Mareferans ma Mudimu ni Mashakamin ma In Kristu Mukand wa Chikumangan
© 2022 Christian Congregation of Jehovah’s Witnesses
RUBING RA 2-8 NGOND WA 1
YOM YA USEY YIDIA MU DIZU DIA NZAMB | 2 ANT 22-23
“Mulong wak Tufanyidin Kwikepish?”
Yosias Wading Ukatin Yijil ya Nzamb
1Mu tempel winou, mwin kupesh mujim Hilikija watanamu muvungur wa Yijil ya Yehova—pamwing ap muvungur winou aufunda kudi Moses. Shafan sekreter wa mwant wamutwadina Yosias muvungur winou ni wamutanginaYijil nich dizu dia piur. Pateshay Yosias yijil yiney, wajingunina anch antu adinga amubwambwidin kal Yehova mu mivu yivud. Mwant Yosias wamuleja Hilikija anch: ‘Yehova ujimen nakash mulong wetwetu. Yang wambamba nend.Yehova ukutulej yom tufanyidina kusal.’ Yehova wayakula kusutil muprofet mband Hulida palonday anch: ‘Antu a mu Yuda anlikin kal. Nikuyipup pakwez nikumupupap mwant Yosias mulong ud mwin kwikepish.’
w09 1/6 paj 15 par. 20
Atakamena Mulong wa Chikumbu cha Yehova!
Pasalau mudimu wa kutunguril watenchikay Mwant Yosias, Hilikija Mwin Kupesh wa pa Mutu “wamanamu Mukand wa Yijil ya [Yehova, NW] yamwinkishau Moses.” (Tang 2 Jinsangu 34:14-18.) Kwasadika chom ik? Kapamp kamwing, mwant wapula yidjal yend mulong wova kuswan ni wapana mbil kud amakundj amwing aya akamwipula Yehova. Kusutil kudiay muprofet mband Hulida, Nzamb waleta uruu umwing wadinga ufishina nich yisal yimwing ya chirelijon yadinga yisadikina mu Yuda. Chikwau, usu uwamp wa Yosias wa kusot kudiosh yisal ya kwifukwil akish wamekana, ni Yehova wamwitiyija chikalap nchik mar mabwakau makushikena pa muchid wawonsu. (2 Jsng. 34:19-28) Chom ik tukutwisha kwilejinaku? Chakin, rusot retu rid kamu mud radingay nich Yosias. Tusotil kuziyil ku umutakel wa Yehova pakad manshindangen, kuta muchim pa chilakej cha dibabesh dia yom yashikenaku anch twalik kupumbuk ni kuburen ritiy kwandama mu difukwil dietu. Ni tukutwish twikal nich ruchingej anch Yehova ukez kwitiyij kutakaman kwetu mulong wa difukwil diakin, mud mwasalay nenday Yosias.
Mapit ma mu Spiritu
w01-F 15/4 p. 26 par. 3-4
Ukutwish Kwikal ni Musangar mu Mwom Chikalap Nchik Mutapu Wakulilau
Chikalap nchik yom yiyimp yamushikena ku wanikanch wend, Yosias wasala yom yiwamp ku mes ma Yehova. Want wend watwisha kwawiy kulondinay Bibil anch: “Kikwadingap mwant mukwau mudi ndiy, watala kudi [Yehova] nich muchim wend wawonsu, nich mupim wend wawonsu, nich usu wend wawonsu, mudi mudia yijil yawonsu ya Moses. Ap kwinyim kwend kwikil kand mwant wasala mudi ndiy.”—2 Ant 23:19-25.
Chilakej cha Yosias chikutwish kuyikasikesh nakash antu ading ni mashakamin makash ku wanikanch wau! Yom ik tukutwisha kwilejin ku chilakej chend? Yom ik yamukwasha Yosias kutond njil yiwamp ni kudandamen kwendilamu?
RUBING RA 9-15 NGOND WA 1
YOM YA USEY YIDIA MU DIZU DIA NZAMB | 2 ANT 24-25
“Kangal Wavuramen Chisu ik Tudia”
w01-F 15/2 p. 12 par. 2
Dichuku dia Dirumburish dia Yehova did Piswimp!
