Mareferans ma Mudimu ni Mashakamin ma In Kristu Mukand wa Chikumangan
© 2023 Watch Tower Bible and Tract Society of Pennsylvania
RUBING 6-12 NGOND WA 11
YOM YA USEY YIDIA MU DIZU DIA NZAMB | JOB 13-14
“Ov, Anch Muntu Wafa Kal, Ukutwish Kwikal Kand Mwom?”
w99-F 15/10 p. 3 par. 1-3
Kulepish ma Chuku ma Mwom
AP ANCH chitongijok chinech cha kwiswimp kwa mwom a chifunda pasut kal mivu 3 500, nlel kud kusu kwau antu akemp akutwisha kutadikish chitongijok chinech. Kudiosh kamu pakur, antu kakatap kamu kusanger mwom mu chisu chilemp kupwa ananap ni kufa. Chawiy chimekeshina anch mukusut kwa chisu antu asadin kal usu wa kukimb milad yivud yakusadin mulong wa kulepish mwom.
Pa chirung cha Job, In Idjibit adilang mabuj ma annam amakwal mwi nving ni chitongijok cha kudandamen ni usand wau. Pakur, chitongijol cha padishina cha antu ileja siyans ubombakena ni yom ya maji chading cha kulepish mwom. Antu ileja siyans ubombakena ni yom ya maji avud ading atongin anch utad wa or usadinau antu ukutwish kwash chakwel antu ikala ni mwomu wakad kufang, ni antu akutwish kushakam machuku mavud adil pa malong masadinau nich utad winou wa or. Ataoïste a mu shin wa pakur atonga a kutwish kusal, kusutil yom mud kutongijokin, kwiyijidish mulong mulong wa kupim ap kusal rejim, kwaswimpa mujimbu ni kusal mwamu muntu ukutwish kulal machuku mavud.
Mwin kukimbijol mulong wa kujingunin jindond Juan Ponce de León wa mu Espany wijikana mulong wa kukimbijol kwend piur yom yitazukinau anch la fontaine de Jouvence. Mu mivu kanan ni yitot chinan, dokter umwing wafunda buku umwing utazukinau anch Hermippus Redivivus; walejanang anch akumangeja an akemp mu ka chikumbu kakemp pa chirung cha mashik mulong ayipwita madjimb mau chakwel amateka mu kamulond chakwel ashakam machuku mavud. Chimeken patok anch yom yasalay yadingap kwau ya usey.
w15-F 15/4 p. 32 par. 1-2
Ov, Chishij Chikutwish Kand Kusapurik?
KUSUTIL kuufanakesh ni cèdre wa ku Liban, mutond mud wa mpach ukutwish kumekan mud wakad usey nakash. Pakwez mutond mud wa mpach ukwet usu wa kulik kuwa ku rinkind. Atanin kal anch mutond winou ukutwish kulal mivu 1000. Mij yau, yandamina pansh nakash, yikat kuukwash kusapurik ap anch aukatul. Anch mij yiuminap, mutond ukutwish kand kusapurik.
Nshankur Job wading ni kashinsh anch, ap anch wafap nchik akumuvumbul. (Job 14:13-15) Wiyilikeja nich mutond, pamwing ap mutond mud wa mpach, mulong wa kumekesh kashinsh kadingay nich mu usu ukwetay Nzamb wa kumuvumbul. Walonda anch «Mutond ukat kwikal nich ruchingej, anch aukatul, ukutwish kusapurik kand, ukat kubudish kand mitiy yau.» Anch ruval wasambish kupwa kwa chishipu, chishin cha mutond mud wa mpach chikat kwichirish, mij ya mutond winou ukat kubudish kand mitiy yisu».”—Job 14:7-9.
w11 1/4 paj 22 par. 5
“Ukez Kwikalany ni Maswir”
Mazu ma Job matufundishin dilejan dia rukat piur pa Yehova: Muntu mwawonsu umulamatina kamu pakampwil, mudi Job, witekin amwinend mu makas mend, umulondwil chakwel amufumba ni amubangin mudi muntu ukatinay ku mes mend. (Isay 64:8) Yehova uyimening in kwifukwil end ashinshamena mudi chom cha usey upandakena. Ndiy walonda piur pa atushalapol end ashinshamena afa kal anch: adi “in maswir.” Mwin kwilej umwing ulondin anch didi dizu dia in Hebereu diakarumunau “chakin kamu ku mazu makash malejena yovil ya maswir makash.” Mwawiy, chikalap nchik Yehova kakuyivuramenap in kwifukwil end pakwez ndiy kand ukuyichirish ku mwom chikupu.
