Kasikeshinany Chitongijok cha Mifund piur pa Chidil—Chikunku cha 4
Yidil Yitakedinau Kudi Antu Akad Kwikal Atuman
1. Chom ik kitufanyidinap kuvuramen pa chisu tuyila ku chidil chitakedilau kudi antu akad kwikal Atuman?
1 Mudi mulondinau mu chikunku “Yipul ya in Kutang” mu Chinong cha Kalam cha Ndol-Mem 15, 2002, (Français), kuya ku chidil chitakedinau kukwatijan nich yitiyij makasu ya relijon, chikala mu egliz ap pibur, udi mulong ujim. Kangal kuvuramen anch, ang atwal chital ku egliz chidi chisal cha chirelijon chikata kukwat ku malejan ap ku mazu ma yitiyij yakad kwikal mu Mifund, mudi kulik kufa kwa mupim wa muntu ni kutambul difut mwiur anch wadinga muntu muwamp. Kwal ntand, kuwang miminy ya chirelijon, kuyilembil angak, kupesh annam, kwichil maar pansh ni akat kusal yisal yikwau yivud ya yishankur ya upagan.
2. (a) Mulong mwin Kristu uvarikena ni muntu ufila ufanyidin kudimuk nakash? Letany yilakej. (b) Chom ik chifanyidinay kusal mwin Kristu chakwel alika kwiyandjik mu yishankur ya upagan?
2 Pa chisu chikwau, akuyit anamakwend a piswimp a muntu wafang asala yishankur ya pakampwil. Chilakej, chitwishikin amwit mwan wa kusambish asala yinshakur yimwing yakad kukwatijan ni Mifund mulong wa tatukwend wakad kwikal Kaman ufila. Chilakej chikwau: Anch ikundj wafa, akutwish amwit mwad-a-mufu asala yishankur ya in mangand. In Kristu afanyidin kubabal nakash chakwel kangal iyandjika mu yisal yiyimp mu milong mudi yiney. Chiwapin anch, tukuchingelap anch ching muntu afa chadi lel twijikisha mwikadil wetu kudi anamakwetu akad kumusadil Yehova. Anch asambel kwijik mipak yetu nawamp kurutu kwa chisu, chikez kutuswakel kwikal ilikena muspiritu chisu tunenganena ni anch kwikal kutushindil kusal yom mudi mudinga chisu chivud pa chidil.
3. (a) Anch mwin Kristu usotin kuya ku chidil cha muntu wakad kwikal Kaman, yipul ik yifanyidinay kwiyipul? (b) Kukwatijan nich 1 Korint 8:12, 13, chom ik chidia cha usey kupandakanamu kuyovish anamakakwetu akad kwikal Atuman ujim?
3 Ing anch mwin Kristu wakat kuya ku chidil cha murund nend, mwanamakwend wa ku mujimbu ap cha mutej nend wakad kwikal Kaman, ukusal nchik? Chikwikal chiwamp iyipula anch: ‘Anch nikal mu chirund cha antu asadila yishankur ya relijon wa makash, chikwinkasiken kulik kusal mudi musadilau? Ov, kwikalaku kwam, kukutwish kwarumbangesh kom ka antu amwing adia mu chikumangen? (Mat. 18:6) Ov, kwikalaku kwam kukutwish kwanshikij ku kukakalijan ni antu akad kutesh mulong wak nilikina kusal yom yikwau?’ Kangal twavuramenany kand usu chikutwisha kwikal nich pa kom ketu. Chak cha kurumbangesh kom ketu ap ka muntu windjing ukutwish ukwikal nich usu ukash kupandakanamu yom yitutongidina kutanyinamu anch twaya ku chidil.—Isikej ni 1 Korint 8:12, 13.
4. (a) Anch waman anch, kukutwish kwikal ubaj wa kwiyandjik ku yisal ya relijon wa makasu, mupak ik ufanyidina kukwat? (b) Pa yisu ik yimwing yikatiningau antu amwing kuya kuyendil antu afishina chakwel ayikwasha ni ayongoja? Mulong wak?
