Ov, Yiney Yawiy Yasotay Nzamb?

TANG jurnal mwin mwawonsu. Tal ku televizion, ap tesh ku radio. Kudi jinsangu jivud ja yisal ya kujipan, ya njit ni jinsangu jiletishina wom. Tongin bil pa yakamish yey amwiney. Pamwing mayej ap rufu ra mukatish yikutwish kukwovish kusansan nakash. Ukutwish kutong mud mwatongay Job, muntu muwamp walonda anch wadinga “wizwil sens nich . . . mar.”—Job 10:15, The Holy Bible in the Language of Today.

Iyipulap bil:

Ov, yiney yawiy yansotilay Nzamb ni antu akwau?
Kwisu nikutwisha kutan ukwash mulong wa kupwish milong yam?
Ov, kudi ruchingej ra kwel anch tukez kuman chisambu pa divu?

Bibil wakwil mu mutapu usangareshina ku yipul yiney yawonsu.

BIBIL UFUNDISHIN ANCH YINEY YAWIY YASOTAY NZAMB NI UKEZ KULET MIKADIL YINEY PA DIVU.

“Ndiy ukez kayikuswol mansoj mawonsu ku mes kwau; kukez kikalip kand rufu; ap kukez kikalip kand madil, ap kushikok kudil, ap kusansan, kwamwamu kand; mulong yom yikuru yasutil kal.”—Kujingunik 21:4

“Ayishet akez kamatok mudi atubaj.” —Isay 35:6

“Chad mes ma amputames makez kaburik.” —Isay 35:5

‘Awonsu adia mwi nzay ya chivurikish . . . akez kubudikamu.’ —Yohan 5:28, 29

“Kwikil muntu ap kusu umwing ukeza kulond anch: ‘Niyedil.’” —Isay 33:24

“Kukwikal mbut yivud mwi ngand.”—Kuseng 72:16

Divu diaswimp kal mudi mwatongay Nzamb kwisambishin: Ipal wikal kal nsand, ayej ni ayilim ayerik kal, afu avumbuk kal, kudi yakudia yivud

ISAKINA YOM YIFUNDISHINAY BIBIL

Kangal kulik swa yimekeshinau pa yipich yidia pa mapaj ma kusambish mud kwau yitongijok ya chamwamu. Nzamb washilamu kulet mikadil yiney, ni Bibil urumburil mutapu ukezay kusal mwamu.

Antu aad ilejin Bibil pasadidinau buku Chifundishinay Bibil

Pakwez Bibil udi wa ukwash mu yom yivud. Udi musul wa kwikal nich mwom usangareshina ap kamu katat. Tonginap bil mu chisu chikemp mar mey ni yakamish yey. Makutwish kwikal kuburen kwa nfalang, yikokujol ya dijuku, kuburen kwa ukash wa mujimbu, ap rufu ra mukatish ney. Bibil ukutwish kukukwash kurish nich yikokujol ya nlel, ni ukutwish kulet rongoj kusutil ku kwakul ku yipul yilondwila ey:

Mulong wak tumena mar?
Mutapu ik tukutwisha kurish nich yakamish ya mwom?
Mutapu ik tukutwisha kwikadish mwom wa dijuku dietu usangareshina?
Yom ik yikata kutushiken pitukata kufa?
Ov, tukez kuyiman kand akatish netu afa kal?
Mutapu ik tukutwisha kwikal nich kashinsh anch Nzamb ukez kuwanyish kushilamu kwend mulong wa machuku ma kurutu?

Piutangina buku winou chimekeshin anch usotil kujingunin chifundishinay Bibil. Buku winou ukukukwash. Ukuman anch maparagraf makwet yipul yambatena nich yidia kwishin kwa paj. Antu avud akat kusadilang mutapu wa yipul ni yakul pakatau kwisambin piur pa Bibil pamwing nau Atuman a Yehova. Tuchingejin anch niyey ukuusanger. Chiyukish cha Nzamb chikal ney piusangaredina katat uman usangareshina ni upwitina manangu ma kwilej chifundishinay chakin kamu Bibil!