BIBLIOTEK Udia pa Kapend
BIBLIOTEK
UDIA PA KAPEND
Uruund
  • BIBIL
  • MIKAND
  • YIKUMANGAN
  • Risu Rutong ra Nzamb Piur pa Divu?
    Chom ik Chakin Kamu Chifundishinay Bibil?
    • SHAPITRE WA KASATU

      Risu Rutong ra Nzamb Piur pa Divu?

      • Risu rutong ra Nzamb piur pa antu?

      • Mutapu ik wamusarumunau Nzamb?

      • Ov, mwom ukez kwikal mutapu ik pa divu mu machuku ma kurutu?

      1. Risu rutong ra Nzamb piur pa divu?

      RUTONG ra Nzamb piur pa divu ridi chakin kamu riwamp nakash. Yehova usotil anch divu dizula too ni antu akweta musangar, ni ukash wa mujimbu. Bibil ulondil anch “Nzamb wadima chir kwingangel mu Eden” ni “waminyisha mitond ya pansh ya mitapu yawonsu yiwapila kutal ku mes, ni yiwapila kand kudia.” Kupwa Nzamb wamutanga ikundj ni mband a kusambish, Adam ni Eve, Wayiteka mwi ndond yiney yisangareshina ni wayela anch: “Valijanany, vulijanany, shakamany, izwishany ngand ni kuyiziyish.” (Disambishil 1:28; 2:8, 9, 15) Komb radinga rutong ra Nzamb anch antu avala an, atandurila mimbu ya chir chinech pa divu diawonsu, ni kuyilam annam.

      2. (a) Mutapu ik twija anch rutong ra Nzamb piur pa divu rikez kuwanyin? (b) Chom ik chilondila Bibil piur pa kushakam chikupu kwa antu?

      2 Ov, utongin anch rutong ra Yehova Nzamb mulong wa antu kushakam pa divu didia paradis rikez kuwanyin? “Yawonsu yinalonda,” mwamu mulondilay Nzamb, “yikez kasadik.” (Isay 46:9-11; 55:11) Mwaning, chitonginay Nzamb chawiy chikezay chakin kamu kusal! Ndiy ulondil anch “kamatangap kwikal ndond yamwamu” pakwez “wamatanga chakwel antu ashakamamu.” (Isay 45:18) Antu a mulad ik asotay Nzamb anch ashakam pa divu? Ni wasota anch ashakam pa divu mivu yinch? Bibil wakwil anch: “Mwin kutentam ukez kaswan ngand, ukez kashakamamu chikupu.”—Kuseng 37:29; Kujingunik 21:3, 4.

      3. Mikadil ik ya ushon yidia katat pa divu, ni yilangwishin yipul ik?

      3 Chakin kamu, chom chinech kand kal chiwanyina bwat. Katat antu akat kuyel ni kufa; akat kutend ni kujipijan umwing ni mukwau. Kudi chom chayipa. Chakin kamu, rutong ra Nzamb radingap anch divu dikala mutapu mutudimena nlel unou! Chom ik chasadika? Ov, mulong wak rutong ra Nzamb rawanyinap? Kwikil buku ap umwing wa rusangu ra muntu wafundau kud muntu ukutwisha kutulej mulong wak matat masambishina mwiur.

      DISAMBISHIL DIA MUKANKUNY

      4, 5. (a) Nany walonda chakin nenday Eve kusutil kud nnak? (b) Ov, chitwishikin nchik anch muntu wadinga pa kusambish wa kashinsh ni wakin ikala mwij?

      4 Mukand wa kusambish wa Bibil wisambidin piur pa mwin kumubwambwil Nzamb wamekana mu chir cha Eden. Amurumburil mud “nnak,” pakwez kadingap nnam wa chamwamu. Mukand wa nsudiel wa Bibil umujingunin mud “upidilau anch Djabul ni Satan, sakudimban wa ngand ya kabuj.” Amutazukin kand anch “nnak mukur.” (Disambishil 3:1; Kujingunik 12:9) Mwangel winou wa usu, ap anch chitang cha muspiritu chakad kumekan, chamusadila nnak mulong wa kwisamb nenday Eve, mud musadilingay muntu mwin manangu ukutwisha kusal chimekan mud anch dizu diend dibudikin mu chirumbidij chidia piswimp ap. Muntu winou wa muspiritu wadingap chisu charijekay Nzamb divu mulong wa antu.—Job 38:4, 7.

      5 Yitang yawonsu ya muspiritu ya Yehova yading yiwanyidina, chad nany, wamusala “Djabul” winou, “Satan” winou? Mu kulond kuswapela, umwing wa an a Nzamb a muspiritu akweta usu wisala amwinend Djabul. Mutapu ik? Inge, nlel muntu wadinga mwin kashinsh ni wa uyakin ukutwish wikal mwij. Chikat kushikenang mutapu ik? Muntu ukutwish kulikin chitongijok chiyimp chipama mu muchim wend. Anch wadandamen kutongijokinap, chitongijok chiyimp chinech chikukul nakash. Chad anch mutapu wamekan, ukutwish wasadil chitongijok chiyimp chadiay ni kutongin.—Jakobu 1:13-15.

