Ukwash Mulong wa Majuku

1. Ov, mutapu ik Sabat wa rubing ni rubing wasangareshangay majuku ma in Isarel?

¹ Kulimish dichuku dia Sabat diadinga ditenchik dia rukat dia Yehova diasangeranga majuku. In Isarel apimanga chisu chawonsu ni atambulanga chisu cha kutongijokin pa kuwap kwa Yehova ni pa urund wau wa piswimp ni ndiy. Anvaj adinga afanyidin kutaninamu ku ditenchik dined chakwel ayifundisha anau Yijil mu michim yau. (Kuv. 6:6, 7) Sabat wikalanga ni chisu chend pa rubing ni rubing chakwel antu a Yehova asina jinkeu kau pa mwikadil wau wa muspiritu.

2. Ov, chom ik chifundishina Sabat piur pa Yehova?

² Chawiy, Yehova kitap anch majuku malimishang Sabat chisu chilemp. Pakwez, chijil chinech chitufundishin chom kanang piur pa Nzamb wetu. Ndiy usangaredining nakash diking dia muspiritu dia antu end. (Isay 48:17, 18) Nlel unou, njil yimwing yimekeshidinay Yehova rukat riner ramushena yidi kusutil ku urel wa Difukwil dia mu Dijuku.

3. Ov, urel wa Kwifukwil mu Dijuku udi ni rutong ik?

³ Ov, Urel wa Kwifukwil mu Dijuku Udi ni Rutong Ik? Pa Chiwong 2009, dilejan dia Bibil dia Chikumangen diasambisha kwikal chisu chimwing ni Shikol ya Mudimu wa Uteokras ni Chikumangan cha Mudimu. Diyingish dimwing dia ditenchik dined didi dia kukwash majuku chakwel mamana mutapu wa kukasikesh mwikadil wau wa muspiritu kusutil ku program wa pakampwil wa urel wa rubing ni rubing ra kwifukwil mu dijuku. Akasikesha dijuku ni dijuku chakwel diswimp dilejan diadi dia mu dijuku diasalangau uchuku mulong wa kwilej buku, anch chidi cha usey, ni kusadil chisu chinech mu mutapu uwamp minsamb ya mu Bibil kukwatijan nich maswir ma mu dijuku.

4. Ov, majuku mafanyidin kutenchik mambamb mau ma mu dijuku ching saa umwing kusu? Rumburil.

⁴ Chakwel tuya tukumangan mu Dilejan dia Bibil dia Chikumangen, tuswiridin chisu cha kudjal, kwend, ni kuwanyish yom yikwau yikwau. Antu avud a mukach mwetu, irijekining mwamu saa umwing chakwel aman chisu chiwamp cha kuya ku yikumangan ya katat. Kusutil ku ditenchik dia program wetu wa yikumangan, tukwet katat urel winou chakwel tumwifukwila Yehova mu dijuku. Chawiy lel, tukwetap kuswir kwa kutenchik Kwifukwil kwetu kwa urel mu Dijuku saa umwing kusu. Pakwez, tufanyidin kutongijokin pa maswir ni yitenchik ya dijuku dietu kwambatijan nich chisu tukweta tufanyidina kushinshikin yom yiney.

5. Ov, Chifanyidin Kusutish Chisu Chawonsu Minsamb mu Chisak? Rumburil.

⁵ Ov, Chifanyidin Kusutish Chisu Chawonsu Minsamb mu Chisak? Pa chisu chisambiningau pamwing kudi ambay atena ni kudi majuku makweta an minsamb yengamidina pa yitongijok kanang ya mu Mifund, akat kumukasikesh muntu ni mukwau. (Rom 1:12) Kusal mwamu kusejishining dijuku piswimp. Pakwez, kwisambil Mifund kufanyidin kwikal chikunku chimwing cha usey urel wa Kwifukwil mu Dijuku. Chikwau, chid ni chid cha mu dijuku chifanyidin kand kusutish chisu mu kwilej kwa panrau. Chilakej, kupwa kwa minsamb ya mu chisak, dijuku difanyidin kuvurik pamwing chikutwisha kudandamen kwilej muntu ni muntu panrend, pamwingap kupwish kwirijek kwend ku yikumangan ap kutang kwend kwa magazet. Majuku mamwing matondining kufung televizio urel wa kabuj.

