Mareferans ma Mudimu ni Mashakamin ma In Kristu Mukand wa Chikumangan

RUBING RA 2-8 NGOND WA 5

YOM YA USEY YIDIA MU DIZU DIA NZAMB | 1 SAMWEL 27-29

“Mutapu Warishay David Njit”

w07 1/3 p. 24 par. 7, 8

Tutumbishany Dijin dia Yehova Pamwing

⁷ Kudiokal ku Nob, David wachina waya kurand ku akilometre 40 mu teritwar wa in Filistin ni wajingamina kudiay Mwant Akish mu Gat, musumb wa chivadik wenday Goliyat. Pamwing ap David watonga anch Saul kakutwishap kwez kumukimb ku Gat. Mu machuku makemp kusu, atushalapol a mwant wa Gat amujingunina David. Pateshay David mu kununganijan anch amujingunin kal, “ndiy wamwova Akish mwant wa Gat wom nakash.”​—1 Samwel 21:10-12.

⁸ Chawiy in Filistin amukwata David. Chimeken anch chawiy chisu chafunday David kuseng kudiokila ku muchim mwamwilembilay Yehova anch: “Tekip mansoj mam mu mulond wey.” (Kuseng 56:8, TMK) Wamekesha ruchingej anch Yehova kakutwishap kuvuramen mar mend pakwez ukumubangin nich rukat ni kumuchidij. David watonga kand mutapu wa kumudimb mwant wa in Filistin. Wasala yom mud chizarik. Pamanay mwamu, Mwant Akish wayiswejina atushalapol end mulong wa kumuletin ikundj “chizarik” kurutu kwend. Choviken, Yehova wayukisha nkeu ja David. David amwopata mu musumb, chawiy chiyepay kapamp kakwau rufu.​—1 Samwel 21:13-15.

w21.03 paj 4 par. 8

Ansand​—Yom ik Ufanyidinanya Kusal Chakwel Akuchingejinany?

⁸ Shinshikin kand mulong ukwau warishay nich David. Kupwa kwa kumuzizil many, David wafanyina kuchingel mivu yivud kurutu asambish kuyikel mud mwant wa Yuda. (1 Sam. 16:13; 2 Sam. 2:3, 4) Chad mu mivu yiney yawonsu, yom ik yamukwasha kuchingel nich kushimpish muchim? Pa ndond pa kuziy, David washinshikina pa yom yading yitwishinay kusal. Chilakej, chisu chading chishichay mu mal ma in Filistin pading pamuchinyinay mwant Saul, David wasadina chisu chinicha mulong wa kuyirishikish akankuny a in Isarel. Mwamu, watwisha kuchidij mimbu ya ngand ya in Yuda.​—1 Sam. 27:1-12.

it-2-F p. 255 par. 6

Makasu

Ap anch Bibil ukangeshin kamu nakash makasu, pakwez chinech chirumburikinap anch tufanyidin kulejan jinsangu jakin kud antu akad kufanyin kwijik yom yiney. Yesu Kristu wayulana anch: “Kangal wapanany yom yitumbila kud atubu, chamwamu akukukarumukinany, akusumany. Kangal wadjibulany usang wen kudi ayibond, chamwamu akuudjatol.” (Mt 7:6) Chawiy chasala anch yisu yimwing Yesu alika kulejan nsangu jimwing ap kwakul kapamp kamwing ku yipul yimwing yamwipulangau, anch kusal mwamu kukutwish kwau kulet milong chamwamu. (Mt 15:1-6; 21:23-27; Yh 7:3-10) Yawiy yasala kand anch Aburaham, Isak, Rahab, ni Elija ajindjika jinsangu jimwing ap kulik kulejan uyakin wawonsu kud antu ading akad kumwifukwil Yehova.​—Dis 12:10-19; shap 20; 26:1-10; Jos 2:1-6; Jak 2:25; 2Ant 6:11-23.

Mapit ma mu Spiritu

w10 1/2 p. 12 par. 5-6

Ov, Afu Akutwish Kuyikwash Aom?

Tongijokin piur pa chinech. Bibil ulondin anch ku rufu muntu ukat “kuchirik ku mavu” ni anch “manangu mau makupwa.” (Kuseng 146:4, TMK) Awonsu aad Saul ni Samwel ading ij anch Nzamb ufishin nich kwambamb ni in yipong. Chawiy, Saul pakusambish wayopata mwi ngand antu asalang yom ya aspiritu ayimp!​—In levi 19:31.