      6. Mutapu ik washikenay mwan a Nzamb wa muspiritu mwin usu ukash kwikal Satan Djabul?

      6 Chawiy chashikena ku mutambu wa Satan Djabul. Chimeken anch wamutesha Nzamb pamulejay Adam ni Eve anch avala an ni kwizwish divu nich anau. (Disambishil 1:27, 28) ‘Antu inay awonsu afanyidin kwingifukwil am pa ndond pa kumwifukwil Nzamb!’ Chakin kamu mwamu mwatongay Satan. Chawiy lel chitongijok chiyimp chasambisha kukul mu muchim wend. Kwisudiel, ndiy wamudimba Eve nich kumulej makasu piur pa Nzamb. (Disambishil 3:1-5) Chad wikala “Djabul,” charumburik anch “Mwin kudimban makasu.” Mu chisu chawiy chimwing, wikala “Satan,” charumburik “Mwin kubwambwil.”

      7. (a) Ov, mulong wak Adam ni Eve afa? (b) Mulong wak an awonsu a Adam akat kunanap ni kufa?

      7 Kusutil ku kusadil makasu ni kadimbadimb Satan Djabul wamushikija Adam ni Eve ku kumubwambwil Nzamb. (Disambishil 2:17; 3:6) Mud chibudikin, afa chakin kamu, mud mwayilejau kud Nzamb anch akufa ang abwambwil. (Disambishil 3:17-19) Mulong Adam wikala wakad kuwanyin pasalay chitil, anend awonsu aswana chitil kud ndiy. (Rom 5:12) Tukutwish kufanikesh mwikadil winou nich mpan mujim wa kwoshin mikat. Anch mpan ukwet kapad (ulim) kanang, chikwikal nchik ku dibot din diawonsu dikoshinau mwi mpan winou? Dibot ni dibot dikwikal nich kapad, ap dikwikal nich ulim. Chawiy chimwing kand, muntu ni muntu waswana “kapad” ka kuburen kuwanyin kudiay Adam. Chawiy chikatau antu awonsu kunanap ni kufa.—Rom 3:23.

      8, 9. (a) Kusarumun ik kwasambishay Satan? (b) Ov, mulong wak Nzamb walikay kuyishesh kamu pinipa antombuj inay?

      8 Satan payishikijay Adam ni Eve ku kusal chitil kurutu kwa Nzamb, wasambisha chakin kamu wintombuj. Wapipeja mutapu wa kuyikel wa Yehova. Chakin kamu, Satan walonda anch: ‘Nzamb udi nyikel muyimp. Ulondil makasu oku wayikish lel antwend yom yiwamp. Antu kaswiridinap kwau kwikal mwishin mwa winyikel wa Nzamb. Akutwish ayinau kwikwatin mipak ya chidia chiwamp ni chidia chiyimp. Ni akwikal nawamp kamu mu winyikel wam.’ Ov, mutapu ik welay kwakul Nzamb ku kumupipej kwinoku kwa masaal? Antu amwing atongining anch Nzamb wading ufanyidin kuyijip kamu antombuj inay. Ov, chinech chela kwakul ku kusarumun kwa Satan? Ov, chela kumekesh anch winyikel wa Nzamb utentamin?

      9 Chovil chiwanyidina cha kutentam kwa Yehova chamubachikap kuyijip kamu antombuj pinipa. Wakwata mupak anch kuswiridikin chisu mulong wa kwakul ku kusarumun kwa Satan mwi njil yimwing yiwamp ni chakwel kumekesh anch Djabul udi mukamakasu. Chawiy Nzamb wakwata mupak wa kuyishil antu ndond ya kwiyikel ayinau mu chisu kanang mwishin mwa usu wa Satan. Tukwisambin mu Shapitre wa 11 wa buku winou mulong wak wasalay Yehova mwamu ni mulong wak washay chisu chilemp mwamu chisuta kurutu kwa kupwish milong yiney. Pakwez, katat, chiwapidil kutongin pa chom chinech: Ov, Adam ni Eve adinga afanyidin kumwitiyij Satan, muntu wadinga kand kal ayisadilap chom chiwamp ap chimwing? Ov, chadinga chitentamina ku mutambu wau kwitiyij anch Yehova, muntu wayinkisha yom yawonsu yadingau nich, ikala mukamakasu mwin chisum? Ang yeya wadingap, ov, wela kusal nchik?

      10. Mutapu ik ukutwisha kukwatikesh mutambu wa Yehova mu kwakul ku kusarumun kwa Satan?

      10 Chiwapidil kutongin pa yipul yiney mulong muntu ni muntu pakach petu urishin nich milong ya chilik chimwing nlel. Mwaning, ukwet mutapu wa kukwatikesh mutambu wa Yehova mulong wa kwakul ku kusarumun kwa Satan. Ukutwish kumwitiyij Yehova mud Nyikel wey ni kukwash kumekesh anch Satan udi mukamakasu. (Kuseng 73:28; Jinswir 27:11) Cha ushon, ching kusu antu akemp pakach pa tutikit ni tutikit twa antu adia mu mangand awiy asadila mwamu. Chinech chilangwishin chipul chimwing chijim, Ov, chakin kamu Bibil ufundishin anch Satan uyikedil mangand minam?

