Mareferans ma Mudimu ni Mashakamin ma In Kristu Mukand wa Chikumangan

NGOND WA 11 RUBING RA 1-7

YOM YA USEY YIDIA MU DIZU DIA NZAMB | JOSHUA 18-19

“Yehova Wangana Ngand Kwa Manangu”

it-1-F p. 933 par. 5

Mimbu

Chimeken kamu anch kwangan kwa ngand ku michid kwading kwimedin pa yom yaad: kuta ubal ni kujimb kwa muchid ni muchid. Kuta ubal kwamekeshang pamwing ap kwau mutambu wa teritwar wafanyina muchid ni muchid kutambul, walejanang ndond ya uswan yidia mwi ngand, chilakej mud Kwiyand, Kurul, Kwingangel ap Kurand, mu kabeng udia piswimp ni wit ap mwi ndond ya mikandu. Mupak wa kuta ubal wadiokalang kud Yehova, chinech chakangesha michid kwovijadin mukau ni kwipuk matend. (Jnsw 16:33) Mu mutapu winou, Nzamb watakela yom chakwel mashakamin ma muchid ni muchid matanijana ni uprofet walonday nshankur Jakobu kurutu kwa kufa ni ufundinau mu Disambishil 49:1-33.

it-1-F p. 1107 par. 6

Uswan

Ngand ya uswan. Uswan wa in Isarel ayinkishau kud Yehova, ndiy wamuleja Moses mimbu ya ngand yau. (Kuch 34:1-12; Jos 1:4) Moses ndiy wapana materitwar mamwing ma ngand kud an a Gad, an a Ruben, ni ku chikunku cha muchid wa Manase. (Kuch 32:33; Jos 14:3) Michid yikwau yashalaku yatambula uswan kusutin kuta ubal mu umutakel wa Joshua ni Eleazar. (Jos 14:1, 2) Kukwatijan ni uprofet wa Jakob udia mu Disambishil 49:5, 7, Simeyon ni Levi kayinkishap chikunku cha ngand mud mwayinkishau akwau. Simeon amwinkisha teritwar wading mukach mwa ngand ya in Yuda (pamwing ni misumb yadingamu) (Jos 19:1-9), pakwez Levi amwinkisha misumb 48 yading yipalangena mwi ngand yawonsu ya in Isarel. Mulong in Levi ayitonda mulong wa kuwanyish chisend cha pakampwil ku dizang, chawiy Yehova ndiy wading uswan wa. Atambulang cha dikum mud chikunku cha uswan wau mulong wa mudimu wasalangau. (Kuch 18:20, 21; 35:6, 7) Kupwa, majuku aminkisha yikunku ya divu mu chikunku cha muchid wau. Pading padandamedina majuku kujimb, chading chifanyidin kuyinkish niyau an uswan, chawiy divu adandamena kudanganijan mu jimpang jikemp jikemp.

it-1-F p. 933 par. 6

Mimbu

Kupwa kwa kwijik mutambu ukushakama muchid ni muchid kusutil ku kuta ubal, chafanyina chad kutek mimbu ya teritwar kulondwish ni chom cha kaad: kujimb kwa muchid. “Ukez kayangenany ching ku kuta ubal mudi mudia majuku men. Muchid ukweta antu avud, ukez kawinkishany chibar chijim cha uswan, ni muchid ukweta antu akemp ukez kawinkishany kand chibar chend chikemp. Kwawonsu kukeza kawil ubal wa muntu, kwawiy kwinakwa kukeza kikal kand ndond yend ya kushakam.” (Kuch 33:54) Mupak udiokila ku kuta ubal piur pa ndond ya kushakam aulimishang, pakwez kujimb kwa uswan afanyina kukuswimp. Chilakej, pamanau anch teritwar wa muchid wa Yuda wading mujim nakash, amukepisha mu kukatulaku yikunku yikwau ni kuyipan ku muchid wa Simeyon.​—Jos 19:9.

Mapit ma mu Spiritu

it-1-F p. 934 par. 1

Mimbu

Kukwatijan ni rusangu rilejena piur pa kwangan ngand, Kurand kwa Yordan kwading chikunku cha Yuda (Jos 15:1-63), Josef (Eferayim) (Jos 16:1-10), ni chikunku cha muchid wa Manase chashakama kurand kwa Yordan (Jos 17:1-13) ayangena kwinsambishin mulong mimbu ni misumb yau ayijimbwil kwa kulondulijan. Kupwa, chimeken anch imika kwangan kwa ngand, mulong in Isarel abukisha chibeng chau kuchidiosh ku Giligal mulong wa kuchitwal ku Shilo. (Jos 14:6; 18:1) Pakwez kulep kwa chisu chasuta kakulejenap, chawiy mu kusut kwa chisu, Joshua wayipupa michid yikwau sambwad mulong wa kushishawal kwau pa kukwat chikunku cha ngand chading chishadina. (Jos 18:2, 3) Kud kurumburil kuvud kulejenau piur pa mayingishin masala anch michid sambwad yimekesh mwikadil winou; in kurumburil amwing alejen anch chading mulong wa kuvul kwa mapit matambulau pading parishinau mulong wa kukwat ngand, ni mulong amana anch in Kanan kadiap kwau a ubaj nakash, chawiy chamanau pamwing ap anch chidiap kwau cha usey kuyirishikish swa swa mulong wa kukwat chikunku cha ngand chading chishadinaku. Pamwing ap kand michid yiney yading yidjidjekin pa kurish mulong wa kutambul yikunku ya ngand yading mu makas ma akankuny a usu, ni chinech chayibachika kand kulabijok. (Jos 13:1-7) Chikwau kand, pamwing ap kadingap kija kamu nawamp chikunku chinech cha Ngand ya Kushilamu mud mutapu wading wijau ndond jading japaninau kal.

