Mareferans ma Mudimu ni Mashakamin ma In Kristu Mukand wa Chikumangan
RUBING RA 7-13 NGOND WA 3
YOM YA USEY YIDIA MU DIZU DIA NZAMB | 1 SAMWEL 12-13
“Kusal Yom Twakad Kwikal ni Mbil ya Kusal Kukat Kulet Usany”
w00-F 1/8 p. 13 par. 17
Kusal Yom Twakad Kwikal ni Mbil ya Kusal Kukat Kulet Usany
17 Kwinsambishin, yisal ya Saul yamekesha mud wading uyingin nich. Antu a Nzamb ikala “mu milong yikash,” “mar mayishata,” ni ading ovil wom mulong mashakamin mading madandamedin kuyip. (1 Samwel 13:6, 7) Chakin kamu, chiyipiningap kukwat mupak wa kusal chom kanang anch kwashiken yom yakad kuchingejin. Pakwez tufanyidin kwijik anch Yehova wijing patok yom yidia mu muchim wetu ni yibachikin yetu. (1 Samwel 16:7) Chakin kamu, Yehova wafanyina kuman yom yimwing piur pa Saul ap anch Bibil kayilejenap yom yiney. Chilakej, Yehova wafanyina kuman anch kuburen kushimpish muchim kwa Saul kwading kwimedin pa kwitutul. Pamwing ap Saul wajimana nakash—mulong ndiy wading mwant wa Isarel—wafanyina kumuchingel muprofet ipal, wading ulabina pa kwez! Chawiy, Saul watonga anch kulab kwa Samwel kwading kumwinkishin mbil ya kutakel yom ni kulik kulondul umutakel wa patok wamwinkishau. Yibudikin ik yikalaku? Samwel kasangerap yom yasalay Saul. Chinyim ni chinech, wamupupa Saul ni kumulej anch: “Pakwez katat want wey kiukudandamenap . . . mulong ey kiwalaminap chijil chakulejay [Yehova].” (1 Samwel 13:13, 14) Pinap kand, kusal yom pakad kwikal ni mbil ya kuyisal kwaletisha usany.
wp07 1/7 paj 20-21 par. 8
Kumuziyil Kwey Yehova Kudi Kwa Usey
8 Rusangu ra Mwant Saul ridia mu Bibil rikasikeshidin usey ujim wa kuziyil. Saul wasambisha mudi nyikel mwin kwikepish ni kwitudish, ‘mukemp nakash ku mes kwend amwinend.’ Pakwez, pa kusut kwa chisu, kwitutul ni yitongijok yiyimp yasambisha kutakel yiyul yend. (1 Samwel 10:21, 22; 15:17, NW) Dichuku dimwing, Saul wafanyidina kwas njit nau in Filistin. Samwel wamuleja mwant kumuchingel chakwel eza kupesh yakupesh kudi Yehova ni kumwinkish yiyul yikwau ya kulondul. Pakwez, Samwel kezap swa mudi mwadinga mumuchingejinau, ni antu asambisha kupalangan. Pamanay mwamu, Saul “wapesha yakupesh ya kwosh.” Yehova wakisa chom chinech. Pashikay Samwel, mwant Saul wita dilikishin mulong wa kubwambwil kwend, walond anch chidi mulong Samwel walaba, chawiy ndiy ‘wishindila’ kupesh yakupesh ya kwosh mulong wa kumutudish Yehova. Kudi Mwant Saul, chadinga cha usey kupesh yakupesh yiney kupandakanamu kuziyil ku umutakel wamwinkishau wa kumuchingel Samwel chakwel eza kupesh yakupesh. Samwel wamwela anch: “Wasalang cha usup. Walamangap mbil ya Yehova Nzamb wey yakwinkishay.” Kumubwambwil Yehova kwamushadishina Saul want wend.—1 Samwel 10:8; 13:5-13, NW.
Mapit ma mu Spiritu
wp11 1/7 paj 13-14 par. 15
Ov, Ukez Kalondul Umutakel Wa Rukat Wa Yehova?
