DILEJAN DIA 20
Mutapu Urijekinau Chikumangen
Yehova kadiap Nzamb wa kanvundangesh. (1 Korint 14:33) Chawiy, tukutwish kuchingej anch antu end niyau afanyidin kwikal arijekinau nawamp. Mutapu ik urijekinau chikumangen cha win Kristu? Mutapu ik niyetu tukutwisha kukwash chakwel chikala chirijekinau nawamp?
1. Nany udia mutu wa chikumangen?
‘Kristu ndiy mutu wa chikumangen.’ (Efes 5:23) Utakedin kudiokal mwiur midimu yisadinau atushalapol a Yehova pa mangand mawonsu. Yesu wamutonda “kashalapol ushishamena ni kubabal,” kachisak kakemp ka amakurump aswila atazukinau kand anch Chisak Chitakedila. (Tang Mateu 24:45-47, TMK.) Mud mwasalangau atwimbuy ni amakurump a mu mivu chitot yakusambish ading mu Yerusalem, Chisak Chitakedila chikat kupan umutakel ku yikumangen yidia pa mangand mawonsu. (Midimu 15:2) Pakwez amakundj inay kawiyap adia mutu wa dirijek dietu. Akat kukimb umutakel wa Yehova ni Dizu diend, ni akat kuziyin ku umutakel wa Yesu.
2. Chisend ik chikwetau amakurump?
Amakurump ad amakundj in Kristu amekeshina kal kushinshaman mu mivu yivud. Akat kuyifundish atushalapol a Yehova kusutil Bibil, akat kuyikwash ni kuyikasikesh. Kakatap kuyifut mulong wa mudimu ukatau kusal. Pakwez akat kusal ‘nich muchim uwamp kurutu wa Nzamb; kadiap mulong wa kukat kwisakinamu, pakwez nich impu nakash.’ (1 Pita 5:1, 2) Amakurump akat kuyikwash kud ankwash a mudimu, akutwisha niyau kuwanyish yitinau mu kusut kwa chisu ni kusal mud amakurump.
Chisak Chitakedila chikat kuyitond amakurump amwing kwikal atulam a minyingumuku. Akat kwendin yikumangen kushalijan mulong wa kuyikasikesh ni kuyinkish umutakel. Atulam a minyingumuku akat kuyitek akadivar awanyishina yitinau mu Bibil mulong wa kwikal amakurump ni ankwash a mudimu.—1 Timote 3:1-10, 12; Titus 1:5-9.
3. Chisend ik chikwetay Kaman mwawonsu?
Antu awonsu adia mu chikumangen akat “kushiman dijin dia [Yehova]” kusutil kwakul ku yikumangan ni kwipan mu mudimu wa kulejan kukwatijan ni usu wau.—Tang Kuseng 148:12, 13.
ILEJA CHIKURIKINA
Ileja mulong wa kwijik Yesu ud ntakel wa mutapu ik, mutapu usadiningau amakurump usu wa kwimburij chilakej chend, ni mutapu tukutwisha kusal mu kwovijan ni Yesu nau amakurump.
4. Yesu ud ntakel muwamp
Yesu ututazukin nich musangar nakash. Tang Mateu 11:28-30, kupwa isambinany chipul ech:
Yesu ukatin anch tumana mutapu ik umutakel wend?
Mutapu ik ukatau amakurump kwimburij chilakej cha Yesu? Talany VIDEO.
Bibil ulejen patok mutapu ufanyidinau amakurump kusal mudimu wau.
Tang Isay 32:2 ni 1 Pita 5:1-3, kupwa isambinany yipul ey:
Mutapu ik wiyovila pa kwijik anch mud mwasalay Yesu, amakurump niyau akat kusal usu wa kuyikasikesh antu akwau?
Amakurump akat kumwimburij Yesu mu mitapu ik kand yikwau?
5. Amakurump akat kufundish kusutil chilakej chau
Mutapu ik ukatinay Yesu anch amakurump amana chisend chau? Talany VIDEO.
Yesu wateka mbil jifanyidinau kulondul antu atakedina chikumangen. Tang Mateu 23:8-12, kupwa isambinany yipul ey:
Mbil ik ja Bibil jikata kuyitakel amakurump? Ov, antakel a marelijon akat kulondul mbil jinej?
Amakurump akat kulam urund wau uwamp ni Yehova ni akat kukwash majuku mau kusal mwamu
Amakurump akat kuyibangin antu awonsu adia mu chikumangen
Amakurump akat kusal mudimu wa kulejan chisu chawonsu
Amakurump akat kufundish. Akat kukwash kand kwinangish ndond ya difukwil ni kusal midimu yikwau
6. Tukutwish kusal mu kwovijan nau amakurump
Bibil ulejen mulong wak chid cha usey nakash kusal mu kwovijan nau amakurump. Tang Hebereu 13:17, kupwa isambinany yipul ey:
Mulong wak Bibil utulejin anch tufanyidin kuyiziyin kwa kwisotin antu atutakedina? Ey utongin nchik?
Tang Luka 16:10, kupwa isambinany chipul ech:
Mulong wak chid cha usey kusal mu kwovijan nau amakurump ap mu yom yimekena mud ya usweral?
ANCH MUNTU WAKWEL ANCH: “Egliz muchim wey, chidiap kwau cha usey kumwifukwil Nzamb pamwing ni antu akwau.”
Ey utongin anch mulong wak chid cha usey kud muntu kumwifukwil Nzamb pamwing ni antu akwau mu chikumangen?
YOM TWILEJA KAL
Yesu ndiy mutu wa chikumangen. Tukat kusal nich musangar mu kwovijan pamwing nau amakurump asadina mwinshin mwa umutakel wa Yesu, mulong akat kutukasikesh ni akat kutufundish kusutil chilakej chau.
Ov, uvurikin?
Nany udia mutu wa chikumangen?
Mutapu ik ukatau amakurump kukwash chikumangen?
Chisend ik chikwetay kashalapol wa Yehova mwawonsu?
JINGUNIN KAND
Tal uman umekeshina anch Chisak Chitakedila ni amakurump akwau akat kuyibangin nakash in Kristu nlel.
Kuyikasikesh Akadivar Adia mu Jingand Mukangeshinau Mudimu Wetu (4:22)
Jingunin mudimu ukatau kusal atulam a minyingumuku.
Tal chisend chikwetau amband mu chikumangen.
“Ov, Kwa Atuman a Yehova Kuding Amband Akata Kulejan?” (Chinong cha Kalam cha 1 Ngond wa 9, 2012)
Jingunin mutapu ukatau amakurump kusal mudimu nakash mulong wa kuyikasikesh ambay nau in Kristu.