4 Ing anch muntu waman anch, ang waya ku chidil chitwishikin asala chisal chakad kwikal cha Ukristu ap anch ukutwish wamupwakesh muntu mukwau ap kukakalijan ni antu akad kwitiyij, ukusal ik? Mulong wa mayingishin minam, dimwing ni dimwing, mwin Kristu ukutwish wakwat mupak wa kulik kuya ku chidil. Anch kom ka mwin Kristu kamulikish kuyaku, kwikil muntu ap umwing mu chikumangen ufanyidina kumunyinyit ap kwovu kuyip. Antu amwing akwatining mupak wa kuya kutal dijuku difishina kurutu ap kupwa kwa kujikan. Mu mikadil yiney, dijuku dikutwish dikal zoong mu manangu ni tayad kutwish kutesh yilondila Bibil. Anch twayinkish nfalang ku ujindj pa yisu yiniya, chitwishikin anch dijuku difishina disadila ukwash wetu. Anch twakimb chisu chifanyidina chakwel tupana ukwash ni rongoj, twikingin muspiritu ni tukwikal nich kashinsh anch ukwash wetu akuusanger ni udi wa usey.
5 (a) Antu avud amening yidil mutapu ik? (b) Mayingishin ik maletiningau antu amwing chakwel ayangang ku yidil yivud?
5 Kangal Wapipeshany Ubaj: Kudi antu avud yidil yidi yisu yiwamp ya kutanijan pamwing ni antu akwau ni ya kudia ni kuna maar makwikalaku. Kuyiman ni kumekan kudi antu akwau pa yishiken yiney kumekening kwikal kwa usey ujim nakash. Pakwez, kulik kumekan pa chidil akumening mudi kupipesh dijuku difishina. Antu akwau oviling wom anch, ang alik kuya chisu ni chisu ku yidil ya akwau, niyawiy kakezap kuyital kudi antu avud pakezau kufish! Mulong wa mayingishin minam, chawiy chiyilingau antu ku yidil yaad, yisatu ap yivud pa rubing rawiy rumwing. Asadiling mwamu ap anch kamwijap kwau wafang ni ap anch kavarikenap ni antu a mu dijuku dinidia. Ov, kuman yidil mu mutapu winou kukwatijadin nich yitongijok ya Nzamb?
6. (a) Tangany Efes 5:15, 16. Kuyangang ku yidil yivud kukutwish kwikal mutapu ik ubaj ku mwikadil wetu wa muspiritu? (b) Mulong wak kichidiap cha manangu kutum chid cha dijuku achinach ku chidil?
6 In kwifukwil akin a Yehova, afanyidin kutongin pa chibudikin chikutwisha kwikalaku pa mwikadil wau wa muspiritu anch akwet chaku cha kuyang chisu ni chisu kusadilau yishankur ya yidil pa kujikan. Ov, chikutwish chikal cha manangu kusutish chisu chijim mulong wa kuya ku yidil pa Diampos ni Diarubing ni kupwa kushal nich chisu chikemp mulong wa kulejan ni kusal midimu yikwau ya Uteokras? (Efes 5:15, 16) Ku yidil ya in mangand chisu chivud kuding yisal yakad kwikal ya Ukristu mudi kwikwiz maar, ni kusal masandj. Chawiy tufanyidin twiyipula anch: ‘Ov, chikwikal cha manangu niya ku chidil mudi chinech amwinam ap nimutuma mukajam ap muntu wa mu dijuku pakad kuya ni muntu mukwau ku chidil chidia mu musumb ap mu ul kanang udia kulemp?’ Etwawonsu tufanyidin kubabel ubaj wa kushejin piswimp nakash nich yisal yikisinay Yehova, mulong yikwikal nich yibudikin yiyimp pa kuya kwetu kurutu muspiritu ni pa untu wetu wa Ukristu.—Kubur. 18:4
7. (a) Rumburilany yom yayishikena in Kristu amwing mulong wa kulik kwau kulondul chiyul chidia mu Jinswir 22:3
7 Pa yisu yimwing, in Kristu akad kubabel apipesha ubaj udingaku ku kwiyandjik mu mwikadil uyimp. Amwing ashikena ku kushadish yisend yau mu chikumangen ni akwau ayopata mu chikumangen cha Ukristu. Bibil ubabeshin anch: “Muntu wa manangu anch waman yom yikash, ukat kwijindjik.” (Jinsw. 22:3) Kutesh nawamp chijidik chinech ni kubangin ubaj wa muspiritu ni wa mwikadil ukutwisha kwikalaku kukutubachik twikala ababela kurutu kwa kukwat mupak anch tukuya ap bwat ku chidil chitakedilau kudi antu akad kwikal Atuman.