2 Chakin kamu uprofet wa Sofoniy wamukasikesha kand nakash nsand Yosias kuman usey wa kushesh difukwil dia makasu mu Yuda. Pakwez ap anch mwant wajiyisha relijon wa makasu mwi ngand, kapwishap uyimp wawonsu wa antu ap kuchakwish yitil ya ngakend, Mwant Manase, ‘wizwisha Yerusalem nich mash mamwangay ma antu akad mulong.’ (2 Ant 24:3, 4; 2 Jinsangu 34:3) Chawiy dichuku dia dirumburish dia Yehova diading difanyidin kamu ching kwez.
w07 1/4 paj 11 par. 10
Manans Majim ma Buku wa Yeremiy
Wadinga muvu wa 607 K.C.C. Sedikias wadinga mu muvu wend wa 11 wa winyikel wend. Mwant Nebukadinesar wa in Babilon wata may Yerusalem angond 18. Pa dichuku dia sambwad dia ngond wa katan mu muvu wa 19 wa winyikel wa Nebukadinesar, Nebuzaradan, kalal wa amasalay in kumulam mwant, ‘weza,’ ap anch washika ku Yerusalem. (2 Ant 25:8, NW) Pamwing ap wadinga udiokil ku chibeng chend chadinga pol pa jimbumbu, Nebuzaradan washinshikina mwikadil ni watenchika mutapu ukusadika yom. Kwinyim kwa machuku masatu, pa dichuku dia dikum dia ngond, ndiy ‘wandamamu,’ ap anch wandama mu Yerusalem. Ni wosha musumb kasu—Jeremiy 52:12, 13.
Mapit ma mu Spiritu
w05 1/10 paj 22 par. 2
Manans Majim ma Buku wa Kaad wa Ant
24:3, 4. Mulong wa mash michilay Manase, Yehova “kasotap kulikishin” Yuda. Nzamb ulimishining mash ma antu akad mulong. Tukutwish kuchingejin anch Yehova ukez kufundakesh mash ma antu akad mulong pakuyisheshay antu amwanga mash minam.—Kuseng 37:9-11; 145:20.
RUBING RA 16-22 NGOND WA 1
YOM YA USEY YIDIA MU DIZU DIA NZAMB | 1 JINSANGU 1-3
“Bibil ud Buku wa Uyakin, Kadiap yom ya Kutongin”
w09-F 1/9 p. 14 par. 2
Adam ni Ev—Ov, ad Antu Akin Adingaku?
Twisambinany chilakej malist ma angank au in Yuda isambidinau mu buku wa Jinsangu wakusambish shapitre wa 1 kushik ku 9 ni mu Luka shapitre wa 3. Malist minam ma nsangu ja majuku marumburilau kachom pa kachom misambidin antu a yirung 48 ni 75. Luka wisambidin rusangu ra majuku matwadina ku Yesu Kristu, Jinsangu wisambidin majuku ma ku chikit cha want ni in kupesh a muchid wa Isarel. Pa malist minam mawonsu pad kand majin ma antu ijikena nakash mud Salomon, David, Jakob, Isak, Aburaham, Nowa, ni kupwa Adam. Majin mawonsu madia pa malist maad minam mamekeshin antu akin adingaku, ni pa list ni list Adam ndiy muntu wakin ulejenau wikalaku wakusambish.
w08 1/7 paj 3 par. 4
Rusangu ra Nowa ni ra Mabeb Rakin, Kiridiap Rungany
Jinsangu jaad ja majuku jidia mu Bibil jilejen anch Nowa wadinga muntu wakinakin. (1 Jinsangu 1:4; Luka 3:36) Ezra ni Luka, awonsu aad afunda jinsangu ja majuku minam, asanda yom nawamp-nawamp. Luka walejana dijuku dia Kristu djat ku dia Nowa.
w09-F 1/9 p. 14 par. 7
Adam ni Ev—Ov, ad Antu Akin Adingaku?