Mapit ma mu Spiritu
it-1-F p. 412 par. 8
Maut
Maut amasadinang mu chifanakesh mulong wa kumekesh chom chakad usey ,chilakej, Aburaham wimanang kurutu kwa Yehova mud ud ‘rufunfut ni maut.’ (Dis 18:27; tal kand Is 44:20; Job 30:19.) Ni Job niyend wafanakesha yom yalondau in kumwongoj amakasu mud ‘jinswir ja maut.’—Job 13:12.
RUBING RA 13-19 NGOND WA 11
YOM YA USEY YIDIA MU DIZU DIA NZAMB | JOB 15-17
“Elifaz Waburena Mutapu Uwamp wa Kukasikeshan”
Lam Ruchingej Rey ra Win Kristu Rikash
Ruchingej retu rikutwish kutukwash kwipuk kutong anch kwikil chom tukusala chikutwisha kumusangaresh Yehova. Chilakej, antu amwing akutwish kutong anch: ‘Nikutwishap ap pakemp kwikal pakach pa antu akutambula mwom wa chikupu. Nidiap kamu kwam muntu muwamp. Nikutwishap ap pakemp kushakam kukwatijan ni mbil ja Nzamb.’ Vurik anch Elifaz, murund wa makasu weza kumwongoj Job, wasadina niyend yitongijok ya mutapu winou. Elifaz walonda anch: “Ov, muntu udi chom ik ing ikala wa zwang?” Kupwa walonda piur pa Nzamb anch: “Ap atumbila, Nzamb kayichingejinap kwend, ni maur kimishitwilap ku mes kwend.” (Job 15:14, 15) Makasu mayimp mud ik! Vurik anch Satan ndiy ukatina anch utonga mwamu. Wij anch ang wasambish kutong mwamu, ukusambish kushadish ruchingej rey. Chawiy, komb ipuk makasu minam, ni shinshikin pa kushilamu kwa Yehova. Kangal widjidjek anch Yehova ukatin anch wikal ni mwom wa chikupu, ni anch ukukukwash kuwanyish rutong riner.—1 Tim. 2:3, 4.
w15 1/2 paj 11 par. 16
Imburijany Kwikepish ni Ranaken ra Yesu
16 Mazu metu ma ranaken. Rukat tukweta mulong wa antu rikat kutubachik ‘kulond mu mutapu uwamp kudi antu ovila runeng.’ (1 Tes. 5:14) Ov, chom ik tufanyidina kulond mulong wa kuyikasikesh antu inay? Tufanyidin kuyilej yom yikutwisha kumekesh mutapu tuyimena. Tukutwish kuyijikitish kamu chakwel ijika anch akwet mikadil ni ukaliweny uwamp. Tukutwish kuyivurish anch Yehova uyipwitin piswimp ni Mwanend, mwamu akutwish kwijik anch akwet usey. (Yoh. 6:44) Tufanyidin kuyilej anch Yehova udi piswimp ni atushalapolend akweta “michim yinenganena” ap ‘akweta ushon.’ (Kus. 34:18) Mazu metu ma ranaken makat kuletang usu kudi antu akweta kuswir kwa ukwash.—Jinsw. 16:24.
Mapit ma mu Spiritu
w06 1/4 paj 30 par. 11
Manans Majim ma Buku wa Job
Job 7:9, 10; 10:21; 16:22—Ov, mazu minam mamekeshin anch Job kadingap ni kwitiyij divumbuk? Madi mazu mamekeshina yadingay ni kuchingej Yob piur pa machuku mend ma kurutu. Chom ik chafilay kulond? Chitwishikin anch Yob wasota kulond anch ang wafa kwikil muntu ukutwisha kand kumuman. Chitwishikin kand anch ndiy wasota kulond anch kwikil muntu ukutwisha kwibudikin mwi Nzal pakad ukwash wa muntu mukwau. Job 14:13-15 umekeshin patok anch Job wadinga ni ruchingej mu divumbuk dia mu machuku ma kurutu.
