Mareferans ma Mudimu ni Mashakamin ma In Kristu Mukand wa Chikumangan
RUBING RA 3-9 NGOND WA 1
YOM YA USEY YIDIA MU DIZU DIA NZAMB | ANKALANSAMBU 15-16
“Kumutungun Muntu chid Chisal Chiyimp!”
w12 1/4 paj 15 par. 4
Kuburen Kushinshaman Chijingidij Chikash!
4 Chakusambish, shinshikinay bil Delila, wakatau kudi Nkalansambu Samson. Samson wading usotin kuyas in Filistin njit mulong wa antu a Nzamb. Pamanau pamwing ap anch Delila kadingap ni rukat rakin pantaliken ni Samson, amakurump atan pakach pa amakurump a in Filistin amwinkisha nfalang jivud chakwel ajingunina ujindj wa usu wend chakwel amujipa. Delila witiya nfalang jinej, pakwez ndiy wakanganya kujingunin ujindj wa Samson tupamp tusatu. Kupwa wasambisha kumushindil “pichuku ni pichuku nich mazu mend ni kumubachok.” Kupwa, “wajika ku muchim mudi sot afa.” Kupwa wamuleja anch mutu wend kand kal usutangap diyemb, mulong ukutwish kushadish usu wend. Pijikay mwamu, Delila wamukila Samson nswich pamuladikay pa mend pend, kupwa wayitazuka akankuny nend chakwel amusala yawonsu yasotau kumusal. (Ank. 16:4, 5, 15-21) Chisal chend chading chiyimp mud ik! Mulong wa ris rend, Delila wamutungana matung muntu wading umukatina.
w05-F 15/1 p. 27 par. 5
Manans Majim ma Buku wa Ankalansambu
14:16, 7; 16:16. Kumushindil muntu yom ya ku usu ap kusutil kudil yikutwish kuyipish uruund uukwetanya.—Jinswir 19:13; 21:19.
w12 1/4 paj 17-18 par. 15-16
Kuburen Kushinshaman Chijingidij Chikash!
15 Ov, mutapu ik ukutwishau antu atijadina kushal ashinshamena kudi ambay nau a uruw? Dizu dia Nzamb dilejen anch: “Sanger mu mukajey [ap nfumwey] wa ku usand wey” ni, “Sangar ni mukajey [ap nfumwey] ukatila chisu chiudia mwom.” (Jinsw. 5:18; Mul. 9:9) Pakatau awonsu aad kunanap, afanyidin “kushakam pamwing” mu urund wau, ku mujimbu ni mu yovil. Chinech chirumburikin kwishinshikin umwing ni mukwau, kusutish chisu umwing ni mukwau, ni kusej piswimp kudi umwing ni mukwau. Afanyidin kushinshikin pa kulam uruw wau ni urund ukwetau ni Yehova. Kupwa, ambay a uruw afanyidin kwilej Bibil pamwing, kusal mudimu wa kulejan mu chingand pamwing, ni kulembil pamwing mulong wa chiyukish cha Yehova.
DANDAMEN KUSHINSHAMAN KUDIAY YEHOVA
16 Kudi yid ya chikumangen yasala yitil yimwing yikash ni ayikanda “nakash chakwel akwikal nich ritiy rakin.” (Titus 1:13) Kudi amwing, mwikadil wau wita anch ayopata. Kudi “awiy akata kwifumbiliku,” kuyikand kwinoku kwayikwasha chakwel ikala akash muspiritu. (Heb. 12:11) Ov, chidi nchik anch mwanamakwetu ap murund netu wa piswimp amwopatin? Chawiy katat chisu cha kumekesh kushishaman kwetu, kangal kudi muntu bwat, pakwez kudi Nzamb. Yehova ututadin chakwel amana anch tukuziyil ku chijil chend cha kulik kushakam pamwing ni muntu mwawonsu wopatau.—Tang 1 Korint 5:11-13.
Mapit ma mu Spiritu
w05-F 15/3 p. 27 par. 6
Samson Wapandakana Kusutil Usu Wamwinkau kud Yehova!