RUBING RA 8-14 NGOND WA 11

YOM YA USEY YIDIA MU DIZU DIA NZAMB | JOSHUA 20-22

“Malejan Twilejidina ku Kutesh Yom Nayimp”

w06 1/5 paj 5 par. 3

Yom Yikutwisha Kukukwash Kwambamb ni Mwin Nkwey

Kwambamb kwa kashinsh kukutwish kukoj ku kuburen kwovijan ni kutesh nayimp. Pasak mu jinsang ja in Isarel, muchid wa in Ruben, wa in Gad, ni chikunku cha muchid wa in Manase adinga kwingangel kwa Wit wa Yordan atunga “chintamb chijim nakash” ku chikum cha Wit Yordan. Michid yikwau mu Isarel yaburena kwov kurumburik kwa yisalijok yau. Atonga anch akadivar nau auka Yordan asala yisalijok ya kupumbwok, chawiy lel michid ya kurand yirijeka mulong wa kurish njit ni “antombuj.” Kurutu kwa kwas njit, atuma antu mulong wa kwambamb ni michid ya kwingangel. Chading chisal cha manangu mud ik! Ajingunina anch chintamb kichadingap mulong wa yakupesh ya kwosh ni milambu yakad kwambatan nich chijil. Pakwez, michid ya kwingangel yading yovil wom anch mu machuku ma kurutu, michid yikwau yikez kuyilej anch: “kiukwetanyap uswan ap kusu umwing kud Yehova.” Chintamb chela kwikal uman wa kumekesh anch ni yawiy adinga in kumwifukwil Yehova. (Joshua 22:10-29) Chintamb chinicha achipila anch Uman, mulong chading uman wakwel anch kud awiy Yehova wading Nzamb wakin.​—Joshua 22:34..

w08 15/11 paj 18 par. 5

“Tulondulany Yom Yikuletisha Chisambu”

In Isarel amwing atonga anch uman wa chitil uwanyidin ni anch ayikashimwish nich njit, antu akemp akufa ku mutambu wau. Pakwez, pa ndond pa kuya kuyas njit swa-swa, michid yadinga kurand kwa Yordan yayituma antu akisambina pa mulong winou ni anamakwau. Awiy ayipula anch: “Ov, kurumbuk ik wasadilanya kurutu kwa Nzamb wa in Isarel mulong wakukarumukany, wamulikany [Yehova, NWT]?” Chakin kamu, kwadingap kurumbuk ap kukemp ku mutambu wa michid yatunga chintamb. Ov, mutapu ik welau kusal pantaliken nich kuyifund kwinoku? Ov, ela kuyipep masal antu ayifunda ap anch kulik kuyakul? Michid yafundau yakula nich kwitudish, yalonda patok anch chakin kamu yisal yau yadinga yibachikinau nich impu yau ya kumusadil Yehova. Chakul chau chachidija urund wau ni Nzamb ni chapandisha mwom. Kwisambin patok kwovikesha nawamp mulong ni kwaleta chisambu.​—Josh. 22:13-34.

Mapit ma mu Spiritu

it-1-F p. 390 par. 4

Kanan

Ap anch in Kanan avud apanda ku kurishikish kwinoku kujim ni kubwambwil ku usuk, pakwez tukutwish kulond anch “[Yehova wapana] ngand yawonsu kud in Isarel mud mwachipay kuyipan kud angakau,” wayinkisha “kwiswedish ku mimbu yau yawonsu,” ni “kushilamu kwawonsu kwa [Yehova] kwashilayimu kud in Isarel kikwarezikap, pakwez yawonsu yawanyina.” (Jos 21:43-45) Michid yawonsu ya akankuny yading yiyombilamu in Isarel yading ni wom ni yadingap kand ya ubaj kud in Isarel. Nzamb watakela kulond anch ukez kayopat in Kanan “pakemp pakemp” chamwamu anch mwi ngand mwashal kapamp kamwing mwakad antu, mukuvulijan annam a mwisuku. (Kub 23:29, 30; Kuv 7:22) Ap anch in Kanan ading akwet yom ya njit ya piur nakash, mud matemb ma njit makweta ma kup-kup, tukutwishap kumufish nich Yehova anch wakanganya kuwanyish kushilamu kwend mulong in Isarel akanganya kukwat ndond jimwing ja ngand. (Jos 17:16-18; Ank 4:13) Pakwez, rusangu ra Bibil rimekeshin anch yisu yimwing in Isarel akanganya kuwin mulong wa kuburen kushinshaman kwau.​—Kuch 14:44, 45; Jos 7:1-12.