8. (a) “Divar” chom ik? (b) Mulong kichifanyidinap in Kristu akin andamamu?
8 Mu mikadil yikwau, antu ading yid ya yisak mudi “divar.” Yitenchik mudi yiney muding ching antu muchid umwing, a kabil kamwing ap arund a ku mudimu umwing. Kuding kusang nfalang mulong wa kutenchik yidil ya yid ya antu adia mu yitenchik yiney. Ayichingejin antu inay awonsu adinga mu yisak yiney yikalaku ni yisala ni akwau. Ov, chidi cha manangu kwikal mu yisak mudi yiney? Mu ul umwing, nambaz umwing wikala chid cha chisak mudi chinech pakad anvajend kwijik. Pafay, yid ya chisak chinech yeza yivud, abula ngam, awanga miminy, ni afufula maj ma mushet. Dijuku diasota kuyilikish, pakwez kwikala kanvundangesh nakash, ni chayinenganesha nakash anvaj ni in Kristu adingaku pa chidil. Kwijik anch urund uyimp ukat kuyipish mwikadil wetu wa muspiritu kufanyidin kutukwash tutesha mu chilik ik chidi kuburen manangu kwikal mu yitenchik mudi yiney.—1 Kor. 15:33.
Chitongijok cha Mifund: Chisiken ni Choviken
9. (a) Mutapu ik ukasikeshidinay 1 Korint 10:21 ubaj wa kusal yishankur ya upagan? (b) Chom ik chikusadika anch chid cha chikumangen chalik kulondul yiyul yidia mu Mudimu Wetu wa Want piur pa yidil ni anch wasal chishankur cha upagan? (c) Tangany Kuvurik Yijil 18:9-13 ni Yeremiy 7:16-19. Chom ik chatongay Yehova piur pa yisal yifanikena ni yiney yasalau in Isarel?
9 Mu 1 Korint 10:21, atulejin anch: “Kiukutwishanyip kuna rupas ra Mwant ni kand rupas ra ayilembil.” Antu a Nzamb ateshin dibabesh dined ni usey. Chad kukwikal ik anch atushidil kudi anvaj ap amutej netu akad kwikal atuman, chad chid cha chikumangen chasal chishankur cha apagan? Anch wasal chisal cha kwifukwil akish ap chisal cha relijon windjing, chikwikal kwitun ritiy, ni chifanyidin kukwat mipak yifanyidina chakwel chikumangen chidandamena zwang.—Kuv. 18:9-13; Yer. 7:16-19.
10. (a) Kukwatijan nich Kuseng 97:10, chom ik tufanyidina kutongin piur pa yishankur yilondila anch afu adi aom? (b) Verse wa 1 Korint 10:32, 33 utwinkishin diyingishin diakin dia kulikin yishankur. Diyingish ik dined?
10 Kwikal ni Manangu Mawamp Piur pa Rufu: Yom ik yikutukwasha twikala nich manangu mawamp piur pa rufu ni yisalijok ya pa chidil yitwisambina kal? Tufanyidin tumukata Yehova ni muchim wetu wawonsu mu chilik cha ‘kukis kuyip.’ (Kus. 97:10) Chifanyidin kudjibwil kwa yishankur yikwatina ku ritiyij rilondila anch afu akwet usu padiau antu adia aom. Chikwau kand, rukat retu rikash mulong wa akwetu in Kristu rikutukangesh kusal chom ap chimwing chikutwisha kuyipwakesh ap kurumbangesh kom kau.—1 Kor. 10:32, 33.