Samson wading kwend nich chitongijok chimwing mu mutu wen, kuyirishikin in Filistin. Wimana ku chikumbu cha mband mwin kusochik wa ku Gaza, mulong wading nich chitongijok cha kuyirishish akankuny a Nzamb. Samson wading ukwet kuswir kwa ndond ya kulal mu musumb wa akankuny, chawiy chatanay ndond yiney kwa mband mwin kusochik. Samson kadingap nich yitongijok yijondila. Wadiokala ku chikumbu cha mband winou mapep ma uchuku ni wazakola yisu ya musumb ni wayiya nich djat ni ku musong wa mukandu wading piswimp ni Heberon, mu makilometre 60 km ni kwi ndond yadiokalay. Wasala yom yiney nich dilau dia Nzamb ni usu wamwinkau kud Nzamb.—Ankalansambu 16:1-3.
RUBING RA 10-16 NGOND WA 1
YOM YA USEY YIDIA MU DIZU DIA NZAMB | ANKALANSAMBU 17-19
“Kubwambwil ku Chijil cha Nzamb Kukat Kuletish Milong”
it-2-F p. 278-279
Mika
1. Ikundj wa mu dijuku dia Eferayim. Wajipa chijil cha chinan pa Yijil Dikum (Kub 20:15), kusutil kusend nfalang ja makwend 1100. Pa chisu chitiyinay ni kujichirish, makwend walonda anch: “Nfalang jinej najishikij kal kudi Yehova mulong wa mwanam ikundj winou. Asal nich chirumbidij cha kusong ni cha utad wa kwenguril. Chawiy katat nikujichirish kudi ey.” Watwala nfalang 200 kud mwin kuchil, niyend wasala “chirumbidij cha kusong ni cha utad wa kwenguril” ni ayiteka mu chikumbu cha Mika. Mika wading ‘nich chikumbu cha yirumbidij,’ wasala kapwany ni chirumbidij ni wapana usu kud anend amakundj chakwel amusadina mud in kupesh. Ap anch amanang anch kusal mwamu kwading mulong kumutumbish Yehova, yading yom yiyimp nakash, mulong kusal mwamu kwajipa chijil chading chijidikina kwifukwil akish (Kub 20:4-6) ni kalimishap dizang ni win kupesh wa Yehova. (Ank 17:1-6; Kuv 12:1-14) Kupwa, Mika wamusenda Yonatan, wa mu dijuku dia Guershon mwan a Moses chakwel nsand winou mwin levi ikala mwin kupesh wend. (Ank 18:4, 30) Pamanay mud wasal kal nawamp, Mika walonda anch: “Katat nijik kal anch, [Yehova] ukez kansadil yom yiwamp.” (Ank 17:7-13) Pakwez Yonatan kadingap wa mu dijuku dia Aron ni kafanyinap kusal mud mwin kupesh, yawonsu yiney yavudisha kurumbuk kwa Mika.—Kuch 3:10.
it-2-F p. 278-279 par. 8
Mika
Kupwa kwa chisu chikemp, Mika ni chisak cha antu ayilondula in muchid wa Dan ni ayitana. Chisu cha mwipulau piur pa yom yadingay nich, Mika wayakula anch: “En wangiyany kal akish am inasala, wamwiyany kand mwin kupesh wam, niye wayany kal. Ov, chadi chom ik chinashalap nich kand?” Pakwez an a Dan amubabesha anch ang wadandamen kuyilondul ni kuyijimeshish akumusal uyimp. Pamanay anch in Dan ading akwet usu kusutamu chisak chezay nich, Mika wachirika kwol kwend. (Ank 18:22-26) Kupwa in Dan akwata musumb wa Lakish ni awosha, kupwa atungap musumb wa Dan. Jonatan ni anend ikala in kupesh a in muchid wa Dan ayitekina ‘kapwany wa kusong wa Mika, mu machuku mawonsu mading chikumbu cha Nzamb [dizang] ku Silo.’—Ank 18:27-31.
