Maferans ma Mudimu ni Mashakamin ma In Kristu Mukand wa Chikumangan

NGOND WA 3 RUBING RA 1-7

YOM YA USEY YIDIA MU DIZU DIA NZAMB | KUCHIND MICHID 7-8

“Malejan Twilejidina ku Yom Yasadika mu Chibeng cha in Isarel”

it-1-F p. 508 par. 5

Chikumangen

Yisu yivud, mu muchid wa Isarel mwading amakurump a kuchingejin atondangau mulong wa kusal mu dijin dia antu awonsu. (Esi 10:14) Chawiy, “amakurump a antu a michid” awiy apana milambu kupwa kwa kutung dizang. (Kuch 7:1-11) Kupwa kand, in kupesh, in Levi ni “amakurump au antu” awiy itiyina “kusuk manswik ni kumafund mu mukand” mu dijin dia antu awonsu pa chisu cha Nehemiy. (Neh 9:38–10:27) Pa chisu chadingau in Isarel mwi mpay, “amakurump atondau mu chisak, ading kamu antu ijikena,” pakach pau pawiy padiokala antu 250 inunga pamwing ni Kore, Datan, Abiram nend On mulong wa kumubwambwil Moses ni Aron. (Kuch 16:1-3) Kusutil umutakel wa Nzamb, Moses watonda amakundj 70 mukach mwa amakurump a in Isarel mulong wa kumukwash kuwanyish chisend cha “kuyilam antu,” chading chimukasikedina kuwanyish amwinend. (Kuch 11:16,17, 24, 25) In Levi 4:15 ulejen anch “amakurump a chisak,” ni pamwing ap chimeken anch antu alondang mu dijin dia antu awonsu awiy adinga amakurump a muchid, antakel, anzwij ni ankwash.​—Kuch 1:4, 16; Jos 23:2; 24:1.

it-2-F p. 835 par. 9

Ruben

Mu chibeng cha Isarel, in muchid wa Ruben ading nau in muchid wa Simeyon ni wa Gad, chad awiy ading ku mutambu wa Kurul kwa dizang. Pasalangau ma weny, michid yiney yisatu ayitakelang kud Ruben yading yilondwil panyim pa michid yisatu, muchid wa Yuda, wa Isakar ni wa Zabulon. (Kuch 2:10-16; 10:14-20) Chawiy pa dichuku dia kupan dizang kud Nzamb, michid yapana milambu yau kukwatijan ni kulong kwinoku.​—Kuch 7:1, 2, 10-47.

w04-F 1/8 p. 25 par. 1

Manans Majim ma Buku wa Kuchind Michid 8:25, 26.

Chakwel mudimu wa in Levi udandamen kusadik nawamp, ni mulong wa kuyibangin antu amwing ading ayila mu kunanap, ayitang anch ang muntu wawanyish mivu kanang kafanyinap kand kusal mudimu wading ufanyidinau in Levi awonsu kusal. Pakwez ukutwish kwipan kwa kwisotil mulong wa kuyikwash in Levi akwau. Ap anch nlel mwin kulejan kakutwishap kwimik mudimu wa kulejan mulong wa upal, pakwez mbil yidia mu chijil chinech yitufundishin dilejan dimwing dia usey. Mulong wa upal, anch mwin Kristu katwishinap kand kuwanyish yisend yimwing, ukutwish kusal mudimu utwishinay kusal kukwatijan ni usu ukwetay.

Mapit ma mu Spiritu

it-2-F p. 637

Kabuzivumu, Mwan wa Kusambish

Mulong an amakundj a kusambish a in Isarel awiy atondau mulong wa kwikal antakel a majuku, ading amekeshin muchid wa kabuj. Chawiy Yehova wautazuka muchid wa kabuj anch “mwanend ikundj wa kusambish,” chakin kamu wading mwanend ikundj wa kusambish mulong wa manswik masukay nend Aburaham. (Kub 4:22) Mulong Yehova wayichidija an amakundj a kusambish, wapana mbil anch “an a kusambish kuvadik, mwawonsu wasambela kubuz divumu pakach pa in Isarel, muntu ap nnam,” ukwikal wendendiy. (Kub 13:2) Chawiy, an a kusambish ayipanang kud Nzamb.