RUBING RA 15-21 NGOND WA 11

YOM YA USEY YIDIA MU DIZU DIA NZAMB | JOSHUA 23-24

“Chiyul cha Nsudien Chapanay Joshua ku Muchid”

it-1-F p. 82 par. 2

Manswik

Yom yeza kuswimp chisu chandama muchid wa Isarel mwi Ngand ya Kushilamu, ngand ya Kanan. Nzamb wayinkisha in Isarel mbil ya kutambul ngand mulong wa kuwanyish kushilamu kwashilayimu kud angakiril au. Ashakamamu mud ngand yau, kadiap mud aeny, ni Yehova wayijidika kuswik manswik ni michid ya antu ading akad kumwifukwil. (Kub 23:31-33; 34:11-16) In Isarel afanyina kulondul yijil ya Nzamb, kadiap yishankur ya michid yafanyinau kwopat. (Lev 18:3, 4; 20:22-24) Ayibabesha anch kangal aswik manswik mulong wa kwatijan ni michid yiney. Manswik mud minam mafanyina kuyibomb kadiap kwau ching kusu nau amband akad kumwifukwil Yehova, pakwez kand ni majuku mau makad kumwifukwil Yehova, pamwing ni yisal ni yishankur yau yikwatijadina ni relijon wa makasu, yom yiney yafanyina kuyipumbul ni kuyiwishin mu mupit.​—Kuv 7:2-4; Kub 34:16; Jos 23:12, 13.

w07 1/11 paj 26 par. 19-20

Dizu Dia Yehova Kidikezap Kukangany

¹⁹ Chakin kamu, kusutil ku yom twimedina ni mes metu ayinetu, tukutwish kulond anch: “Kushilamu kwawonsu kuwamp kwashilayimu [Yehova] Nzamb wen mulong wenen, kwikil chom ap kusu chimwing chaburena kuwanyin. Yawonsu yasadika mulong wenen. Kwikil chom ap chimwing chaburena, bwat.” (Joshua 23:14) Yehova ukat kukol, kulam, ni kuyibangin atushalapol end. Ov, ukutwishany kujimbul kushilamu kwend ap kumwing kwaburena kuwanyin pa chisu chau? Chitwishikinap kukujimbul. Chidi cha manangu anch tuchingejina mu Dizu dia Nzamb.

²⁰ Chidi nchik mulong wa machuku ma kurutu? Yehova watuleja kal anch antu avud pakach petu akutwish kuchingejin kushakam pa divu dikezau kukarumun kwikal paradis umwing usangareshina. Akemp kusu pakach petu akweta ruchingej ra kuyikel pamwing ni Kristu mwiur. Chikalap nchik ruchingej retu, tukwet mayingishin mawonsu ma kushal ashinshamena mudi mwasalay Yoshua. Dichuku dikez kuwanyin pakeza kuwanyin ruchingej retu. Kupwa tukez kutal kwinyim pa yakushilamu yawonsu yashilayimu Yehova, ni niyetu kand tukez kulond anch: “Kwikil chom ap kusu chimwing chaburena kuwanyin.”

Mapit ma mu Spiritu

w04-F 1/12 p. 12 par. 1

Manans Majim ma Buku wa Joshua 24:2

Ov, Tera tatukwend a Aburaham wifukwilang akish? Kwinsambishin, Tera kadingap mwin kumwifukwil Yehova Nzamb. Chimeken anch wifukwilang nzamb ngond Sin​—wading wijikena nakash mu Ur. Kukwatijan ni yishankur ya in Yuda, chimeken anch Tera wading kand mwin kusong atupwany. Ap mwamu, pamulejau Aburaham kudiokal mwi ngand ya Ur, Tera niyend waya nend pamwing ku Haran.​—Disambishil 11:31.

RUBING RA 22-28 NGOND WA 11

YOM YA USEY YIDIA MU DIZU DIA NZAMB | ANKALANSAMBU 1-3

“Rusangu ra Kutakaman ni Manangu”

w04-F 15/3 p. 31 par. 3

Ehud Wapwisha Rupompat ra Akankuny Nau

Anch kurijek kwa Ehud kwatwishika, chadingap mulong wa manangu mend ap mulong wa kuburen manangu kwa mukankuny. Kuwanyin kwa rutong ra Nzamb kwimedinap pa ukwash wa antu. Diyingishin dia pakampwil diasala anch kurijek kwa Ehud kuwanyin did anch Ehud ading amukwashin kud Nzamb mulong wading usadin kukwatijan ni rusot Rend ra kukwol antu End. Nzamb wamusadina Ehud. Bibil ulondin anch: “Chawiy [Yehova] chayilangwishinay ankalansambu mulong wa [antu end]. Yehova wading nend nkalansambu.”​—Ankalansambu 2:18; 3:15.

