MWBR18.12 Mareferans mulong wa Mudimu ni Mashakamin ma in Kristu Mukand wa Chikumangan

NGOND WA 12 RUBING RA 3-9

YOM YA USEY YIDIA MU DIZU DIA NZAMB | MIDIMU 9-11

“Mwin Kuzengolan Nakash Wikala Kaman wa Mushiku”

bt-F p. 60 par. 1-2

Chikumangen ‘Chashakama mu Chisambu’

¹ IN KWENDANGAN akweta ujim nakash asejin piswimp ni Damas, musumb uyilau mulong wa kusal yom yiyimp. Ayil kuyidiosh in kwilej a Yesu mu yikumbu yau, kuyikas, kuyipipej ni kuyitwal ku Yerusalem ku chisak cha in ujim cha Sanedrin.

² Mukurump wa chisak, utazukinau anch Saul, wichil kal mash ma antu avud. Machuku ma kwinyim, wadingaku ni witiyija anch Azelot amwasa Stefan mayal kushik ni pamujipinau, mwin kwilej wa mushiku wa Yesu. (Mid. 7:57–8:1) Kasangerap kusu kuyikwat in kwilej a Yesu ading achisha mu Yerusalem, Saul wayimesha mar nakash. Wading usotin kujiyish chisak cha antu atazukau anch “Njil.”​—Mid. 9:1, 2; tal mushet ulondina anch “Mudimu wa Saul mu Damas,” pa paj wa 61.

w16.06 paj 4 par. 4

Mumana Yehova Mudi Mwin Kuumb Wetu

⁴ Yehova kameningap antu mutapu tuyimening. Pakwez, ukat kutal mu muchim ni umening chitudia chakin kamu. (Tang 1 Samwel 16:7b.) Yehova wamekesha chom chinech pasalay chikumangen cha win Kristu. Wasejisha antu avud kudi ndiy ni kudi Mwanend amanangau kudi antu akwau anch kakwetap usey. (Yoh. 6:44) Chilakej, umwing wa antu inay wading Mufaris watazukangau anch Saul, wading mwin ‘masaal ni mwin kuzengolan ni chibud.’ (1 Tim. 1:13) Pakwez Yehova wamana muchim wa Saul ni kamumanap mudi kam wakad usey. (Jnsw. 17:3) Pakwez, Yehova wamana anch wafanyina kumuumb Saul ikal mudi “chom chitondinau” chakwel alejana “kudi in michid yikwau, ni kudi ant, ni kudi in Isarel.” (Mid. 9:15) Yehova watonda kand antu akwau akutwishay kuumb mulong wa “kusadil mudimu wa katumb,” pakach pa antu inay mudi antu alewang maar pakur, asalang masandj, ni antu iyang (Rom 9:21; 1 Kor. 6:9-11) Chisu chilejau Bibil, akasikesha ritiy rau mudiay Yehova ni itiya anch ayiumba.

bt-F p. 64 par. 15

Chikumangen ‘Chashakama mu Chisambu’

¹⁵ Ov, ukutwish kutongin mutapu wovau antu ujim, washimwokau ni wovau kuyip chisu chamumanau Saul ukat kulejan piur pa Yesu mu ma sinagog? Iyipula anch: ‘Ov, kindiyap muntu wadia ni kuyiparol antu mu Yerusalem ajimbulang dijin dined?’ (Mid. 9:21) Pading parumburilay piur pa kuswimp kwend kwa muchim mulong wa Yesu, Saul ‘wayijikisha patok anch winou ndiy kamu Kristu.’ (Mid. 9:22) Pakwez antu awonsu kakulondangap pakot mudi mutapu winou. Kulond patok kukutwishap kuburil manangu ma antu mizwila sens nich yinshakur ap akweta chibud nakash. Pakwez Paul kaziyap.