Mapit ma mu Spiritu
w15 1/12 paj 15 par. 6
Dikarumun dia Dizu dia Nzamb Diswapela Kutesh ni dia Ukwash
6 Nlel, kudi yom yivud yimekeshina anch tufanyidin kusadil dijin Yehova. Dichirikin dia Traduction du monde nouveau mu Inglish dia mu 2013, disadidin dijin dia Nzamb tupamp 7 216. Tupamp musamban kusutamu mu dichap dikuru. Awejidinamu tupamp tutan mulong atana dijin dia Nzamb mu Mivungur ya mu Karung wa Mungu yatanau mivu yasuta kal ey. (Tal mazu ma kwinshin.) Tupamp tutan twinetu tudi mu 1 Samwel 2:25; 6:3; 10:26; 23:14, 16. Kapamp ka musamban kadi mu Ankalansambu 19:18, akawejidinaku mulong ileja nakash ma maniskri makuru ma Bibil.
RUBING RA 17-23 NGOND WA 1
YOM YA USEY YIDIA MU DIZU DIA NZAMB | ANKALANSAMBU 20-21
“Dandamenany Kukimb Yiyul ya Yehova”
w11-F 15/9 p. 32 par. 2
Fineas ud Chilakej cha Kulondul pa Yisu ya Mar?
Kupwa kwa kumuyipish ni kumujip mband wa mwin Levi kud amakundj a ku Gibeya, a mu muchid wa Benjamin, amakundj a michid akwata mupak wa kuyirishikish in muchid wa Benjamin. (Ank. 20:1-11) Kurutu aya kwi njit, amulembila Yehova chakwel ayikwasha. Pakwez ayipandakana tupamp twaad ni ayijipa nakash. (Ank. 20:14-25) Ov, atonga anch malembil mau kamateshap? Ov, Yehova wakimba kuyipup in kurumbuk?
w05-F 15/1 p. 27 par. 8
Manans Majim ma Buku wa Ankalansambu
20:17-48—Mulong wak Yehova anch in Benjamin ayipandakan in michid yikwau tupamp twaad, ap anch awiy afanyinau kupup? Mu kulik michid yading yishinshamena chakwel ayipandakan, Yehova wayipaka mulong kuman anch akutwish kudandamenang kudiosh uyimp mu Isarel pakad kuziy.
w11-F 15/9 p. 32 par. 4
Fineas ud Chilakej cha Kulondul pa Yisu ya Mar?
Yom ik twilejidina ku rusangu riner? Yisu yimwing, mu chikumangan mukashiken milong ni yikat kudandamen chikalap nchik usu wusadinau amakurump ni malembil mau. Amakurump inay afanyidin kuvurik mazu ma Yesu malondina anch: ‘Dandamenany kwit, ni akukwinkishany; dandamenany kusurab, ni ukutanany; dandamenany kukokal, ni akukwazurilany.’ (Luka 11:9) Ap anch chamekan mud malembil alabin kumakul, amakurump afanyidin kwikal nich kashinsh anch Yehova ukwakul pa chisu chirijekinay amwinend kwakul.
Mapit ma mu Spiritu
wp14 1/5 paj 31 par. 4-6
Ov, Wij?
Ov, mutapu ik wasadilangau ut wa ndundu mwi njit ja pasak?
Ut wa ndundu wawiy wasadinay David mulong wa kumujip Goliat. Chimeken anch David wasadina ut wa ndundu winou mu mivu yivud padingay kafung wa a mikoku.—1 Samwel 17:40-50.
Ut wa ndundu aulejen mudi chom chasadilau in Idjibit ni in Asiriy pa chirung chafundau Bibil. Ut winou wading ukwet mioj yaad kwading kuswikinau chikit. Mwin kuzomb wading kutek mu chikit chinech diyal dikweta kujimb kwa a centimetre (5 ap 7.5 ni dilimina pamwingap (agram 250). Wafanyina chad kunyingumush ut wa ndundu ni kulikaku moj umwing, ni kusal anch diyal diya ni usu ukash pakad kurez.
Kukimbijol kwa mu Moyen-Orient kwamekesha uvud umwing ujim nakash wa mayal ma ut wa ndundu madingau kura nich njit pasak. In kuzomb kushalijan atwisha kudibul diyal diading kuya ni usu ukash. In kukimbijol kitiyijinap ap anch ut wa ndundu wadinga kuya kulemp anch audibul nakash, pakwez ut wa ndundu wafanyina chakin kamu kumekesh anch wadinga kujipan.—Ankalansambu 20:16.