RUBING RA 8-14 NGOND WA 3

YOM YA USEY YIDIA MU DIZU DIA NZAMB | KUCHIND MICHID 9-10

“Mutapu Ukatay Yehova Kuyitakel Antwend”

it-1-F p. 386 par. 5

Chibeng

Kushemunok kwa chibeng chinech chijim kudiokal ndond kanang mulong wa kuya pa ndond yikwau (Mu Kuchind Michid 33, Moses ulejen piur pa kushemunik piswimp tupamp 40 twashemunikau) kwading kumekeshin kutenchik kuwamp nakash. Chisu chawonsu chimanang didj piur pa dizang, chibeng chashemunikangap. Anch didj diashemunik, chibeng nichawiy chashemunikang. “Ku dizu dia Yehova kwawiy kwatumbukinangau in Isarel ni kuya, chad ku dizu kand dia Yehova kwawiy kwatekinangau chibeng.” (Kuch 9:15-23) Ijikishang mbil ja Yehova mu chibeng chawonsu kusutil kubul mpuny jaad ja utad wa argent. (Kuch 10:2, 5, 6) Yidjimin ya pakampwil yalejanang kutumbuk kwa chibeng. Abula yidjimin yiney kapamp ka kusambish “mu muvu wa kaad [1512 K.C.C.], pa machuku makum maad ma ngond wa kaad.” Chawiy atakejang kurutu mushet wa manswik, chad kwalondul michid yisatu yakusambish yatekalangau kud Yuda, kud Isakar ni kud Zabulon. Kwinyim kwalondulang in Gershon ni in Merari ading asendina yom ya mu dizang. Kwalondulang kand michid yisatu yatakelangau kud Ruben, kud Simeyon ni kud Gad. Kwinyim kwa awiy kwading in Kehat asedang dizang, kwambaken michid yisatu, muchid wa Eferayim, wa Manase ni wa Benjamin. Kwinsudiel kwa awonsu kwading michid yatekalangau kud Dan, kud Azer ni kud Nafitali. Chawiy michid yaad yading yikweta usu nakash ni yadinga ni antu avud nakash yawiy yafanyina kwikal kurutu ni kwinyim.​—Kuch 10:11-28.

w11-F 15/4 p. 4-5

Ov, Ukat Kujingunin Uman wa Umutakel wa Nzamb?

Mutapu ik tukutwisha kumekesh anch tusangaredin umutakel wa Nzamb? Kambuy Paul walonda anch: “Ziyilang ni kwikepish kudi in kutakel en.” (Heb. 13:17) Chiswapelingap kusal mwamu chisu chawonsu. Chilakej: Iteka pa ndond ya mwin Isarel umwing wadinga pa chisu cha Moses. Tong bil anch kupwa kwa kusal weny mu chisu kanang, didj diman kwau. Ov, dikwiman pinapa mu asa inch? Dichuku dimwing? Rubing rumwing? Anch angond avud? Katat wasambish kwiyipul anch: ‘Ov, nifanyidin kusuburil mafund mam mawonsu?’ Chakusambish, ukutwish kwey kudiosh tuyom tukemp mwamu ukweta nich kuswir. Pakwez, kupwa kwa machuku makemp, yakuziyish kwey chad mulong wa kusand kukimb yom yey ni wasuburil chad mafund mawonsu. Pakwez, uchid kamu anch upwish kusuburil mafund, wazambul mes mwamu, waman didj diasambish kushemunik—ni ufanyidin kand kusambish kulongij mafund mey! Chadingap chiswapela kusal mwamu ni chadingap chisangareshina. Pakwez, in Isarel afanyina ‘kutumbuk kamu pinapa ni kudilondul’ didj.​—Kuch. 9:17-22.

Chad mutapu ik tukata kusal anch twatambul umutakel wa Nzamb? Ov, tukat kusalang usu wa kuusadin ‘pinapa kamu’? Ap tukat kudandamenang kwetu kusal yom mud mutapu twijididina kal kusal? Ov, twij umutakel wa katat, mud umutakel utadina mutapu wa kutakel malejan ma Bibil, mutapu wa kupan uman kud antu alondina dizu dindj, mutapu wa kusal chisu chawonsu difukwil dia mu dijuku, mutapu wa kusal pamwing ni Komite wa Ukwash ku Milong ya Rupital ni mutapu wa kumekesh kalimish ku yitentam yetu? Tukat kumekesh kand anch tukwatin nich usey umutakel wa Nzamb anch twitiy yiyul. Anch tukimbin kukwat mipak yijim, tufanyidinap kuchingejin manangu metu ayinetu pakwez tufanyidin kumuchingejin Yehova ni kukimb umutakel upaninay kusutil dirijek diend. Ni mud mutapu ukatay mwan mukemp kuchinin kud anvajend anch kud rinkind mukash, tukat kukimb diking mu dirijek dia Yehova anch milong ya mangand minam yidia mud rinkind mukash yatushiken.