Tong bil. Anch Samwel mwin kushinshaman wadinga mwom mu spiritu, ov, wela kujip chijil cha Nzamb ni kusal pamwing ni mwin chipong chakwel asankanijana ni Saul? Yehova walika kwambamb ni Saul. Ov, mwin chipong wela kumubachik Nzamb mwin Dikand Diawonsu ambamba nenday Saul kusutil Samwel wafila kal? Bwat. Chimeken patok anch, “Samwel” winou kadingap muprofef ushinshamena wa Nzamb ap pakemp. Wading spiritu​—chilembil muyimp wimekesha mud Samwel wafila kal.

RUBING RA 9-15 NGOND WA 5

YOM YA USEY YIDIA MU DIZU DIA NZAMB | 1 SAMWEL 30-31

“El Yehova Nzamb Akwinkisha Usu”

w06 1/8 p. 30 par. 12

Wayuk Muntu Umwovila Yehova Wom!

¹² Wom wa David mulong wa Yehova wasala yivud kupandakanamu kusu kulik kusal uyimp. Wamukasikesha kukwat mupak ukash padingay mu mikadil yikash. David ni antwend amuchina Saul, mu muvu umwing ni angond anying, aya ku Sikilag mwi ngand ya in Filistin. (1 Samwel 27:5-7, NW) Dichuku dimwing amakundj kadingakwap, ij in kubuu a in Amalek osha musumb ni ayisenda amband awonsu, an ni yivam yawonsu. Pachirikau ni kuman yashikena, David ni antwend adila. Ujim wakarumuka swa wikal rukuny, ni antu a David asota kumwas mayal. Chikalap nchik ushon wovay, David kashadishap ruchingej. (Jinswir 24:10) Wom wend wa winzamb wamubachika kukarumukin kud Yehova, ni “wakasikeshina muchim wend kudi [Yehova] Nzamb wend.” Nich ukwash wa Nzamb, David ni antwend ayikwata in Amalek ni ayitambula yom yawonsu.​—1 Samwel 30:1-20.

w12 1/4 p. 31 par. 14

Yehova Utulamin Mulong wa Dipandish

¹⁴ David warisha ni yishiken yikash mu mwom wend. (1 Sam. 30:3-6) Mazu mend mapepilau mamekeshin anch Yehova wading wij yovil yend. (Tang Kuseng 34:18; 56:8.) Nzamb wij nawamp yovil yetu. Anch tukwet “michim yinenganena” ap “michim yitudishila,” ndiy ukat kutushejin piswimp. Chinech chikutwish kutukasikesh mud kamu chamukasikesha David, wawanga anch: “Nikal ni musangar ni kuzangam mulong wa rukat rey rudimukina, mulong Ey wamana kal mar mam, wijika mar ma mupim wam.” (Kus. 31:7) Pakwez, Yehova usadining yom yivud kupandakanamu kuman ching kusu mar metu. Utulamin kusutil ku kutwinkish usu ni dikasikesh. Njil yimwing yisadidinay mwamu yid kusutil yikumangan ya win Kristu.

Mapit ma mu Spiritu

w05-F 15/3 p. 24 par. 8

Manans Majim ma Mukand wa Samwel Wakusambish

30:23, 24. Mupak winou wimedina pa Kuchind Michid 31:27, umekeshin anch Yehova uyikwatining nich usey antu akata kukwash midimu ya chikumangen. Chikalap nchik yom tusadina mu chikumangen, Bibil utulejin anch: “midimu yawonsu yiukusalany, salany nich [muchim wawonsu] mudi muukat kumusadilany [Yehova], wakad kutong anch ukat kuyisadilany . . . antu.”​—Kolosay 3:23.

RUBING RA 16-22 NGOND WA 5

YOM YA USEY YIDIA MU DIZU DIA NZAMB | 2 SAMWEL 1-3

“Yom ik Twilejidina ku ‘Ut wa Nseu’?”

w12 1/10 p. 21 par. 11

Ov, Muchim wa Mutapu Ik Ukata Kumekeshany?

¹¹ Tufanyidin kulam mu manangu anch Yehova wayinkisha amakurump mudimu wa ‘kwikal atufung a chikumangen cha Nzamb.’ (Mid. 20:28; 1 Pita 5:2) Chawiy, twij anch chid cha manangu kulimish ditenchik dia Nzamb, twikala amakurump a chikumangen ap bwat. Kulam muchim uwamp kukutwish kutukwash chakwel twipuka kwitek kurutu. Pamanay Mwant Saul wa Isarel anch David wasambish kal kwikal ubaj ku want wend, Saul “wamwovila David mukau.” (1 Sam. 18:9) Mwant wakudisha muchim uyimp ni wasota ap kumujip David. Pa ndond pa kushinshikin pa yisend mud mwasalay Saul, chid chiwamp nakash kumwimburij David. Chikalap nchik yom yakad kutentam yamusalau, nsand winou wadandamena kumulimish mwant watondau kud Nzamb.​—Tang 1 Samwel 26:23.

w12 1/4 p. 16 par. 8

Kuburen Kushinshaman Chijingidij Chikash!

