Ov, Ukutwish Kusal Mudimu wa Kulejan pa Machuku ma Diarubing?
1. Ov, chom ik tukutwisha kwilejin ku yaku ya Paul ni arund nend mu musumb wa Filip?
1 Diading dia Sabat, dichuku diapimangau kudi in Yuda avud a mu musumb wa Filip. Paul ni arund nend aya kwend mu musumb pa chisu cha umwing wa maweny mau ma umishoner masalau. Kwikil muntu ap umwing watwisha kuyifish nich ap anch kupim kwadinga kufanyidina mu mudimu wau wa kulejan pa dichuku dinidia. Pakwez, ading ija anch in Yuda eza kukumangan pol chakwel alembil, chawiy lel asadila chisu chifanyidina cha kuyilej rusangu. Musangar mudi ik watwisha kwikal nich Paul ni arund nend chisu chayiteshau kudi Lidi ni chamubatishau pamwing ni antu a mu chikumbu chend! (Mid. 16:13-15) Mulong antu avud akat kupim Diarubing, ov, mulong wak ukatap kusadil chikunku cha dichuku dined chakwel uyilejan rusangu kudi antu inay?
2. Yikokujol ik yapandakenau kudi antu a Yehova chakwel alejan Diarubing pakad kuyiswidiosh?
2 Njit Mulong wa Kulejan Diarubing: Pa chisu cha 1927, ayikasikesha antu a Yehova chakwel asutishang chikunku cha Diarubing din diawonsu mu mudimu wa kulejan. Chinech chaleta rupompat kapamp kamwing. Antu avud ayikwata mu rukan mu États-Unis anch ajipin yijil ya Sabat Diarubing, aletin kanvundangesh, ni akat kulandish pakad mbil. Pakwez antu a Yehova kalikinap bwat. Mu muvu wa 1930, atenchika “makampany ma yikunku,” mwading in kulejan adiokila mu yikumangen ya piswimp atwisha kwibomb nau chakwel alejan mu teritwar wawonsu. Pa yisu yimwing yayikwatau in kulejan, kwading kand avud mukach mwau ayovishau wom kudi anyikel. Ov, usangaredinany chakin kamu kwipan kwipaninau kudi akadivar ay chakwel etu niyetu tutwisha kulejan Diarubing pakad kutuswidiosh?
3. Ov, chom ik chisadila Diarubing kwikal dichuku diwamp dia kusal mudimu wa kulejan?
3 Dichuku Dipandakena Kuwap dia Kulejan: Antu avud adiokilinga ku mudimu ading ku yikumbu Diarubing. Chisu chivud iswedishining. In kuya mu maegliz amwing akutwish ikal nich chaku cha kutesh yitulondilinga piur pa Nzamb pa dichuku dined. Anch tukwet chikumangan chetu Diarubing, tukat kudjal mudi tuyilinga mu mudimu wa kulejan, ov, mulong wak tutonginap kusal mudimu wa chingand kurutu ap kupwa kwa yikumangan? Anch chiswiriken, ukwisukaku yakudia yikemp ya kuya nich.
4. Musangar ik tukutwisha kuman anch twasutish chikunku cha Diarubing mu mudimu wa kulejan?
4 Anch twasadil chikunku cha Diarubing mu mudimu wa kulejan, tukez kwikal kand ni chisu cha kupim anch tuswiridin. Ni kupim kwetu kukez kwikal nich musangar ukata kudiokal mu kwipan mu mudimu utumbila. (Jinsw. 19:23) Musangar mudi ik wa kutan muntu kanang mudi Lidi!