin kwitudish, mwin ranaken, ni wakad kwitongin amwinend padingay ni kuyisadil antu. Amakundj mu chikumangen afanyidin kwikal mutapu winou pantaliken ni akwau, pakampwil ni akajau.

² Pakwez, chidi nchik piur pa amband? Nany udia mutu wau? Paul wafunda anch “Mutu wa mband ndiy ikundj.” Mutapu ik ufanyidinau kuman amband mazu minam mapepidilau? Ov, chijil chinech chisadil anch mbay wa uruw udi muntu wakad ritiy? Ov, kuziyil ku umutu wa ikundj kumwitil mband kwikal mbay wa uruw mwin kuninet, wakad chakulond pa kukwat mipak kanang? Mu mutapu ik ukatau amband kwiletin katumb kudi ayinau?

“Chifanyidin Nimutangil Mwin Kumukwash”

3, 4. Mulong wak ditenchik dia umutu didi dia ukwash mu uruw?

³ Ditenchik dia umutu diadiokala kudi Nzamb. Kupwa kwa kumutang Adam, Yehova Nzamb walonda anch: “Kichiwapilap kudi ikundj kushakam amwinend. Chifanyidin nimutangil mwin kumukwash ukutwisha kushakam nend.” Kupwa kwa kumutang Eve, Adam wasangara nakash pa kwikal nich murund ni nkwash ni walonda anch: “Dined katat didi difup dia mafup mam ni musuny wa misuny yam!” (Dis. 2:18-24, MN) Adam ni Eve ading ni ruchingej ripandakena kuwap ra kwikal tatuku ni maku wa antu a michid yawonsu ya antu awanyidina, akushakama nich musangar chikupu mu paradis pa mangand mawonsu.

⁴ Mulong wa kubwambwil kwa anvaj etu a kusambish, mwikadil wa kuwanyin wa mu chir cha Eden washadika. (Tang Rom 5:12.) Pakwez ditenchik dia umutu disadil ni katat. Anch adilondul nawamp, dikulet chiyukish chijim ni musangar mu uruw. Chibudikin chikwikal chilik chimwing ni mutapu wovay Yesu piur pa kwikal mwin kuziyil ku umutu wend, Yehova. Mu mwom wend wa kurutu ikala muntu, Yesu wasangaranga “kand kurutu kwend [Yehova] machuku mawonsu.” (Jinsw. 8:30) Mulong wa kuburen kuwayin, amakundj katwishiningap yisu yivud kwikal mitu yiwanyidina, ni amband niyawiy katwishiningap kumekesh kuziyil kuwanyidina. Pakwez, anch amakundj ni amband adandamen kusal nawamp mu mutapu utwishinau kusal, ditenchik dined dikutwish kulet musangar ujim nakash mu uruw pa chisu chinech.

5. Mulong wak ufanyidinau ambay a uruw kuta muchim ku chiyul chidia mu Rom 12:10?

⁵ Chakwel kutwish mu uruw chidi cha usey kudi ambay a uruw kusadil chiyul cha Bibil chiyinkishinau in Kristu awonsu anch: ‘Katijanany mudi divar, ulimishijanany muntu ni mukwau.’ (Rom 12:10) Chikwau kand, awonsu aad ikundj ni mband afanyidin kusal usu chakwel ikala “antu adimukina, in kwanakenijan muntu ni mukwau, in kulikishijadin muntu ni mukwau.”—Efes 4:32, MN.

Anch Mbay wa Uruw Kadiap Mwin Ritiy

6, 7. Chibudikin ik chikutwisha kwikalaku anch mband mwin Kristu ukat kumuziyil nfumwend wakad ritiy?

⁶ Chikwikal mutapu ik anch mbay ney wa uruw kadiap kashalapol wa Yehova? Yisu yivud, ikundj kadingap mwin ritiy. Pa chinech, mutapu ik ufanyidinay mband kumusadil? Bibil wakwil anch: “Niyen amband, yiziyilany anfumwen, ap anch amwing a pakach pau kitiyinap nchik dizu dia Nzamb, ukutwishany kuyipwitany ku ritiy pakumanau yisalijok yen yiwamp. En kiukwikalanyap nich kuswir kwa kulond dizu. Mulong awiy akuman yaku yen ya zwang ni kalimish ken.”—1 Pita 3:1, 2, MN.