15 Ov, antu inay atonga anch mwant wa chiuntu ukez kwikal wakin, ni ukweta want ipau kupandakanamu Yehova? Anch chidi mwamu, awiy ading alondwil chakin kamu chom chamwamu! Ni ading mu ubaj wa kulondul yom yikwau ya chamwamu ya satan. Ant a chiuntu ela chakin kamu kuyishikij ku kwifukwil akish. In kwifukwil akish akat kwidimb mu kutong anch yom ya ku mujimbu—anzamb asadinau nich mitond ap diyal—yidi yakin, yikutwishau kuchingejin nakash, pa ndond pa kumuchingejin Nzamb wakad kumekan ku mes Yehova, watanga yom yawonsu. Pakwez mudi mwalonday kambuy Paul anch, akish adi kwau “yom ya chamwamu.” (1 Kor. 8:4) Awiy kakutwishap kuman, kutesh, kulond ap kusal. Ukutwish kuyiman ni kuyikwat, pakwez anch wasambish kwifukwil kudi umwing, ukez kulondul chom chamwamu—chom cha kutongin chikukuletin ching kusu mar.—Kus. 115:4-8.
RUBING RA 14-20 NGOND WA 3
YOM YA USEY YIDIA MU DIZU DIA NZAMB | 1 SAMWEL 14-15
“Kuziyil Kupandakenamu Yakupesh”
wp07 1/7 paj 26 par. 4
Kumuziyil Kwey Yehova Kudi Kwa Usey
4 Chidiay Sakatang, yom yawonsu yitukweta ya ku mujimbu yidi ya Yehova. Anch mwamu chidia, ov, kudi chom tukweta chitukutwisha kumwinkish? Inge, tukutwish kumwinkish chom chimwing cha usey nakash. Chom ik chinech? Tukutwish kutan chakul mu dibabesh dined: “Mwanam ikundj, ikal mwin manangu chakwel wez usangarish muchim wam, mwamu ni yam nikez katwish kumwakul muntu ukwinsala masal.” (Jinswir 27:11) Tukutwish kumuziyil Nzamb wetu. Ap anch tukwet ngikadil ni yishankur kushalijan, anch twaziyil, umwing ni umwing wetu ukutwish kwakul ku mazu ma makasu ma Satan Djabul malonday anch antu kakutwishap kushinshaman kudi Nzamb anch ayitek mu yoziu. Twitapidil dilau mudi ik!
it-2-F p. 429 par. 1
Kuziyil
Kwikil chom ap chimwing chikutwisha kuswinkan pa ndond ya mwikadil wa kuziyil, tukutwishap kwikal ni dilau dia Nzamb pakad mwikadil winou. Samwel wamuleja Mwant Saul anch: “Ov, komb [Yehova] ukat kusanger ku yakupesh kupandakanamu [dizu dia shamaʽ] kuziyil dizu diend? Tal kwa, kuziyil [mutapu ukwau wa kulond, kutesh] kupandakenamu yakupesh kuwap, ni kutesh kupandakenamu many ma amikoku kuwap.” (1Sam 15:22) Kulik kuziyil kurumburikin kulik dizu dia Yehova, kumekeshin anch twitiyijinap, tuchingejidinap ap tukwetap ritiy mu dizu dined ni Musul wad. Chawiy komb, muntu wakad kuziyil kashalijadinap ni muntu ukata kubwak ap mwin kwifukwil akish. (1Sam 15:23; ilakej ni Ro 6:16.) Kwitiy mulong wa kusal chom kanang kukwetingap usey anch tusadinap chom chatwitangau; kulik kusal yom yatwitangau kud kuburen ritiy ni kalimish pantaliken ni muntu watwinkishang mbil ja kusal yom yiney. (Mt 21:28-32) Antu akata kusanger kutesh uyakin ni kuwitiy mu manangu pakad kusal yom yiyitinau, idimbining ayinau nich yitongijok ya makasu ni kakutambulap chiyukish ap chimwing. (Jak 1:22-25) Mwan a Nzamb walejana patok anch ap antu asadina yom mud mwayitangau, pakwez kayisadinap nawamp ap ayisal nich yitongijok yiyimp, kakwandamap ap pakemp mu Want wa Nzamb ni kakuyitiyap ap pakemp.—Mt 7:15-23.