Chilakej, tushinshikinany mafundish mamwing makwatiningau nich usey nakash kud antu avud ayiling mu maegliz—difut. Kukwatijan ni mafundish minam, Yesu Kristu wapana mwom wend uwanyidina wa chiwuntu kwikal difut mulong wa kuyikwol antu ku yitil yau. (Mateu 20:28; Yohan 3:16) Twij anch difut ud usey wilikena nich chom chashadikang ap chatambulangau, ni usey winou akat kuufut mulong wa kukwol ap kuchirish chom chinech. Kwawiy Bibil kumutazukinay Yesu anch ‘difut dilikena.’ (1 Timote 2:6) Pakwez tukutwish kwiyipul anch dilikena nich ik? Bibil wakwil anch: “Mudi mukat kufau antu awonsu mulong adiokala kudi Adam, chawiy kand chimwing, . . . awonsu akez kavumbuk kwikal kand aom mulong wa Kristu.” (1 Korint 15:22) Mwom uwanyidina wapanay Yesu mulong wa kuyikwol antu aziyidina wiliken nich mwom uwanyidina washadishay Adam mulong wa chitil chakusambish chasadika mu Eden. (Rom 5:12) Chovaken nawamp, anch Adam kadingapaku kwakulond anch chakupesh cha Difut dia Kristu chovakenap.
Mapit ma mu Spiritu
it-1-F p. 977 par. 2-3
Kushimunin Divar
Majin ma amband. Amband ayijimbwil pa chipatu mu jinsangu ja majuku mamwing anch kud diyingishin dia usey dia kusal mwamu. Sarai (Sara) amujimbwil mu Disambishil 11:29, 30, chakin kamu mulong mwan wamukanau Aburaham wafanyina kumuval ni ndiy, kadiap ni mband mukwau. Milika niyend amujimbwil mu mukand wawiy umwing pamwing ap mulong ndiy wading ngakend a Rebeka, mband a Isak; mulong wa kumekesh anch dijuku dia Rebeka avariken ni Aburaham, mulong Isak kafanyinap kwat mband wa michid yindj. (Dis 22:20-23; 24:2-4) Mu Disambishil 25:1, amujimbwilamu Ketura, mband watay Aburaham mu kusut kwa chisu. Chinech chimekeshin anch Aburaham watana kand kupwa kwa rufu ra Sara ni anch wading uchikwet kal usu wa kuvadishan mivu 40 ni kusut kupwa kwa kumwinkishirilau kand mu chilay kud Yehova. (Ro 4:19; Dis 24:67; 25:20) Kupwa, yom yiney yimekeshin kand divar diading pakach pa in Isarel nau in Madian ni michid yikwau ya in Arab.
Leya, Rechel, ni ambad akwau a Jakob, pamwing ni anau avalau, ayijimbwil niyau. (Dis 35:21-26) Chinech chitukwashin kutesh mutapu Yehova wayisadinay an inay mu kusut kwa chisu. Kud kand amband akwau ajimbwilau mu jinsangu ja majuku mulong wa mayingishin ma mutapu winou. Ajimbulang majin mau anch kud uswan upaninau kusutil awiy. (Kuch 26:33) Chakin, Tamar, Rahab, ni Rut awiy idioshinamu. Muntu ni muntu pakach pau, kud chom cha pakampwil chasadika chasala anch amband inay iwej ku mulong wa angakiril a Mesia, Yesu Kristu. (Dis 38; Rut 1:3-5; 4:13-15; Mt 1:1-5) Kud kand amband akwau ajimbwilau mu jinsangu ja majuku, chilakej mu 1 Jinsangu 2:35, 48, 49; 3:1-3, 5.
RUBING RA 23-29 NGOND WA 1
YOM YA USEY YIDIA MU DIZU DIA NZAMB | 1 JINSANGU 4-6
“Malembil Mam Mamekeshin ik Piur Pam?”
w10-F 1/10 p. 23 par. 3-7
Mwin ‘Kutesh Malembil Metu’
Jabes wading ikundj mwin kulembil. Wasambisha malembil mend kusutil kwit chiyukish cha Nzamb. Kupwa wita yom yisatu yimekeshina ritiy rikash.
Chakusambish, Jabes wamwilembina Nzamb anch: ‘Njimbishila ngand yam.’ (Verse wa 10) Ikundj winou wading ulimishinau kadingap mwin ris wading usotila kuyitambul akwau ngand jau. Chakin kamu, malembil mend ma win kashinsh mading matadin antu, kadiap ngand. Chimeken anch wita anch ngand yend yijimba mu chisambu chakwel mwikala antu avud amwifukwidina Nzamb wakin.