w04-F 15/3 p. 30 par. 1-3

Ehud Wapwisha Rupompat ra Akankuny Nau

Chom cha kusambish chasalay Ehud, wachila “amwinend mpak ya musamun”—mpak yading yiswimp ni yiswapela kujindjik mu yidjal. Mulong wading wij anch pamwing ap akutwish kumusop. Kwading chaku cha kudjal mpak ku mutambu wa kamaku, mulong chading chiswapel kuyizakul nich chikas cha katatuku. Mulong Ehud wasadinang chikas cha kamaku, wajindjika mpak yend “wayidjal mwi mbund mutambu wa katatuku,” mulong chimeken anch mutambu winou kausopangap nakash kud atulam a mwant. Chawiy pakad chikangesh, “ndiy walambula mulambu kudi Egilon, mwant wa in Mowab.”​—Ankalansambu 3:16, 17.

Kwikil chom ap chimwing chilejenau piur pa yom yasambela kusadik mu chipang cha Egilon. Bibil ulondin kwend anch: “Chapwishay Ehud kulambul mulambu, ndiy wachirika pamwing nau antu asenda mulambu.” (Ankalansambu 3:18) Ehud walambula mulambu ni wayibachikijaku in kuusend kulemp ni kwadingay mwant Egilon, ni kupwa kwa kuyibachikijaku wachirika. Mulong wak? Ov, amakundj iniya ading kwaku mulong wa kumuchidij, mulong wa kuyak angendj, ap mulong wa kutambul milambu? Ov, Ehud wayidioshaku mulong afanyina kumuchidij mwant chakwel awanyish chitongijok chend? Chikalap nchik diyingishin, nich kutakaman Ehud wachirika katat amwinend.

“[Ehud] wachirika ku mayal ma kusong piswimp ni ku Giligal, weza walond anch: ‘A! Mwant, am nikwet mazu kudi ey ma ujindj!’” Mifund yilejenap yom yasalay chakwel atwish kumwandjikiril djat ni kwadingay mwant Egilon. Ov, atulam kafanyinap kumuman mud kabaaj? Ov, ading amen anch mwin Isarel umwing kadingap kwend wa ubaj kud mwant wau? Mulong Ehud waya amwinend, ov, chinech chayibachika kutong anch Ehud wayitun kal antwend? Chikalap nchik diyingishin, Ehud wita chakwel ambambaku ni mwant ku ujindj, ni amwitiyija.​—Ankalansambu 3:19.

Mapit ma mu Spiritu

w05-F 15/1 p. 24 par. 7

Manans Majim ma Buku wa Ankalansambu 2:10-12

Tufanyidin kwikal nich program wa kutang Bibil dichuku diawonsu chakwel ‘kangal twavuramen yisalijok ya Yehova.’ (Kuseng 103:2) Anvaj afanyidin kusal usu wa kwandjik uyakin wa Dizu dia Nzamb mu michim ya anau.—Kuvurik Yijil 6:6-9.

RUBING RA 29 NGOND WA 11–5 NGOND WA 12

YOM YA USEY YIDIA MU DIZU DIA NZAMB | ANKALANSAMBU 4-5

“Yehova Wayisadina Amband Aad Mulong wa Kuyikol Antu End”

w15-F 1/8 p. 12 par. 6

“Nalanka mudi Maku mu Isarel”

Sisera! diading Dijin dianyikesha ni kulet wom mu Isarel. Yishankur ni relijon wa in Kanan yading ya chisum, apeshang anau pa kasu ni kusadin windumb ku tempel. Ov, mashakamin mading mutapu ik chisu chading ngand mwishin mwa umutakel wa kalal mwin Kanan Sisera ni amasalay end? Muminy wa Debora umekeshin anch chading chikasiken kusal weny mwi ngand ni mal mading kwau mud mafil kal. (Ankalasambu 5:6, 7) Tukutwish kutong anch in Isarel ading ajingamin mu mitond ni ku mikandu, ading akwet wom wa kudim yir yau ap kushakam mu mal makad kwikal mu jimbumbu. Pamwing ap ading akwet wom wa kwendin mu jinjil jijim, chamwamu akuyirishikish, akuyisend anau, ni kuyilal akajau ku usu.

w15-F 1/8 p. 13 par. 1

“Nalanka mudi Maku mu Isarel”

Antu ova wom mu mivu 20 kushik ni pamenay Yehova anch antwend in kubwambwil ading akatin kuswimp mwikadil wau, ap mulong wa kuchirikin mazu ma muminy wa Debora ni Barak, kushik ni dichuku “am, Debora, nalanka mudi Maku mu Isarel.” Twijap kamu anch Debora wading watinau kud ikundj utazukinau anch Lapidot wading maku cha kashinsh, pakwez pinap ud maku mu chifanakesh. Chawiy, Yehova wamwinkisha Debora chisend cha kuchidij muchid mud mukatay kusal maku mulong wa mwanend. Amwinkisha chisend cha kumutazuk ikundj wading ukweta ritiy nakash, nzuj Barak, mulong wa kumulej chakwel amurishikish Sisera.​—Ankalansambu 4:3, 6, 7; 5:7.