      NANY UYIKEDILA MANGAND MINAM?

      Satan umulejin Yesu mant mawonsu ma mangand

      Mutapu ik Satan wamwinkishay Yesu mant mawonsu anch mant minam kimadingap mend?

      11, 12. (a) Choziu cha Yesu chimekeshin nchik anch Satan udi nyikel wa mangand minam? (b) Yom ik yikwau yimekeshina anch Satan udi nyikel wa mangand minam?

      11 Yesu kidjidjekap anch Satan ndiy nyikel wa mangand minam. Mu mutapu umwing wa chishimushimu, dichuku dimwing Satan wamuleja Yesu “mant mawonsu ma mangand ni uyaj wau.” Kupwa Satan Wamwela Yesu anch: “Yom yiney yawonsu nikukwinkish kwey, anch wawa pansh wangifukwil am.” (Mateu 4:8, 9; Luka 4:5, 6) Tongap bil. Ov, chipan chinech chela kwikal choziu kud Yesu anch Satan kadingap nyikel wa mant minam? Yesu katadikap anch mant minam mawonsu ma mangand madi ma Satan. Chakin kamu, Yesu wela kusal mwamu anch Satan kadingap nich usu pa mant minam.

      12 Chakin kamu, Yehova udi Nzamb Mwin Dikand Diawonsu, Sakatang wa mangand mapandakena kuwap. (Kujingunik 4:11) Chikwau kand, kwikil ndond ap yimwing mu Bibil yilondilau anch Yehova Nzamb ap Yesu Kristu udi nyikel wa mangand minam. Pakwez, Yesu wisambina cha pakampwil piur pa Satan mud “mwant wa mangand minam.” (Yohan 12:31; 14:30; 16:11) Bibil wisambidin Satan Djabul mud ‘nzamb wa mangand minam.’ (2 Korint 4:3, 4) Kambuy mwin Kristu, Yohan wafunda piur pa ntombuj winou, ndiy kamu Satan anch: “Ngand ya kabuj yidi mu chikas cha Satan.”—1 Yohan 5:19.

      MUTAPU UKEZAU KUDIOSH MANGAND MA SATAN

      13. Mulong wak kuswiridikina mangand masu?

      13 Mu kusut kwa muvu ni muvu, mangand mayil kamu mu kwikal ma ubaj nakash. Mizwil too nich amasalay in kwas njit, anyikel a chipolitik in makasu, antakel a marelijon akweta rilemb, ni in kujipan achinchikina michim. Chikasiken nakash kutenchikiril mangand mawonsu. Bibil ulejen anch chisu chikezay Nzamb kushesh mangand mijondila pa njit jend ja Armagedon chidi piswimp. Mangand minam akez kumaswinkan kud mangand masu matentamina.—Kujingunik 16:14-16.

      14. Nany watonday kal Nzamb Kwikal Nyikel wa Want Wend, ni mutapu ik wachibwakau?

      14 Yehova Nzamb wamutonda kal Yesu Kristu kwikal Mwant wa Want Wend wa mwiur, ap anch winyikel. Pakur, Bibil wabwaka anch: “Kud etu kwavadikin kal mwan, atwinkish kal mwan ikundj: ni winyikel ukez kwikal pa chikij chend: ni akez kumupil dijin anch . . . Mwan a Mwant wa Chisambu. Kuyikel kwend kukez kadandamen kujimb ni kukez kwikalap nsudiel ya chisambu.” (Isay 9:6, 7, NW) Piur pa winyikel winou, Yesu wayifundisha in kwilejend kulembil anch: “Want wey weza. Rusot rey arusala pansh mudi mwiur.” (Mateu 6:10) Mud mutapu tukumana kurutu oku mu buku winou, Want wa Nzamb ukez kudiosh katat kamu ak winyikel wawonsu wa mangand minam, ni awinau ukez kuuswinkan wawonsu. (Daniel 2:44) Want wa Nzamb ukez kayikel pa divu dikwikala paradis.

      MANGAND MASU MADI PISWIMP!

      Antu awangin ni abudin yisaj pasangaredinau mwom mu mangand masu

      15. “Ngand yisu” chom ik?

      15 Bibil utwinkishin kashinsh anch: “Pakwez etu tutadil ku maur masu ni ngand yisu, mudi mulondila kushilimu kwend [Nzamb], kukusokau in kutentam.” (2 Pita 3:13; Isay 65:17) Yisu yimwing pakatay Bibil kwisambin piur pa “ngand,” chirumburikin anch antu ashicha pa divu. (Disambishil 11:1) Komb “ngand yisu” yitentamina chidi chisak cha antu itiyikina kud Nzamb.

      16. Chisu chipan chipandakena kujimb cha Nzamb kud antu itiyijinay, ni yom ik tufanyidina kusal mulong wa kuchitambul?

      16 Yesu washilamu anch mwi ngand yisu yezina, antu itiyikina kud Nzamb akez katambul chipan cha ‘mwom wa chikupu.’ (Marko 10:30) Buril amboku Bibil ku Yohan 3:16 ni Yohan 17:3, ni tang yalonday Yesu anch tufanyidin kusal mulong wa kutambul mwom wa chikupu. Katat, shinshikin mu Bibil umana yiyukish yikezau kwikal nich antu awanyishina yitinau chakwel kutambul chipan chinech chipandakena kuwap cha Nzamb mu Paradis wezina pa divu.