Kukimbijol Mapit ma mu Spiritu

bt-F p. 60-61 par. 5-6

Chikumangen ‘Chashakama mu Chisambu’

⁵ Chisu chamwimikau Saul kudi Yesu mwi njil yiyila ku Damas, Yesu kamwipulap anch: “Mulong wak ey ukat kuyizengol in kwilej am?” Pakwez mudi twalondang, walonda anch: “Mulong wak ey ukat kwinzengol am?” (Mid. 9:4) Mwaning, Yesu wanenganana mulong wa mar mayishikena in kwilej end.​—Mat. 25:34-40, 45.

⁶ Anch akumeshin mar mulong wa ritiy ukweta mudiay Kristu, ikal ni kashinsh anch Yehova ni Yesu amen mulong wey. (Mat. 10:22, 28-31) Katat, mar kakumadioshap kamu. Vurik anch, Yesu wading umen Saul ukat kukwash chakwel amujipa Stefan, ni wamumana Saul ukat kuyichinish in kwilej ashinshamena ku yikumbu yau mu Yerusalem. (Mid. 8:3) Pakwez, Yesu kasalap chom chisu chinicha. Ap anch chidi mwamu, Yehova, kusutin Kristu, wamwinka Stefan nau in kwilej akwau usu wading uswiridinau mulong wa kushal ashinshamena.

nwtsty yom ya kwilej yidia mu Mid 10:6

Simon, mwin kurijek yikit: Mwin kurijek yikit wasalang ni yikit ya annam, mu kusadin yom yiswanina mulong wa kudiosh mavuj, yidadabu ni many. Kupwa wachitekang mu maar ma kasu chakwel asala yom ya yikit yikash. Mudimu wa kurijek yikit wading mudimu wa madjimb mayimp nakash ni witina mem mavud nakash, chinech chawiy chilejena mulong wak Simon wading ushich ku chikum cha karung, chimeken anch chading piswimp ni musumb wa Yopa. Kukwatijan ni Chijil cha Moses, muntu wading kusadin yom ya annam afila kal wading wijondil. (Lev 5:2; 11:39) Chawiy, in Yuda avud ayimanang in kurijek yikit mudi antu a chamwamu ni idjidjekang kushakam nau. Kupwa, Talmud, buku mukur wa yijil ya in Yuda ulejen anch mudimu wa kurijek yikit wading wa pansh nakash kusutamu wa in kukumangej twij twa annam. Pakwez, Pita kalikap anch kasolikany kamukangesha kushakam ni Simon. Mulong Pita wova kurumburik kwa yom yiney, chinech chamukwasha kwitiy chisend chijim chading chimuchingedina​—kuya kuyital akamichid ku yikumbu yau. In manangu amwing amen anch dijin dia Grek “mwin kurijek yikit” (byr·seusʹ) mudi dijin dikwau dia Simon.

NGOND WA 12 RUBING RA 10-16

YOM YA USEY YIDIA MU DIZU DIA NZAMB | MIDIMU 12-14

“Barnabas ni Paul Akat Kwikadish in Kwilej ku Jindond ja Kulemp Nakash”

bt-F p. 86 par. 4

‘Izula Nich Musangar ni Spiritu Utumbila’

⁴ Pakwez mulong wak spiritu utumbila watakela pakampwil anch Barnabas ni Saul ayaurila ‘mulong wa mudimu’? (Mid. 13:2) Bibil kalondinap chom. Twij anch spiritu utumbila watakela kutond kwa amakundj inay. Kwikil chom chimekeshina anch aprofet ni alej a ku Antiosh alika mupak winou. Pakwez, akwasha ni muchim umwing kutond kwinoku. Tong mutapu wafanyinau kwiyov chisu akadivar nau a mu spiritu, pakad choy, “ajila yakudia ni kulembil, ayanzuk makas, chad ayitum aya.” (Mid. 13:3) Niyetu tufanyidin kuyikwash antu atambwila yisend ya uteokras, kuwejaku nau amakundj atondinau mudi atulam a chikumangen. Pa ndond pa kuyovil mukau antu inay atambwila yisend yiney, tufanyidin kuyinkish “kalimish nakash ni rukat mulong wa midimu yau.”​—1 Tes. 5:13.