Mapit ma mu Spiritu
it-2-F p. 598 par. 7
Ranaken
Anch atubachik kumekesh ranaken pakwez rikwatijadinap ni rusot ra Nzamb, kukutwish kwikal yibudikin yiyimp. Yom yiney yimeken kamu patok kusutil yom yamushikena Mwant Saul. Chisu chawanyina mulong wa dirumburish dia Nzamb pantaliken nau in Amalek, awiy ading antu akusambish kuyirishikish in Isarel kupwa kwa kudiokal mu Idjibit. Amuleja Saul kulik kuyanaken. Mulong Saul wova wom wa antu end, kalondulap kamu nawamp umutakel wa Yehova. Chawiy, Yehova kamwitiyap kand Saul kwikal mwant. (1Sam 15:2-24) Anch twalondul jinjil jitentamina ja Yehova ni kusal usu wa kushal ashinshamena kud Ndiy, tukwipuk kusal yom mud Saul ni kushadish dilau dia Nzamb.
RUBING RA 21-27 NGOND WA 3
YOM YA USEY YIDIA MU DIZU DIA NZAMB | 1 SAMWEL 16-17
“Njit Jid ja Yehova”
wp16.5-F p. 11 par. 2-3
“Njit Jid ja Yehova”
David wamwinkisha Saul kashinsh kusutil kumulej yom yasadika parishay ni ntambu ni nnam mukwau wa chidiany. Ov, wading wibazin? Bwat. David wading wij mutapu wawinay njit jinija. Walonda anch: “[Yehova] wankamunina ku kan kwa ntambu ni kwa nnam wa chidiany, ndiy kand ukwinkamunina ku makas ma mwin Filistin winiwa.” Saul witiyija, wamwel anch: “Yang, chawiy [Yehova] ikala ney.”—1 Samwel 17:37.
Ov, ukukat kwikal ni ritiy mud ra David? Tufanyidin kwijik anch ritiy ra David radingap kwau ra piur piur ap rakad kwimen pa chom kanang. Ritiy rend rading rimedin pa ukaliweny wend ni pa yom yimenayap. Wading umwij Yehova mud mwin Kumuking ukweta rukat ni Ukata kuwanyish kushilamu kwend. Anch tukimbin anch twikal ni ritiy rikash mud riner, tufanyidin kudandamen kwilej piur pa Nzamb watwinkisha Bibil. Anch twasadin mu mwom wetu yom twilejina, tukujingunin yibudikin yiwamp yikwikalaku ni chinech chikukasikesh kand ritiy retu.—Hebereu 11:1.
wp16.5-F p. 11-12
“Njit Jid ja Yehova”
Nlel kand, chakul cha David chimekeshin kamu ritiy rikash. Tongijokin nsand David pamutoyidinay Goliat anch: “Ey wezil ni kurish ni yamam nich mpak yey ya musamun, ni murumbu ni mubur. Pakwez am nezil ni kurish ney mu dijin dia [Yehova] mwin dikand, ndiy kamu Nzamb wa yisak ya amasalay a in Isarel wafunyishina ey.” David wading wij anch usu wa muntu winou ni yom yend ya kurish nich yafanyinap kumupandakan. Goliat wamuburena Yehova Nzamb kalimish ni chinech chamusangareshap Yehova. Mud mwalonday David, ‘njit jid ja Yehova.’—1 Samwel 17:45-47.