⁸ Bibil wisambidin kand piur pa antu avud ashinshamena. Tushinshikinany antu aad pakach pa antu inay, ni tusambish ni muntu wamekesha kushinshaman kwend kud David. Jonatan, mwan wa kusambish wa Mwant Saul, ndiy wela pamwing ap kuswan want mu Isarel—pakwez wachingeja chom chimwing. Yehova wamutonda David chakwel ikala mwant mu machuku ma kurutu. Jonatan walimisha mupak wa Nzamb. Ndiy kamwovilap David mukau mud mukankuny nend. Pakwez “muchim wa Jonatan wikasa ni wa David” ni wakwata mupak wa kushinshaman kudiay ndiy. Wamwinkisha kand David yidjal yend, mpak yend ya musamun, ni ut wend, ni ut wend wa nseu, ni nshipu yend. (1 Sam. 18:1-4) Jonatan wasala usu wend wawonsu mulong wa ‘kukasikesh makas ma David’, ap anch kusal mwamu kwafanyina kumutek mu ubaj mulong wa Saul. Jonatan wamuleja nich kushinshaman anch: “Ey yey ukuyikela in Isarel, am niyam nikwikal ney piswimp.” (1 Sam. 20:30-34; 23:16, 17) Chishimokishinap pa kuman anch kupwa kwa rufu ra Jonatan, David wamekesha ushon ni rukat rend kud ndiy pawangay muminy wa madil.​—2 Sam. 1:17, 26.

Mapit ma mu Spiritu

it-1-F p. 928 par. 7

Mukadivar

Dizu “Mukadivar” akat kudisadin kand mulong wa kwisambin antu akweta chitongijok chimwing, mupak umwing ap yom ya kusal pamwing. Chilakej, Mwant Hiram wa ku Tir wamutazuka Mwant Salomon anch mukadivar nend, chidiap kwau kusu mulong awonsu ading ant ni ading ni ulabu wa mutapu umwing, pakwez pamwing ap kand mulong ading asadin awonsu pamwing mulong wa kukumangej mitond ni yom yikwau ya kutung nich tempel. (1Ant 9:13; 5:1-12) David wafunda anch: “Talany kuwap ni musangar anch akadivar abombakan ni kushakam pamwing!” Charumburik anch, kuvarikan kumujimbu kurumburikinap kamu anch antu a dijuku dimwing akwikal mu chisambu ni mu uumwing. (Kus 133:1) Mulong ading akatijadin ni ambangijadidin, yawiy yamubachika David kumutazuk Jonatan anch mwanamakwend, kadiap divar dia ku mujimbu, bwat. (2Sam 1:26) Antu akweta yaku yifanakena ni akata kusal yom mu mutapu ufanakena ayitazukin anch akadivar.​—Jnsw 18:9.

RUBING RA 23-29 NGOND WA 5

YOM YA USEY YIDIA MU DIZU DIA NZAMB | 2 SAMWEL 4-6

“Ikal ni Wom wa Kumujimesh Yehova”

w05-F 15/5 p. 17 par. 7

Manans Majim ma Mukand wa Samwel wa Kaad

6:1-7. Ap anch chitongijok cha David chadingap chiyimp, pakwez wajipa chijil cha Nzamb pasotay kusendikish Mushet wa Manswik mu chilangumun. Ni katwishap bwat. (Kubudik 25:13, 14; Kuchind Michid 4:15, 19; 7:7-9) Chisal cha Uza cha kwazuk chikas ku Mushet wa Manswik chimekeshin nichawiy anch yitongijok yiwamp yikutwishap kuswimp mbil ja Nzamb.

w05-F 1/2 p. 27 par. 20

Yehova Ukat Kusalang Ching Yom Yitentamina

²⁰ Vurik anch Uza wading wij nawamp Chijil. Mushet wading umekeshin kwikalaku kwa Yehova. Chijil chalejana anch muntu wakad kwinkau mbil ya kukwataku kafanyidinap kuukwat, ni chalejana patok anch muntu ukujipa chijil chinech ufanyidin kufa. (Kuchind Michid 4:18-20; 7:89) Chawiy, kusend mushet utumbila chadingap chisend cha kukwat nich usweral. Uza wafanyina kwijik chijil chinech mulong wading mwin Levi (pakwez kadingap mwin kupesh). Pakur, tatukwend a Uza ndiy walamang mushet kwol kwend. (1 Samwel 6:20–7:1) Wasala kwinikwa mivu piswimp 70, djat ni pakwatay David mupak wa kuushemunin. Chawiy, chimeken anch kudiosh ku wanikanch Uza wading wij nawamp yijil piur pa Mushet wa Manswik.