bt-F p. 95 par. 5

‘Alonda Nich Kutakaman ku Ukash wa Yehova’

⁵ Chakusambish, Paul ni Barnabas imana mu Ikon, teritwar wading ni yinshakur ya Grek ni musumb umwing pakach pa misumb ya provins wa Galatia, mu winyikel wa Rom. Musumb winou wading wizwil nau in Yuda ijikena avud ni akamichid avud akad kwikal in Yuda. Kukwatijan ni chaku chau, Paul ni Barnabas andamang mu sinagog ni kusambish kulejan. (Mid. 13:5, 14) Awiy “arumburila mazu mawamp chakwel in Yuda avud, ni antu a michid yikwau avud, ikala in kwitiyij.”​—Mid. 14:1.

wp14 1/9 paj 13 par. 4-5

Musadina Nzamb Nich Kushinshaman ap Anch Kudi “Mar Nakash”

⁴ Kupwa kwa kushik mu musumb wa Derbe, Paul nenday Barnabas “achirika ku musumb wa Listre, ni wa Ikon, ni wa Antiosh wa ku Pisidiy. Mu musumb ni musumb awiy ayikasikeshanga in kwitiyij ni [kuyikasikesh] kudandamen mu ritiy. Ayilejanga anch: ‘Chifanyidin etu awonsu kuman mar nakash mulong wa kwandam mu Want wa Nzamb.’” (Mid. 14:21, 22) Kwinsambishil, mazu minam mafanyina kumekan mudi makwatishena wom. Kupwa chad, rutong ra kwel anch chifanyidin kuman “mar nakash” rela kwikal chom cha runeng, kulik chikasikeshina. Ov, mutapu ik wafanyina kusadik anch Paul nend Barnabas “ayikasikeshanga in kwitiyij” kusutil ku mazu mading kulondau piur pa mar mavud?

⁵ Tukutwish kutan chakul anch twashinshikin nawamp mazu ma Paul. Ndiy kalondap kwend anch: “Chifanyidin etu awonsu kuman mar nakash.” Pakwez, walonda anch: “Chifanyidin etu awonsu kuman mar nakash mulong wa kwandam mu Want wa Nzamb.” Chawiy lel Paul wayikasikesha in kwilej kusutil ku kukasikesh chibudikin chiwamp cha kushinshaman kudi Nzamb. Chiyukish chinech chidiap chom cha makasu. Pakwez, Yesu walonda anch: “Muntu mwawonsu ukeza kujijaman djat ni ku rufu rend, Nzamb ukez kumupandish.”​—Mat. 10:22.

Kukimbijol Mapit ma mu Spiritu

w08 15/5 paj 32 par. 7

Manans Majim ma Buku wa Midimu

12:21-23; 14:14-18. Herod witiyija ntumb yamwinkishau, yadinga yifanyidinau kumwinkish Nzamb. Chom chinech chadinga chishalijadina nich ntumb ni kukasikeshin kalimish kamwinkishau Paul ni Barnabas! Kitufanyidinap kuswiriken ntumb mulong wa yom yitukutwisha kusal mu mudimu wa Yehova.