Mapit ma mu Spiritu

it-1-F p. 207 par. 7

Yikumangan

Usey wa Kukumangan. Musambu wa Pasak wasalangau muvu ni muvu umekeshin usey wa kutaninamu nakash mu yom yintechikinay Yehova mulong wa kukumangej antu end ni kuyidish yakudia ya mu spiritu. Ikundj mwawonsu wishitwila ni wakad kwikal mu weny anch wadiul kwend kusal musambu wa Pasak, afanyina kumujip. (Kuch 9:9-14) Mwant Ezekias wayitazuka antu a mu Yuda ni a mu Isarel chakwel eza kusal musambu wa Pasak ku Yerusalem ni wayileja anch: “En, in Isarel, chirikany kand kudi [Yehova] . . . Kangal wayilakejany angakirilen. Ipanany kudi [Yehova], ezany mwi ndond yend yitumbila yatumbishay kal kwikal ya chikupu. Musadilany [Yehova] Nzamb wen, niyend kakukwovilanyap ujim. . . .[Yehova] Nzamb wen udi mwi riy ni ranaken. Chawiy anch wezany kudi ndiy, niyend kakukombanyap nyim.” (2Jsng 30:6-9) Mwin Isarel mwawonsu walika kwa kwisotin kwez ku musambu winou wamekesha anch wamulik kal Nzamb. Ap anch in Kristu kakusalangap musambu wa Pasak ap misambu yikwau mud yiney, Paul wayikasikesha anch kafanyidinap kulik kukumangan nau antu a Nzamb, chawiy wapana chiyul ech: “Tutalijanany muntu ni mukwau chakwel tukwashijanany kumekesh rukat ni kusal yisalijok yiwamp. Kangal twalikany chaku cha kukumangan pamwing, mudi mukat kulikau antu amwing. Pakwez chifanyidin tupandakeshany kukasikeshijan muntu ni mukwau, mulong umenany anch, dichuku dikurumburishay Nsalejetu dikat kusej piswimp.”​—Heb 10:24, 25; tal pafundinau anch CONGRÉGATION.

RUBING RA 15-21 NGOND WA 3

YOM YA USEY YIDIA MU DIZU DIA NZAMB | KUCHIND MICHID 11-12

“Mulong wak Tufanyidin Kwipuk Chaku cha Kunyinyit?”

w01-F 15/6 p. 17 par. 20

Tufanyidinap Kwikal in Kutesh Akata Kuvuramen

²⁰ In Kristu avud kand kal awilangap mu mupit wa masandj. Pakwez tufanyidin kubabal chakwel kangal tusala yom yikutwisha kutushikij ku kunyinyit, mulong kusal mwamu kukutwish kutukangesh kwikal ni dilau dia Nzamb. Paul utuyudin anch: ‘Kangal etu twamuswidiosh Yehova mud mwasalau antu amwing [in Isarel] a pakach pau. Pasalau mwamu, ayijipa kud annak. Kangal twinanany [ap kunyinyit] mud mwasalau amwing a pakach pau. Pasalau mwamu, ayijipa kud mwin kusheshan.’ (1 Korint 10:9, 10) In Isarel amunyinyita Moses nend Aron—ni Nzamb win amwinend, mulong wa mana wayinkau kusutil chilay. (Kuchind Michid 16:41; 21:5) Ov, ujim wovay Yehova panyinyitau wading ukemp mu kwisikesh nich ujim wovay pasalau masandj? Rusangu ra mu Bibil ritulejin anch in kunyinyit avud ayijipa kud annak. (Kuchind Michid 21:6) Chikwau kand, kurutu kwa yom yiney kusadik, kwafa kand ambwambol in kuyinyint 14,700. (Kuchind Michid 16:49) Chawiy tufanyidinap kupak kushimpish muchim kwa Yehova mu kulik kukwat nich kalimish ap kudiul yitenchik yend.

w06 1/8 paj 9 par. 7

‘Kangal Winanany’

⁷ Manangu ma in Isarel maswimpa mu mutapu ushimokishena! Cha kusambish, awanga miminy ya kumushiman Yehova mulong wa kumujikitish pamanau mutapu wayikolay mu Idjibit ni kuyawish pa karung musuz. (Kubudik 15:1-21) Pakwez, mulong wa mashakamin ma mwi mpay ni wom wadingau nich mulong wa in Kanan, antu a Nzamb ashadisha mwikadil wa kujikitish ni asambisha kwinan. Pa ndond pa kumujikitish Nzamb mulong wa kukolik kwau, amulonda yom yiyimp mulong wa yom yamanau awiy mu mutapu uyimp mud kuburen. Kwinan kwau kwamekesha anch kadingap in kujikitish mulong wa yom yayisadinau kud Yehova. Chawiy chalonday anch: “Ov, chisu ik chisak chinech chiyimp chikulika kwinungan am?”​—Kuchind Michid 14:27; 21:5.

