DILEJAN DIA 28
Mujikitisha Yehova ni Yesu Mulong wa Yom Yakusadinau
Mutapu ik ukata kwiyov anch murund ney wakwinkish chipan chiwamp? Ukat kusangar nakash ni kusal usu wa kumekesh anch uchikwatin nich usey. Yehova ni Yesu atwinkisha chipan chipandikena kujimb chisutinamu yipan yawonsu yatwinkishinawap kal. Chipan chinech chipan ik, ni mutapu ik tukutwisha kumekesh anch tujikitishin mulong wa chipan chinech?
1. Mutapu umwing wa kumekesh kujikitish mulong wa yom yatusadinau kud Nzamb ni Kristu
Bibil ukanin anch “muntu mwawonsu ukumwitiyija [Yesu]” ukutwish kushakam chikupu. (Yohan 3:16) Chirumburikin ik kumekesh ritiy? Kumekesh ritiy kudiap kusu kwau kulond anch tumwitiyijin Yesu. Tufanyidin kand kumekesh ritiy mu mipak yetu tukata kukwat ni mu yom tusadina. (Jakobu 2:17) Anch twamekesh ritiy kusutin yom tusadina ni tulondina, tukat kukasikesh urund wetu ni Yesu ni Tatukwetu, Yehova.—Tang Yohan 14:21.
2. Chinship ik cha pakampwil chitukwashining kumekesh kujikitish mulong wa yom yatusadinau kud Yehova ni Yesu?
Urel wa nsudien kurutu kwa rufu rend, Yesu wayileja in kwilejend mutapu ukwau wa kumekesh kujikitish mulong wa chakupesh chend. Wasala musambu umwing wa pakampwil utazukinau mu Bibil anch ‘Yakudia ya Urel ya Nsalejetu,’ ap kand anch Chivurikish cha rufu ra Kristu. (1 Korint 11:20) Yesu wasala musambu winou mulong wa kuyikwash atwimbuy end nau in Kristu akin awonsu akeza kez kwijik anch ndiy wapana mwom wend mulong wetwetu. Yesu amwinend walonda piur pa chinship chinech anch: “Dandamenany kusal mwamu mulong wa kwinvurik am.” (Luka 22:19, NWT) Chawiy, anch waya ku Chivurikish, umekeshin anch ujikitishin mulong wa rukat ripandikena kujimb ratumekeshinau kud Yehova ni Yesu.
ILEJA CHIKURIKINA
Shinshikin kand yom yikwau ukutwisha kusal mulong wa kumekesh anch ujikitishin mulong wa rukat ripandikena kujimb rakumekeshinau kud Yehova ni Yesu. Tal kand usey wa Chivurikish cha rufu ra Kristu.
3. Yom ik tufanyidina kusal mulong wa kumekesh kujikitish?
Tong bil mud anch wajiyang mu mem, chad muntu kanang wez wakupandish. Ov, ukez kavuramen yom yakusadidinay muntu winou? Anch ukukimb mitapu ya kumekesh anch umujikitishin mulong wa yom yakusadidinay?
Tukwet mutapu wa kutambul mwom wa chikupu mulong wa uwamp wa Yehova. Tang 1 Yohan 4:8-10, kupwa isambinany yipul ey:
Mulong wak chakupesh cha Yesu chid chipan chimwing cha pakampwil nakash?
Mutapu ik wiyovila piur pa yom yakusadinau kud Yehova ni Yesu?
Mutapu ik tukutwisha kumekesh anch tujikitishin nakash mulong wa yom yatusadinau kud Yehova ni Yesu? Tang 2 Korint 5:15 ni 1 Yohan 4:11; 5:3. Kupwa kwa kutang mukand ni mukand, isambinany chipul ech:
Kukwatijan ni mukand winou, yom ik tukutwisha kusal mulong wa kumekesh kujikitish kwetu?
4. Mwimburija Yesu
Mutapu ukwau wa kumekesh kujikitish ud kumwimburij Yesu. Tang 1 Pita 2:21, kupwa isambinany chipul ech:
Mu mitapu ik ukutwisha kulondul mwi nzau ja Yesu nich kushinshaman?
Yesu wading ukatin Dizu dia Nzamb, walejanang rusangu ruwamp, ni wayikwashang antu akwau
5. Kumangan ku Chivurikish cha rufu ra Yesu
Mulong wa kuman yom yasadika chisu chasalau kapamp kakusambish Yakudia ya Urel ya Nsalejetu, tang Luka 22:14, 19, 20. Kupwa isambinany yipul ey:
Yom ik yasadika ku Yakudia ya Urel ya Nsalejetu?
Mukat ni nviny yimekeshining ik?—Tal verse wa 19 ni 20.
Yesu wading ukatin anch in kwilejend asambish kusal musambu wa Yakudia ya Urel ya Nsalejetu kapamp kamwing pa muvu mulong wa kuvurik rufu rend. Chawiy, Atuman a Yehova akat kukumanganang kapamp kamwing pa muvu mulong wa kuvurik rufu ra Yesu mud mwalejanay amwinend. Mulong wa kwijik yom yivud piur pa chikumangan chinech cha usey, talany VIDEO. Kupwa isambinany chipul ech:
Yom ik yisadikining ku Chivurikish?
Mukat ni nviny yid yijingidij. Mukat ufanakeshin mujimbu uwanyidina wa Yesu wapanay mulong wetwetu. Nviny ufanakeshin mash mend
ANCH MUNTU WAKWEL ANCH: “Chidiaku mwitiyija kwey Yesu, ukupand.”
Mutapu ik ukutwisha kusadin Yohan 3:16 ni Jakobu 2:17 mulong wa kumulej anch kud yom yikwau ya kusal?
YOM TWILEJA KAL
Tukat kumekesh kujikitish mulong wa yom yatusadinay Yesu kusutin kutek ritiy mudiay ndiy ni kusutin kukumangan ku Chivurikish cha rufu rend.
Ov, uvurikin?
Chirumburikin ik kumwitiyij Yesu?
Ey utongin kusal ik mulong wa kumekesh kujikitish kwey mulong wa yom yakusadinau kud Yehova ni Yesu?
Mulong wak chid cha usey nakash kukumangan ku Chivurikish cha rufu ra Kristu?
JINGUNIN KAND
Rufu ra Kristu ritubachikin kusal ik?
Jingunin yom yivud piur pa ritiy ni mutapu wa kurimekesh
“Mekesh Ritiy mu Kushilamu Kwa Yehova” (Chinong cha Kalam cha Ngond wa 10, 2016)
Tal mu rusangu rilondina anch “Niyovil Anch Nishitwil ni Nikatin Mwom” mutapu kwilej piur pa chakupesh cha Kristu kwikala ni chibachikin pa mwom wa mband umwing.
“Bibil Ukarumwin Mwom ya Antu” (Chinong cha Kalam cha 1 Ngond wa 8, 2011)
Jingunin mulong wak antu akemp kusu awiy akat kudia mukat ni kuna nviny ku Chivurikish.