Chishimu Cha Nfalang Dikum Ja Mina

Pading padandamedinay weny wend mulong wa kuya ku Yerusalem, chimeken anch Yesu pamwing ni in kwilejend ading ku chikumbu cha Zakeu. In kwilej ading atongin anch: “Want wa Nzamb” wading piswimp ni kuutenchik ni kumutek Yesu mudi Mwant. (Luka 19:11) Awiy kateshap nawamp mulong winou, mudi mwakanganyau kutesh kand piur pa rufu ra Yesu. Chawiy, Yesu wayileja chishimu chimwing mulong wa kuyikwash ajingunina anch Want akez kuutenchik mu machuku ma kurutu.

Ndiy walonda anch: “Kwading muntu umwing mujim wasota kuya kwi ngand ya kulemp chakwel akamudisha want, chad wading uchingejin anch, ukuchirik kand kwol kwend.” (Luka 19:12) Weny winou wading wa machuku mavud. Chimeken patok anch Yesu ndiy ‘muntu mujim’ waya “kwi ngand ya kulemp,” mwiur, ndond yafanyinay Tatukwend kumudishin want.

Mu chishimu chinech, kurutu ‘muntu mujim’ aya mu weny, ndiy wayitazuka atushalapol dikum ni wayinkisha muntu ni muntu rufalang ra [mina] kupwa wayileja anch: “Isakany nich nfalang jinej djat ni pinikeza kuchirikin.” (Luka 19:13) Rufalang ra mina rawiy ramufutangau ndim wasalanga mudimu mu angond asatu ni kusut.

In kwilej ajingunina anch awiy ading mudi atushalapol inkinshau nfalang dikum jisambinau mu chishimu chinech, mulong Yesu wasambela kuyifanikesh ni in kwangul mbut. (Mateu 9:35-38) Chakin kamu, Yesu kayilejap in kwilejend kumuletin mbut ja mu yir. Pakwez, kwangul kwinoku kwading kwa kuyilet in kwilej akwau chakwel ikal mu Want wa Nzamb. In kwilej asala usu wau wawonsu mulong wa kuyikwash antu akwau niyawiy ikala mu Want.

Yom ik yikwau yalejanay Yesu mu chishimu chinech? Ndiy walonda anch an a ngand “amukisa [muntu mujim] atuma aruu mwi ngand yiniya mulong wa kulejan anch: ‘Etu kitusotilap muntu winou kwikal mwant wetu.’” (Luka 19:14) In kwilej ading ij anch in Yuda kamwitiyap Yesu—in Yuda amwing akimba kumujip Yesu. Kupwa kwa Yesu kufa ni pavumbukay mulong wa kuya mwiur, in Yuda amekesha chitongijok chau piur pa Yesu payizengolau in kwilejend. Akankuny inay amekesha patok anch kakatap Yesu ikala Mwant wau.—Yohan 19:15, 16; Midimu 4:13-18; 5:40.

Mutapu ik mwasadinau atushalapol dikum nfalang jau djat ni pamudishau ‘muntu mujim want’ kushik ni pachirikay? Yesu warumburila anch: “Ndiy amudisha want, chad wachirika kwol kwend. Chawiy wayitazuka atushalapol end ashilay nfalang, chakwel ijika nfalang jisakilau kal. Kashalapol wa kusambish weza walond anch: ‘Mwant, rufalang rumwing [mina] wanginkisha, am nisakidilap nfalang jikwau dikum ja [mina].’ Mwant wamwela anch: ‘Chiwamp, ey udi kashalapol muwamp! Mulong ey wamekesh kal win yakin mu yom yikemp, am nikez kukutek ey kwikal mwin kutakel wa misumb dikum.’ Kashalapol wa kaad weza, walond anch: ‘Mwant, rufalang rumwing ra [mina] ruwanginkisha, am nisakidilap nfalang jikwau jitan ja [mina].’ Mwant wamuleja kashalapol winou anch: ‘Am nikukutek ey kwikal mwin kutakel wa misumb yitan.’”—Luka 19:15-19.

Anch in kwilej ajingunina anch awiy ading mudi atushalapol asadina usu wau mulong wa kuyikadish antu in kwilej, awiy afanyina kwikal nich kashinsh anch Yesu ukez kusangar. Ni afanyina kwikal nich kashinsh anch akez kuyifut mulong wa mushiku wau. Chakin kamu, kadiap in kwilej awonsu a Yesu adinga ni mashakamin ma mutapu umwing ap ading ni chisu ap kand ukaliweny wa chilik chimwing. Pakwez, Yesu wadishau “want” wij nawamp ni ukuyiyukish in kwilej mulong wa kushinshaman kwau kwasalau mulong wa kuyikadish antu in kwilej.—Mateu 28:19, 20.

Chinyim ni chinech, Yesu wapwisha kulond chishimu chinech anch: “Kashalapol mukwau weza, walond anch: ‘Mwant, rufalang rey ra [mina], er kamu er. Narukasa mu chibel, narujindjik. Am nakwova ey wom mulong ukwet muchim ukash. Ey ukat kutambul yom yiwakad ey kwikal nich, ukat kwangul yom yiwakad ey kukun.’ Mwant wamwela anch: ‘Ey udi kashalapol muyimp! Nikukufish nich mudi mudia mazu mey! Ey wij kal anch, am nikwet muchim ukash, chad nikat kutambulang yom yakad iyam, ni kwangul kand yom yinakad kukun. Anch mwamu, ing, mulong wak walika kuyinkish in kwisak nich? Ing pineza kal ap, nelang kutambul nich diyanzukesh.’ Chad mwant wayileja antu ading iminya pinipa anch: ‘Mutambulany rufalang ra [mina], chad urupanany kudi kashalapol ukweta nfalang dikum ja [mina].’”—Luka 19:20-24.

Palikay kuvudish dipit dia mwant wend, kashalapol winou amutambula yom yawonsu yadingay nich. Atwimbuy ading achingedin chisu chikuyikelay Yesu mu Want wa Nzamb. Piur pa yom yalonday Yesu mulong wa kashalapol wa nsudien, in kwilej afanyina kutong anch, ang kasadinap usu kakwikalap ni ndond mu Want winou.

Mazu malonday Yesu mafanyina kuyibachik in kwilej ashinshamena chakwel asala usu nakash mu mudimu winou. Chawiy Yesu wapwisha mambamb palonday anch: “Muntu mwawonsu ukweta kal chom, akez kumuwejinaku yikwau. Pakwez muntu mwawonsu uburedina, akez [kumutambul] kakemp kakwetay.” Walonda kand anch akankuny end ading amukisina “kwikal mwant wau,” akez kuyishesh. Kupwa, Yesu wapwishina weny wend mu Yerusalem.—Luka 19:26-28.