it-2-F p. 715 par. 1

Matend

Manyinyit. Kunyinyit kukat kuyizish nakash antu akwau. Kupwa kwa kudiokal mu Idjibit, in Isarel amunyinyita Yehova mu kumulond nayimp piur pa atushalapol atekay mulong wa kuyitakel, Moses ni Aron. (Kub 16:2, 7) Mu kusut kwa machuku, kunyinyik kwinoku kwamuziyisha nakash Moses ni wita rufu. (Kuch 11:13-15) Kunyinyit kukutwish kumutek muntu uyinyitina mu ubaj wa rufu. Yehova wayimana antu amunyinyita Moses mud in kubwambwil ku winyikel wend. (Kuch 14:26-30) Avud afa mulong anyinyita.

Mapit ma mu Spiritu

it-2-F p. 207 par. 4

Mana

Mutapu Wadinga Mana. Yakudia ya mana yading mud “ntit ja kasaku, yading yitok” ni “kuyital ku mes” yading mud ulaaj utok ufanakena nich woch wikwatina mud usang. Kutaal kwa mana kwading mud “tumabot twa kubombakesh nich woch” ap mud “mabot matal.” Kupwa kwa kumatwa pa mayal ap mu yiny, amisukang mu manung ap kumosh mu fur mud mabot.​—Kub 16:23, 31; Kuch 11:7, 8.

RUBING RA 22-28 NGOND WA 3

YOM YA USEY YIDIA MU DIZU DIA NZAMB | KUCHIND MICHID 13-14

“Mutapu Ukata Ritiy Kutwinkish Kutakaman”

w06 1/10 paj 16 par. 5-6

Kasikanany mu Ritiy ni Kumwov Nzamb Wom

⁵ Pakwez, in kutentish aad, Yoshua ni Kaleb, adinga ni impu ya kwandam mwi Ngand ya Kushilamu. Awiy alonda anch: In Kanan “adi mud yakudia yetu. Usu wau wayipwil kal, pakwez [Yehova] udi ni yetwetu. Kangal twayovany wom.” (Kuchind Michid 14:9) Ov, Yoshua ni Kaleb adinga ni ruchingej riner chamwamu? Chakin kamu bwat. Awiy ni muchid wawonsu, amana mutapu Yehova wakwatishay Idjibit mwin dikand ni anzamb end usany kusutil ku Yipupu Dikum. Kupwa, amana kand mutapu Yehova wamujiyishay Farao ni amasalay end mu Karung musunz. (Kuseng 136:15) Chakin kamu, chakasikana kulikishin wom wovau in kutentish dikum ni antu inunga nau. Yehova walonda, mulong wa kumekesh kukis kwend anch: “Chisu ik chikez kwingitiyijau am mulong wa yijingidij yawonsu yinasala mukach mwau.”​—Kuchind Michid 14:11.

⁶ Yehova wakwata ku musul win kamu wa mulong—mwong wadingau nich antu wamekesha anch kakwetap ritiy. Inge, ritiy ni kutakaman yiyiling pamwing, yendining pamwing. Chawiy, kambuy Yohan wafundina chikumangen cha Ukristu piur pa ukash wach wa mu spiritu anch: “Winou wawiy usu wapandikenau kal nich mangand, rawiy ritiy retu kamu.” (1 Yohan 5:4) Ilel unou, ritiy mud ra Yoshua ni Kaleb rimeken mu rusangu ruwamp ra Want rilejenau mu mangand mawonsu kud mamiliyon musamban ni kusut ma Atuman a Yehova, ansand ni amapal, akash ni aziyila. Kwikil mukankuny utwishina kuyininetish amasalay inay a usu, ni akasikena.​—Rom 8:31.

Mapit ma mu Spiritu

it-1-F p. 740

Ngand Yayinkau in Isarel kud Nzamb

NGAND yayinkau in Isarel kud Nzamb yading kamu ngand yiwamp nakash. Moses payitumay in kutentish kurutu kwa muchid wawonsu mulong wa kushinshikin Ngand ya Kushilamu ni kusend yom yimwing ya mwi ngand yinaya, eza ni mabuj mud ma mbur, nfung ni mabuj ma nviny masendau kud antu aad pa mukambu mulong mading malimin nakash! Ap anch ova wom mulong wa kuburen ritiy, pakwez ayinau alonda kamu anch: Ngand “wizwil sens nich mayel ni woch.”​—Kuch 13:23, 27.