RUBING RA 24-30 NGOND WA 1
YOM YA USEY YIDIA MU DIZU DIA NZAMB | RUT 1-2
“Londul Rukat Rishinshamena”
w16.02 paj 10 par. 5
Tuyimburijany Arund a Yehova
5 Dijuku dia Rut diading ku Mowab. Wafanyina kwend kuchirik kwol kwau, ni dijuku diend diafanyina kamu kumulam nawamp. Wading wij antu, dizu, ni yaku ya antu a ku Mowab. Nawom kafanyinap kumwinkish Rut ruchingej piur pa chom ap chimwing pakach pa yom yiney mu Betlehem. Ni Nawom wiyakamisha anch kafanyinap kuman ikundj ap chikumbu cha kushakam. Chawiy Nawom wamuleja anch achirika ku Mowab. Mudi mutwamana kal, Oripa “wachirik[a] kudi anamakwend ni [ku anzamb end].” (Rut 1:9-15) Pakwez Rut kachirikap kudi anamakwend ni ku anzamb end.
w16.02 paj 10 par. 6
Tuyimburijany Arund a Yehova
6 Chimeken anch Rut wileja piur pa Yehova kusutil nfumwend ap kudi Nawom. Wileja anch Yehova kadiap mudi anzamb a ku Mowab. Wamukata Yehova ni wijika anch uwanyidin kumukat ni kumwifukwil. Chawiy Rut wakwata mupak wa manangu. Wamuleja Nawom anch: “Anamakwey akwikal anamakwam, ni Nzamb wey ukwikal Nzamb wam.” (Rut 1:16) Tukat kusangar anch twatongin piur pa rukat ra Rut mulong wa Nawom. Pakwez chisangareshina nakash ridi rukat radingay nich Rut mulong wa Yehova. Chom chinech chamushimokisha Bowaz, wamubaza mulong ‘wakimba diking mu mapur ma Yehova.’ (Tang Rut 2:12.) Mazu masadinay Bowaz makutwish kutuvurish mutapu ukatau kukimb an a atujil diking mu mapur ma anvajau. (Kuseng 36:7; 91:1-4) Chilik chimwing, Yehova wamwinka Rut diking dia rukat ni wamufuta mulong wa ritiy rend. Rut kadingap ni diyingishin ap dimwing dia kunenganan piur pa mupak wend.
Mapit ma mu Spiritu
w05-F 1/3 p. 27 par. 1
Manans Majim ma Buku wa Rut
1:13, 21—Ov, Yehova wamwikadisha Nawomi ntany ni kwisu kwadiokala mar mend? Bwat, ni Nawomi kalondap anch Nzamb wasala uyimp. Pakwez mulong wa yom yawonsu yamushikena, watonga anch Yehova kamukatinap. Wading umen mar ni ukwet kusansan ku muchim. Chimeken kand anch pakur, kuval kwading kumeken mud chiyukish cha Nzamb, pakwez kulik kuval akumanang mud riyind. Nawomi kadingap ni ijukur ni anend amakundj afang, chawiy chadingay nich mayingishin ma kulong anch Yehova wamwikadisha ntany.
RUBING RA 31 NGOND WA 1–6 NGOND WA 2
YOM YA USEY YIDIA MU DIZU DIA NZAMB | RUT 3-4
“Lam ni Ijikan mu Mutapu Uwamp kud Antu”
w12-F 1/10 p. 22 par. 5
“Mband wa Yaku Yiwamp”
Mazu mawamp ma Bowaz mamwinkisha Rut kashinsh. Walonda anch: “Chiyukish cha [Yehova] chikala ney, mwanam. Ey wamekesh kal kudimuk kwey kupandakan kwa pakusambish, mulong ey kiuyilondwilap ansand, ap kutal kudi atuzwendj ap ampich, bwat.” (Rut 3:10) Rut wamekesha rukat rishinshamena kapamp ka kusambish pamutwalay Nawomi mu Isarel ni kumulam. ‘Kapamp ka kaad,’ kawiy ak. Bowaz wading wij nawamp anch changadim mu Rut wafanyina kukimb ikundj pakach pa ansand, ikala mpich ap kazwendj. Pandond pa kusal mwamu, wakata kusal yom yiwamp kadap kwau ching kud Nawomi, pakwez kand kud ikundj wa Nawomi wafa. Wakata kusapuril uswan wa mwin kufa mwi ngand yend. Chawiy chasala anch Bowaz ashimoka mulong wa kutakaman kwamekeshay chingadim winou.