nwtsty yom ya kwilej yidia mu Mid 13:9

Saul, utazukinau kand anch Paul: Kudiosh pinap, Saul amutazukin anch Paul. Kambuy wavadika mudi mwin Hebereu ukweta wan a ngand wa Rom. (Mid 22:27, 28; Fil 3:5) Chimeken pamwing ap anch kudiosh ku wanikanch wend, wading ni dijin dia Hebereu anch Saul ni dia Paul mu dizu dia in Rom. Chading chaku kudi in Yuda a pa chisu chinacha, nakash antu ading ashicha pol pa ngand ya Isarel, kwikal ni majin maad. (Mid 12:12; 13:1) Anamakwend amwing a Paul ading ni majim ma in Rom ni ma in Grek. (Rom 16:7, 21) Mulong wading ‘kambuy wa michid,’ Paul amutuma kulejan rusangu ruwamp kudi antu akad kwikal in Yuda. (Rom 11:13) Pamwing ap wakwata mupak wa kusadin dijin diend dia in Rom; wamana anch mwamu chikutwish kuswapal kumwitiy. (Mid 9:15; Gal 2:7, 8) Antu amwing ading alondin anch wipila dijin dia in Rom mulong wa kumulish Serigius Paulus, pakwez chidiap kamu mwamu, mulong Paul walama dijin dined ap kupwa kwa kudiokal mu Shipre. Akwau alondang anch Paul wipuka kusadin dijin diend dia Hebereu mulong mutapu udijimbwilau mu Grek udi kand mutapu umwing ujimbwilau dijin dimekeshina muntu (ap nnam) wading witutwila chisu chendinay.​—Tal yom ya kwilej yidia mu Mid 7:58.

Paul: Mu Mifund ya Grek ya win Kristu, dijin Pauʹlos, didiokila mu Latin anch Paulus, dirumburikin “Kakemp; Mukemp,” adisadidin tupamp 157 palondinau piur pa kambuy Paul ni kapamp kamwinng chisu chilondinau piur pa nyikel wa ditung dia Shipre utazukinau anch Serigius Paulus.​—Mid 13:7.

NGOND WA 12 RUBING RA 17-23

YOM YA USEY YIDIA MU DIZU DIA NZAMB | MIDIMU 15-16

“Mupak Uwamp Wimedina pa Dizu dia Nzamb”

bt-F p. 102-103 par. 8

‘Atadikijana Nau ni Kupwitijan Nakash’

⁸ Luka uwejidinaku anch: “Paul nend Barnabas atadikijana nau nakash mulong wa chom chinech. Chawiy amutonda Paul nend Barnabas, pamwing ni antu akwau a mu Antiosh, chakwel aya ku Yerusalem kumanijan nau atwimbuy a Yesu nau amakurump mulong wa chom chinech.” (Mid. 15:2) ‘Kutadikijan ni kupwitijan’ kumekeshin yovil yikash ni kashinsh ka yom yijau ku mitambu yawonsu yaad, ni chikumangen cha ku Antiosh chatwishap kupwish mulong winou. Mulong wa kulam chisambu ni uumwing, chikumangen chakwata mupak wa manangu wa kutwal mulong winou kudi ‘atwimbuy nau amakurump ku Yerusalem,’ ading asadina chisak chitakedila. Yom ik tukutwisha kwilejin kudi amakurump a ku Antiosh?

wp12 1/1 paj 8 par. 6-7

In Kristu Akin Aziyidil Ku Dizu Dia Nzamb

⁶ Mufund wa Bibil wakwasha kupwish mulong wading wa Amos 9:11, 12. Mudi mwafundau mu Midimu 15:16, 17, tutangin anch: ‘Am nikez kachirik, Nikez katung kand chikumbu cha David chawa kal; Nikez katung kand yikunku ya mankuru mau, Nikez kayimik kand, chakwel antu avud ashadilap amusota [Yehova], ni michid yawonsu yikat kutazukau mu dijin diam.’