David kadingap mputames, wading umen kujimb ni kulep kwa Goliat ni yom yend ya kurish nich. Pakwez kitiyap anch yom yiney yimovisha wom. Karumbukap mud mwasalay Saul ni amasalay end. David kiyilakejap ni Goliat. Pakwez, wamwilakeja Goliat ni Yehova. Goliat wading ni chimbu chilemp cha a metre 2 ni asantimetre 90, chawiy wading uyisutinamu antu akwau, pakwez chading nchik mu kumwilakej ni Mukaleng wa mangand mawonsu? Chakin kamu, mud muntu win mwawonsu, Goliat wading kwend mud kapopu—wading ukimbinau kushesh kud Yehova!
wp16.5-F p. 12 par. 4
“Njit Jid ja Yehova”
Nlel atushalapol a Nzamb kakatap kwiyandjik mu milong ya njit ja mangand. Chisu chinech chasutin kal. (Mateu 26:52) Pakwez tufanyidin kwimburij ritiy ra David. Mud David, tufanyidin kumuman Yehova mud muntu umekena ku mes—mud Nzamb umwing kusu tufanyidina kwifukwil ni kwov wom. Yisu yimwing, tukutwish kwiyov anch tukepin mu kwiyilakej ni milong yetu, pakwez milong yetu yid kwau yikemp mu kuyilakej ni usu wakad musul wa Yehova. Anch twamutond Yehova mud Nzamb wetu ni twatek ritiy mudiay ndiy mud mwasalay David, kwikil yikokujol ap milong yikutwisha kutwovish wom. Usu wa Yehova ukat kupandikan chom chin chawonsu!
Mapit ma mu Spiritu
it-2-F p. 905-906
Saul
Kupwa kwa yom yiney ni kupwa kumuzizil David many mulong wa kwikal mwant wa Isarel mu machuku ma kurutu pawiy padiokalay spiritu wa Yehova padiay Saul. Kusambish kamu pinipa “[spiritu muyimp] wadiokala kwa Yehova, wez wamukwat Saul, wading ni kumuzengol.” Mulong wadiosha spiritu wend padiay Saul, Yehova walikidila anch spiritu muyimp amuzengol Saul, kumukangesh kwikal ni chisambu cha mu manangu ni kwikal ni yibachikin yiyimp pa yovil yend, yitongijok ni manangu mend. Mu kumubwambwil Yehova, Saul wamekesha chitongijok chiyimp chading mu manangu ni mu muchim wend, chawiy kwadingap spiritu wa Nzamb mulong wa kumuchidij Saul ni kumwinkish usu wa kujijamen chitongijok chinech chiyimp. Chawiy mulong Yehova walikidila anch ‘spiritu muyimp’ aswinkan pa spiritu wend ni kumuzengol Saul, tukutwish kulond anch “[spiritu muyimp] wadiokala kwa Yehova,” ni atushalapol a Saul amujimbula spiritu winou mud ‘spiritu muyimp wa Nzamb.’ Kusutil chiyul cha kashalapol wend umwing, Saul wita anch David eza mulong wa kumubudinang kadiad chakwel iyova nawamp anch ‘spiritu muyimp’ wasambish kumuzengol.—1Sam 16:14-23; 17:15.
RUBING RA 28 NGOND WA 3–3 NGOND WA 4
YOM YA USEY YIDIA MU DIZU DIA NZAMB | 1 SAMWEL 18-19
“Shal Wikepishina Anch Watwish Kusal Chom Kanang”
w04-F 1/4 p. 15 par. 4
Chingejin pa Spiritu wa Nzamb Anch Mashakamin Maswimp
4 Mu kusut kwa machuku, nsand kafung wijikana nakash mwi ngand ya kabuj. Amutazuka kwa mwant mulong wa kubulang mizik. Wamujipa mwin kurish njit mujim Goliat, chilabu wovishena wom, wading wakaminau ap kud amasalay in Isarel arishang njit. David amuteka kurutu kwa amasalay arishang njit, warisha ni kuyipandakan in Filistin. Antu amukata nakash. Awanga miminy mulong wa kumutumbish. Kwinsambishin, kashalapol wa Mwant Saul wamujimbula David mud muntu “[wija] kubul kadiad nawamp” pakwez wamujimbula kand mud “muntu wa kashinsh wa usu, wij[a] kurish njit, ukat[a] kulond nich manangu, . . . muntu wa ufun.”—1 Samwel 16:18; 17:23, 24, 45-51; 18:5-7.