RUBING RA 29 NGOND WA 3–4 NGOND WA 4

YOM YA USEY YIDIA MU DIZU DIA NZAMB | KUCHIND MICHID 15-16

“Ipuk Kwitutul ni Kwichingejin Nakash”

wp11 1/9 paj 30 par. 12

Ov, Wijiken Kudi Yehova?

¹² Pakwez, padinga muchid wa in Isarel mwi njil yitwadila kwi Ngand ya Kushilamu, Kore wamekesha yadingay ni kutong kwikal milong mu ditenchik dia Nzamb. Kupwa antu akwau 250 pakach pa in kutakel inunga ku mutambu wa Kore ni apakisha kukarumun yom. Kore ni antu inay akwau amana anch ading mu diking mu urund wa piswimp ni Yehova. Awiy amuleja Moses anch: “En wapandakeshany kal kand! Mulong chisak chinech chawonsu chidi cha antu atumbila, ni [Yehova] udi pakach pau.” (Kuch. 16:1-3) Ud mwikadil wa kwichingejin nakash ni wa chibud mudi ik! Moses wayileja anch: “[Yehova] ukutulejay nany udia iwend.” (Tang Kuchind Michid 16:5.) Urel wa dichuku diambakena, Kore ni antu awonsu inunga ku mutambu wend mu kubwambul afa.—Kuch. 16:31-35.

wp11 1/9 paj 30 par. 11

Ov, Wijiken Kudi Yehova?

¹¹ Moses nenday Kore ashalijana nakash piur pa kumekesh kalimish kau ku ditenchik dia Yehova ni ku mipak yend. Yisal yau yading ni usu piur pa mutapu wading uyimenau kudi Yehova. Kore wading mwin Levi wa mu dijuku dia Kehat, ni wading ni yisend yivud, ndiy wamana kand kupand kwa muchid wa in Isarel pa Karung musunz, witiyija dirumburish dia Yehova pantaliken ni Isarel pabwambwilau ku Mukandu wa Sinai, ni wading kand ni chisend cha kusend mushet wa manswik. (Kub. 32:26-29; Kuch. 3:30, 31) Ndiy wading chakin kamu ushinshamena kudiay Yehova mu mivu yivud ni kupwa antu avud asambisha kumulimish mu chibeng cha in Isarel.

Mapit ma mu Spiritu

w98-F 1/9 p. 20 par. 1-2

Tek Yom ya Usey pa Ndond ya Kusambish!

Ku mes ma Yehova, mulong wading kamu ujim. Bibil ulondin anch: “Yehova wamuleja Moses anch: ‘Muntu winou afanyidin kumujip.’” (Kuchind Michid 15:35) Mulong wak Yehova wamana anch chisal cha muntu winou chading chiyimp nakash?

In Isarel ayinka machuku musamban mulong wa kuchay nkuny, kukimb yakudia, masun ma kudjal ni kurijek yikumbu yau. Dichuku dia sambwad diading dia kwipan ching ku yom ya mu spiritu. Kuchay nkuny chadingap kwau chom chiyimp, pakwez chading chiyimp kusal mwamu pa chisu chafanyinau in Isarel kumwifukwil Yehova. Ap anch in Kristu kalondwilap kand Chijil cha Moses, ov, rusangu riner ritufundishinap anch tufanyidin kutek yom ya usey pa ndond ya kusambish nlel?—Filip 1:10.

RUBING RA 5-11 NGOND WA 4

YOM YA USEY YIDIA MU DIZU DIA NZAMB | KUCHIND MICHID 17-19

“Am Nid . . . Uswan Wen”

wp11 1/9 paj 16 par. 9

Ov, Wasadin Kal Anch Yehova Ikala Chibar Chey?

⁹ Tongin bil piur pa in Levi, awiy katambulap ngand ja uswan. Mulong ading atekin difukwil diakin pa ndond ya kusambish, awiy afanyina kumuchingejin Yehova mulong wa kuwanyish maswir mau ma kumujimbu, mulong ndiy wayileja anch: “Yam kamu nidia chibar chey.” (Kuch. 18:20) Ap anch tusadinap mu chikumbu cha Nzamb chimekena ku mes mud mwadingau ni kusal in kupesh ni in Levi, tukutwish kwimburij kwipan kwau, ni kwikal nich ruchingej anch Yehova ukez kuwanyish maswir metu. Ruchingej retu mu usu wa Nzamb wa kupan ukwash rikal kal nakash ra usey pitushejidina nakash kwinsudiel kwa machuku ma nsudiel.​—Kuj. 13:17.