11. (a) Kukwatijan ni Efes 5:8, mutapu ik a kusal yom ni kutong ufanyidinau in Kristu kwipuk? (b) Usu ik ukutwisha kwikal nich 1 Tesalonik 4:13 pa mwikadil wetu pitudia ku chidil?
11 Kutesh kwetu kuwamp mwikadil wa afu kukutukwash kwiyep yitongijok ni ngikadil ya antu adia mu mididim ya muspiritu. Tujijamen ku chipwichik cha antu akata kutenchik yidil mulong wa kuyitumbish ni kuyishiman afu, ap mulong wa kusot kumekesh reng rau ni mapit mau. Tukuyilikinap yitil yirumbangesha midimu yetu ya usey ya uteokras. Tukumekeshap kand in kunyinyitan nakash mu chilik cha kwovu kuyip anch muntu kanang wakwat mupak wa kuya kusadilau yishankur ya chidil ap anch katwinkishinap mudimu kanang wa kusal kwinikwa. In Kristu akin akat kutong ni kusal yom mu mutapu windjing, mulong uyakin udia mu Bibil ukat kuyimunyikin chitokish. (Efes 5:8) Tukat kuyidil akatish netu afila ni kuyijik mu mutapu uwamp, ulejena manangu mawamp ma muspiritu, pakwez tukat kusalang kand mwamu mu mutapu wa kwikepish, wisikena ni kukwatijan nich uyakin udia mu Bibil.—1 Tes. 4:13; 5:5, 8, 11.
12. (a) Tangany 1 Pita 4:4. Pitulikininga kusal yishankur yijondila, chom ik tufanyidina kuchingejin kudiokal kudi antu akad kwikal nich yitiyij yetu? (b) Kukwatijan nich Jinswir 29:25, ov, mulong wak kitufanyidinap kumwov muntu wom kwikala nich usu pa mutapu wetu wa kutong ni pa mwikadil wetu?
12 Kangal Kuyov Aom Wom: Kitukusotap kumwovish kuyimp muntu ap wisu. Pakwez, ap yisal yiwamp ya Yesu yayovisha kuyip antu adinga kateshinap kurumburik kwa uyakin udia mu Bibil, chovikend kand patok anch, mwikadil wetu ku mutambu wa difukwil dishitwila niwawiy uleta chibudikin mudi chinech. (Yoh. 6:60, 66) Akutwish atunyinyit, atusal, atusal nayimp, ap kutukish kudi antu akad kwikal nich yitiyij yetu mulong wa kulik kwetu kusal yishankur ya apagan. (1 Pita 4:4) Atuman a Yehova amwing ayitambula uswan wau, alika kuyikwash ni ayopata mulong ikala ku mutambu wa yom yitentamina. (Yoh. 15:19) Akwau ayimening mudi kadiap antu awamp, ayilonda mudi kijap kushakam ni akwau ni akad kuyilimishang afu. Yom yiney kiyidiap yiwamp, pakwez chitwija anch tushalijadin ni in mangand, tuchingejin anch akutusadil mu mutapu mudi winou. (2 Tim. 3:12) Chawiy lel, pa ndond pa kumwov muntu wom, tukat kwov wom uwamp wa kulik kumwovish Yehova Nzamb kuyip.—Jinsw. 29:25; Mid. 5:29.
13. (a) Antu amwing ayiswingishining Atuman a Yehova mutapu ik? (b) Tufanyidin kujijamen choziu cha mutapu ik, ni chilakej ik chatushilay Yesu pa mulong winou?
13 Yikishany Mutapu Chakwel Amana Kushalijan: Antu amwing atuswingishining anch: “Atuman a Yehova kijingap kuyidil afu au.” Ov, mazu minam makat kuturumbangesh? Ov, tusotining pa yisu yimwing kupakish kumekesh anch twij niyetu nawamp mutapu wa kuyidil akatish etu afila? Tuvurikany anch pamutekau Yesu mu choziu kudiay Satan chakwel amekesha anch wadinga Mwan a Nzamb anch idjimbula pansh kudiokal pa musong wa tempel, Yesu walika. Kitiyijap kumusadish chom kanang chiyimp mulong wa kuyishimokish antu. (Mat. 4:5-7) Chawiy chimwing, niyetu tufanyidin kujijamen choziu cha kusot kumekesh, nich kwimburij mutapu usadilingau yidil antu akad kwikal Atuman, chakwel kuyijikish anch chakin niyetu twij mutapu wa kuyidil afu etu. Mutapu ik chikutwisha kusadik?