⁷ ‘Pakwez chingel,’ muntu kanang ukutwish kulond anch, ‘mufund winou ulondilap anch chidingap chiswiridina kudi Akamichid in ritiy kuya ku mukand.’ Chakin kamu; pakwez, in Kristu in Yuda ela kwikal nich chitongijok chinech. Kadingap ni kuyiman Akamichid aya kumukand mudi ‘antu a mangand’ pakwez mudi akadivar. (Kub. 12:48, 49) Chilakej, kulondulijan ni La Bible d’Alexandrie, dikarumun dia Septante, tutangin Ester 8:17 anch: “Pakach pa antu in ngand, amwing ikarumuna kwikal in Yuda.” Chawiy lel, pasambela Mifund kulond anch awiy ashalaku a chikumbu cha Isarel (in Yuda ni antu akarumuka ikal in Yuda kusutil ku kuyitwal ku mukand) pamwing nich “antu a michid yawonsu” (Akamichid akad kutwal ku mukand) akwikal antu amwing mulong wa dijin dia Nzamb, rusangu riner rading rovikena. Chadingap chiswiridina kudi Akamichid asota kwikal in Kristu kuyitwal ku mukand.

bt-F p. 123 par. 18

‘Kukasikesh Yikumangen’

¹⁸ Paul ni Timote asala mudimu pamwing mu mivu yivud. Padingau mu mudimu wa kwendangan, awanyisha yisend yivud mu dijin dia chisak chitakedila. Bibil ulejen anch: “Pasutangau mu ul ni ul, ayilejanga in kwitiyij yijil yatenchikau kudi atwimbuy a Yesu ni kudi amakurump mu Yerusalem. Ayilejanga kuziyil ku yijil yiney.” (Mid. 16:4) Chakin kamu, yikumangen yalondula umutakel udiokila kudi atwimbuy ni kudi amakurump adinga ku Yerusalem. Mulong aziyina, ‘yikumangen yadandamena kwiman dang mu ritiy ni yavulijana kand pichuku pichuku.’​—Mid. 16:5.

Kukimbijol Mapit ma mu Spiritu

wp12 1/1 paj 14 par. 8

Ileja Kucha Ku Mes Kusutil Kudi Atwimbuy A Yesu

⁸ Yom ik tukutwisha kwilejin ku rusangu riner? Shinshikin anch mwiku wa Nzamb wamukangesha ching kusu kupwa kwa Paul kusambish kuya ku Aziy. Kupwa, Yesu wayikangesha ching kusu kupwa kwa Paul kushik piswimp ni Bitiniy. Ni kupwa, Yesu wamuleja kuya ku Masedon ching kusu kupwa kwa Paul kushik ku Trowas. Chidiay Mutu wa chikumangen, Yesu ukutwish kutusadil mu mutapu wa chilik chimwing. (Kol. 1:18) Chilakej, ukutwish watongidin kal piur pa kusal mudimu wa uchibol wa rawonsu ap kuya kwin ndond kudia kuswir kujim kwa in kulejan. Pakwez chikutwish kusal anch ching kusu kupwa kweyey kushiken rutong rey anch Yesu, kusutil ku mwiku wa Nzamb, ukez ku kutakel. Chilakej: Mwin kwendish motak ukutwish kutwal motak wend ku chikas cha katatuku ap cha kamaku ching kusu anch motak wendil. Chilik chimwing, Yesu ukutwish kututakel mu kujimbish mudimu wetu pakwez ching kusu anch tukat kusal​—anch tusadil usu chakwel kuwanish.

nwtsty yom ya kwilej yidia mu Mid 16:37

Etu tudi in Rom: Charumburik anch an a ngand a Rom. Paul pamwing ap ni Silas ading an a ngand a Rom. Chijil cha in Rom chading chilejen anch mwan a ngand wading ukwet mbil ya kuya ku dirumburish ni kafanyinap kumupup pakach pa antu kurutu kwa kumusambish. Kwikal mwan a ngand wa Rom kwamwinkishang muntu mbil ni kutaninamu kanang ndond yawonsu yadingay mwi ngand yakabuj. Mwan a ngand wa Rom wading ufanyidin kuziyil ku chijil cha Rom, kadiap ku yijil ya misumb yikwau. Anch amufund, wafanyina kwitiy amurumburisha kukwatijan ni chijil cha kwol kwau; pakwez wading kand ni mbil ya kumurumbish ku dirumburish dia Rom. Anch wasal kurumbuk kujim, wading ni mbil ya kumutazukish mwant ap nyikel. Kambuy Paul walejana nakash mu misumb yawonsu yading mu winyikel wa Rom. Wasadina mbil yend ya wan a ngand wa Rom tupamp tusatu. Kapamp ka kusambish wasadina padingay mu Filip chisu chayilejay anzwij a mu Filip anch ajipa chijil chisu chamubulau.​—Mulong wa kwijik tupamp tukwau twaad twasadinay mbil yend ya wan a ngand wa Rom, tal yom ya kwilej yidia mu Mid 22:25; 25:11.