Tal Kushalijan Kudia Pakach pa Antu
6 Antu amwing akat kwibaz mulong akweting yifu yiwamp, ijiken nakash, ij kubul mizik nakash, akweting usu ap mulong akat kuyibaz kudi antu akwau. David wading ni yom yiney yawonsu, pakwez washala wikepishina mu mwom wend wawonsu. Chilakej, kupwa kwa David kumujip Goliat, Mwant Saul wamuleja David anch ufanyidin kumwat mwanend. Pakwez David wamwakula anch: “Ov, niyam nachadi nany, ni mwom wam chom ik, ni dijuku dia tatukwam mu Isarel didi ik, chad ing nez nikala tatuwenend wa mwant?” (1 Samwel 18:18) Yom ik yamukwasha David kushal wikepishina? Wijika anch mikadil yawonsu, ukaliweny, ni yisend yend yadingay nich chading mulong Nzamb wading wikepishin ni wamuteshang. (Kuseng 113:5-8) David wading wij anch chom chin chawonsu chiwamp chadingay nich chadiokalang kudi Yehova.—Ilikej ni 1 Korint 4:7.
7 Mudi David, antu a Yehova nlel asadin usu wa kwikal antu ikepishina. Chikat kutushik ku michim yetu pa kwijik anch Yehova amwinend, Udia wa Piur Nakash, udi wikepishina. (Kuseng 18:35) Tufanyidin kusadin mazu am: “Djalany riy, ni kudimuk, ni kwishikumwish, ni kuwap, ni kushimpish kwa muchim.” (Kolosay 3:12) Twij kand anch rukat ‘kirikwibazangap, ap kwishimek.’ (1 Korint 13:4) Anch antu akwau aman anch tudi ikepishina, niyau akutwish kukat kumwijik Yehova. Mudi ikundj wakad kwikal mwin kwitiyij ukutwish wasej kudi Yehova pakumanay mwikadil uwamp wa mukajend mwin Kristu, antu akutwish kusej kudi Nzamb kusutin kwikepish kwa atushalapol end.—1 Pita 3:1.
Mapit ma mu Spiritu
it-2-F p. 671 par. 5
Muprofet
Ap anch aprofet ayitondang kud spiritu wa Yehova, chimekeshinap anch adandamenang kulond kusutil spiritu wa Nzamb. Pakwez, spiritu wa Nzamb ‘wayishirikinang’ pa yisu yimwing mulong wa kuyilej uruu wafanyinau kulejan. (Eze 11:4, 5; Mk 3:8) Spiritu winou wikalang ni usu padiau awiy ni wayibachikang kulond. (1Sam 10:10; Jer 20:9; Am 3:8) Kadiap kwau anch asalang ching yom ya pakampwil pakwez kand mazu mau ni yaku yau yamekeshang pakad kwidjidjek yovil yimwing yading chakin kamu ya pakampwil. Chinech chikutwish kurumburil mu chikunku kurumburik kwa mazu ‘kusal yom mud aprofet.’ (1Sam 10:6-11; 19:20-24; Jer 29:24-32; ilakej ni Mid 2:4, 12-17; 6:15; 7:55.) Mulong ading ashinshikidin nakash pa chisend chau ni ading achiwanyishin nich mushiku ni kutakaman, chinech chafanyina kusal anch yisalijok yau yimekan mud yishalijadin ni ya antu akwau, ap kumekan mud ya usup, chilakej yisalijok yamekeshay muprofet umwing pantaliken nau atulal a amasalay chisu chamuzizilau Jehu many. Pakwez, pajinguninau anch muntu winou wading muprofet, atulal itiya uruu wend ni kashinsh kin kawonsu. (2Ant 9:1-13; ilakej ni Mid 26:24, 25.) Saul pading pamulondwilay David, washikena ku ‘kusal yom mud muprofet,’ wadjola masun mend ni wiyasa pansh “kanzikis muten wawonsu ni uchuku wakabuj,” chawiy chisu chachinay kamu David. (1Sam 19:18–20:1) Tukutwishap kulond anch yisu yivud aprofet endang kanzikis mulong Bibil kalejenap mwamu. Mwi nsangu jikwau jaad jilejenau, muprofet wayangang kanzikis nich chitongijok kanang, cha kumekesh chisend chend cha uprofet. (Is 20:2-4; Mk 1:8-11) Diyingishin diashadinay Saul kanzikis kadilejenap patok—pamwing ap chading mulong wa kumekesh anch kakwikalap kand ni mwaz, amudiosh kal masun mend ma want, kakwikalap kand ni ulabu ni usu udiokila kud Yehova mulong wa kutakel ap pamwing ap wasala mwamu mulong wa diyingishin dikwau diakad kwijikan.