w12-F 1/10 p. 23 par. 1
“Mband wa Yaku Yiwamp”
Rut wafanyina kusangar nakash pa kumutesh Bowaz ukat kulond anch—wading wijiken kud antu mud ‘mband wa yaku yiwamp’! Kukat nakash kumwijik Yehova ni kumusadin yawiy yasala anch ijikana mu mutapu winou. Wamumekeshina kand Nawomi rukat rijim ni kumubangin ni wasala usu wa kwijidin mashakamin ni yaku yading yishalijadina ni kwadiokalay. Anch twimburij ritiy ra Rut, chikutukwash kuyilimish antu akwau chikalap nchik mashakamin mau ap yaku ya chivadik. Anch twasal mwamu, tukwijikan niyetu mu mutapu uwamp.
w12-F 1/10 p. 24 par. 2
“Mband wa Yaku Yiwamp”
Bowaz wamwata Rut. Chawiy tutangina anch: “Yehova wamukwasha Rut, chad ndiy wimisha divumu, wamuval mwan ikundj.” Amband a ku Betlehem amuyukishang Nawomi ni kumutumbish Rut mulong wading ukwet usey kud Nawomi kusutamu an amakundj sambwad. Kupwa, mwan wa Rut wakila ngakiril wa mwant mujim David. (Rut 4:11-22) David, niyend wikala ngakiril wa Yesu Kristu.—Mateu 1:1.
Mapit ma mu Spiritu
w05-F 1/3 p. 29 par. 3
Manans Majim ma Buku wa Rut
4:6—Mu mutapu wafanyinay mwin kukwolan ‘kushesh’ uswan wend kusutil kukwol muntu? Chakusambish, anch muntu wikadina kazwendj walandisha uswan wend, muntu walanda wafanyina kwit nfalang kanang mulong wa kuchirish uswan, uvud wa nfalang jinej auchindang kukwatijan ni mivu yading yishadinaku mulong wa kushik ku muvu wa musangar. (In Levi 25:25-27) Kusal mwamu kwakepishang usey wa chom cha muntu. Chikwau kand, mwan wafanyinay Rut kuval, ndiy wafanyina kuswan uswan kulik mwan wa mwin kuland uswan wa piswimp.
RUBING RA 7-13 NGOND WA 2
YOM YA USEY YIDIA MU DIZU DIA NZAMB | 1 SAMWEL 1-2
“Muleja Yehova yom Yawonsu Yidia ku Muchim wey mu Malembil”
ia-F p. 55 par. 12
Wamuleja Nzamb yom Yawonsu mu Malembil
12 Ana ud chilakej chiwamp piur pa kulembil. Tufanyidin kwijik anch Yehova mulong wa kuwap kwend, ukat kuyit atushalapolend chakwel amuleja yom yikatinau, pakad kujindjik, kumulej minan yitu yawonsu mud mukatay mwan kumulej tatukwend uchingejidinay. (Tang Kuseng 62:8; 1 Tesalonik 5:17.) Kambuy Pita mazu malondwilaku am pamupelau kusutil spiritu utumbila piur pa kumulembil Yehova: “Letany yakamish yen yawonsu kudi ndiy, mulong ukat kukulamany.”—1 Pita 5:7.
w07-F 15/3 p. 16 par. 4
Mutapu Wikalay Nich Ana Chisambu
Yom yiney yawonsu yitufundishin ik? Chisu tumulembila Yehova, tufanyidin kumulej yom yin yawonsu tukweta ku muchim ni kumwit nich muchim win wawonsu. Anch twasal usu wetu wawonsu mulong wa kupwa mulong kanang, tufanyidin kusal usu wa kulikin yom yiney mu makas mend. Wawiy mutapu uwamp wa kusal.—Jinswir 3:5, 6.