w15-F 1/8 p. 15 par. 1

“Nalanka mudi Maku mu Isarel”

Jayel kadingap ni chisu chilemp mulong wa kutongijok. Wamuleja Sisera ndond ya kulal mulong wa kupim. Sisera wamuleja Jayel anch kangal wamulej muntu ap umwing ukweza kumukimb ndond yidiay. Palalay, Jayel wamubwika dra, ni kupwa pitay mem ma kuna, Jayel ndiy wamwinkisha mayel. Pakad kulab, Sisera widjubula mu tul. Kupwa Jayel wanona rupopu ra mwinkand ni marto, yom yading yijau kusadin nakash kud amband ading ashicha mu minkand. Jayel wazengama ku mutu wa Sisera, ni wasambisha kwirijek chakwel awanyisha dirumburish dia Yehova, chisend chimwing chading chikwatishena wom nakash. Anch wapakisha kwend kwidjidjek ap kwau pakemp kusu, wafanyina kutek mwom wend mu ubaj. Ov, wading ukat kutong piur pa mar mayimeshinau kal antu a Nzamb mu mivu yivud kud ikundj winou? Anch wading ukat kutongin piur pa dilau dia kwikal ku mutambu wa Yehova? Rusangu rend rirumburilap chom ap chimwing pa mulong winou. Pakwez yitwija yid anch wasala pakad kulab mulong wa kuwanyish chitongijok chend. Wamujipa Sisera!​—Ankalansambu 4:18-21; 5:24-27.

Mapit ma mu Spiritu

w05-F 15/1 p. 25 par. 5

Manans Majim ma Buku wa Ankalansambu 5:20

Atutumbu amurishina Barak mutapu ik kudiokal mwiur? Bibil kalejenap chom chimekeshina anch yom yiney yasadika ku ukwash wa angel, ku mayal makemp makemp mading madiokila ku atutumb makanganyau kurumburil nawamp kud amakundj in manangu enday Sisera, ap pamwing ap yading yom yabwakau kusutin atutumbu piur pa Sisera yamekana kwau anch yid ya makasu. Chawiy pakad ntad, kwading usu kanang wa Nzamb wakwasha.

RUBING RA 6-12 NGOND WA 12

YOM YA USEY YIDIA MU DIZU DIA NZAMB | ANKALANSAMBU 6-7

“Yang Nich [Usu] Wey Winou Ukweta”

w02-F 15/2 paj 6-7

Ukutwish Kutaninamu mwi Mbil ja Nzamb

Gedeyon, nzuj mwin Hebereu, wading ni chitongijok chisikena piur pa amwinend ni wading wij kwishinshikin amwinend mu mutapu uwamp. Kakatap kutakel muchid wa Isarel. Pamutondau mulong wa kuwanyish chisend chinech, wimana anch kawanyidinap ni walonda anch: “Dijuku diam [didi dikemp] mu muchid wa Manase, niyam nidi kwam wa kwinsudiel mu dijuku diam.”—Ankalansambu 6:12-16.

w05-F 15/7 p. 16 par. 3

“Mpak ya musamun ya [Yehova] ni ya Gedeyon!”

In Madian ova wom nakash! Pakad kutongin, kwalanka masok makash madiokala ku ansab 300 abuzau, jimpuny 300 jabulau, ni kutoyol kwa amakundj 300. In Madian akashimuka, pakampwil pateshau akat kutoy anch “Mpak ya musamun ya [Yehova] ni ya Gedeyon!,” ni masok mau miweja ku rishind riner. Mu kanrumbangesh kinak, chayikasikena kwauril anamakwau ni akankuny nau. Amakundj 300 imana pakad kurish, ni Yehova wateka kanrumbangesh mukach mwa akankuny nau chakwel ajipijan ayinau nich jimpak jau ja musamun. In Madian ayipandikana, ni katwishap kuchin, ayilondula umwing ku umwing ni kuyinongish. Chawiy kupompat kwayipompatangau in Isarel kud in Madian kwapwa kamu chikupu. Chisu chilemp chasalau in Madian mu kuyijip in Isarel chimena pinap.​—Ankalansambu 7:19-25; 8:10-12, 28.

Mapit ma mu Spiritu

w05-F 15/1 p. 26 par. 6

Manans Majim ma Buku wa Ankalansambu 6:25-27

Gedeyon wasala nich kubabal chakwel kangal wayijimesh akankuny nend chamwamu. Pa chisu tudia mu mudimu wa kulejan, tufanyidin kubabal chakwel kangal twayijimesh in kututesh kusutin mutapu wetu wa kulond.

RUBING RA 13-19 NGOND WA 12

YOM YA USEY YIDIA MU DIZU DIA NZAMB | ANKALANSAMBU 8-9

“Chid Chiwamp Nakash Kwikepish Kusut Kwitutul”

w00-F 15/8 p. 25 par. 3

Mutapu ik Ukata Kusal Mulong wa Kupwish Kupwitamijan?