      17, 18. Mutapu ik tukutwisha kwikal nich kashinsh anch kukez kwikal chisambu ni diking pa divu diawonsu?

      17 Uyimp, njit, kujipan, ni chisum yikez kwikalakwap chikupu. “Antu ayimp kakwikalikup kand . . . Pakwez itudishila akez kaswan ngand.” (Kuseng 37:10, 11) Kukez kwikal chisambu mulong ‘Nzamb ukez kukatwish njit ni kwisudiel ya mangand.’ (Kuseng 46:9; Isay 2:4) Chad lel “Atentamina akashakam nawamp, kukwikal chisambu mwi ngand chikupu ni kushik ngond kakwikalikup kand”—charumburik anch chikupu!—Kuseng 72:7.

      18 In kumwifukwil Yehova akez kushakam mu diking. Mud muchadinga kudiau in Isarel amuziyila Nzamb pa yirung ya Bibil, ashakama mu diking. (In Levi 25:18, 19) Chikez kwikal cha musangar mud ik kwikal nich diking dia chilik chimwing mu Paradis!—Isay 32:18; Mike 4:4.

      19. Mutapu ik twija anch kukez kwikal yakudia yivud mu mangand masu ma Nzamb?

      19 Kukezap kwikal kamungun. “Kukwikal mbut yivud mwi ngand,” mwamu mwawangay nfund-a-kuseng. “Ni mitu ya mbut yikazengamin mu yir pa mukandu.” (Kuseng 72:16) Yehova Nzamb ukez kayiyukish antwend atentamina, ni ‘chakin kamu divu dikez kasongish mabuj mad.’—Kuseng 67:6.

      20. Ov, mulong wak tukweta kashinsh anch divu diawonsu dikez kwikal paradis?

      20 Divu diakabuj dikez kwikal paradis. Yikumbu ya ufun ni yir yiwamp yikez kaswinkan mwi ngand yasheshau kud akayitil. (Isay 65:21-24; Kujingunik 11:18) Mu kusut kwa chisu, yikunku ya divu yitenchikinau kal yikez kutandurik djat ni pakwikadila ngand yawonsu ya ufun ni yisongishina mud mwadinga chir cha Eden. Ni Nzamb kakezap kukangany ‘kuburil chikas chend ni kuwanyish rusot ra chom chawonsu chikweta mwom.’—Kuseng 145:16.

      21. Chom ik chimekeshina anch kukez kwikal chisambu pakach pa antu ni annam?

      21 Kukez kwikal chisambu pakach pa antu ni annam. Annam a mwisuku ni yivam awonsu akez kadil pamwing. Ap mwan mukemp kakezap kuyov annam adia katat ayidiany wom.—Isay 11:6-9; 65:25.

      22. Yom ik yikeza kushiken mayej?

      22 Mayej makez kwikalakwap. Chidiay Nyikel wa Want wa mwiur wa Nzamb, Yesu ukez kwokan mu chilik chijim nakash kupandakanamu yasalay padingay panap pansh. (Mateu 9:35; Marko 1:40-42; Yohan 5:5-9) Chad lel “Kwikil muntu ap umwing ukeza kulond anch: ‘Niyedil.’”—Isay 33:24; 35:5, 6, NW.

      23. Ov, mulong wak disanguk ditwinkishin musangar mu michim yetu?

      23 Akatish afa kal akez kuyichirish ku mwom nich ruchingej rakad kwez kufa kand. Awonsu alela mu rufu adia mu manangu ma Nzamb akez kuyisangul. Chakin, “antu awamp ni antu ayimp akez kavumbuk kwikal kand aom.”—Midimu 24:15, MM; Yohan 5:28, 29.

      24. Ov, wiyovil nchik piur pa kushakam mu Paradis pa divu?

      24 Madi machuku ma kurutu masangareshina mud ik mayichingedina antu atondina kwilej piur pa Sakatang wetu Mujim, Yehova Nzamb, ni kumusadil! Yesu wisambina piur pa Paradis wa kurutu ukeza kwikal divu pamukanay mukayitil wafay nend pamwing anch: ‘Ukez kwikal ni yamam mu Paradis.’ (Luka 23:43) Chidi cha usey nakash anch twileja yom yivud padi Yesu Kristu, mulong kusutil kud ndiy kwawiy tukutwisha kutambwil yiyukish yiney yawonsu.

      CHIFUNDISHINAY BIBIL

      • Kushilamu kwa Nzamb mulong wa kwikadish divu Paradis kukez kuwanyin.—Isay 45:18; 55:11.

      • Satan uyikedil katat mangand minam. —Yohan 12:31; 1 Yohan 5:19.

      • Mu mangand masu mezina, Nzamb ukez kuyinkish antu yiyukish yivud.—Kuseng 37:10, 11, 29.

  • Want wa Nzamb Chom Ik?
    Chom ik Chakin Kamu Chifundishinay Bibil?
    • SHAPITRE WA CHINAN

      Want wa Nzamb Chom Ik?

      • Bibil utulejin yom ik piur pa Want wa Nzamb?