Cha kaad, Jabes wamwilembina Nzamb chakwel “chikas” cha Nzamb chikal nend. Chikas cha chifanakesh cha Nzamb ud usu ukatay kusal nich yom, usu ukatay kusadin mulong wa kuyikwash atushalapol end. (1 Jinsangu 29:12) Mulong wa kutambul maswir ma muchim wend, Jabes wamuchingejina Nzamb ukweta usu wa kuyikwash antu akata kumekesh ritiy mudiay ndiy.—Isay 59:1.
Cha kasatu, Jabes walembila anch: ‘Nlama ku mar chakwel kangal mansal nayimp.’ Mazu “chakwel kangal mansal nayimp” makutwish kumekesh anch Jabes walembila, kadiap mulong wa kwiyep mar, pakwez mulong amuchidij chakwel kangal mar mamupandaken.
Malembil ma Jabes mamekeshin anch wading wiyakamishin piur pa difukwil diakin, mamekeshin kand ritiy ni ruchingej rend mudiay ndiy Ukata Kutesh malembil. Mutapu ik wakulay Yehova? Rusangu riner riswimp ripwil nich mazu: “Nzamb wamwitiya yipulay.”
Mapit ma mu Spiritu
w05 1/11 paj 9 par. 7
Manans Majim ma Buku wa Kusambish wa Jinsangu
5:10, 18-22. Mu machuku ma Mwant Saul, tubil twa kwingangel kwa Yordan twarisha njit nau in Hagar ni ayiwina in Hagar ap anch adinga avud tupamp 2 ap 1 kuyipandakanamu. Chadinga mwamu mulong amakundj ayifuvu a tubil twinetu amuchingejina Yehova ni akimba ukwash wend. El tutekany ruchingej retu rawonsu mudiay Yehova pitudandamedina kurish njit ja muspiritu pantaliken nau akankuny avud kutupandakanamu.—Efes 6:10-17.
RUBING RA 30 NGOND WA 1–5 NGOND WA 2
YOM YA USEY YIDIA MU DIZU DIA NZAMB | 1 JINSANGU 7-9
“Yehova Ukutwish Kukukwash Kuwanyish Yisend Yikash”
w05 1/11 paj 9 par. 8
Manans Majim ma Buku wa Kusambish wa Jinsangu
9:26, 27. In Levi alamanga yis adinga nich chisend chijim nakash. Ayinkisha nfungul ya chis cha kwandam mwi ndond jitumbila ja tempel. Ayichingejina kusal nawamp mudimu wa kwanzuril yis dichuku ni dichuku. Antwinkisha kal chisend cha kuyendil antu adia mu teritwar wetu ni kuyikwash eza kumwifukwil Yehova. Ov, kitufanyidinap kwimekesh kwikal kamu antu akuchingejin ni in uyakin mud mwadingau in Levi alamanga yis?
w11-F 15/9 p. 32 par. 7
Ov, Ukumwimburij Fines Chisu Urishina ni Yakamish?
Fines wading ni chisend chijim nakash mu Isarel wa pasak; pakwez kutakaman kwend, manangu mend, ni ruchingej rend mudiay Nzamb, yamukwasha kupandakan yakamish. Mulong Fines wipana nakash mulong wa chikumangen, mud chibudikin witapila dilau dia Yehova. Kupwa kwa mivu piswimp 1 000, Esidera amupepila kufund anch: “Fines mwan ikundj wa Eleyazar, ndiy wayiyikela pasak, chad [Yehova] wading nend.” (1 Jsng. 9:20) El chikala kand mwamu kud awonsu akweta yisend mu chikumangen cha win Kristu, ni kud in Kristu awonsu amusadidina nich kushinshaman.
Mapit ma mu Spiritu
w10 1/12 paj 29 par. 6
Muwangilany Yehovah!
6 Mwaning, kusutil aprofet end, Yehova wayileja in kumwifukwil end chakwel amushimana nich muminy. In kuwang, kusambish pa muchid wa in kupesh, kasalangap yom yikwau yayitau in Levi chakwel ikala ni chisu cha kufund ni cha kuwangol.—1 Jsng. 9:33.