w05-F 1/2 p. 27 par. 21

Yehova Ukat Kusalang Ching Yom Yitentamina

²¹ Mud mutapu twamana kal, Yehova ukutwish kuman yom yidia mu muchim wa muntu. Mulong Dizu dia Nzamb ditazukin chisal cha Uza anch ‘chisal cha kuburen kalimish,’ chimeken anch Yehova wamana yibachikin yiyimp yadingay nich Uza, yakad kulejanau mu rusangu riner. Ov, Uza wading muntu ukweta chibud, wading ni chaku cha kulik kulimish mimbu yend? (Jnsw. 11:2) Ov, kusendish mukach mwa antu Mushet walamau mu dijuku diend kwamubachika kwikwat nich usey nakash? (Jnsw. 8:13) Ov, Uza waburena ritiy kushik mu chilik cha kutong anch Yehova kakutwishap kuchidij Mushet utumbila umekeshina kwikalaku kwend? Chikalap nchik diyingishin diamujipinay, tukwet kashinsh anch Yehova wasala yom yitentamina. Chimeken anch kud chom chamanay mu muchim wa Uza chamubachika kumupup kamu pakad kulab.​—Jnsw. 21:2.

Mapit ma mu Spiritu

w96-F 1/4 p. 29 par. 1

Mudjibwila Yehova Chisu Chawonsu Yisend Yey

Ap anch David wading mwant, pakwez kasalangap kamu ching yom yiwamp. Yom yasalay yimekeshin anch ap muntu ukweta urund uwamp ni Yehova ukutwish yisu yimwing, pakampwil mu yisu yikash, kusal yom yakad kuwanyin. Chakusambish David wajimana. Kupwa, wova wom. (2 Samwel 6:8, 9) Urund ukash wading ukwetay ni Yehova aupaka. Mulong kaziyinap ku yijil ya Yehova, pinap David wakanganya kumudjibwil Yehova yisend yend. Ov, yom yiney yatushikenap kal niyetu? Ov, twamufishap kal nich Yehova mulong wa milong yatushikena mulong wa kulik kusadin mbil jend?​—Jnsw. 19:3.

RUBING RA 30 NGOND WA 5–5 NGOND WA 6

YOM YA USEY YIDIA MU DIZU DIA NZAMB | 2 SAMWEL 7-8

“Yehova Wasuka Manswik ni David”

w10-F 1/4 p. 20 par. 3

‘Want Wey Ukez Kashakam Mivu ni Minang’

Maswir makin ma David mamupukuna nakash Yehova. Mulong wa kwipan kwa David ni kukwatijan ni uprofet, Yehova wasuka manswik ni David anch muntu umwing wa ku chikit cha want wa David ukez kayikel chikupu. Kusutil Natan, Nzamb wamukana David anch: “A majuku mey ni want wey yikez kashakam mivu ni minang kurutu kwam, ni ditand diey dikez kiman chikupu.” (Verse wa 16) Ov, nany udia Nswan wa chikupu wa manswik mawonsu​—ukuyikela chikupu?​—Kuseng 89:21, 30, 35-37.

w10-F 1/4 p. 20 par. 4

‘Want Wey Ukez Kashakam Mivu ni Minang’

Yesu wa ku Nazaret wading wa ku muchid wa David. Palejanay mwangel piur pa kuvadik kwend, walonda anch: “[Yehova] Nzamb ukez kamuswanish pa ditand dia want diading dia ngakiril wend David. Ndiy ukez kikal Mwant wa in Isarel chikupu, Want wend kiukez kapwap.” (Luka 1:32, 33) Chawiy, manswik maswikay Nzamb ni David mawanyina pad Yesu Kristu. Mwamu Yesu kayikedilap mud ukwova anch amutonda kud muntu, pakwez uyikedil mulong wa kushilamu kwa Nzamb umwinkishina mbil ya kuyikel chikupu. Ni twij anch kushilamu kwa Nzamb kukat kuwanyinang chisu chawonsu.​—Isay 55:10, 11.