6. Ov, Mutapu ik Tufanyidina Kutakel Minsamb Yiney?

⁶ Ov, Mutapu ik Tufanyidina Kutakel Minsamb Yiney? Kichifanyidinap chisu chawonsu minsamb yiney yikal ya yipul ni yakul. Chakwel chisu chinech cha urel wa Kwifukwil mu dijuku chikal chiwamp ni chisangareshina, majuku mavud makwet program umwing ufanijadina nich yikumangan ya pa rubing. Akat kwanganijan minsamb yau yikunku yivud ni kutakel minsamb yiney mu mitapu yishalijadina. Chilakej, akutwish kutang Bibil pamwing, akutwish kurijek chikunku cha yikumangan, ni kusadil yikunku yimwing mu mudimu wa kulejan. Paj wa 6 uletin yitongijok yimwing.

7. Ov, Anvaj Afanyidin Kusal Usu wa Kwikal ni Mwikadil Ik?

⁷ Ov, Anvaj Afanyidin Kusal Usu wa Kwikal ni Mwikadil Ik? Chifanyidin dijuku diey dileja nawamp win kamu mu rukat, ni mu mutapu ufanyidina. Yisu yimwing ukutwishany wilejinany pol pa chikumbu anch chitwishikin. Anch chitwishikin, chifanyidin kupim. Majuku mamwing mawejidiningaku tuyom tukemp twa kudia ni kuna kupwa kwa program. Anvaj kafanyidinap kusadil chisu chinech cha urel wa Kwifukwil mu Dijuku mudi chisu cha kupupan, akutwish kuswiridin kusadil chisu chimwing mulong wa kwisambin pa milong kanang yifanyidinau kupwitin jinkeu jau. Pakwez, chikutwish kwikal chipandakena kuwap kwisambin yom ya pakampwil nend mwan pa chisu chikwau mukach mwa rubing chakwel tulik kumufish usany ku mes ma anamakwend. Urel wa Kwifukwil mu Dijuku ufanyidinap kwikal chisu cha usweral, pakwez chidi chisu tufanyidina kumekesh musangar wa Nzamb wetu utukata kwifukwil.​—1 Tim. 1:11.

8, 9. Ov, mutapu ik ukutwisha kwirijek mitu ya majuku?

⁸ Ov, Mutapu ik Ukutwisha Kwirijek Mutu wa Dijuku? Dijuku dikez kutaninamu nakash anch mutu wadi wirijek kurutu kwa chisu urel ni urel wa Kwifukwil kwa mu Dijuku kusutil ku yom yifanyidinau kwisambin ni mutapu upandakena kuwap ukutwishau kusadil chakwel ayishinshikin. (Jinsw. 21:5) Mutu wa dijuku ukusal nawamp anch wambamb nend mukajend pa mulong winou. (Jinsw. 15:22) Ov, en mitu ya majuku, mulong wak pa yisu yimwing kiwisambininganyap nau anen piur pa yitongijok yau yiletiningau? Anch usadiningany mwamu, ukez kutaninanyamu manangu ma usey mu yom yisangarediningau ni yiyitadina.

⁹ Mutu wa dijuku ufanyidinap kutambul mbing jivud kurutu chakwel utambula chisu chivud cha kwirijek. Chiding chiwamp dijuku anch disangaredin kwikal ni yom ya kwisambin chisu chawonsu pa rubing ni rubing, ni mutu wa dijuku kiuswiridinap kwikal chisu chawonsu ni program musu. Mutu wa dijuku ukuman mutapu chidia chiwamp chakwel wirijeka kupwa kwa program ni program wa urel wa Kwifukwil mu dijuku pa chisu chichidia maswir ma muspiritu mu dijuku diend ni usey. Mitu yimwing ya majuku yikat kufund mu kalupe ni ukukatek pandond pakutwishau kukaman mu dijuku, mudi pa frigo. Kusal mwamu kukulet impu ni kukwinkish dijuku chisu cha kwirijek anch chiswiridin.