      • Yom ik Yikeza Kusal Want wa Nzamb?

      • Want ukez kusadish rusot ra Nzamb pa divu chisu ik?

      1. Malembil ik mijikena nakash tukushinshikina?

      TUTIKIT twa antu mu mangand mawonsu ij nawamp malembil makatau antu avud kutazuk anch Malembil ma Tatukwetu, ap anch Malembil ma Nsalejetu. Mazu minam maad misambidin malembil mijikena matwinkishau mud nsampul kud Yesu Kristu amwinend. Madi malembil mamwing marumburikina yom yivud, ni kushinshikin kwa yom yisatu ya kusambish yitinau kukez kukukwash kwilej yivud piur pa chifundishinay chakin kamu Bibil.

      2. Yom ik yisatu yayifundishay Yesu in kwilejend kulembil?

      2 Kwinsambishil kwa malembil minam ma nsampul, Yesu wayileja in kumutesh anch: “Chawiy pa chinech lembilany anch: ‘Tatukwetu udia mwiur, Dijin diey aditumbish. Want wey weza. Rukat [rusot] rey arusala pansh mudi mwiur.’” (Mateu 6:9-13) Yirumburikin ik yom yiney yisatu?

      3. Chom ik tuswiridina kwijik piur pa Want wa Nzamb?

      3 Twilejin kal yivud piur pa dijin dia Nzamb, Yehova. Ni mu mutapu umwing twisambidin rusot ra Nzamb—yasalay kal ni yikezay kuyisadil antu. Chom ik chadingay ni kwisambin Yesu patufundishay kulembil anch: “Want wey weza”? Want wa Nzamb chom ik? Mutapu ik ukeza kutumbish dijin dia Nzamb, ap anch kudisal ditumba? Ni kwez kwa Want kwambaten mutapu ik nich kusal rusot ra Nzamb?

      CHIDIA WANT WA NZAMB

      4. Want wa Nzamb chom ik, ni nany udia Mwant?

      4 Want wa Nzamb udi winyikel utenchikinau kud Yehova Nzamb ukweta Mwant watondau kal kud Nzamb. Nany udia Mwant wa Want wa Nzamb? Yesu Kristu. Yesu chidiay Mwant udi mujim kuyipandakanamu anyikel awonsu a ukauntu ni amutazukin anch “Mwant wa ant, Nsalej wa ansalej.” (1 Timote 6:15) Ukwet dikand dia kusal yom yiwamp kumupandakanamu nyikel wa ukauntu ap wisu, ap in adia awamp pakach pau.

      5. Want wa Nzamb uyikedil kwisu, ni uyikedil pa chom ik?

      5 Want wa Nzamb ukez kuyikel kwisu? Mwaning, kwisu kudiay Yesu? Ukutwish kuvurik anch wileja kal anch amujipina pa mutond wa mar, ni kupwa amusangula. Chisu chikemp kusu, wakandama mwiur. (Midimu 2:33) Komb, kwawiy kwinikwa kudia Want wa Nzamb—mwiur. Chawiy chikatau kuutazuk mu Bibil anch ‘want wa mwiur.’ (2 Timote 4:18) Ap anch Want wa Nzamb udi mwiur, ukez kuyikel pa divu diawonsu.—Kujingunik 11:15.

      6, 7. Chom ik chimwikadishina Yesu Mwant wa pakampwil?

      6 Chom ik chimwikadishina Yesu Mwant wa pakampwil? Cha kusambish, chidi anch kakezap kufa. Mu kumwilikej Yesu nau ant a ukauntu, Bibil umutazukin anch ‘ndiy kusu udia ni mwom wakad kufa, ushich mu kutok kwakad kutwish antu kushejin piswimp.’ (1 Timote 6:16) Charumburik anch yom yawonsu yiwamp yikezay kusal Yesu yikez kushal chikupu. Ni ukez kusal yom yijim ni yiwamp.

      7 Shinshikin uprofet unou wa Bibil piur pa Yesu: ‘Spiritu wa Yehova ukez kashakam pad ndiy, spiritu wa manangu ni kujingunin, spiritu wa chiyul ni dikand, spiritu wa ronganyin ni wa kumwov Yehova wom; ni ukez kusanger mu kumuziyil Yehova. Ndiy kakez karumburishap kwa kutatish, ap kwa kutesh kulondol kwa antu. Chad ukez kayirumburish atuzwendj nich kutentam, ni ukez kayilondil ayimanamar wakad kasolikany.’ (Isay 11:2-4) Mazu minam mamekeshin anch Yesu ukez kwikal Mwant utentamina ni ukweta riy piur pa antu adia pa divu. Ov usotil kwikal ni nyikel mud winou?

      8. Anany akeza kuyikel nend Yesu?

      8 Tukwet kand uyakin ukwau piur pa Want wa Nzamb: Yesu kakezap kuyikel amwinend. Ukez kwikal nau answan-mulapu. Chilikej, kambuy Paul wamuleja Timote anch: ‘Anch twisum tukez kuswan kand nend mud ant.’ (2 Timote 2:12) Mwawiy, Paul, Timote, ni antu akwau ashinshamena atondau kud Nzamb akez kuyikel pamwing nend Yesu mu Want wa mwiur. Ov adi antu inch akeza kwitapil dilau dined?