⁷ Dizu dia Nzamb dimulejin mband kudandamen kumuziyil nfumwend wakad kwikal mwin ritiy. Chaku chend chiwamp chikutwish kumubachik chakwel kushinshikin chom chisadila ikala ni yisal yiney yiwamp. Mudi chibudikin, ikundj ukutwish kushinshikin yitiyij ya mukajend ni kupwa kwitiy amwinend uyakin.

8, 9. Chom ik chikutwishay mband mwin Kristu kusal anch nfumwend wakad ritiy kakwilap nawamp ku chaku chend chiwamp?

⁸ Pakwez, chikwikal nchik anch ikundj wakad ritiy kitiyinap? Bibil umukasikeshin mband mwin ritiy kumekesh ngikadil ya in Kristu chisu chawonsu, chikalap nchik yikokujol yikutwisha kwikalaku. Chilakej, tutangin mu 1 Korint 13:4 anch: “Rukat rikat kushimpish muchim.” Chawiy lel, amband in Kristu awapidil kudandamen kwikal “nich kwikepish kwawonsu ni kwitudish, ni kwishimpish muchim,” kujijaman nich mwikadil wa rukat. (Efes 4:2) Nich ukwash wa usu wa Nzamb—spiritu wend utumbila—chitwishikin kulam ngikadil ya in Kristu ap pikudia mikadidil ya yikokujol.

⁹ Paul wafunda anch: “Nikutwish kusal yom yawonsu mwi ndiy ukata kwinkasikesh am.” (Fil. 4:13) Spiritu wa Nzamb uyitwishishin ambay a uruw in Kristu kusal yom yivud yakadau kutwish kusal pakad ndiy. Chilakej, kumumesh mbay wa uruw mar kukutwish kumubachik umwing kumusal chilik chimwing. Pakwez, Bibil uyilejin in Kristu anch: “Kangal wamufundakeshinany muntu kuyip ku kuyip. . . . Mulong achifunda anch: kufundakesh kuding kudi am; yam nikez kafutan, mwamu mwalonday Mwant [Yehova].” (Rom 12:17-19) Chilik chimwing, 1 Tesalonik 5:15 utuyudil anch: “Talany anch pikil umwing wakafundakeshil mukwau yiyimp ku yiyimp; pakwez londulany yiwapidila machuku mawonsu, umwing ni mukwau, ni kudi awonsu.” Nich ukwash wa spiritu utumbila wa Yehova, yom yakad kutwishik ku usu wetu ayinetu yikadil kal yitwishikina. Chiwapidil mud ik kudi etu kwit spiritu utumbila wa Nzamb chakwel atuwanyishina yom tuburedina!

10. Mutapu ik warishay nich Yesu kulond ni yisal yiyimp ya antu akwau?

¹⁰ Yesu washa chilakej chiwamp mu kuyisadil antu adinga ni kumulond ap kumusal yom yakad kumusangaresh. 1 Pita 2:23, MN, ulondin anch: “Pamusalau masaal, ndiy kayichirishinap. Pamumeshau mar, ndiy kayifunyinap amumesha mar, pakwez ndiy wamuchingeja Nzamb Nkalansambu utentamina.” Atukasikeshin kulondul chilakej chend chiwamp. Kangal kwikal usarumwinau kusutil ku yaku yiyimp ya antu akwau. Mudi kamu muyikasikeshinau in Kristu awonsu, ikalany “ni michim ya riy, ni yitudila. Kangal wafundikeshany kuyip ni kuyip, ap kuchirilan.”—1 Pita 3:8, 9.

Ov, Ambay Kusu Akad cha Kulond?

11. Chisend ik chijim chikwikalau nich amband in Kristu?

¹¹ Ov, kuziyil ku umutu wa ikundj kurumburikin anch amband adi kusu ambay akad cha kulond mu uruw, akad cha kulond mu milong ya dijuku ap mu milong yikwau? Bwat kwau. Amband pamwing ni amakundj ayinkishin yisend yivud kudiay Yehova. Tongin bil pa katumb kajim kakwetau antu 144000 pa kwikalau ant ni in kupesh mwiur mwishin mwa umutakel wa Kristu pakuyikelay pa divu diawonsu! Mu uvud winou mudi kand amband. (Gal. 3:26-29) Chakin kamu, Yehova wayinkishin kal amband mudimu wa kusal mu kutenchik kwend kwa yom.

12, 13. Pan chilakej chimekeshina anch amband adinga ni kubwak.