RUBING RA 6-12 NGOND WA 2
YOM YA USEY YIDIA MU DIZU DIA NZAMB | 1 JINSANGU 10-12
“Kasikesh Impu Yey ya Kusal Rusot ra Nzamb”
w12 1/11 paj 11 par. 12-13
“Nleja Mwakusadil Rusot Rey”
12 Rukat ra David mulong wa yany yidiokila mu Chijil ni maswir mend ma kushakam kwambatan nich rid kand rifanyidina kwimburij. Shinshikin chom chasadika pa chisu chamekeshay David maswir ma “mem ma kuna mu dijiy dia ku chis cha Betlehem.” Chawiy lel ayilabu asatu a David andama ku usu mu musumb—wadinga mu makas ma in Filistin—ni avita mem amuletinam. Pakwez, “ndiy kanap mem bwat, wamamwangila kurutu kwa [Yehova].” Ov, mulong wak? David urumburil anch: “Chakapuk chaya mwa kudi am kurutu kwa [Yehova] kinikunap mem minam. Ov, nikutwish nchik kuna mash ma mom ma antu inay ipanyina kushadish mom yau mulong wa kwinletil mem minam? Wawiy mulong walikinay kuna mem.”—1 Jsng. 11:15-19.
13 David wading wij kusutil Chijil anch mash afanyidin kumamwangil kurutu kwa Yehova ni kafanyidinap kumadia. Watesha kand mulong wak chifanyidin kusal mwamu. David wading wij anch “mwom wa mujimbu ushiching mu mash.” Pakwez, minam madinga mem, kimadingap mash. Ov mulong wak David walika kuna mem minam? Wasangera yany yidia kwinyim kwa mbil yiney. Kudiay David, mem mading nich usey mud mash ma amakundj inay asatu. Chikwau, chadingap chifanyidina kud ndiy kuna mem. Pa ndond pa kumana, walonda anch ukutwish kumamwangil pansh.—Lev. 17:11; Kuv. 12:23, 24.
El Yiyil ni Mbil ja Nzamb Jifumba Kom Key
5 Anch tusotin anch yijil ya Nzamb yitukwasha, tufanyidin kusal yivud kusutamu kwau ching kutang ap kwijik yijil yiney. Tufanyidin kuyikat ni kuyilimish. Bibil utulejin anch: “Kisany yom yiyimp, katany yom yitentamina.” (Amos 5:15) Pakwez mutapu ik tukutwisha kusal mwamu? Tufanyidin kwilej kuman yom mud muyimeningay Yehova. Tong bil piur chom ech. Tong anch walalangap nawamp chad dokiter wey wakwinkish mbil anch ufanyidin kudia nawamp, kwiyijidish ni kuswimp yom yikwau mu mashakamin mey. Mu kusadin chiyul chend, waman kamu anch chakukwash kal! Mutapu ik ukumana mbil jikwinkishinau ku dokiter?
6 Chilik chimwing, Sakatang wetu watwinkisha yijil mulong wa kutuchidij ku yibudikin yiyimp ya chitil ni kuwapish mwom wetu. Chilakej, Bibil utufundishin anch tufanyidinap kudimban, kwiy ku shikol, kwiy, kusal masandj, kwikal ni chisum ap kwikal ni chom chin chawonsu chidia mu umwing nau ayilembil. (Tang Jinswir 6:16-19; Kujingunik 21:8) Anch twaman yibudikin yiwamp yidiokila ku kumuziyin Yehova, rukat retu mulong wendendiy ni mulong wa yijil yend rikat kupam.
Mapit ma mu Spiritu
it-1-F p. 492 par. 2-3
Muchim
Kusal nich ‘muchim wawonsu.’ Muchim wakin ufanyidin kwikal wakabuj chakwel lel usal nawamp, pakwez muchim wachifanakesh ukutwish kwaurik. David walembila anch: “Bwalikesh muchim wam wova dijin diey wom,” chinech chimekeshin anch muchim wa muntu ukutwish kwaurik piur pa yovil ni wom yidia mu muchim wend. (Kus 86:11, TMK) Muntu wa mutapu winou ukutwish kwikal ni “michim yaad”—kumwifukwil Nzamb nich kalengidij. (Kus 119:113; Kuj 3:16) Muntu ukutwish kwikal kand ni “michim yaad,” kusutil kupakish kuyisadil ansalej aad, ap kudimban kulond yom yindj pakwez yitonginay yindj. (1Jsng 12:33; Kus 12:3) Yesu wayifisha nich nakash antu akweta rubabek ra mutapu mwamu.—Mt 15:7, 8.