wp11 1/9 paj 10 par. 4

Yehova Udi Chibar Cham

⁴ Ov, chisend chinech chading chirumburikin ik kud in Levi? Yehova walonda anch ndiy wading chibar chau mu mutapu wa kwel anch pa ndond pa kutambul uswan, awiy ayinkisha chisend cha mudimu wa usey nakash. Kwikal mu “win kupesh wa [Yehova]” wading uswan wau. (Jos. 18:7) Mazu ma Kuchind Michid 18:20 mamekeshin anch chisend chinech chasalap anch ikala mu uzwendj ku mujimbu bwat. (Tang Kuchind Michid 18:19, 21, 24.) In Levi ayinkishanga “chadikum chawonsu cha mu Isarel kwikal uswan wau, mulong wa midimu yau.” Awiy afanyina kutambul 10 pa chitot pakach pa yom ya in Isarel ni pakach pa kuvulijan kwa yivam yau. Kupwa, in Levi ading akat kupan niyawiy chadikum cha yom yadingau ni kutambul, “ya yom yipandakena kuwap,” mulong wa kukwash mudimu wa win kupesh. (Kuch. 18:25-29) Ayinkisha kand in kupesh ‘milambu yitumbila’ yaletangau an a in Isarel kud Nzamb kwi ndond yend ya kwifukwil. Chawiy lel, in kupesh ading nich diyingish diwamp dia kwitiyij anch Yehova ukez kuyikwash.

Mapit ma mu Spiritu

g02-F 8/6 p. 14 par. 2

Mungu Chid Chom Chiwamp Nakash cha Kutaadish Nich Yakudia

Mungu wikala kand chijingidij cha yom yidandamedina kwikalaku ni yiminya dang. Chawiy, mu Bibil manswik ma pakampwil amatazukin anch “manswik ma [mungu],” yisu yivud antu asukang manswik minam adiangang pamwing yakudia yikweta mungu mulong wa kumekesh anch ovijadin. (Kuchind Michid 18:19) Kukwatijan ni Chijil cha Moses, chading chifanyidin kuwej mungu ku milambu yalambulangau pa chintamb, pamwing ap mulong mungu wading umekeshin chom chakad kuvund ni chinangina.

RUBING RA 12-18 NGOND WA 4

YOM YA USEY YIDIA MU DIZU DIA NZAMB | KUCHIND MICHID 20-21

“Lam Kwitudish Kwey Anch Akubachik Kusal Yom ku Usu”

w19.02 paj 12 par. 19

Sal Usu wa Kwikal Witudishina Chakwel Umusangaresha Yehova

¹⁹ Anch tudi antu itudishina tukwipuk kurumbok. Tong piur pa Moses. Wading witudishina mu mivu yivud ni wamusangaresha Yehova. Kupwa, piswimp ni kwinsudien kwa mivu 40 yadingau mwi mpay, Moses wakanganya kumekesh mwikadil wa kwitudish. Mpanyend, wakwasha kamu pamwing ap kupandish mwom wend mu Idjibit wafa ni amujika ku Kades. Kapamp kakwau kand, in Isarel asambisha kulondol anch kayilaminap nawamp. Kapamp kinak asambisha “kumutendish Moses” piur pa kuburen kwa mem ma kuna. Chikalap nchik yilay yawonsu yasalay Yehova kusutil Moses ni ap anch Moses wayitakela in Isarel pakad choy mu mivu yivud, antu asambisha kununganijan. Kanunganijanap kwau ching piur pa kuburen kwa mem pakwez anunganijana kand piur pa Moses mud kumekesh anch chid mulong wendendiy yawiy yaburenau kal mem.​—Kuch. 20:1-5, 9-11.

w19.02 paj 13 par. 20-21

Sal Usu wa Kwikal Witudishina Chakwel Umusangaresha Yehova

²⁰ Moses wajimana nakash ni wakanganya kwidutish. Ap anch Yehova wamuleja Moses kudilej diyal nich dizu, Moses wayilonda antu mazu mayimp ni wayileja anch ukimbin kusal chilay. Kupwa, wabula ku diyal tupamp twaad ni mem masambisha kubudik. Warumbuka mulong wa ujim ni chibud. (Kus. 106:32, 33) Mulong wa kachisu kakemp kaburenay kwitudish, Yehova kamwitiyap Moses kwandam mwi Ngand ya Kushilamu.​—Kuch. 20:12.