w14 1/10 p. 13 par. 14

Ikal ni Ritiy Rikash mu Want

¹⁴ Shinshikin bil pa yom yamukanau Mwant David wa mu Isarel wa pasak kud Yehova mu manswik matazukinau anch manswik ma David. (Tang 2 Samwel 7:12, 16.) Yehova wasuka manswik minam ni David pa chirung cha want wa David mu Yerusalem, wamukana anch Mesia wafanyina kwikal wa mu dijuku diend. (Luka 1:30-33) Chawiy, Yehova walejana patok dijuku dikuvadikina mbut yiney ni walonda anch mwin kumuswan David ufanyidin kwikal “umwing unatonda” mulong wa ditand dia Want wa Umesia. (Ezek. 21:25-27) Kusutil Yesu, want wa David ‘ukushakam chikupu.’ Chikwau kand, mbut ya David “yikez kikalaku chikupu, nkwas yend ya katumb yikez kushakam chikupu mudi muten.” (Kus. 89:34-37) Mwaning, winyikel wa Mesia kakezap kaukatul milamu, ni yom tukutaninamu mu winyikel winou yikwikal ya chikupu!

Mapit ma mu Spiritu

it-1-F p. 623 par. 2

Machuku Mansudiel

Uprofet wa Balam. Muprofet Balam wamuleja Balak kurutu kwa in Isarel kwandam mwi ngand ya kushilamu anch: “Ez lel, nikuleja yom yikez kasalau antu inay [in Isarel] kudi antu ey mu machuku [mansudiel]. . . . Katumbu ukez kabudik kudi Jakobu, Mwant ukez kabudik mukach mwa in Isarel. Ndiy ukez kabuz mavumu ma in Mowab, ni kushesh an awonsu a in chisum.” (Kuch 24:14-17) Mu kuwanyin kwa kusambish kwa uprofet winou, Mwant David ndiy wikala “katumbu,” wayipandikana in Mowab. (2Sam 8:2) Chakin kamu, mu kuwanyin kwa uprofet winou wa pakampwil, ‘machuku mansudiel’ masambisha pikalay David mwant. Mulong David wading umumekeshin Yesu, Mwant wa Umesia, uprofet winou wafanyina kand kuwanyin pad Yesu chisu chikuyipandikanay akankuny nend.​—Isa 9:7; Kus 2:8, 9.

RUBING RA 6-12 NGOND WA 6

YOM YA USEY YIDIA MU DIZU DIA NZAMB | 2 SAMWEL 9-10

“David Wamekesha Rukat Rishinshamena”

w21.11 p. 9 par. 7

Dandamenany Kumekeshijadin Rukat Rudimukina Amwing ni Akwau

Kushalijan kudia pakach pa kushinshaman mud mutapu warumburilau kal mu paragraf wa 6 ni rukat rudimukina kwimedin pa yibachikin ya muntu. Kukwatijan ni Bibil, yom ik yayibachika antu a Nzamb kumekesh rukat rudimukina pasak? Amekesha rukat riner kadiap mulong ading ayishindidin, pakwez mulong ading akatin kusal mwamu. Shinshikin chilakej cha David. Muchim wend wamubachika kumumekeshin murund nend Jonatan rukat rishinshamena ap anch tatukwend a Jonatan wading ukimbin kumujip David. Mivu yivud kupwa kwa rufu ra Jonatan, David wadandamena kumumekeshin Mefiboket mwan a Jonatan rukat rudimukina.​—1 Sam. 20:9, 14, 15; 2 Sam. 4:4; 8:15; 9:1, 6, 7.

w05-F 15/5 p. 17 par. 11

Manans Majim ma Mukand wa Samwel wa Kaad

9:1, 6, 7. David wawanyisha kushilamu kwend. Niyetu tufanyidin kwikasikesh kuwanyish kushilamu kwetu.

w02-F 15/2 p. 14 par. 10

Arisha ni Miy mu Mijimbu Yau

¹⁰ Kupwa kwa mivu, mulong wa kumekesh anch wading umukatin Jonatan nakash, Mwant David wamumekeshina Mefiboket rukat rishinshamena. David wamwinkisha yir yawonsu ya Saul ni wamwinkisha Siba, wading kashalapol wa Saul chisend cha kuyilam. David wamuleja kand Mefiboket anch: “Ey ukudiang kand ni yamam machuku mawonsu ku mes.” (2 Samwel 9:6-10) Chakin kamu, rukat rishinshamena ra David ramwongoja nakash Mefiboket ni ramudutishaku kusansan kwa ulim wadingay nich. Chilakej chiwamp mud ik! Niyetu tufanyidin kusal usu wa kuyanaken antu Arishina ni muy mu mijimbu yau.