Muntu ukimbina kumusangaresh Nzamb kafanyidinap kwikal ni muchim waurikina ap michim yaad, pakwez ufanyidin kumusadin Nzamb nich muchim wawonsu. (1Jsng 28:9) Mulong wa kutwish kusal mwamu chitin kusal usu nakash mulong muchim ud uyimp nakash ni wengamidining ku uyimp. (Jer 17:9, 10; Dis 8:21) chitin kulembil nich win kashinsh mulong wa kutwish kulam muchim wawonsu (Kus 119:145; Mad 3:41), kwilej Dizu dia Nzamb chisu chawonsu (Esi 7:10; Jnsw 15:28), kwipan nich mushiku mu mudimu wa kulejan rusangu ruwamp (ilakej ni Jer 20:9), ni kuta urund ni antu amusadidina Yehova ni muchim wau wawonsu.—Ilakej ni 2Ant 10:15, 16.
RUBING RA 13-19 NGOND WA 2
YOM YA USEY YIDIA MU DIZU DIA NZAMB | 1 JINSANGU 13-16
“Tukutwish mu Yom Tusadina Anch Twalimish Umutakel”
w06 1/8 paj 25 par. 13
Ikal Mwin Manangu—Mwova Nzamb Wom!
13 Ukwash wa Yehova watambulay mu chisu cha mar wajimbisha wom wa David piur pa Nzamb ni wakasikesha ruchingej rend mwi ndiy. (Kuseng 31:22-24) Pakwez, tupamp tusatu twakabuj, wom wa David piur pa Nzamb wapwa, chom chamuletina yikokujol yivud nakash. Cha kusambish chimedin pa kurijek kwarijekay chakwel asendisha mushet wa manswik ma Yehova pa ditemb ni kuutwal ku Yerusalem pa ndond pa kuusendish pa makij ma in Levi, mud mwadinga Chijil cha Nzamb. Uza, wadinga ni kutakel ditemb, wafa kapamp kamwing papukunay ku Mushet chakwel kuushichik nawamp, mulong wa “chisal chinech chiburedina kalimish.” Mwaning, Uza warumbuka kamu nakash, ap anch David ndiy wamusarumwina rufu, pakanganyay kulimish Chijil cha Nzamb. Kumwov Nzamb wom kurumburikin kusal yom kulondwish nich yisotinay.—2 Samwel 6:2-9; Kuchind Michid 4:15; 7:9.
w03-F 1/5 p. 11 par. 13
Ov, Ukat Kwiyipulang Anch ‘Yehova ud Kwisu?’
13 Disudiel, in Levi asenda Mushet kuudiosh ku chikumbu cha Obed Edom kuutwal ku Yerusalem; dichuku dinidia awanga mwas wawangay David. Mu mwas winou mwading chivurish ech cha usu: “Musotany [Yehova] ni usu wend, sotany mpal yend chikupu! Vurikany midimu yend yikwamushena yasalay, ni yom ya kushimok, ni dirumburish dialonday.”—1 Jinsangu 16:11, 12.
Mapit ma mu Spiritu
w14 1/1 paj 10 par. 14
Mwifukwila Yehova, Mwant wa Chikupu
14 David waleta mushet utumbila wa manswik ku Yerusalem. Pa chisu chinech cha musangar, in Levi awanga muminy wa kushiman wadinga ni mazu ma usey mafundau mu 1 Jinsangu 16:31: “Alonda ku michid yawonsu anch: ‘Yehova wikadil kal Mwant!’” Muntu ukutwish kwiyipul anch, ‘Mulong Yehova ud Mwant wa chikupu, mutapu ik wikalay Mwant pa chirung chinicha?’ Yehova wikala Mwant pamekeshay umutakel wend ni patekay chisu chimwing muntu pa want mulong wa kupwish milong kanang. Mwikadil winou wa want wa Yehova wading wa usey nakash. Kurutu kwa David kufa, Yehova wamukana anch want wend ukez kadandamen chikupu anch: “Am nikez kumwimik mwaney ikundj ukeza kadiokal mwivumu mwey. Nikez kalangwish want wend.” (2 Sam. 7:12, 13) Mu kuwanyin kwansudiel kwa mazu minam, ‘mwan ikundj’ winou wa David wamekana kupwa kwa mivu 1 000 ni kusut. Muntu winou wading nany, ni chisu ik chikalay Mwant?