²¹ Kusutil chilakej chinech, twilejidinaku malejan ma usey nakash. Chakusambish, tufanyidin kudandamen kusal usu wa kulam mwikadil wetu wa kwitudish. Anch twapipej mwikadil winou mu chisu kanang, tukutwish kwikal ni chibud ni kulond ap kusal yom ya usup. Cha kaad, anch tukwet yakamish, chikutwish kutukasiken kwikal itudishina, chawiy tufanyidin kusal usu wa kwikal itudishina ap anch turishin ni milong yikash.

w09-F 1/9 p. 19 par. 5

Nzwij Ukatina Kutentam

Chakusambish, Yehova kamwitap Moses kwisamb ni in Isarel, ap kuyel anch antombwij. Chakaad, Moses ni Aron kamutumbishap Nzamb. Nzamb wayileja anch “walikany kal . . . Kwintumbish.” (Verse 12) Palonday anch “tukukubudishinany mem,” chid mud Moses walonda anch ndiy ni Aron—awiy afanyina kusal chilay cha kubudish mem—kadiap Nzamb. Cha kasatu, ayipupa mud mwasambelau kuyipup antu akwau. Kwinyim, Nzamb kitiyap anch in Isarel abwambwila andam mwi Ngand ya Ksanan, ni mwawiy kand mwasalay piur pa Moses ni Aron. (Kuchind Michid 14:22, 23) Cha kanying, Moses ni Aron awiy ading antakel a in Isarel. Antu akweta yisend nakash akupan kand kuchind kud Nzamb mu chilik chijim.​—Luka 12:48.

Mapit ma mu Spiritu

wp14 1/6 paj 19 par. 12

Ov, Ukat Kuyiman Antu Aziyila Mutapu Uyimeningay Yehova?

¹² Mu milong yiney yawonsu, Yehova wafanyina kumupup Aron kapamp kamwing. Pakwez Yehova wamana anch Aron kadingap muntu muyimp ap mwin kusal yitil yikash. Chamekana anch Aron mu yisu yimwing walikidila yishiken ap yibachikin ya antu akwau yimudiosha mwi njil yitentamina. Pakwez, parishay ni yitil yend, wayitiya pakad kutadik ni witiya dipup dia Yehova. (Kub. 32:26; Kuch. 12:11; 20:23-27) Yehova washinshikina pa ritiy ra Aron ni kukarumuk kwend. Kupwa kwa yitot ya mivu, Aron ni anend ayivurika mudi in kumwov Yehova wom.​—Kus. 115:10-12; 135:19, 20.

RUBING RA 19-25 NGOND WA 4

YOM YA USEY YIDIA MU DIZU DIA NZAMB | KUCHIND MICHID 22-24

“Yehova Wakarumuna Mashing Kwikal Chiyukish”

bt-F p. 53 par. 5

Amuleja “Rusangu Ruwamp Piur pa Yesu”

⁵ Mud mutapu muchading mu mivu chitot ya kusambish, nlel unou rupompat rimikinap mudimu wa kulejan wa atushalapol a Nzamb. Yisu yivud, in Kristu opatiningau mulong wa kuya kushakam ndond yikwau, chikala mu rukan ap mwi ngand yikwau, akat kutwal uruu wa Want kwi ndond kuyilau. Chilakej, pa chisu cha Njit ja Kaad ja pa Mangand Mawonsu, Atuman a Yehova apana uman ujim nakash mu ma kompony ma mar ma in Nazi. Mwin Yuda umwing wading ni Atuman mu makompony walonda anch: “Kujijaman kwa Atuman adinga mu rukan kwangikisha kashinsh anch ritiy rau rimedin kamu pa Mifund—ni chinech chankasikesha niyam kwikal Kaman.”

it-1-F p. 909 par. 7

Usup

Usup wa Kumurishikish Yehova. Muprofet Balam wakwata mupak wa usup pakimbay kuyishing in Isarel chakwel atambula nfalang kudiay Balak mwant wa in Mowab, pakwez Yehova wamukangesha kusal mwamu. Kambuy Pita warumburila piur pa Balam anch “nnam wakad kulondang, walonda nich dizu dia muntu, mwamu mwakangeshay usup wa muruu winou.” Mulong wa kumekesh usup wa Balam, kambuy wasadina dizu dia Greek pa·ra·phro·niʹa, dirumburikina anch “kuburen manangu.”​—2Pi 2:15, 16; Kuch 22:26-31.

Mapit ma mu Spiritu

w04-F 1/8 p. 27 par. 2

Manans Majim ma Buku wa Kuchind Michid 22:20-22

Mulong wak Yehova wamujimena nakash Balam? Yehova wamuleja muprofet Balam anch kafanyidinap kuyishing in Isarel. (Kuchind Michid 22:12) Pakwez muprofet winou waya pamwing ni antu a Balak nich chitongijok cha kuyishing in Isarel. Balam wakata kumusangaresh mwant wa in Mowab chakwel amufut. (2 Pita 2:15, 16; Jud 11) Ap anch amuleja anch ufanyidin kuyiyukish in Isarel pa ndond pa kuyishing, Balam wakata kwikal ni dilau dia mwant ni wamuleja kusadin amband amwifukwilang Bal mulong wa kuyoz amakundj in Isarel. (Kuchind Michid 31:15, 16) Chawiy, ris riyimp nakash radingay nich Balam rawiy rasala anch Nzamb amujimen.