Mapit ma mu Spiritu
w05-F 15/3 p. 21 par. 5
Manans Majim ma Buku wa 1 Samwel
2:10—Mulong wak Ana walembila anch Yehova apana “usu kudi mwant wend” ap anch kwadingap mwant uyikedila mu Isarel pa chisu chinicha? Chijil cha Moses chatakela kulejan anch In Isarel ading ni mwant wa ukawuntu. (Kuvurik Yijil 17:14-18) Mu uprofet walonday mu ulal wa rufu, Jakobu walonda anch: “Diland [chijingidij cha want ujim] kidikez kudiokalap kudi Yuda.” (Disambishil 49:10) Chikwau kand, piur pa Sara—ngakiril wa In Isarel—Yehova walonda anch: “Ant a michid akez kudiok kwi ndiy.” (Disambishil 17:16) Chawiy komb, Ana wading ukat kulembil piur pa mwant wafanyina kwez kurutu.
RUBING RA 14-20 NGOND WA 2
YOM YA USEY YIDIA MU DIZU DIA NZAMB | 1 SAMWEL 3-5
“Yehova Ukat Kubangin”
Udi Mwin Dikand Diawonsu Pakwez Ukat Kubangin
3 Samwel wasambisha kusadin ku dizang chisu chadingay mwan mukemp nakash. (1 Samwel 3:1) Uchuku umwing payay kulal, kwashikena chom chimwing chishimwokishena nakash. (Tal mazu ma kwinshin.) (Tang 1 Samwel 3:2-10.) Watesha muntu ukat kumutazuk. Samwel watonga anch wading ipal Mwin Kupesh Mujim Eli. Chawiy waziyina, walanka ni waya kudi Eli ni wamwela anch: “Nez kal mwan, mulong yey wantazukanga.” Pakwez Eli wamuleja anch: “Kiyamap nakutazukanga.” Kupwa amutazuka kand tupamp tukwau twaad, chad Eli wajingunina anch Nzamb ndiy wading umutazukina Samwel. Chawiy Eli wamuleja Samwel yom yifanyidina kulond anch amutazuk kand kapamp kakwau, ni Samwel waziyina. Mulong wak Yehova kamulejap Samwel kapamp ka kusambish anch ndiy wading umutazukina? Bibil kalejenap diyingishin. Pakwez chimeken anch Yehova wasala mwamu mulong wading ubangidin yovil ya Samwel.
Udi Mwin Dikand Diawonsu Pakwez Ukat Kubangin
4 Tang 1 Samwel 3:11-18. Chijil cha Yehova chayileja an akemp kuyilimish antu apamina kal, nakash antu akweta winyikel. (Kubudik 22:28; In Levi 19:32) Chawiy chikasiken kutong anch nsand mudi Samwel atumbuka pamanch, mulong wa kuya kudi Eli ni kumulej nich kutakaman uruu wa dirumburish dikash dia Nzamb. Bibil utulejin anch Samwel “wova wom wa kumulejamu Eli chishimushimu chinech.” Pakwez, Nzamb wasala anch Eli ijik anch Umutazukin Samwel. Mudi chibudikin, Eli wamwela Samwel anch kangal wamujindjikin chom ap chimwing chamulejau kudi Nzamb. Samwel wamuziyina Eli, ni “wamuleja yom yawonsu.”
Mapit ma mu Spiritu
w05-F 15/3 p. 21 par. 6
Manans Majim ma Buku wa 1 Samwel
3:3—Ov, Samwel walalang mwi Ndond Yitumbila Nakash? Bwat. Samwel wading mwin Levi ni dijuku diend diadingap dia in Kehat. (1 Jinsangu 6:33-38) Chawiy chasidina anch kadingap ni mbil ja ‘kwandam mwi ndond yitumbila.’ (Kuchind Michid 4:17-20) Ndond kusu yimwing yadingay nich mbil ya kwandam, yading dibur dia dizang. Mwawiy mwafanyinay kulal. Chimeken pamwing ap anch Eli niyend walalang mu dibur dined. Kulond anch “kwading mushet wa manswik ma Nzamb” kumekeshin kamu yom yawonsu yitadina dizang.