Pading parishinay Gedeyon nau in Madian, njit pijapandikana, wita ukwash wa in Eferayim. Chawiy papwa njit, in Eferayim asambisha kumwel Gedeyon anch walika kuyitazuk kudiokal kwinsambishin kwa njit. Rusangu rilondin anch “amutendisha ni kumulondol nakash.” Gedeyon wayakula anch: “Ov, chom ik [nasadina] chilakena ni yiwasadilanya en? Ov, yakwangul yapupurolau ya Eferayim kiyipandakenap kuwap kwa nviny ya Abiyezer? Nzamb wayipanyin ayilol a Madian, Oreb ni Zeb, mu makas mwen. Ing am nikutwish nchik kwilikej kand ni yiwasadilanya en?” (Ankalansambu 8:1-3) Kusutin mazu mend mawamp ni ma matul, Gedeyon wakangesha njit jela kulank pakach pa michid yau. Muchid wa Eferayim wading ufil nich ni wading ukatin ntumb ni kwitutul. Pakwez chinech chamukangeshap Gedeyon kuchirish chisambu. Ov, niyey ukutwish kusal mwamu?

w17.01 paj 18 par. 15

Mulong Wak Kwitudish Kudandamedin Kwikal ni Usey

¹⁵ Gedeyon udi chilakej chiwamp cha kwitudish. Pamwinkishau mudimu kud Yehova wa kuyipandish in Isarel mu makas ma in Madian, Gedeyon walonda anch: “Dijuku diam [did dikemp] mu muchid wa Manase, niyam nidi kwam wa kwinsudiel mu dijuku diam.” (Ankalansambu 6:15) Pakwez Gedeyon wamuchingejina Yehova ni witiya mudimu wamwinkishau. Kupwa Gedeyon wikala ni kashinsh anch wov kal kurumburik kwa yom yamulejau kud Yehova ni wamulembila chakwel amutakel. (Ankalansambu 6:36-40) Gedeyon wading muntu ukweta usu ni utakamena, pakwez wading kand ukwet manangu ni ubabela. (Ankalansambu 6:11, 27) Kupwa, pamukimbau kud antu chakwel ayiyikel, Gedeyon walika. Chawiy wasala yom yamulejau kud Yehova ni wachirika kwol kwend.​—Ankalansambu 8:22, 23, 29.

w08 15/2 paj 9 par. 9

Endilany Mu Jinjil Ja Yehova

⁹ Chakwel twikala arund nend Nzamb, tufanyidin kwikal in “kwitudish.” (1 Pita 3:8; Kus. 138:6) Usey wa kwitudish aulejen mu Ankalansambu shapitre wa 9. Gedeyon mwan wa Yotan walonda anch: “Dichuku dimwing mitond yaya chakwel yikamutonda mwant wa kuyikel.” Mu rusangu riner ajimbwilamu mutond wa mpach, wa nfung, ni wa nviny. Yifanikeshin antu awanyidina alika kuyiyikel ambay nau in Isarel. Pakwez chifukis cha miy—chadingau kwakish nich kasu—chafanikesha want wa Abimelek mwin chibud, mwin kujipan wasota kuyiyikel akwau. Ap anch ‘wadinga mwan a mwant mu mivu yisatu,’ wafa rufu ra rinkanku. (Ank. 9:8-15,  22, 50-54) Chipandiken kuwap mudi ik kwikal in “kwitudish”!

Mapit ma mu Spiritu

w04-F 15/10 p. 16 par. 10

“Endish Ngand”

¹⁰ Gedeyon wayilondula amasalay abombakana mulong wa kumurishikish apanda kwi njit djat kamu ni ku Bet Shita, kupwa wayilondula ku mutambu wa kurul djat ni ku Abel Mehola, piswimp ni Wit wa Yordan. (Ankalansambu 7:22-25) Rusangu rilondin anch: “Chad Gedeyon washika ku Wit wa Yordan, wauk ushad pamwing ni antu yitot yisatu adingay nau. Ading aziyang kal, pakwez achilondwil.” Kupwa kwa kwauk, in Isarel ayilondula akankuny nau ku mutambu wa kurul djat kamu ni ku Sukot ni ku Penuwel, piswimp ni ku Jabok, kupwa ayilondula ku mikandu kushik ni ku Jogibeha (piswimp ni ku musumb wa Amman, mu Jordanie). Wayilondula mu chintamp cha akilometre piswimp 80 mulong wa kurish nau njit. Gedeyon wayikwata ant aad a in Madian ni kuyijip, kupwa wachirika mu musumb wend wa Ofira, piswimp ni kwi ndond kwasambishina njit. (Ankalansambu 8:4-12, 21-27) Chimeken kamu anch kuwin kwa Gedeyon kwadingap kwimedina kwau kusu pa kubul mpuny, kunyikesh jinsak ja kasu, ni kutoy mu chisu chikemp. Tongijokin pa yom yasadika kusutin mazu manam malondinau piur pa amakundj in ritiy anch: “Kinikwetap chisu cha kurumburil rusangu ra Gedeyon [ni antu akwau]. Ading aziyil, chad ikala akash. Ading ayilabu mwi njit.” (Hebereu 11:32-34) In Kristu niyau yisu yimwing akutwish kuziy, pakwez, ov, chidiap cha usey kudandamen kusal rusot ra Nzamb?​—2 Korint 4:1, 16; Galatia 6:9.