NGOND WA 12 RUBING RA 24-30

YOM YA USEY YIDIA MU DIZU DIA NZAMB | MIDIMU 17-18

“Mwimburija Kambuy Paul mu Kulejan ni mu Kufundish”

nwtsty yom ya kwilej yidia mu Mid 17:2, 3

wayitongisha: Paul kayilejap ching kusu rusangu ruwamp. Warirumburila ni walejana uman mu Mifund, charumburish anch kudiokal mu Mifund ya Hebereu yapepilau. Wasala yivud kusutamu kwau kutang Mifund; wayitongisha kusutin Mifund ni waswimpa mutapu wend wa kutong kukwatijan ni in kumutesh. Dizu dia Grek di·a·leʹgo·mai adikarumana mudi “kusambish mambamb ma kuswimpijan mazu; kwisamb; kwambamb.” Dizu dined dimekeshin kwambamb nawamp nau antu. Dizu dined dia Grek adisadidin kand mu Mid. 17:17; 18:4, 19; 19:8, 9; 20:7, 9.

wapanang uman mu kujimbul maverse: Mu Grek, mazu minam marumburikin anch “kutet kwimbet (kutek kuns).” Chinech chikutwish kurumburik anch Paul wafanakeshang nawamp uprofet wa Umesia udia mu Mifund ya Hebereu ni yinship ya mwom wa Yesu, ni kumukesh mutapu wawanyishay Yesu uprofet winou.

nwtsty yom ya kwilej yidia mu Mid 17:17

Chiku: Chading pakach pa Kurul ni Kurand kwa Acropole, chiku cha mu Aten (mu Grek a·go·raʹ) chading ni kujimb kwa ametre 48 562. Chiku chadingap kwau ching kusu ndond ya kuland yom ni kulandish. Yading ndond yijim ya musumb ya kwisakin, ya kusadin yom ya politik ni yom yisadiningau antu pichuku pichuku. Antu a mu Aten asangerang kukumangen pa ndond yiney ya pibur mulong wa kwambamb yom ya in manangu.

nwtsty yom ya kwilej yidia mu Mid 17:22, 23

Kudi Nzamb Wakad Kwijikan: Mu Grek, mazu A·gnoʹstoi the·oiʹ mading pakach pa mazu mafundinau pa chintamb cha mu Aten. In Aten amekeshang wom wa anzamb kusutil kutung matempel ni yintamb yivud, atungang kand yintamb mulong wa anzamb akad kwikalaku, mudi nzamb wa Ntumb, wa Kwikepish, wa Usu, wa Kukasikesh ni wa Riy. Pamwing ap ovang wom anch akutwish kuvuramen nzamb kanang ni chinech chikutwish kusal anch alika kwikal ni dilau dia nzamb winou, chawiy apana chintamb “kudi Nzamb Wakad Kwijikan.” Kusutil chintamb mudi chinech, antu ading kwitiyij kwikalaku kwa Nzamb wakadiau kwijik chom ap chimwing piur pend. Paul wasadina ni nkeu kwikalaku kwa chintamb chinech mudi dishin mulong wa mafundish chakwel ayileja antu piur pa Nzamb​—Nzamb wakin​—wading wakadiau awiy kwijik.