RUBING RA 20-26 NGOND WA 2
YOM YA USEY YIDIA MU DIZU DIA NZAMB | 1 JINSANGU 17-19
“Lam Musangar Wey ap Anch Ukwetap Mutapu wa Kwikal ni chisend Kanang”
w06 1/8 paj 13 par. 1
Tutonginany pa Uwamp wa Dirijek Dia Yehova
DAVID ud umwing wa antu a pakur isambidinau nakash mu Mifund ya Hebereu. Kafung winou, wadinga kand mwin kuwang, muprofet, ni mwant wamuchingejina nakash Yehova Nzamb. Urund wa piswimp nakash wadingay nich David ni Yehova wamulangwishina maku ma kumutungin Nzamb chikumbu. Chikumbu chinech, ap anch dizang, chafanyina kwikal ndond ya kusambish ya difukwil diakin mu Isarel. David wading wij anch yitenchik yikwatijadina nich dizang ni midimu yadinga ni kusadikamu yikez kuyiletin antu a Nzamb musangar ni yiyukish. Chawiy David wawanga anch: “Wayuk muntu utondila Ey [Yehova], ni ukokojila Ey, chakwel ukashakam mu dibur dia chikumbu chey. Tukikut ni kuyuk kwa mu chikumbu chey, mu dizang diey ditumbila.”—Kuseng 65:4.
Sanger Yisend Ukweta Katat
11 Chilik chimwing, tukutwish kwikal ni musangar nakash anch twipan nakash mu chisend chawonsu chitwinkishinau mu mudimu wa Yehova. “[Ipana] chisu chawonsu” mu mudimu wa kulejan, ni kusal nakash midimu yikwau ya chikumangen. (Mid. 18:5; Heb. 10:24, 25) Rijek nawamp yikumangan mulong wa kwakul mu mutapu ukasikeshina. Kwat nich usey nakash chikunku chawonsu chikukwinkishau ku shikol ya chikumangan cha mukach mwa rubing. Anch akwit kukwash mudimu kanang mu chikumangen, itiy ni shik kurutu kwa chisu. Kangal watong anch mudimu wakwinkishangau ud wa usweral ni ukutwishap kusutish chisu chey mulong wa mudimu winou. Sal usu wa kuwapish ukaliweny wey. (Jnsw. 22:29) Anch wipan nakash mu midimu ni yisend ya mu spiritu ukweta, ukuwapish urund wey ni Yehova, ni ukwikal ni musangar nakash. (Gal. 6:4) Chikukuswapel kand kusangar pamwing nau antu akwau anch ayinkish yisend ukatina niyey kwikal nich.—Rom 12:15; Gal. 5:26.
Mapit ma mu Spiritu
w20.02 paj 12, mushet
Tumukatin Nakash Tatukwetu, Yehova
Ov, Yehova Wingij Kamu?
Ov, wiyipwilap kal anch: ‘Mulong wak Yehova ukat kwinshinshikin am pakach pa mamiliyar ma antu inay awonsu ashicha pa divu?’ Anch mwawiy, udiap amwiney. Mwant David wafunda anch: “[A Yehova], ing muntu niyend wachad nany lel chakwel ey umutonga? Ov, mwan a muntu wachad nany lel ing umubangaku?” (Kus. 144:3) David wading ukwet kashinsh anch Yehova wading umwij nawamp. (1 Jsng. 17:16-18) Ni kusutil Dizu diend ni dirijek diend, Yehova ukwinkishin kashinsh anch wij rukat riumumekeshidina. Shinshikin mazu mamwing madia mu Dizu dia Nzamb makutwisha kukukwash chakwel wikal nich kashinsh ka uyakin winou:
• Yehova wading ukwij, ap kurutu uvadik.—Kus. 139:16.
• Yehova wij yom yidia mu muchim wey, ni wij yitongijok ni yovil yey.—1 Jsng. 28:9.
• Yehova ukat kuteshang pakampwil malembil mey mawonsu.—Kus. 65:2.
• Yisal yey yikweting yibudikin pa yovil ya Yehova.—Jnsw. 27:11.
• Yehova wakupwitina pakampwil kud ndiy.—Yoh. 6:44.