RUBING RA 20-26 NGOND WA 12

YOM YA USEY YIDIA MU DIZU DIA NZAMB | ANKALANSAMBU 10-12

“Jefite Wading Ikundj wa mu Spiritu”

w16.04 paj 5 par. 9

Kwikal Ushinshamena Kuletin Dilau dia Nzamb

⁹ Chilakej cha Josef chamukwasha Jefite. Wafanyina kwilej mutapu wayimekishinay Josef anamakwend ranaken ap anch amukisa. (Disambishil 37:4; 45:4, 5) Kutongin piur pa chilakej chinech kwamukwasha Jefite kusal mu mutapu umusangareshina Yehova. Yom yamusadinau kud anamakwend yamunenganesha kamu Jefite. Pakwez, kurish mulong wa dijin dia Yehova ni mulong wa antwend kwading kwa usey nakash mu yitongijok ya Jefite. (Ankalansambu 11:9) Wakwata mupak wa kushal kamu ushinshamena kud Yehova. Mwikadil winou waletisha yiyukish yidiokila kud Yehova, kud ndiy ni kud in Isarel.​—Hebereu 11:32, 33.

it-2-F p. 1202 par. 6

Jefite

Jefite, ikundj wa usu, wakwata mupak nich kutakaman pakad kulab. Watuma uruu kud mwant wa in Amon, wading ulondina anch in Amon ading ezin kuyirishikish in Isarel mulong wa kuyitambul ngand. Mwant wakula anch yadinga ngand ya in Amon yatambulau in Isarel. (Ank 11:12, 13) Jefite wamekesha anch kadingap mwin kwas njit chisup wakad manangu, pakwez wading mwin kwilej nsangu, pakampwil nsangu jilejena mutapu washakamay Nzamb ni antu end. Kitiyap chitongijok cha in Amon, ni wamekesha anch patok anch (1) In Isarel kayirishikishap in Amon, in Mowab, ni in Edom (Ank 11:14-18; Kuv 2:9, 19, 37; 2Jsng 20:10, 11); (2) In Amon kadingap ni ngand chisu chading chikwatinau in Isarel ngand, mulong ading mu makas ma in Amore adinga mu Kanan, ni Nzamb wamupana mwant wau Sihon ni ngand yend mu makash ma in Isarel; (3) Kwasut kal mivu 300, in Amon kandikal apwitamijanangap ni in Isarel mulong wa kufil ndond yiney; chad, mayingishin ik mayibachika kal kusal mwamu katat?​—Ank 11:19-27.

it-2-F p. 1202 par. 7

Jefite

Jefite wamekesha anch mulong wading wimedin kwau pa kushalijan kwa difukwil. Warumburila anch Yehova ndiy wayinkisha in Isarel ngand ni mulong wa diyingishin dined kakutwishap kupan rizau ap rumwing ra ngand kud in kwifukwil nzamb wa makasu. Walonda anch Kemosh wading nzamb wa in Amon. Antu amwing atonga anch warumbuk kal. Pakwez, ap anch in Amon ading ni nzamb Milikom, ni anch Kemosh wadinga nzamb wa in Mowab, michid yiney yawonsu yading kwifukwil anzamb a makasu avud. Solomon niyend warumbuka pa kwandjik difukwil dia nzamb wa makasu Kemosh kusutin amband aeny. (Ank 11:24; 1Ant 11:1, 7, 8, 33; 2Ki 23:13) Chawiy, in kukimbijol nsangu ja Bibil amwing arumburil anch dijin “Kemosh” dikutwish kurumburish “Mwin kuwin, Mwin Kurishikish.” (Tal mu Hebräisches und chaldäisches Handwörterbuch über das Alte Testament, par W. Gesenius, Leipzig, 1857, tome 5, vol. 1, p. 414.) Chimeken anch Jefite wisambina piur pa nzamb winou, mulong in Amon alondang anch nzamb winou ndiy wapanang dikand dia ‘kuwin’ ap ‘kurishikish’ ni kupan ngand.