Kukimbijol Mapit ma mu Spiritu

w08 15/5 paj 32 par. 5

Manans Majim ma Buku wa Midimu

18:18​—Machip ik machipay Paul? In kwilej Bibil amwing alondiling anch Paul wachipa machip ma Unazir. (Kuch. 6:1-21) Pakwez, Bibil kalondilap chamadinga machip ma Paul. Chikwau, Mifund kiyilondilap anch Paul wachipa machip minam kurutu ap kupwa kwa kukarumuk kwend ap kulond anch wadinga umasambishin ap kumapwish. Chikalap nchik, chadingap chitil kuchip machip minam.

nwtsty yom ya kwilej yidia mu Mid 18:21

anch Yehova wakat: Mazu minam makasikeshidin usey wa kutek rusot ra Nzamb pa ndond ya kusambish chisu tusadina ap turijekina kusal chom chin chawonsu. Kambuy Paul walama mbil yiney mu manangu. (1Ko 4:19; 16:7; Heb 6:3) Mwin kwilej Jakobu niyend wayikasikesha in kutang end kulond anch: “Anch [Yehova wachikatish], etu tukupand, chad tukez kusal chom chikanang ap chikampand.” (Jak 4:15) Chifanyidinap kwau kulond mazu minam chamwamu; muntu mwawonsu ulondina nich kashinsh anch “anch Yehova wakat” ufanyidin kusal kukwatijan ni rusot ra Yehova. Chidiap kwau cha usey chisu chawonsu kujimbul mazu minam nich dizu di piur, pakwez chiyipinap kwau kumalond mu muchim.​—Tal yom ya kwilej yidia mu Mid 21:14; 1Ko 4:19; Jak 4:15 ni Appendice C.

NGOND WA 12 RUBING RA 31–6 NGOND WA 1

YOM YA USEY YIDIA MU DIZU DIA NZAMB | MIDIMU 19-20

‘Babalany Ayinen, ni Kudi Chisak Chawonsu cha Amikoku’

wp11 1/6 paj 24 par. 5

“Yilamany Yisak Ya Amikoku A Nzamb Akwinkishanyau”

⁵ Kambuy wafunda anch amakurump afanyidin ‘kulam yisak ya amikoku a Nzamb.’ Chading cha usey kudi awiy pa kwijik anch chisak cha amikoku chidi cha Yehova ni Yesu Kristu. Amakurump afanyidin kupan kuchind piur pa mutapu wadingau ni kulam amikoku a Nzamb. Tongin bil anch murund ney wa piswimp wakulej anch uyilama anend padingay kulemp. Ov, welap kuyilam nawamp ni kuyidish? Anch mwan umwing wayel, ov, ukutwishap kusal usu chakwel umwokisha? Chilik chimwing kand, amakurump adia mu chikumangen afanyidin kwikal “atufung a in chikumbu cha Nzamb, awiy kamu ikadila kal aend mulong wa mash ma Mwanend.” (Mid. 20:28) Afanyidin kulam mu manangu anch mukoku mwawonsu amulanda nich mash ma usey ma Yesu Kristu. Mulong akez kupan kuchind, amakurump afanyidin kuyidish, kuyiking, ni kuyilam yisak ya amikoku.

wp13 1/1 paj 31 par. 15

Atulam in Kristu ‘Ambay a Mudimu Mulong wa Musangar Wetu’

¹⁵ Kwikal kafung kwitin mudimu ukash. Yisu yimwing, atulam akat kuchish pakad kulal mu kuyibangin amikoku a Nzamb ap mu kupan ukwash wa muspiritu kudiau ambay akaritiy. (2 Kor. 11:27, 28) Ni katat, atulam asendin yisend yau nawamp ni musangar, mudi kamu mwasalay Paul. Wayifundina in Korint anch: “Nikwet musangar wa kupan yom yawonsu yinikweta, ni kwipan kand am amwinam, mulong wa kukupandishany en.” (2 Kor. 12:15) Chakin, nich rukat mulong wa akadivar nend, Paul wipana sens amwinend mu kuyikasikesh. (Tang 2 Korint 2:4; Fil. 2:17; 1 Tes. 2:8) Chakin akadivar amukatisha nakash Paul mud ik!—Mid. 20:31-38.