• Anch wafa, Yehova ukwij nawamp, chawiy ukutwish kukuvumbul. Ukukwinkish mujimbu usu ni manangu mud muwading, ni tuyom tukwau kand tukemp tukemp twa untu wey wa pakampwil.—Yoh. 11:21-26, 39-44; Mid. 24:15.
RUBING RA 27 NGOND WA 2–5 NGOND WA 3
YOM YA USEY YIDIA MU DIZU DIA NZAMB | 1 JINSANGU 20-22
“Yikwasha Ansand Kuya Kurutu”
w17.01 paj 28 par. 8
“Yom Yiney Yilejana Kudi Amakundj Ashinshamena”
8 Tang 1 Jinsangu 22:5. David wafanyina kwiyov anch Salomon kadingap kawanyidina kutakel mudimu mud winou wa usey. Tempel wading ufanyidin kwikal wa “ufun nakash,” ni Salomon wading ‘mwan mukemp, ni kand kal ikala nich manangu.’ Pakwez David wading wij anch Yehova ukumukwash Salomon chakwel asal mudimu winou wa pakampwil. Chawiy David wasala yawonsu yafanyinay kusal mulong wa kumukwash kurijek yom mulong wa mudimu winou ujim.
w17.01 paj 27 par. 7
“Yom Yiney Yilejana Kudi Amakundj Ashinshamena”
7 David wakimba chakin kamu kutung tempel mulong wa Yehova, chawiy, wafanyina kuziy nakash. Pakwez wadandamena kukwash mudimu wafanyinay kutakel mwanend Salomon. David wakwasha kukimb in kusal mudimu ni kukumangej utad wa fer, wa argent, wa or, wa bronze, ni mabay. Kiyakamishap piur pa muntu ukwikala ni ntumb mulong wa kutung tempel, washikena kwijikan mud tempel wa Salomon. Pakwez, wamukasikesha Salomon, palonday anch: “Katat, mwanam, chifanyidin [Yehova] ikala ney, chakwel ukutwish kutung Chikumbu cha [Yehova] Nzamb wey mudi mwalonday kal [mulong weyey].”—1 Jinsangu 22:11, 14-16.
Anvaj, Ov, Ukat Kuyikwashany Anen Kuya Kurutu Mulong Atambul Dibatish?
14 Amakurump akutwish kukwash yom yisadinau anvaj mu kwikal ni chitongijok chiwamp chisu chisambidinau piur pa yom ya kusal mu mudimu wa Yehova. Nambaz umwing uvurikin anch Mukadivar Russell wambamba nend padingay ni mivu musamban. Walonda anch: “Wambamba ni yamam mwa aminit 15 piur pa mipak yam ya mu spiritu.” Yibudikin ik yikalaku? Kupwa, nambaz winou wikala chibol ni wasala mudimu wa uchibol mu mivu 70 ni kusut! Chakin kamu, mazu mawamp ni kukasikeshan yikutwish kwikal ni yibudikin yiwamp mu mwom wa muntu. (Jinswir 25:11) Amakurump akutwish kuyitazuk anvaj ni anau kukwash mudimu kanang ku Chot cha Want. Akutwish kuyilej an kusal yom kukwatijan ni mivu ni ukaliweny wau.
15 Mutapu ik ukutwishau antu akwau mu chikumangen kukwash? Mu kumekesh kamu anch ayibangidin ansand. Chilakej, ukutwish kukimb yom yimekeshina anch ansand amusejidin Yehova piswimp. Ov, mwan wakulang nawamp ku yikumangan ap ukwet chikunku ku yikumangan ya mukach mwa rubing? Wapanin uman ku shikol ap wasadin chom chiwamp chisu chamupakinau kusal chom chiyimp? Anch chid mwamu, sal usu wa kumulej anch wasadin nawamp! Tukutwish kusal usu wa kwitekin mupak wa kwambamb nau ansand kurutu ni kupwa kwa yikumangan. Anch twasal mwamu, an akwiyov niyau anch ad ‘mu chikumangen chijim.’—Kuseng 35:18.
Mapit ma mu Spiritu
w05 1/11 paj 11 par. 5
Manans Majim ma Buku wa Kusambish wa Jinsangu
21:13-15. Yehova wamuleja mwangel kwimik chipupu mulong Ndiy ukat kwov kuswan pa mar ma antu end. Chakin kamu, “ranaken rend ridi rujim nakash.”