Mapit ma mu Spiritu

it-1-F p. 270 par. 5

Wedj

Antu a pakur avud, a ku mutambu wa kwingangel, kuwejaku ni in Isarel, akatang nakash kulam wedj mulong wamekeshang kalimish ka muntu ikundj. Chijil cha Nzamb chayikangesha in Isarel kukil ‘uvuj wa mwimbet mwa mutu,’ uvuj udia pakach pa ditu ni dis, ni kuns kwa wedj. (Lev 19:27; 21:5) Chakin kamu mulong chading chishankur cha chirelijon wa apagan.

RUBING RA 13-19 NGOND WA 6

YOM YA USEY YIDIA MU DIZU DIA NZAMB | 2 SAMWEL 11-12

“Kangal Walik Maku Mayimp Makuyikel”

w21.06 p. 17 par. 10

Ukutwish Kwipuk Kufa mu Mipit ya Satan!

¹⁰ Ris ramushikija Mwant David ku kuvuramen yom yawonsu yamwinkishau kud Yehova, mud mapit, ntumb ni kuwin njit jivud pad akankuny nend. David wading wij nawamp anch yipan yamwinkishau kud Nzamb yading “yipandaken kuvul!” (Kus. 40:5) Pakwez chisu chimwing, David wavuramena yom yawonsu yamwinkishau kud Yehova. Wakanganya kusanger yom yadingay nich ni wakata kwikal ni yivud kupandakan. Ap anch David wading nau amband avud, wasambisha kand kumwovil mband ayen ris. Mband winou wading Batisheba ni nfumwend wading Uria mwin Het. David witongina amwinend ni walala ni Batisheba, ni Batisheba wimisha. Yom yasalay David yading yiyimp nakash. Pakwez warijeka kand chakwel amujip Uria! (2Sam 11:2-15) Yom ik yading yitonginay David? Ov, wading utongin anch Yehova kamenap kwend? Ap anch David wading wamusadidin kal Yehova mu mivu yivud, wakudisha ris, ni kusal mwamu kwamuletina mar nakash. Pakwez cha musangar, mu kusut kwa chisu, David witiyina kurumbuk kwend ni wakarumuka. David wamujikitisha Yehova nakash mulong wamulikishina!​—2Sam 12:7-13.

w19.09 p. 17 par. 15

Muziyila Yehova Nich Musangar​—Mulong wak ni Mutapu ik?

¹⁵ Yehova wamutonda David mud ntakel kadiap kusu mulong wa dijuku diend pakwez kand mulong wa muchid wawonsu wa Isarel. Mulong wading mwant, David wading ni ulabu nakash. Yisu yimwing wasadina nayimp ulabu wend ni warumboka nakash. (2 Sam. 11:14, 15) Pakwez wamekesha anch umuziyidin Yehova kusutil kwitiy dipup. Chisu chalembilay, wamuleja Yehova mutapu wading wiyovilay. Ni wasala usu wa kuziyil ku chiyul cha Yehova. (Kus. 51:1-4) Chikwau kand, wikepisha ni witiya yiyul kadiap kwau ching ya amakundj pakwez kand ni yading yidiokila kud amband. (1 Sam. 19:11, 12; 25:32, 33) David wilejina ku kurumbok kwend ni wateka mudimu wa Yehova pa ndond ya kusambish.

w18.06 p. 16 par. 7

El Yiyil ni Mbil ja Nzamb Jifumba Kom Key

⁷ Tukwetap kuswir kwa kuman mar madiokiling ku kujip yijil ya Nzamb mulong wa kwilej yom yidia yiwamp ni yidia yiyimp. Tukutwish kwilejin kusutin kurumbuk kwasalau kud antu akwau pasak. Yilakej yiney yid mu Bibil. Jinswir 1:5 ulondin anch: “Mwin manangu atesha kand, ni kuwejaku kwilej kwend kakwau.” Malejan minam madiokil kud Nzamb ni mapandaken kuwap nakash! Chilakej, tong mutapu wamanay David mar kupwa kwa kumubwambwil Yehova ni kusal masandj ni Batisheba. (2 Samwel 12:7-14) Chisu utangina rusangu riner, iyipula anch: ‘Mutapu ik wafanyinay David kwipuk milong yiney? Yom ik nikusala anch yom mud yiney yanshiken? Anch angoz mulong wa kusal masandj, ov, nikusal mud David anch mud Josef?’ (Disambishil 39:11-15) Anch twatong nawamp piur pa yibudikin yikash ya kusal chitil, tukudandamen ‘kukis yom yidia yiyimp.’