      9. Antu inch akeza kuyikel nend Yesu, ni chisu ik chasambishay Nzamb kuyitond?

      9 Mud mutapu walejanangau patok mu Shapitre wa 7 wa buku winou, kambuy Yohan wamana chishimushimu ni wamumana “Mwan a mukoku [Yesu Kristu] wiminy ku mukandu wa Zion [mwikadil wend wa winyikel wa mwiur], ni antu katikit ni tutu tunying ni tunan tunying adingau nend, akwet dijin diend ni dijin dia Tatukwend amafundil pa mpal pau.” Adi anany in 144 000? Yohan amwinend utulejin anch: “Inang awiy adia ni kumulondul Mwan a mukoku kwawonsu kwadingay ni kuya. Inang awiy adioshauku kal mukach mwa antu kwikal mabuj ma kusambish kudi Nzamb ni kudi Mwan a mukoku.” (Kujingunik 14:1, 4) Mwaning, inay adi in kwilej ashinshamena a Yesu Kristu atondau pakampwil mulong wa kuyikel nend mwiur. Kupwa kwa kuyisangwil ku mwom wa mwiur, “akez kuyikel pa mangand” pamwing nend Yesu. (Kujingunik 5:10, MM) Kusambish pa machuku ma atwimbuy, Nzamb watonda kal in Kristu ashinshamena chakwel kuwanyish uvud wa 144 000.

      10. Ov, mulong wak didi ditenchik dia rukat anch Yesu nau antu 144 000 ayikela piur pa antu?

      10 Ditenchik dia kwel anch Yesu nau antu 144 000 ayikela pamwing pa antu didi chakin kamu dia rukat. Cha kusambish, chidi mulong Yesu wij chidinga kwikal muntu ni kuman mar. Paul walonda anch “kitukwetip mwin kupesh wa pa mutu wakad kutwish kutwovil riy mu kuziy kwa michim yetu; mulong ndiy watondilau kumwoz mu yawonsu mudi mutudia etu, pakwez ndiy kakwetip chitil.” (Hebereu 4:15; 5:8) Answanend niyawiy amana mar ni ajijamana padingau antu. Chikwau kand, ara tutaku nich kuburen kuwanyin ni kurish nich mayej ma milad ni milad. Chakin kamu, akez kutesh milong yikatau kwikonk nich antu!

      YOM IK YIKEZA KUSAL WANT WA NZAMB?

      11. Ov, mulong wak Yesu walonda anch chiyifanyidin in kwilejend kulembil chakwel rusot ra Nzamb risadika mwiur?

      11 Palonday Yesu anch in kwilejend afanyidin kulembil chakwel Want wa Nzamb weza, ndiy walonda kand anch afanyidin kulembil chakwel rusot ra Nzamb risadika “pansh mudi mwiur.” Nzamb udi mwiur, ni rusot rend akat kurisal kwinikwa kud angel ashinshamena. Mu Shapitre wa 3 wa buku winou, twilejin anch mwangel umwing muyimp walika kusal rusot ra Nzamb ni wamushikija Adam ni Eve ku kusal chitil. Mu Shapitre wa 10, tukez kwilej yom yivud yifundishinay Bibil piur pa mwangel winou muyimp, twija anch Satan Djabul. Satan pamwing ni yitang ya muspiritu yatonda kumulondul—yitazukinau anch ayilembil—ayishilaku chisu cha kushakam mwiur mu kachisu kanang. Chikalap nchik mwamu, kwikil ap umwing wau mwiur wadinga ni kusal rusot ra Nzamb. Chadinga chifanyidin kuswimp kurutu Want wa Nzamb usambisha kuyikel. Mwant musu wadishau, Yesu Kristu, warisha njit nend Satan.—Kujingunik 12:7-9.

      12. Yinship ik yaad yijim yisambidinau mu Kujingunik 12:10?

      12 Mazu ma uprofet malondwila am marumburil chadinga chifanyidina kushiken: “Ni yam nova dizu dijim mwiur dialond anch: ‘Katat dipandish diez kal, ni usu, ni want wa Nzamb wetu ni dikand ni Kristu wend, mulong mwin kuyifund [Satan] anamakwetu amudjibul kal pansh, wading ni kuyifund ku mes kwa Nzamb wetu muten ni uchuku.’” (Kujingunik 12:10) Ov waman kal yinship yaad yijim yisambidinau mu verse winou? Cha kusambish, kusambish kwa kuyikel kwa Want wa Nzamb udia mu chikas cha Yesu Kristu. Cha kaad, Satan amwopat kal mwiur ni kumudjibwil pa divu.

      13. Chibudikin ik chamekanaku pamwopatau Satan mwiur?

      13 Yisu yibudikin ya yinship yiney yaad? Piur pa yashikena mwiur, tutangin anch: “Chawiy sangarany mwiur ni yenen ushichanyamu.” (Kujingunik 12:12) Mwaning, angel ashinshamena adia mwiur asanger mulong Satan ni ayilembil end kadiamwap kand, umwing ni umwing ushicha mwiur ushinshamen kud Yehova Nzamb. Mwiur mudi chisambu ni uumwing uwanyidina. Rusot ra Nzamb risadikin mwiur.