RUBING RA 21-27 NGOND WA 2
YOM YA USEY YIDIA MU DIZU DIA NZAMB | 1 SAMWEL 6-8
“Nany Mwant Wey?”
it-2-F p. 827 par. 1
Want wa Nzamb
Ita Mwant wa Ukawuntu. Kwasuta mivu piswimp 400 ya Kubudik ni mivu 800 nikusut kudiosh kwasukinay Nzamb manswik nend Aburaham, In Isarel ita mwant wa ukawuntu chakwel ayitakel, mud mwading michid yikwau. Kusal mwamu kwading kumekeshin kulik want wa Yehova amwinend kuyitakel. (1Sam 8:4-8) Chid chakin anch In Isarel inay ading achingedin want kukwatijan ni kushilamu kwa Nzamb kud Aburaham ni Jakobu, mud twamanang kwinsambishil. Ruchingej riner rading rimedin kand pa uprofet walonday Jakobu padingay piswimp ni kufang piur pa Yuda (Dis 49:8-10), mu mazu malonday Yehova kupwa kwa Kubudik mu Edjibit (Kub 19:3-6), piur pa manswik ma Chijil (Kuv 17:14, 15), ni mu chikunku cha uruu wamupepilay Nzamb muprofet Balam kulond (Kuch 24:2-7, 17). Ana makwend a Samwel niyend wajimbula ruchingej riner ma malembil. (1Sam 2:7-10) Chikalap nchik mwamu, Yehova kalejanap ‘ujindj wend utumbila’ piur pa Want ni kalejanap chisu chatenchikay mulong wa kutek Want winou ni mutapu wafanyinang kwikal ni antu afanyinang kuusal, ap anch wafanyinang kuyikel mwiur ap pansh. In Isarel kadingap nich mayingishin mawamp pitau mwant wa ukawuntu.
w11-F 1/1 p. 27 par. 1
Washinshamana Chikalap Nchik Kumurumbukin
Tesh mutapu wakulay Yehova pamulejau mulong winou kud Samwel mu malembil: “Tesh ku dizu dia in Isarel ku yom yawonsu yikulondau kudi ey, mulong awiy kakulikinap ey, pakwez anlikin kal an kwikal mwant wau wa kuyikel.” Mazu minam mamukasikesha kamu Samwel, pakwez antu inay aburena kalimish kud Nzamb Mwin Dikand Diawonsu! Yehova wamuleja muprofet wend kuyilej yibudikin ya kwikal ni mwant wa ukawuntu. Samwel wayileja, awiy akasikesha anch: “Bwat, pakwez etu tusotil mwant wa kutuyikel.” Wamuziyina Nzamb wend, chawiy Samwel waya ni wamuzizila many mwant watonday Yehova.—1 Samwel 8:7-19.
w10 1/1 p. 30 par. 9
Kuchidij Mutapu Wa Kuyikel Wa Yehova!
9 Rusangu ra muntu rilejen uyakin wa chiyul chinech cha Yehova. Isarel wikala mu mar makash pamwiyikelau kudi mwant wa chiuntu, pakampwil anch mwant winou wikal wakad kushinshaman. Nich chilakej chinech cha Isarel mu manangu, tukashimukinap pa kuman anch mu yirung yawonsu maguvernema ma antu akad kumwijik Yehova makangen kulet yibudikin yiwamp ya chikupu. Chakin kamu, in politik amwing alondiling anch Nzamb uyukishin usu wau usadilau mulong wa kulet chisambu ni kushakam zoong, ov, mutapu ik lel ukutwishay Nzamb kuyiyukish antu alikina kuziyil ku winyikel wend?—Kus. 2:10-12.
Mapit ma mu Spiritu
w02-F 1/4 p. 12 par. 13
Ov, Mulong wak Kwitiy Kukubatish?