10. Ov, mutapu ik ukutwisha muntu ushicha amwinend kusutish urel wend wa Kwifukwil mu Dijuku?

¹⁰ Ov, Chom ik Nikutwisha Kusal Anch mu Dijuku Diam Nidi Amwinam mu Uyakin? Muntu ushichinga amwinend ukutwish kusadil urel wa Kwifukwil mu Dijuku mudi chisu cha kwilej kwa panrend. Program muwamp wa kwilej kwa panrend ufanyidin kwikal wengamidina pa kutang Bibil, kurijek yikumangan, ni kutang Chinong cha Kalam ni Réveillez-vous ! In kulejan amwing awejidiningaku kand program wa kwilej kwa panrau. Pa yisu yimwing, akutwish kusot kumutazuk mwin kulejan mukwau ap dijuku kanang chakwel inunga nau mulong wa kukasikesh Mifund ya kwisambin.

11, 12. Ov, yiyukish ik utaninganya anch chisu chawonsu ukwetany urel wa Kwifukwil mu Dijuku?

¹¹ Ov, Yiyukish ik Utaninganya Anch Chisu Chawonsu Ukwetany Urel wa Kwifukwil mu Dijuku? Antu ipanininga ni muchim umwing mu difukwil diakin adi piswimp ni Yehova. Chikwau, majuku makata kwifukwil pamwing makasikeshining uumwing wau. Ambay atena aad afunda piur pa yiyukish yasangerau anch: “Chitudia ambay aad ayibol akad kuval an, tumening chakin kamu mutapu wa kuya kurutu ni urel wetu wa Kwifukwil mu Dijuku. Twiyoviling mudi tuding piswimp ni muntu mukwau ni tuding kand piswimp ni Tatukwetu wa mwiur. Katat pa chisu tulankininga pichuku, tukat kutenchik pamwing program wetu, ni tukat kumulej muntu ni muntu anch: ‘Lond bil, chom ik tukusal urel ou? Udi urel wa Kwifukwil mu Dijuku!’”

¹² Ditenchik dia kwikal nich urel wa kwifukwil mu dijuku dikwashining kand majuku makwatikena. Maku umwing ushicha amwinend ulidin an aad amakundj, udi chibol wa rawonsu ni wafunda anch: “Pasak, kwilej kwetu kwa mu dijuku kwamananga mar. Kikwadingap chisu chawonsu ni kusangareshina mulong nadinga niziyin. Kinadingap kamu ni kutongin mutapu tukutwisha kusutish chisu chinech. Chawiy, nakufunndinany kal mulong wa kukujikitishany nakash win kamu piur pa urel wa kwifukwil mu Dijuku. Twapandakna kwikal ni chisu cha kwilej chisu chawonsu mu dijuku ni twatana anch chadinga cha musangar.”

13. Ov, chom ik chikumekesha mutapu ufanyidina dijuku kutan yiyukish yidiokila ku ditenchik dined?

¹³ Mudi Sabat, urel wa Kwifukwil mu Dijuku udi chipan chidiokidila kudiay Tatukwetu wa mwiur ukutwisha kukwash majuku. (Jak. 1:17) Njil yasadilau in Isarel piur pa Sabat yamekesha mutapu tufanyidina kurijek urund wetu wa piswimp ni Yehova. Chawiy chimwing, mutapu wetu wa kusadil urel kanang tukweta ukutwish kusal chakwel difukwil mu dijuku dimekesh mutapu ufanyidina dijuku dietu kutaninamu. (2 Kor. 9:6; Gal. 6:7, 8; Kol. 3:23, 24) Mu kusadilang nawamp ditenchik dined, dijuku diey dikuya ntumb mudi mwalonday nfund a kuseng anch: “Pakwez kudi am chidi chiwamp kamu kusej piswimp kudi Nzamb. Nikangidil kal kudi Nsalejam [Yehova].”​—Kus. 73:28.