      Minan, njit, milong ya chisum ni kuyipish kwa rinkind

      Kumwopat Satan ni ayilembil end mwiur kwaleta riyind pa divu. Yikokujol yiney yikupwa katat kamu ak

      14. Yom ik yashikena mulong wa kumudjibwil Satan pa divu?

      14 Chad, chidi nchik pa divu? Bibil ulondil anch: “Pakwez riyind kudi a mangand ni karung, mulong Satan washirik kal pansh kudi en, ukwet ujim nakash, wij kal anch kwamushal kal chisu chikemp kusu.” (Kujingunik 12:12) Satan ukwet ujim nakash mulong amwopatin kal mwiur ni kwamushadil kal kachisu kakemp kusu. Mu ujim wend uletin mar, ap anch “riyind,” pa mangand. Tukez kwilej yivud piur pa “riyind” riner mu shapitre ulondwilaku. Pakwez nich yom yiney mu manangu, tukutwish kwipul anch, ov, Want ukutwish nchik kusadish rusot ra Nzamb pa divu?

      15. Risu rusot ra Nzamb mulong wa divu?

      15 Mwaning, vurik chidia rusot ra Nzamb mulong wa divu. Wilejin rusot rend mu Shapitre wa 3. Mu Eden, Nzamb wamekesha anch rusot rend ridi anch divu dikal paradis wizwila ni antu akad kufang, atentamina. Satan wamushikija Adam ni Eve ku kusal chitil, ni charumbangesha kuwanyin kwa rusot ra Nzamb mulong wa divu pakwez Nzamb kaswimpap rusot rend. Djat ni katat rutong ra Yehova ridi anch “in kutentam akez kaswan ngand, akez kashakamamu chikupu.” (Kuseng 37:29) Want wa Nzamb wawiy ukeza kuwanyish rusot riner. Mutapu ik?

      16, 17. Daniel 2:44 utulejin ik piur pa Want wa Nzamb?

      16 Shinshikin uprofet udia mu Daniel 2:44. Tutangin mwamu: ‘Pa machuku ma in ant inay, Nzamb wa mwiur ukez kukasikesh want ukwau wakad kwez kwikal nich disudiel chikupu. Kakez kuuswanap kud antu akwau. Pakwez ukez kushesh mant makwau mawonsu, chad wawiy ukez kushakam chikupu.’ Uprofet winou utulejin ik piur pa Want wa Nzamb?

      17 Cha kusambish, utulejin anch Want wa Nzamb adinga afanyidin kuwimik ‘pa machuku ma in ant inay,’ ap anch pachidau ant akwau ni kuyikel. Cha kaad, utulejin anch Want ukez kushal chikupu. Kakezap kuuswan kud winyikel ukwau. Cha kasatu, tumen anch kukez kwikal njit pakach pa Want wa Nzamb ni mant ma mangand minam. Want wa Nzamb ukez kuwin. Kwisudiel, wawiy kusu ukeza kwikal winyikel piur pa antu awonsu. Antu akez kusanger winyikel upandakena kuwap wakadiau kal kwijik.

      18. Njit ya nsudiel pakach pa Want wa Nzamb ni winyikel wa mangand minam ayijimbwiling nchik?

      18 Bibil ukwet yom yivud ya kulond piur pa njit jinej ja nsudiel pakach pa Want wa Nzamb ni winyikel wa mangand minam. Chilikej, Bibil ufundishin anch piyishejidina nsudiel piswimp nakash, aspiritu ayimp akez kupalangesh makasu chakwel kuyidimb ‘ant a mangand mawonsu.’ Mulong wak? Mulong wa “kuyikumangej pamwing, arisha njit pa dichuku dijim dia Nzamb wa dikand diawonsu.” Ant a mangand akez kuyikumangej pamwing kwi “ndond yipidilau mu win Hebereu anch, Amagedon.” (Kujingunik 16:14, 16) Mulong wa yom yilondilau mu maverse minam maad, kurish kwinoku kwa nsudiel pakach pa winyikel wa antu ni Want wa Nzamb akutazukin anch Harmagedon, ap anch Armagedon.

      19, 20. Chom ik chikangeshina rusot ra Nzamb kusadik pa divu ni nlel unou?

      19 Rusot ik rikeza kuwanyish Want wa Nzamb kusutil ku Armagedon? Tongin kand chidia rusot ra Nzamb mulong wa divu. Yehova Nzamb wasota anch divu dizula nich antu atentamina, awanyidina akumusadila ndiy mu Paradis. Ov yom ik yikangeshina chom chinech kusadik katat? Cha kusambish, tudi akayitil, ni tukat kuyel ni kufa. Twilejin mu Shapitre wa 5 anch, Yesu watufila chakwel tutwisha kushakam chikupu. Chawiy lel uvurikin mazu mafundilau mu Rusangu ra Yohan anch: “Mulong Nzamb wakata ngand, ndiy wapana Mwanend wa kuval kwend umwing, chakwel mwawonsu ukwitiya kudiay ndiy kakujiyip, pakwez ukwet kal mwom wa chikupu.”—Yohan 3:16.

