makum chinan, ni kuvul kwa mivu yetu yin yidi kusu kwau ya mar ni ushon. Mwom yetu yikat kupwa swa, chad tukat [kujimwangan].”—Kuseng 90:10.

Delphine watana ukwash wa Bibil pa chisu chinech chikash. Ukwash winou wading wa usey nakash kudi ndiy. Mudi mulejena mitu ya milong yisatu yilondwilaku, antu akwau avud amen anch Bibil wayisadidin yom yivud chisu chasadidinau yiyul ya Bibil mu milong yau yadiau nich. Ashikena kamu ku kuman anch Bibil ufaniken ni monima twisambinang kwiur oku. Ushalijadin nakash ni mabuku mavud mikadina kal makur ni makad ukwash. Ov, chinech chidi mwamu mulong Bibil amusala nich yom yishalijadina? Chidi anch mulong ukwet yitongijok ya Nzamb—kadiap ya an a antu?—1 Tesalonik 2:13.

Pamwing ap niyey wamen kal anch mwom udi wiswimp ni wizwil too ni milong. Anch milong yakupandaken, kwisu ukuya chakwel utana rongoj, ukwash ni yiyul ya manangu ya kusadin?

El tushinshikinany mitapu yisatu yikutwishay Bibil kwikal nich usey mu mwom wey. Ukutwish kukufundish mutapu wa

1. kwiyep milong anch chiswapel.

2. kupwish milong yikutwisha kushiken.

3. kujijamen nawamp milong yimwing yiwakad kutwish kuswimp.

Mitu ya milong yilondwilaku ey yikwisambin yom yiney yisatu.

Kuyauril ayej panrau.

Chijil cha Moses chalejana kuyauril antu ayedina musong wa mak nau antu akwau. Chawiy, mulong wa yipupu yashikena mu chirung cha Moyen Âge pawiy pilejau chad adokiter kusadin mbil yiney, yidandamedina kwikal nich usey kushik ni katat.—In Levi, shapitre wa 13 ni wa 14.

Kowal mem kupwa kwa kumukwat muntu wafang kal.

Kushik kamu ni kwinsudien kwa mivu ya 1 900, amingang akwatang mijimbu ya antu afang kal kupwa end ayok kand ayej—pakad kowal ku makas. Chaku chinech chajipesha antu avud nakash. Pakwez, Chijil cha Moses chalejana anch muntu mwawonsu ukukwata mujimbu wafang kal wading wijondil. Chijil chalejana anch chifanyidin kwitokish mu kowal mem. Chaku chinech cha chirelijon chading kamu cha usey nakash mulong wa ukash wa mujimbu.—Kuchind Michid 19:11, 19.

Kujindjik yiyimp ya muntu.

Muvu ni muvu, chikunku cha miliyon umwing ni kusut cha an akat kufa mulong wa mayej ma kusut mwinvumu, nakash chiding mulong wa yiyimp ya antu yakadau kujindjik pa ndond yiwamp. Chijil cha Moses chalejana anch chifanyidin kupundin yiyimp ya antu mu divu ni kuyishikidin, kwi ndond kulemp ni pashichau antu.—Kuvurik Yijil 23:13.

Chisu cha kutwalan ku mukand.

Chijil cha Nzamb chalejana anch chifanyidin kumutwal mwan ikundj ku mukand pa dichuku dia chinan kupwa kwa kuvadik. (In Levi 12:3) Kudi an avadika kal katat, usu wa kwikwat kwa mash ukat kwikal uwamp kupwa kwa rubing ra kusambish. Pasak, kurutu kwa mitapu ya kwokan ya chimwing yikala yiwamp, kuchingel rubing rimwing kurutu kwa kumutwal mwan ku mukand chading cha manangu nakash.

Kukwatijan kudia pakach pa ukash wa mu manangu ni wa ku mujimbu.

In kukimbijol a chimwingang nau in siyans alonda anch yovil yiwamp mudi musangar, ruchingej, kujikitish ni kulikishin ni muchim umwing kukat kwikal ni yibudikin yiwamp pa ukash wa mujimbu. Bibil ulondin anch: “Muchim wa musangar udi mwom uwamp, pakwez muchim wa runeng ukat kuumish mafup.” —Jinswir 17:22.