RUBING RA 4-10 NGOND WA 4
YOM YA USEY YIDIA MU DIZU DIA NZAMB | 1 SAMWEL 20-22
“Mutapu Ukutwisha Kwikal Murund Muwamp”
Kasikesh Urund Wey Nau Antu Akwau Kurutu Disudiel Dishika
18 Nlel unou, akadivar ni anambaz netu arishin ni yakamish kushalijan. Chilakej, antu avud arishin ni mar madiokila ku yom yatangau ap madiokila ku yom yisadinau antu. Anch mar minam mashiken, amwing pakach petu tukutwish kushakam ni akadivar ni anambaz inay ku yikumbu yetu. Akwau akutwish kuyikwash kusutil kuyinkish nfalang. Pakwez etu awonsu tukutwish kumwit Yehova chakwel ayikwasha akadivar ni anambaz netu. Anch twatesh anch mukadivar ap nambaz uziyin mulong wa milong, pamwing ap tukutwishap kwijik yom tufanyidina kulond ap kusal. Pakwez etu awonsu tukwet mutapu wa kukwash. Chilakej, tukutwish kusutish chisu pamwing ni murund netu. Tukutwish kumutesh nawamp chisu chilondinay. Ni tukutwish kumulej verse tukatining nakash. (Isay 50:4) Chidia cha usey nakash chidi anch ufanyidin kwikal kwaku mulong wa kuyikwash arund ney chisu chikwetau kuswir kwa ukwash.—Tang Jinswir 17:17.
w08 15/2 paj 8 par. 7
Endilany Mu Jinjil Ja Yehova
7 Nzamb uchingejin twikala arund akashinsh. (Jinsw. 17:17) Yonatan mwan wa Mwant Saul wikala murund nend David. Pateshay Yonatan anch David wamujipa Goliat, “Mupim wawonsu wa Yonatan winunga nich mupim wa David, ni Yonatan wasambisha kumukat ndiy mudi mupim wend amwinend.” (2 Sam. 18:1, 3) Ap Yonatan wamubabesha David pasotay Saul kumujip. Kupwa kwa David kuchin, Yonatan wasankanijana nend ni waswika manswik nend. Radinga rufu ra Yonatan kumulej Saul mulong wa David, pakwez arund inay aad asankanijana kand ni akasikesha urund wau. (1 Sam. 20:24-41) Patanijanau kapamp kansudiel, Yonatan wamukasikesha David chikas “mwi Nzamb.”—1 Sam. 23:16-18.