¹² Chilakej pa chirung cha Bibil, amband adinga ni kubwak. Jowel 2:28, 29 wasambela kulond anch: ‘Nikez kamuzizil spiritu wam padi antu awonsu, ni anen amakundj ni anen amband akez kabwak. . . . Pa chisu chinicha nikez kapan spiritu wam kudi atushalapol ni kudi amilomb.’

¹³ Pakach pa in kwilej a Yesu 120 adinga akumangen mu kapalikany ka piur mu Yerusalem pa dichuku dia Pentekot mu muvu wa 33 C.C. padinga amband ni amakundj. Spiritu wa Nzamb amuzizila pa chisak cha antu inay awonsu. Pawiy lel palonday Pita yom yasambelay muprofet Jowel kulond ni kuyisadil chilik chimwing padiau amakundj ni amband. Pita walonda anch: “Pakwez chinech chawiy chalondilau kudi muprofet Jowel anch: Nzamb ukat kulond anch, mwamu chikeza kikal mu machuku ma kwisudiel, am nikez kamuzizil spiritu wam padi awonsu, anen amakundj ni anen amband akez kabwak . . . Mwawiy padiau atushalapol am ni amilomb am mu machuku minima nikez kayizizil spiritu wam ni awiy akez kabwak yom yakad kal kwez.”—Mid. 2:16-18.

14. Mudimu ik wasalau amband mu kupalangesh kwa Ukristu pakusambish?

¹⁴ Mu chitot cha mivu cha kusambish, amband asala mudimu ujim mu kupalangesh kwa Ukristu. Ayileja antu akwau piur pa Want wa Nzamb ni asala yom yikwatijadina nich mudimu wa kulejan winou. (Luka 8:1-3) Chilakej, kambuy Paul wamutazuka Febe anch “udi mwilomb ku chikumbu cha Nzamb cha ku Kenkrea.” Ni mu kuyipanin ambay nend a mudimu moy, Paul wajimbula uvud kanang wa amband in kushinshaman, kuwejinaku “Trifena ni Trifosa, asadila mudimu mu Mwant.” Wafunda kand anch “Persis mukarukat wasadila mudimu ukash wa Mwant.”—Rom 16:1, 12.

15. Mudimu ik usadilau amband mu kupalangesh kwa Ukristu pa chirungu chetu?

¹⁵ Pa chisu chetu, chikunku chijim cha ma miliyon sambwad ma antu alejena rusangu ruwamp ra Want wa Nzamb pa mangand mawonsu adi amband a yimbu ya mivu yawonsu. (Mat. 24:14) Avud pakach pau ading atushalapol a chisu chawonsu, amishoner, ni yid ya dijuku dia Betel. Nfund a kuseng David wawanga anch: “Nsalejetu [Yehova] walonda dizu, chad chisak chijim cha amband, awiy apalangesha rusangu ruwamp.” (Kus. 68:12, MN) Mazu minam mamekana kwikal makin mudi ik! Yehova ukwatin nich usey mudimu usadinau amband mu kulejan rusangu ni kuwanyish ntong jend. Kuyit kwend aband kwikal in kuziyil chakin kamu kurumburikinap kumuyikel pakad ndiy kwikal nich chakulond.

Amband Aad Alonda

16, 17. Mutapu ik umekeshina chilakej cha Sara anch amband kadiap ambay akad cha kulond mu uruw?

¹⁶ Anch Yehova uyinkishin amband yisend yivud, ov, ikundj kakutwishap kwisamb ni mukajend kurutu kwa kukwat mipak yijim? Chikwikal cha manangu ku mutambu wau kusal mwamu. Bibil ujimbwil milong yivud yayisala amband alonda ap kusal yom kanang pakad ap kuyilej kusal mwamu kudi anfumwau. Tushinshikina yilakej yaad.

¹⁷ Sara, mband wa nshankur Aburaham, wadandamena kumulej amwopata mukajend wa kaad ni mwanend mulong wa kuburen kwau kwa kalimish. “Chom chinech chamukasikena Aburaham nakash,”—pakwez kudi Nzamb bwat. Yehova wamuleja Aburaham anch: “Kangal wiswil kwey mulong wa mwan winou, ni mwilomb wey Hagar. Tesh kwey yom yawonsu yikukulejau kudi Sara uyisadila.” (Dis. 21:8-12) Aburaham wamuziyila Yehova, wamutesha Sara, ni wasala yom yamulejay kusal.