14. (a) Chitil ik chijim chasalau in Isarel? (b) Kukwatijan nich Kubudik 32:28, chitongijok chau kichadingap chikwatijadina ni cha Yehova mu mutapu ik, ni chom ik chayishikena?
14 Kaman wa Yehova kafanyidinap kusal yisalijok ya apagan. Pakwez, anch kitubabelap, tukushiken ku kukudish yitongijok yawiy yimwing ya makasu yayiwisha mu mupit antu a Nzamb a pakur. Chakin, in Isarel asala chirumbidij cha musamb a ngomb ni amwifukwila, kupwa awiy alonda anch udi “musambu wa kumulimish nich [Yehova, NW].” (Kub. 32:5) Idimba ayinau pa kutongin anch Nzamb ukutwish witiyij kubombakesh pamwing difukwil diakin ni dia makasu. Idimba mudi ik! Kubombakesh difukwil kwinoku, kwamwovisha Yehova kuyip, kwayiletina rufu in Isarel piswimp 3 000.—Kub. 32:28.
15. (a) Tangany Galatia 6:12 ni Kuvurik Yijil 12:30. Atushalapol a Nzamb kafanyidinap kupakish kusal chom ik, ni mulong wak? (b) Chikalap nchik kusot kudiosh tuyom twa upagan mu yishankur, kukwatijan nich 1 Korint 10:20, in Kristu akin ayimening mutapu ik? (c) Kukwatijan nich Malakiy 3:18, chom ik chikumanau antu anch twakwat mupak nich kujijaman ku mutapu wa yom yitentamina ni anch twakasikeshin chitongijok cha Mifund piur pa yidil?
15 Atushalapol a Nzamb kakupakishap ap dimwing “kusakul” yishankur ya angak ya upagan, mudi kwal ntand, misambu ya kumwang chidil, misambu ya kuvurik dichuku diafay muntu, ni yisal yikwau yijondila, nich kudioshaku yom yimwing yimekena patok anch yidi ya upagan ni ya relijon wa makasu nich kuswinkesh ni yom yimekena anch yidi ya difukwil diakin. Kusal mwamu kukutwish kwamekan kwikal “chom chiwamp” kudi antu akad kwikal nich yitiyij yetu, pakwez kand nich kuyinkish chitongijok chakwel anch Atuman a Yehova atenchik kal mutapu wau usu wa kusal misambu ya upagan. (Gal. 6:12; Kuv. 12:30) Pakwez, tuyimen yishankur yiney mudi muyidia kamu—yakad kumulimish Nzamb, ya upagan ni yakad kukwatijan nich difukwil dishitwila. (1 Kor. 10:20) Anch twalam ba chitong chinech, tukuyikwash antu mutapu ufanyidina wa ‘kuman kushalijan kudia pakach pa muntu utentamina ni wakad kutentam, pakach pa antu amusadidina Nzamb ni akad kumusadin.’—Mal. 3:18.
16. (a) Yakushilamu ik yamushena yikuwanyina piswimpap? (b) Mupak ik ufanyidinay umwing ni umwing wetu kukwat?
16 Piswimpap kamu, rufu rikwikalakwap. Mansoj metu, ushon wetu, kusansan kwetu yikupwa pakezay Yehova kuyichirish antu afa kal ku mwom. (Kubur. 21:4) Ruchingej ra kuyiman akatish netu afa kal rengamidin pa kudandamen kwetu kwikal ashinshamena katat. Pituchingedina kuwanyin kwa yakushilamu yiney yamushena, tukwatany mipak chakwel Yehova eza atutana wakad ulim ni dises ni aurikina ku yom ya mangand minam mayimp ni ku yisalijok yay yakad kumulimish Nzamb!—2 Pita 3:14.