Mapit ma mu Spiritu

it-1-F p. 600 par. 6

David

Pakwez, Yehova wading umen, ni wamekesha patok chisal chinech chiyimp. Anch Yehova wayilikina anzwij a chiuntu arumburisha mulong wa David nend Batisheba kukwatijan ni Chijil cha Moses, David ni Batisheba afanyina kuyijip, ni mwanau wa kusochik wafanyina niyend kufil mwinvumu mwa makwend. (Kuv 5:18; 22:22) Pakwez Yehova wapwisha mulong winou amwinend ni wamwovila David riy mulong wa manswik ma Want (2Sam 7:11-16), chakin kamu mulong David niyend wayovilang antu akwau riy (1Sam 24:4-7; ilakej ni Jak 2:13) ni mulong Yehova wamana anch akayitil inay ading in kukarumuk. (Kus 51:1-4) Pakwez kayilikap mwamu pakad kuyipup. Yehova walonda kusutil muprofet Nathan anch: “Nikulangwish kuyip mu dijuku diey.”​—2Sam 12:1-12.

RUBING RA 20-26 NGOND WA 6

YOM YA USEY YIDIA MU DIZU DIA NZAMB | 2 SAMWEL 13-14

“Kwitongin kwa Amunon Kwaleta Yibudikin Yiyimp”

it-1-F p. 31 par. 7

Abisalom

Rufu ra Amunon. Ufun wa Tamar mpanyend a Abisalom wamulangwisha Amunon maku ma upwepu. Amunon wadimbana kuyel ni watenchika chakwel amutuminay Tamar kwol kwend kumwisukin yakudia, kupwa wamulala ku usu. Yovil yikash ya rukat yadingay nich piur pa Tamar yakarumuka kwikal rikis ni wamudjibula tamar mu balibal. Tamar wapola nkandj wend muwamp wading udjitay wamumekeshang kwikal mwan a mwant uchidia kal kajik, wiyichila maut pa mutu ni kupwa watanijana ni Abisalom. Abisalom wajingunina kapamp kamwing yom yasadika, ni manangu mamuya kud Amunon, walonda anch wad wasambishin kal kuman anch Amunon umukatining Tamar. Pakwez, wamuleja Tamar kulam pa kan, ni wamusenda kushakam nend kwol kwend.​—2Sam 13:1-20.

w17.09 p. 6 par. 11

Tukudishany Mwikadil wa Kwilam

¹¹ Bibil utwinkishin kand yilakej ya antu alika kujijamen choziu cha kusal masandj. Ni utulejin yibudikin yiyimp yikushikena anch twalik kwilam. Anch yom yamushikena Kim yakushiken niyey, tong piur pa nsand chisup ulejenau mu Jinswir shapitre wa 7. Tong kand piur pa Amunon ni yom yiyimp yamushikena mulong wa yisal yend. (2 Samwel 13:1, 2, 10-15, 28-32) Anvaj akutwish kuyikwash anau kukudish mwikadil wa kwilam ni manangu chisu chisambinau nau piur pa yilakej yiney pasadinau difukwil dia mu dijuku.

it-1-F p. 32 par. 1

Abisalom

Kwasuta mivu yaad. Pa chisu cha kukamb mavuj ma amikoku, chisu chinech antu asalang misambu. Abisalom watenchika musambu ku Bal Hasor, wading Kwiyand kwa Yerusalem mu akilometre piswimp 22. Wayitazuka an a mwant ni David win amwinend. Palikay David kwez, Abisalom wamukasikesha David chakwel amutum Amunon mwanend wakusambish pa ndond yend. (Jnsw 10:18) Ku musambu, pamekanay Amunon anch ‘maar mamukwat kal,’ Abisalom wayileja atushalapol end kumujip. An akwau a David achirika ku Yerusalem, pakwez Abisalom wachinina kwa ngakend mwin Siri, mu want wa in Geshur, Kwingangel kwa Karung wa Galalia. (2Sam 13:23-38) “Mpak ya musamun” yalejanay muprofet Natan yandama katat mu “majuku” ma David ni yafanyina kudandamen mu mwom wend wawonsu.​—2Sam 12:10.

Mapit ma mu Spiritu

w08 15/11 p. 5 par. 3

Ov, Usotil Wikala Muntu wa Mutapu Ik?