18. Yom ik yasalay Abigayil?

¹⁸ Tongijokin kand piur pa Abigayil, mukajend a Nabal. Padingay David ni kumuchin Mwant Saul mwin ris, wasutisha chisu mu chibeng piswimp nich ndond yadinga chisak cha amikoku enday Nabal. Pandond pa kukwatap yimwing ya yivam yivud ya ikundj winou mpich, David ni amakundj end ayilama nawamp. Pakwez, Nabal “wadinga muntu uswejina nakash. Wadinga kand muntu muyimp,” ni ‘wayiswejina’ aruu a David. Wandinga “chisup,” ni ‘wadinga nich usup.’ Pamwitau nich kalimish aruu a David yom, Nabal walika. Abigayil wasala nchik pateshay yom yashikena? Pakad kumulejamu Nabal, “watambula swa swa mitand ya mabot yitot yaad, ni ansab aad a maar ma nviny, ni amikoku atan akusay nawamp, ni yilik yitan ya kabak wa kwosh ni yizakas chitot ya mabot ma nfung matal yitot yaad” ni wayinkisha aruu a David ni atushalapol end. Ov, Abigayil wasala chom chiwamp? Bibil ulondin anch, ‘Yehova wamubula, chad wafa.’ Kupwa David wamwata Abigayil.—1 Sam. 25:3, 14-19, 23-25, 38-42, MN.

‘Amband Aletina Katumb’

19, 20. Yom ik yisadila chakwel ayishimana amband?

¹⁹ Bibil uyishimen amband awonsu asadila yom mwi njil ya Yehova. Buku wa Bibil wa Jinswir umushimen “mband wa kashinsh,” ulondin anch: “Usey wend upandaken kujimb kwa mayal ma usey ukash. Muchim wa nfumwend uchingejin mwi ndiy, ikundj winou kakuburenap kwisak chom. Mu machuku mawonsu ma mwom wend ukat kumusadil nfumwend kuwap, wakad kusadil kuyip.” Chikwau kand, “ndiy ukat kwasul kan kend nich manangu, ni malejan ma kudimuk madi ku rudim rend. Ndiy ukat kutal nawamp ku yaku ya antu a mu dijuku diend. Ndiy kakudiangap yakudia ya usweral. Anend akat kutumbuk ni kumujikitish, ni kulond ya kuyuk kwend, ni nfumwend niyend ukat kumushiman.”—Jinsw. 31:10-12, 26-28.

²⁰ Yom ik yisadila chakwel ayishimana chakin kamu amband? Jinswir 31:30 jilondil anch: “Yaku ya rulemb yidi makasu, ni ufun udi chom chamwamu, pakwez mband mwin kumwov [Yehova] wom akat kumushiman.” Mu kumwov Yehova wom mudi kand maswir ma kuziyil kwa kwikatil ku ditenchik dia Nzamb dia umutu. “Mutu wa mband ndiy ikundj,” mudia kamu “mutu wa muntu mwawonsu ndiy Kristu,” ni “mutu wa Kristu ndiy Nzamb.”—1 Kor. 11:3.

Ikal Mwin Kujikitish Mulong wa Chipan cha Nzamb

21, 22. (a) Mayingishil ik makwetau ambay a uruw in Kristu chakwel kujikitish mulong wa chipan cha Nzamb cha uruw? (b) Mulong wak tufanyidin kumekesh kalimish mulong wa ditenchik dia Yehova dia wintakel ni umutu? (Tal mushet.)

²¹ Ambay a uruw in Kristu akwet mayingishil mavud mudi ik ma kumujikitish Nzamb! Akutwish kwend akwatijadina ku makas mudi ambay a uruw in musangar. Pakampwil akutwish kujikitish mulong wa chipan chiyinkishinau kudi Nzamb cha uruw mulong chiyinkishin mutapu wa kunung mwom wau pamwing ni kwend pamwing nend Yehova. (Rut 1:9; Mike 6:8) Ndiy—Sakatang wa uruw—wij nawamp yom yiswiridina mulong wa uruw wa musangar. Chisu chawosu sal yom mwi njil yend, ni ‘musangar wa Yehova yawiy mpwembu yen,’ ap kand mu machuku ma kanvundangesh pa mangand.—Neh. 8:10.

²² Ikundj mwin Kristu umukatina mukajend mudi mwikatilay amwinend ukusadil umutu nich rukat ni kalimish. Ukumukatish chakin kamu mukajend mwin kumusadil Nzamb, mulong ukumukwash ni ukumumekeshin kalimish kajim. Cha usey kupandakanamu yawonsu, chilakej chau mu uruw chikumushiman, Nzamb wetu wa kushiman, Yehova.