wp09 1/10 paj 26-27 par. 11
Lamany Urund Mu Mangand Makad Rukat
11 Ikal ushinshamena. Salomon wafunda anch: “Murund ukat kumekesh kukat machuku mawonsu. Mwanamaku wavadika mulong wa kukwash mu yom yikash.” (Jinsw. 17:17) Pafunday mazu minam, Salomon wadinga ni manangu mend urund wadingay nich tatukwend, David ni Yonatan. (1 Sam. 18:1, NW) Mwant Saul wadinga ukatin anch mwanend Yonatan amuswikana mwi nkwas ya want wa Isarel. Pakwez Yonatan witiyija anch Yehova wamutondin kal David mulong wa chisend chinech. Pakad kwikal mudi Saul, Yonatan kadingap ni kumwovil David ris. Kovap kuyip ku muchim mulong wa ntumb yamutumbishau David, ni kitiyijap kapamp kamwing yitongijok yadingay nich Saul ya kusot kumujip David. (1 Sam. 20:24-34, NW) Ov, tudi mudi Yonatan? Anch arund netu atambul yisend, ov, tukat kuyisanger? Padingau mu yisu ya mar, ov, tukat kuyongoj ni kuyikwash? Anch twatesh anch akat kumulondin murund yom yiyimp, ov, tukat niyetu kuyitiyij? Ap anch, mudi mwadingay Yonatan, tukat kumuchidij murund netu?
Mapit ma mu Spiritu
w05-F 15/3 p. 24 par. 4
Manans Majim ma Mukand wa Samwel wa Kusambish
21:12, 13. Yehova utuchingejidin anch tusadina manangu ni ukaliweny wetu mulong wa kurish ni milong yikash yikutwisha kushiken mu mwom. Watwinkishin kal Dizu diend diapepilay, ditulejina mutapu wa kwikal ababela, ronganyin, ni ukaliweny wa kutong. (Jnsw 1:4) Tukat kutambul kand ukwash wa amakurump in Kristu atondau.
RUBING RA 18-24 NGOND WA 4
YOM YA USEY YIDIA MU DIZU DIA NZAMB | 1 SAMWEL 23-24
“Muchingela Yehova Nich Kushimpish Muchim”
w04-F 1/4 p. 16 par. 8
Chingejin pa Spiritu wa Nzamb Anch Mashakamin Maswimp
8 David walika kumusal Saul nayimp. Nich ritiy ni kushimpish muchim, David washa milong yawonsu mu makas ma Yehova. Kupwa kwa mwant kubudik mu mandam, David wamwela anch: “Chifanyidin [Yehova] ikala nkalansambu pakach pamam ni peyey, chifanyidin Yehova akufundakeshin ey mulong wamam, pakwez am kinikutwishap kwez kukupukunaku ey makas!” (1 Samwel 24:13) Ap anch David wading wij anch Saul wading ufil nich, kamufundakeshinap; kamusaalap ap kumulond nayimp. Yisu yivud mu mwom wend, David kakatap kwiyingish nich amwinend. Pakwez wamuchingejinang Yehova chakwel apwish milong yawonsu.—1 Samwel 25:32-34; 26:10, 11.
Mapit ma mu Spiritu
w17.11 paj 29-30 par. 11
Kangal Walik Chom ap Chimwing Chikukangesh Kutambul Difut
11 Anch twasal usu nakash mulong wa kwikal ni rukat ni awamp, tukutwishap kamu kwikal ni mukau. Dizu dia Nzamb dilondin anch: “Rukat rikat kushimpish muchim, [riwapin] kand. Rukat kirukwetap mukau.” (1 Korint 13:4) Mulong wa kwikal ni kashinsh anch mukau kangal wikala mu wuntu wetu, tufanyidin kusal usu wa kuman yom mudi muyimenay Yehova. Tufanyidin kuyiman akadivar nau anambaz netu mudi antu a mujimbu umwing, charumburik anch chikumangen. Bibil ulondin anch: “Anch chid chimwing achitumbish, yid yawonsu yikusangar pamwing.” (1 Korint 12:16-18, 26) Anch yom yiwamp yamushiken mukadivar umwing pakach pa akadivar netu, tukumwovil musangar, tukumwovilap mukau bwat. Tong piur pa chilakej chiwamp cha Jonatan mwan a Mwant Saul. Jonatan kamwovilap David mukau pamutondau kwikal Mwant pa ndond pa kumutond ndiy. Wamukasikesha David ni wamukwasha. (1 Samwel 23:16-18) Tukutwish kwikal awamp ni akweta rukat mudi Jonatan?