RUBING RA 26 NGOND WA 4–2 NGOND WA 5

YOM YA USEY YIDIA MU DIZU DIA NZAMB | KUCHIND MICHID 25-26

“Ov, Muntu Umwing Ukutwish Kushalijan nau Akwau?”

lvs paj wa 118 par. 1-2

‘Chinany Masandj!’

MWIN kuta ansh ukat kuyang ndond yikutwishay kutan ansh akatinay kukwat. Ukat kutond ndish jiwamp jikutwishay kulau nich. Ukat kuchingel ni kushimpish muchim, ni anch insh wafa ku dilau, ukat kupwit mulong wa kumukwat.

² Chilik chimwing, niyau antu akutwish kuyikwat. Chilakej, in Isarel ading piswimp ni Ngand ya Kushilamu padingau mu chibeng cha Mowab. Mwant wa Mowab wakana kumwinkish ikundj utazukinau anch Balam nfalang jivud anch washiken ku kuyishing in Isarel. Pakwez, Balam wamana mutapu wa kwel anch in Isarel ishinga ayinau. Watonda mupit nich manangu. Watumang ayangadim a mu Mowab mu chibeng cha in Isarel mulong wa kuyoz amakundj.​—Kuchind Michid 22:1-7; 31:15, 16; Kujingunik 2:14.

lvs paj wa 119 par. 4

‘Chinany Masandj!’

⁴ Mulong wak in Isarel avud afa mu mupit wa Balam? Ading kutonginang ching pa maswir ma ayinau ma ku mujimbu, ni avuramena yawonsu yayisadinau kud Yehova. In Isarel ading ni mayingishin mavud ma kwikal ashinshamena kud Nzamb. Wayidiosha mu uswik mu Idjibit, wayidisha mwi mpay, ni wayilama nawamp djat piswimp ni Ngand ya Kushilamu. (Hebereu 3:12) Pakwez, apumbuka mulong wa masandj. Kambuy Paul wafunda anch: “Niyetu kangal twasal [masandj] mudi mwasalau antu amwing a pakach pau. Pasalau mwamu, antu tunan makum maad ni tusatu ayijipa pa dichuku dimwing.”​—1 Korint 10:8.

Mapit ma mu Spiritu

it-1-F p. 933 par. 5-6

Mwimbu

Chimeken kamu anch kwangan kwa ngand ku michid kwading kwimedin pa yom yaad: kuta ubal ni kujimb kwa muchid ni muchid. Kuta ubal kwamekeshang pamwing ap kwau mutambu wa teritwar wafanyina muchid ni muchid kutambul, walejanang ndond ya uswan yidia mwi ngand, chilakej mud Kwiyand, Kurul, Kwingangel ap Kurand, mu kabeng udia piswimp ni wit ap mwi ndond ya mikandu. Mupak wa kuta ubal wadiokalang kud Yehova, chinech chakangesha michid kwovijadin mukau ni kwipuk matend. (Jnsw 16:33) Mu mutapu winou, Nzamb watakela yom chakwel mashakamin ma muchid ni muchid matanijana ni uprofet walonday nshankur Jakobu kurutu kwa kufa ni ufundinau mu Disambishil 49:1-33.

Kupwa kwa kwijik mutambu ukushakama muchid ni muchid kusutil ku kuta ubal, chafanyina chad kutek mimbu ya teritwar kulondwish ni chom cha kaad: kujimb kwa muchid. “Ukez kayangenany ching ku kuta ubal mudi mudia majuku men. Muchid ukweta antu avud, ukez kawinkishany chibar chijim cha uswan, ni muchid ukweta antu akemp ukez kawinkishany kand chibar chend chikemp. Kwawonsu kukeza kawil ubal wa muntu, kwawiy kwinakwa kukeza kikal kand ndond yend ya kushakam.” (Kuch 33:54) Mupak udiokila ku kuta ubal piur pa ndond ya kushakam aulimishang, pakwez kujimb kwa uswan afanyina kukuswimp. Chilakej, pamanau anch teritwar wa muchid wa Yuda wading mujim nakash, amukepisha mu kukatulaku yikunku yikwau ni kuyipan ku muchid wa Simeyon.—Jos 19:9.