Njil yikwau ya kujingunin yom yitufanyidina kukarumun yid kusutil ku kwilej yaku yadingau nich antu isambidinau mu Bibil, kushinshikin yisal yiwamp yadingau nich ni yakad kwikal yiwamp. Chilakej, tongijokin bil padiay Yosef, mwan wenday nshankur Yakob. Chikalap nchik yom yiyimp yamusalau, Yosef wadinga nich manangu mawamp ni kuwap kwa muchim. (Dis. 45:1-15) Ku mutambu ukwau, Abisalom mwan wenday Mwant David wadimbana kuyibangin nakash antu ni amukata mulong wa kuwap kwa muchim wend. Pakwez, chakin kamu, ndiy wadinga mwin rubabek ni mpongirik. (2 Sam. 13:28, 29; 14:25; 15:1-12, NW) Kuwap kwa kadimb-a-dimb ni kuwap kwa mujimbu kukatap chakin kamu kumwikadish muntu, muntu muwamp.

RUBING RA 27 NGOND WA 6–3 NGOND WA 7

YOM YA USEY YIDIA MU DIZU DIA NZAMB | 2 SAMWEL 15-17

“Chibud Chamubachika Abisalom Kubwambwil”

w16.02 p. 23 par. 10

Ilejina Kudi Atushalapol Ashinshamena a Yehova

Abisalom, mwan wa Mwant David kadingap ushinshamen kud Nzamb mulong kadingap wikepishina. Wakimba kwikal mwant, chawiy watambula “ditemb diend dimwing ni atubar, ni antu amakundj makum matan adinga ni kuyang mau pansh kurutu kwend.” (2 Samwel 15:1) Wayibachika kand in Isarel kwikal ashinshamena kud ndiy. Wasala usu mulong wa kumujip tatukwend, ap anch wading wij anch Yehova ndiy wamuteka David kwikal mwant wa Isarel.​—2 Samwel 15:13, 14; 17:1-4.

w12 1/7 p. 18 par. 5

Musadila Nzamb Mwin Want Ipau

⁵ Mu Bibil mud yilakej yivud ya antu adinga nich chibachikin chiyimp pa antu akwau. Chilakej chimwing chid cha Abisalom, mwan wa Mwant David. Abisalom wadinga nich chifu cha ufun. Pakwez, mud Satan, ndiy walikidila maku ma ris chakwel mizula mu muchim wend, chad wasambisha kusot kwikal pa nkwas ya want ya tatukwend, pakwez kadingap ni mbil ya kushakam pa chitwam chinech. Mu kupakish kusend want, Abisalom walangwisha ushon ukash kud ambay nend in Isarel ni kuyilej nich manangu anch chikumbu cha mwant chaburena kuyibangin. Mwaning, mud Djabul mu chir cha Eden, Abisalom wimekesha amwinend mud muntu muwamp, ni kumusadil tatukwend yom yiyimp.​—2 Sam. 15:1-5.

it-1-F p. 1101 par. 4

Heberon

Mu kusut kwa mivu, Abisalom mwan a David wachirika ku Heberon ni kwawiy kwasambishinay kutenchik yom mulong wa kumutambul tatukwend want, pakwez wakanganya. (2Sam 15:7-10) Chakin kamu watonda kusambish kutenchikin yom ku Heberon mulong wading musumb wijikena nakash, pakur wawiy wading musumb ujim wa ngand ya Yuda. Chikwau kand, kwawiy kwavadikinay. Mu kusut kwa chisu, Mwant Robowam, mwijukurend a David watungurila kand musumb wa Heberon. (2Jsng 11:5-10) Kupwa kwa kushesh ngand ya Yuda kud in Babilon, ni kupwa kwa in Yuda akwatau mu winkwal kuchirik, in Yuda amwing adiokala mu winkwal ashakama mu Heberon (Kirijat Arba).​—Neh 11:25.

Mapit ma mu Spiritu

w18.08 p. 6 par. 11

Ov, Ukwet Uman Wakin?

¹¹ Kukutwish kwikal chisu chimwing tukwova pakampwil nayimp mulong antu apalangeshin nsangu ja makasu piur petu jikweta uyakin wa chikunku. Yiney yawiy yom yamushikena Mefiboket. Mwant David wamwinkisha Mefiboket yir yawonsu yadinga ya ngakend Saul. (2 Samwel 9:6, 7) Pakwez kupwa David watesha rusangu riyimp piur pa Mefiboket. Kakimbijolap mulong wa kwijik anch rusangu rid rakin ap bwat, ni wamutambula Mefiboket yom yawonsu. (2 Samwel 16:1-4) Kupwa, chisu chambambay David ni ndiy, David wajingunina anch warumbukang kal. Wamuchirishina Mefiboket yom yimwing. (2 Samwel 19:24-29) Anch David witekina chisu cha kukimb uman wakin pa ndond pa kukwat mupak wimedina pa rusangu ra chikunku, ing Mefiboket kafanyinap kuman mar ma kuburen kutentam kwinoku.