bt-F p. 172 par. 20

‘Am Nitokish kal ku Mash ma Antu Awonsu’

²⁰ Mwom wa Paul wading ushalijadin nakash ni wa antu asadina nayimp chisak cha amikoku mu kusut kwa chisu. Wasala mudimu nakash mulong wa kwikwash amwinend mulong wa kulik kupan yisend ku chikumangen. Usu wasalay mulong wa ambay nend in kwitiyij wadingap mulong wa kutaninamu kwend amwinend. Paul wayikasikesha amakurump a ku Efes kumekesh muchim wa kwipan. Wayileja anch: Chifanyidin kusal midimu yikash mudi munasala am, mulong wa kuyikwash aburedina. Vurikany mazu malonday Nsalejetu Yesu amwinend anch: ‘Chiyukish cha mwin kupan chipandakenamu cha mwin kutambul.’”​—Mid. 20:35.

Kukimbijol Mapit ma mu Spiritu

bt-F p. 161 par. 11

Dizu ‘Diaya Kurutu ni Kupalangan’ Chikalap Nchik Rupompat

¹¹ Paul wasala madiskur mu shikol yiney dichuku diawonsu mu mivu yaad. Walondang pamwing ap kusambish pa saa wa 11:00 pamanch kushik ni pa saa wa 16:00 urel. (Mid. 19:9.) Chimeken anch chinech chading chisu chiwamp, pakwez cha muten ukash, chawiy antu imikang midimu yau mulong wa kudia ni kwiswedish. Tong bil anch Paul walondula program winou mu mivu yaad yakabuj, wafanyina kusal asaa 3000 mu kufundish. Dined diawiy diyingishin dikwau dimekeshina mulong wak dizu dia Yehova diandamena kuya kurutu ni kupalangan. Paul wasala mudimu nakash ni waswimpa yitongijok yend kukwatijan ni yishiken. Warijeka program wend chakwel mudimu wend wa kulejan ukwatijana ni maswir ma antu a ndond yiniya. Kwading yibudikin ik? “In Yuda ni antu a michid yikwau awonsu ading ashicha mwi ngand ya Aziy atesha rusangu ra Nsalejetu.” (Mid. 19:10) Wapana uman uwamp mud ik!

bt-F p. 162-163 par. 15

Dizu ‘Diaya Kurutu ni Kupalangan’ Chikalap Nchik Rupompat

¹⁵ Yom yikash yayishikena an a Sikeva yasala anch antu akwau amwova Nzamb wom ni yayibachika antu avud kwitiyij ni kulik yom yau ya ayilembil. Mu yaku ya in Efes mwading yom ya ulaj nakash. Maji, disaku (nkau) ni yom ya kuwang ap ya kulond ya ulaj yading yijiken nakash ni yisu yivud ayifundang mu mabuku. In Efes avud akwata mupak wa kukungamej mabuku mau ma yom ya ulaj ni kumwosh pakach pa antu avud​—ap anch mading ma usey wa tunan ni tunan twa ma dolar kukwatijan ni usey wa katat. Luka ulejen anch: ‘Chawiy dizu dia Nzamb diadandamena kuya kurutu ni kupalangan.’ (Mid. 19:17-20) Kuwin kuwamp mudi ik kwa uyakin pantaliken ni makasu ni yom ya ayilembil! Nlel unou, antu inay ashinshamena atushila chilakej chiwamp. Niyetu tushich mu mangand mizwila too ni yom ya ayilembil. Anch twajingunin anch tukwet chom chikwatijadina ni yom ya ayilembil, tufanyidin kusal mudi mwasalau in Efes​—kuchidiosh pakad kulab! El twipukany amboku yisal mudi yiney yijondila, ap anch chitin kushadish yom yivud.