13 Tufanyidin kukarumuk kurutu kwa kwikal Kaman wa Yehova kusutil dibatish. Kukarumuk chid chisal cha kwikatin chisadinau kud muntu usotina kumulondul Yesu Kristu nich muchim wend wawonsu. Ukulik yisal yend yiyimp yikur ni kukwat mupak wa kusal yom yitentamina ku mes ma Nzamb. Mu mifund, dizu dia Hebereu ni dia Grek piur pa kukarumuk dirumburikin kuchirik. Kukarumun kurumburikin kulik njil yiyimp ni kukarumukin kud Nzamb. (1 Ant 8:33, 34) Kukarumuk kwitin kusal “yom yiwamp ya kumekesh kukarumuk.” (Midimu 26:20) Kwitin kulik difukwil dia makasu, kuziyil yijil ya Nzamb ni kulamat kud Yehova pakad kumubomb nau anzamb a makasu. (Kuvurik Yijil 30:2, 8-10; 1 Samwel 7:3) Kukarumuk kufanyidin kumeken mu yaku yey, yom utongina chisu chawonsu ni yisalijok yey. (Ezekiel 18:31) Tukat ‘kukarumuk’ chisu tukata kuswinkesh yom yakad kumusangaresh Nzamb nich yom yimusangareshina.—Midimu 3:19; Efes 4:20-24; Kolosay 3:5-14.
RUBING RA 28 NGOND WA 2–6 NGOND WA 3
YOM YA USEY YIDIA MU DIZU DIA NZAMB | 1 SAMWEL 9-11
“Saul Wasambisha Nich Kwikepish ni Kwitudish”
End ni Nzamb Wey Nich Kwikepish ni Ijik Mimbu Yey
11 Tongijokin pa yom yamushikena Mwant Saul. Kwinsambishin wading muntu wikepishina. Wading wij mimbu yend ni widjidjeka pa kwitiy yisend yivud. (1 Sam. 9:21; 10:20-22) Pakwez, mu kusut kwa chisu, Saul wamatika mimbu yend. Wamekesha mwikadil wa kwitutul chisu chikemp kupwa kwa kwikal mwant. Dichuku dimwing waburena kushimpish muchim chisu chading chimuchingedinay muprofet Samwel. Pa ndond pa kumuchingejin Yehova nich kwikepish chakwel ayikwash antu end, Saul wapesha yakupesh ap anch kadingap ni mbil ya kusal mwamu. Mudi chibudikin, Saul washadisha dilau dia Yehova ni disudien washadisha want wend. (1 Sam. 13:8-14) Tumekeshin anch tudi in manangu anch twadiosh malejan kusutil chilakej chinech chitubabeshina ni anch twipuk kusal yom twakad kwikal ni mbil ya kusal.
wp14 1/3 paj 9 par. 8
Mutapu ik Ufanyidina Kulam Muchim wa Kwipan
8 Saul Mwant wa Isarel utukwashin mudi chilakej cha kubabesh piur pa mutapu ukutwish choy kuyipish muchim wetu wa kwipan. Pasambishay Saul winyikel wend wading muntu wikepishina ni witudishina. (1 Sam. 9:21) Walika kuyipup in Isarel palondau nayimp piur pa want wend, ap anch wading ukwet diyingish dia kusal mwamu mulong Nzamb ndiy wamwinka want. (1 Sam. 10:27) Mwant Saul witiya umutakel wa mwiku wa Nzamb pa kuyitakel in Isarel mwi njit jayiwinau in Amon. Kupwa, wapana ni kwikepish katumb ka kuwin kwinoku kudi Yehova.—1 Sam. 11:6, 11-13.
w95-F 15/12 p. 10 par. 1
In Amon—ad Antu Achirisha Uyimp ku Uwamp
In Amon akula kwa ujim ku uwamp wayimekeshinau kud Yehova. Yehova kadiwulap chisal chau chinech chiyimp: “Mwiku wa Nzamb wamuwila Saul pateshay mazu minam [ma Nahash], chad ujim wamukwata nakash.” Kusutil spiritu wa Nzamb, Saul wasenda amasalay 330 000, ayirishikisha in Amon ni “asandangana mau, kwikil antu aad ashakama pamwing.”—1 Samwel 11:6, 11.
Mapit ma mu Spiritu
w05-F 15/3 p. 22 par. 8
Manans Majim ma Buku wa 1 Samwel
9:9—Mazu malondina anch ‘muprofet, pakur amutazukanga anch, mwin kubwak,’ marumburikin ik? Pamwing ap chimeken anch, aprofet ading chisend chijim mu machuku ma Samwel ni pa chirung cha ant mu Isarel, dizu dined aditazuka kand yisu yimwing anch “mwin kubwat” akutwish kudiswinkesh nich dizu “muprofet.” Samwel ndiy muntu wa kusambish mu dijuku dia aprofet.—Midimu 3:24.