[Dizu dirumburila chipich chidia pa paj wa 5]

Urel wa Kwifukwil mu Dijuku ufanyidinap kwikal chisu cha usweral, pakwez chidi chisu tufanyidina kumekesh musangar wa Nzamb wetu utukata kwifukwil

[Kamushet kadia pa paj wa 6]

LAM

Yitongijok Yimwing Piur pa Urel wa Kwifukwil mu Dijuku

Bibil:

• Tangany pamwing chikunku cha kutang Bibil cha pa rubing. Anch yom yatenchikau ayinay yimekeshin kusal mwamu, muntu umwing ukutwish kutang rusangu, ni akwau akutwish kutang mazu madia mu mitapu kushalijan

• Isambinany chikunku cha kutang Bibil.

• Mwinkisha chid ni chid cha mu dijuku chakwel chitang yikunku yalejanau mu Bibil kurutu ni fund chipul chimwing ap yaad yidia mu yom ya kwisambin. Kupwa, kimbany yipul ya muntu mwawonsu pamwing.

• Pa rubing ni rubing, rijekany mu chisu chikemp verse wa mu Bibil ni iyidisha kumulam mu manangu ni murumburila. Kasikesh chitongijok cha maverse minam, ni machirkina pa rubing ni rubing chakwel umana mutapu uchivurukina kand mifund yivud.

• Tesh maband makwatinau kal ma kutang Bibil pa chisu umwovila amwiney mu Bibil.

Yikumangan:

• Rijekany pamwing yikunku ya chikumangan.

• Ijidisha ni program wa miminy ya Want ya rubing rikwezap.

• Anch muntu kanang ukwet diskur ku Shikol ya Mudimu wa Uteokras ap chakumenaku mu Chikumangan cha Mudimu, isambinany yitongijok chakwel ayisadil, ap kimbany yitongijok yiney mu dijuku.

Maswir ma Dijuku:

• Shinshikinany malejan madia mu buku Les jeunes s’interrogent ap Ilejina Kudi Mulej Mujim.

• Sadilany chikunku cha kupakish mutapu wa kutakel chikunku chakwinkishinanyau mudi muusadilinganya ku shikol.

• Sadilany chikunku padi anvaj ni an chakwel akurumburilany mu mutapu ukwau uwamp. An akimbining mitu ya milong ni kupwa ayishinshikidining pamwing nau anvaj.

Mudimu wa Kulejan:

• Salany chikunku cha kurijek yakumenaku ya kwinsudiel kwa rubing.

• Isambinany jintong jakin kamu jikutwisha dijuku kutanduril mu mudimu wadi wa kulejan pa chisu cha chivurikish ap pa yisu ya konje.

• Inkish chid ni chid cha mu dijuku minit yikemp chakwel yikimba mutapu wa kwakul ku yipul yishalijadina yikutwisha kulank mu mudimu wa kulejan, kupwa sadilany yikunku.

Yiyul Yikwau:

• Tangany pamwing mutu wa mulong udiokidila mu magazet masu

• Chid ni chid cha mu dijuku chikutang kurutu kwa chisu mutu wa mulong uchisangereshina wa mu magazet masu, ni kupwa chikupan rapor wa yom chatangakal.

• Pa yisu yimwing ukutwish kumutazuk mwin kulejan ap ambay atena chakwel inunga ney mulong Kwifukwil mu Dijuku ni pamwingap ukutwish kuyipul yipul.

• Lejan chisu ni isambinany umwing wa maband video etu.

• Isambinany pamwing “ Les jeunes s’interrogent ” ap “ Apprenons en famille ” yidiokidila mu Réveillez-vous !

• Isambinany pamwing “Yifumbani Anen” ap “ Pour nos jeunes lecteurs ” yidiokidila mu Chinong cha Kalam.

• Tangany ni isambinany chikunku cha mu Annuaire musu ap umwing wa ku mikand yisu yitukweta wabudishau ku chitentam cha distrikt cha muvu washadina.

• Chirikinany manans majim kupwa kwa kukumangan ku chitentam cha pakampwil, cha munyingumuku ap cha distrikt.

• Shinshikinany pa chom chatangay Yehova, ni isambinany chitufundishina chitang chinech piur pa Yehova.

• Tenchikany kusal yom pamwing, mudi model kanang, kufwatul kart, ap kamesh.