Mapit ma mu Spiritu

it-2-F p. 1201

Jefite

Jefite Kadingap Mwan wa Masandj. Makwend a Jefite wading “mband ndumb,” pakwez chinech chirumburishinap anch Jefite wadinga mwan wa masandj ap wa kuns. Makwend wading mband mukamasandj kurutu amwat pa rupad kudiay Galad, mud kand mutapu wadingay Rahab mukamasandj pakwez kupwa amwat kud Salomon. (Ank 11:1; Jos 2:1; Mt 1:5) Yom yimekeshina kamu anch Jefite kadingap mwan wa masandj, chid mulong anamakwend avalau kud mband wa kusambish wa Galad amwopata chakwel kangal anganijan nend uswan. (Ank 11:2) Chikwau kand, mu kusut kwa machuku, amwitiya Jefite kwikal mwant wa amakundj a mu Galad (mwading mumekenau ananamakwend a Jefite avalau ni maband wa kusambish kwikal antu a usey nakash). (Ank 11:11) Chikwau kand, wapana chakupesh kud Nzamb ku dizang. (Ank 11:30, 31) Mwan wa masandj kafanyinap kusal yom yiney yawonsu, mulong Chijil chading chilondin anch: ‘Mwan wa masandj kangal wez wandam mu chikumangen cha Yehova, chikupu kamu ni ku a majuku mend ma dikum, kakez kuyitiyap kwandam mu chikumangen cha Yehova.’​—Kuv 23:2.

RUBING RA 27 NGOND WA 12–2 NGOND WA 1

YOM YA USEY YIDIA MU DIZU DIA NZAMB | ANKALANSAMBU 13-14

“Yom Yikutwishau Anvaj Kwilejin ku Chilakej cha Manowa ni Mukajend”

w13-F 15/8 p. 16 par. 1

Anvaj—Yifumbany Anen Kudiokal ku Wanikanch Wau

Shinshikin chilakej cha Manowa, ikundj mwin Dan wading ushicha mu musumb wa Soreya mu Isarel wa pasak. Mwangel wa Yehova wamuleja mband wa Manowa wadinga mumb anch ukuval mwan ikundj. (Ank. 13:2, 3) Pakad kwidjidjek, rusangu riner ramusangaresha nakash Manowa ni mukajend. Chikalap nchik mwamu, iyakamisha kand nakash. Chawiy Manowa walembila anch: “Nakwilembil, amboku, Nsalejam! Chifanyidin [muruu] wa Nzamb watumanga eza kand kakwau kudi etu, aturumburila chom cha kusal kudi mwan winou anch wez wavadik!” (Ank. 13:8) Manowa ni mukajend iyakamisha piur pa mutapu wa kumulil mwan. Pakad kwidjidjek, amufundisha mwanau Samson chijil cha Nzamb, ni atana yibudikin yiwamp ya usu wasalau. Bibil ulondin anch: ‘Mu kusut kwa chisu, spiritu wa Yehova wasambisha kumukasikesh [Samson].’ Mud chibudikin, Samson wasala yom yivud yikwamushena mud umwing wa pakach pa ankalansambu in Isarel.​—Ank. 13:25; 14:5, 6; 15:14, 15.

w05-F 15/03 p. 25 par. 5

Samson Wawina Nich Usu wa Yehova!

Padinga payilay Samson mu kupam, ‘Yehova wadandamena Kumuyukish.’ (Ankalansambu 13:24) Dichuku dimwing, Samson weza kudiay tatukwend ni makwend ni wayileja anch: “Namen mband umwing ku Timinat wa pakach pa ayangadim au in Filistin. Yang ukangatilanyay ikal mukajam.” (Ankalansambu 14:2) Tongijokin mutapu wakashimukau. Pa ndond pa kuyikol in Isarel mu makas ma akankuny nau, mwanau ukimbin kuta nau urund kusutin kwatenaku. Chijil cha Nzamb chading chikangeshin kwat mband pakach pa in kwifukwil anzamb a makasu. (Kubudik 34:11-16) Chawiy anvaj end amwakula anch: “Ov, pakach pa dijuku diey, ap pakach pa antwey, pikilap mband wa kwat, ap kusu umwing? Chad ing uya ukata mband wa pakach pa in Filistin.” Pakwez Samson wiyasa pansh anch: “Ngatila kwam mband winiwa, mulong diy kamu [winwanyidina].”​—Ankalansambu 14:3.

Mapit ma mu Spiritu

w05-F 15/3 p. 26 par. 1

Samson Wawina Nich Usu wa Yehova!

Mu mutapu ik wadingay mband mwin Filistin winou ‘umuwanyidina’ Samson? Buku Cyclopedia de McClintock et Strong ulejen anch kichidiap anch mulong wading “muwamp, wa ufun, usangareshina, pakwez wading umuwanyidina mulong wa kuwanyish chitongijok ap mupak kanang.” Ov, chitongijok ik? Ankalansambu 14:4 urumburil anch Samson “wading ukimbil chom cha kuyisarumun nich in Filistin.” Samson wading ukatin mband ukutwisha kumukwash kuwanyish chitongijok chinech. Padingay payilay Samson mu kupan,“spiritu wa Yehova wasambisha kumukasikesh,” charumburik anch kumubachik kusal mudimu. (Ankalansambu 13:25) Chawiy spiritu wa Yehova ndiy wamubachika Samson kwit kumwat mband winou ni ndiy kand wamukwasha mu mudimu wend mud nkalansambu mu Isarel. Ov, Samson wawanyisha chitongijok chend? El tushinshikinany chakusambish mutapu Yehova wamukwashay.