RUBING RA 25 NGOND WA 4–1 NGOND WA 5
YOM YA USEY YIDIA MU DIZU DIA NZAMB | 1 SAMWEL 25-26
“Ov, Ukat Kusal Yom Pakad Kutong?”
ia-F p. 78 par. 10-12
Wasala Nich Kubabal
10 Amasalay inay ayisadinang atufung mutapu ik? Yisu yivud chafanyina kuyiswapel kwiy mukoku pakwez kasalap mwamu. Ading mud rubumbu rading riyikingina atushalapol ni amikoku a Nabal. (Tang 1 Samwel 25:15, 16.) Atufung ni amikoku arishang ni ubaj kushalijan. Annam a yidiany ni yisu yivud ij ading piswimp ni kwingangel kwa Isarel ezang mulong wa kwiy.
11 Chadingap chimuswapedina David kuyidish antu awonsu inay mwi mpay. Chawiy David wakwata mupak wa kutum amakundj dikum mulong wa kwit ukwash kud Nabal. David watonda chisu chiwamp mulong wa kwit ukwash winou. Chading chisu cha kukamb mavuj ma amikoku, chisu cha musambu winou, antu ading ni chaku cha kudia nawamp ni cha kupan yom. David watonda nawamp mazu, ma kalimish ni mutapu wa kumalond. Ni wasadina dizu “mwaney David,” pamwing ap mulong wading wij anch Nabal wading mukurump kumusutamu ndiy. Mutapu ik wakulay Nabal?—1 Sam. 25:5-8.
12 Wajimana nakash! ‘Wasambisha kuyiswejin,’ mwawiy mwamulejau Abigayil kud nsand twajimbulang kwisambishil. Cha ushon, Nabal walika ni dibot diend, mem ni mbij. Wamuswingisha David mud muntu wa chamwamu ni wamufanikesha ni kashalapol uchinina kwa nsalejend. Chitongijok cha Nabal chading chikwatijadin pamwing ap ni chitongijok cha Saul wading umukisina David. Ni pakach pau kwikil ap umwing wading ni chitongijok mud cha Yehova. Nzamb wading umukatin David ni kamumanap mud muswik ubwambwidina, pakwez wamumana mud mwant wa machuku ma kurutu wa Isarel.—1 Sam. 25:10, 11, 14.
ia-F p. 80 par. 18
Wasala Nich Kubabal
18 Abigayil witiyina kurumbuk kwa nfumwend ni wamwita David dilikishin. Nich kubabal, witiya anch nfumwend wading muntu muyimp ni mwawiy mwading mulejena kurumburik kwa dijin diend, pamwing ap mulong wa kumekesh anch David wafanyina kwipwishikish kalimish kend pa kumupup muntu mud winou. Wamekesha anch wading umuchingejidin David. Wading wij anch ud katum wa Yehova, warishang ‘njit ja Yehova.’ Wading wij kand kushilamu kwa Yehova piur pa David ni want, mulong walonda anch: “Yehova . . . ukukuswanish want wa in Isarel.” Chikwau kand, wamukangesha David kusal chom chafanyina kumubachik kwichil mash ni kupwa ‘kwikal nich runeng’ ni kom kamwakamishina. (Tang 1 Samwel 25:24-31.) Mazu mawamp mud ik!
Mapit ma mu Spiritu
ia-F p. 79 par. 16
Wasala Nich Kubabal
16 Ov, Abigayil wabwambwila ku umutakel wa nfumwend? Bwat; pijikay anch Nabal wamusadina kwa chisum kashalapol uzizidilau many wa Yehova, chisal chafanyina kuletish rufu kud antu avud ading akad mulong a mu chikumbu cha Nabal. Anch Abigayil kasalap chom, niyend wafanyina kwiyandjik mu kurumbuk kwa nfumwend. Pa mulong mud winou, wafanyina kuziyin bil kudiay Nzamb wend pa ndond kuziyin kudiay nfumwend.