      20 Mulong ukwau udi anch, antu avud asadil yom yiyimp. Akat kudimban, kwiy, ni kusal masandj. Kasotilap kusal rusot ra Nzamb. Antu akata kusal yom yiyimp akez kuyishesh kwi njit ja Nzamb jitazukinau anch Armagedon. (Kuseng 37:10) Diyingish dikwau dimekeshina mulong wak rusot ra Nzamb risadikinap pa divu chidi mulong winyikel ukatap kuyikasikesh antu kusal rusot riner. Winyikel uvud uding uziyila, wa chisum, ap uyimp. Bibil ulondil patok anch: “Muntu ukat kumuyikel muntu nich kumumesh mar.”—Mulej 8:9, NW.

      21. Ov, Want ukez kusadish nchik rusot ra Nzamb pa divu?

      21 Kupwa kwa Armagedon, antu awonsu akez kwikal mwishin mwa winyikel umwing kusu, Want wa Nzamb. Want winou ukez kusal rusot ra Nzamb ni ukez kulet yiyukish yamushena. Chilikej, ukez kumudiosh Satan ni ayilembil end. (Kujingunik 20:1-3) Akez kusadil usu wa yakupesh ya Yesu chakwel anch antu ashinshamena kakezap kand kuyel ni kufa. Pakwez, mwishin mwa winyikel wa Want akez kutwish kushakam chikupu. (Kujingunik 22:1-3) Divu dikez kwikal paradis. Chad lel Want ukez kusal anch rusot ra Nzamb risadika pa divu ni ukez kutumbish dijin dia Nzamb. Chinech chirumburikin ik? Chirumburikin anch muntu mwawonsu ukeza kushakam chakin kamu mu Want wa Nzamb ukez kulimish dijin dia Yehova.

      WANT WA NZAMB UKEZ KUSADISH RUSOT RA NZAMB PA DIVU CHISU IK?

      22. Ov, mutapu ik twija anch Want wa Nzamb wadinga kand kal weza padingay Yesu pa divu ap kapamp kamwing kamu kupwa kwa Yesu kusanguk?

      22 Payilejay Yesu in kwilejend kulembil anch, “Want wey weza,” chovakana patok anch Want wadinga kand kal weza pa chisu chinicha. Ov, weza pakandamay Yesu mwiur? Bwat, mulong Pita nenday Paul alonda anch kupwa kwa Yesu kusanguk, uprofet udia mu Kuseng 110:1 wawanyina padi ndiy: “Dizu dia [Yehova, NW] kudi nsalejam: ‘Shakam kwey ku chikas cham cha katatuku kushik pinikeza kuyitek akankuny ney ikal chitwamu chey.’” (Midimu 2:32-34; Hebereu 10:12, 13) Kwadinga chisu cha kuchingel.

      Rusot ra Nzamb rikez kusadik pansh mud muridinga mwiur, mwishin mwa winyikel wa Want

      23. (a) Want wa Nzamb wasambisha kuyikel chisu ik? (b) Yom ik yikwisambinau mu shapitre ulondwilaku ou?

      23 Mu machuku minch? Pa chirung cha chitot cha 19, in kwilej akin a Bibil achinda anch chirung cha kuchingel chikupwa mu muvu wa 1914. (Mulong wa muvu winou, tal Wenjil, paj wa 215-218.) Yinship ya mangand yasambisha mu muvu wa 1914 yimekeshin anch kuchind kwa in kwilej a Bibil inay kwadinga salal. Kuwanyin kwa uprofet wa Bibil kumekeshin anch mu muvu wa 1914, mwawiy mwikalay Kristu Mwant ni Want wa mwiur wa Nzamb wasambisha kuyikel. Kudiosh kamu pinipa, tushich mu ‘chisu chikemp’ chashala kal cha Satan. (Kujingunik 12:12; Kuseng 110:2) Tukutwish kand kulond nich kashinsh anch katat kamu ak Want wa Nzamb ukusal chakwel anch rusot ra Nzamb risadika pa divu. Ov, riner ridi rusangu ruwamp kud ey? Ov, witiyijin anch udi uyakin? Shapitre ulondwilaku ukez kukukwash kuman anch chakin kamu Bibil ufundishin yom yiney.

      CHIFUNDISHINAY BIBIL

      • Want wa Nzamb udi winyikel wa mwiur ni Yesu Kristu ndiy Mwant, ni ayitondin kal antu 144 000 mukach mwa antu, chakwel ayikela nend pamwing.—Kujingunik 14:1, 4.

      • Want wasambisha kuyikel mu muvu wa 1914, ni kudiosh pinipa Satan amwopata mwiur amudjibwil pa divu.—Kujingunik 12:9.

      • Want wa Nzamb ukwez piswimp ap kamu kushesh winyikel wa muntu, ni divu dikez kwikal paradis.—Kujingunik 16:14, 16.

Mikand ya Uruund (1999-2025)
Budik
Andam
  • Uruund
  • Kwangan
  • Yom ukatina
  • Copyright © 2025 Watch Tower Bible and Tract Society of Pennsylvania
  • Mbil ja Kusadin
  • Mbil ja Ujindj
  • Paramètres de confidentialité
  • JW.ORG
  • Andam
Kwangan