RUBING RA 20-26 NGOND WA 11
YOM YA USEY YIDIA MU DIZU DIA NZAMB | JOB 18-19
“Kangal Wayilik Ambay Ney In Kwifukwil”
Yom Tukutwisha Kwilejin ku Kudil kwa Yesu
9 Yongoja antu anenganena. Yesu kimenap kwend kusu pa kudil pamwing ni Mart ni Mariy, pakwez wayitesha kand ni kuyilej mazu makasikeshina. Tukutwish niyetu kuyisadin antu anenganena mutapu winou. Mukadivar Dan, mukurump wa chikumangen ushicha mu Ostrali, ulondin anch: “Kupwa kwa mukajam kufa, nikala ni kuswir kwa rongoj. Kwezang ambay a uruw kushalijan muten ni uchuku mulong wa kwintesh. Kankangeshap kuyirumburil ushon nading nich ni kovap kuyip pinadilang. Ankwasha kand yom yivud mud kowish motak, kuland yakudia, ni kwisuk, chisu novang anch nikutwishap kusal midimu yiney. Ni yisu yivud alembilang nam pamwing. Amekesha kamu anch ad arund ni akadivar akin adia kwaku ‘mulong wa kukwash mu yirung yikash.’”—Jnsw. 17:17.
Anch Muntu Tukatina Wamulik Yehova
16 Dandamen kuyikwash antu a mu dijuku ashinshamena. Akwet kuswir anch uyimekeshin rukat ni kuyikasikesh nakash katat kusutamu pakur. (Heb. 10:24, 25) Yisu yimwing, antu a mu dijuku dia muntu wopatangau akat kuman anch antu amwing mu chikumangen akat kuyiyep mud niyau ayopatin. Tufanyidinap kusal mwamu! Tufanyidin kuyijikitish ni kuyikasikesh nakash ansand akweta anvaj adiokila kal mu uyakin. Maria ukweta ikundj wopatau ni wachina dijuku diend ulondin anch: “Arund nam amwing eza ku chikumbu mulong wa kwinkwash kwisuk yakudia ni kwilej nau anam. Ova ushon nakash ni adila nam pamwing. Anlondinang anch atesh antu akwau akat kwinlond yom yimp. Ankasikesha nakash!”—Rom 12:13, 15.
w90-F 1/9 p. 22 par. 20
Ov, Ukatin Kwikal ni Yisend?
20 Chisak cha amakurump chifanyidin kwijik anch ang muntu widing mukurump ap nkwash wa mudimu amutambul yisend yiney ap anch walikap amwinend chikutwish kamu kumuziyish. Anch kamwopatinap, ni amakurump aman anch mukadivar uziyin, akutwish kuya kumukwash mu spiritu. (1 Tesalonik 5:14) Afanyidin kumukwash ikala ni kashinsh anch chikumangen chimukwet nich maswir. Ap anch amuyula, muntu wikepishina ni mwin kujikitish kafanyidinap kulab labee pakad kumuchirishin yisend mu chikumangen.
Mapit ma mu Spiritu
w94-F 1/10 p. 32
Usu Ukweta Mazu Mawamp
Chikwau kand, chisu chadingay Job ni kuswir kwa kumukasikesh, Elifaz ni arund nend amulonda nayimp. Amufisha nich kulond anch Job ndiy wadinga musul wa mar mend amwinend, ni anch wasala chitil chading chijindjikinay (Job 4:8). Pa mulong winou, mwin kulond milong ya Bibil umwing (The Interpreter’s Bible) walonda anch: “Job wading ukwet kuswir kwa ranaken ra antu. chawiy, yom yateshay yading kwau mud yitongijok ya chirelijon ni yitongijok yidia ‘yakin’ ni yidia yiwamp kamu nakash.” Job wovang nayimp pateshay yom yalondangay Elifaz ni arund nend, wayela anch: “Ov, chisu ik ukulikany kwingakamish ni kwimpuchol nich mazu men?”—Job 19:2.
Chifanyidinap kumumeshikin mbay netu mwin Kristu mar mulong wa kumwel mazu ma chisum ap makad kutongijokin nawamp (tal Kuvurik Yijil 24:15). Nswir jimwing ja Bibil jilondin anch: “Rufu ni mwom yidi ku usu wa ridim, ni akurikata akez kudia mabuj mar.”—Jinswir 18:21.
RUBING RA 27 NGOND WA 11–3 NGOND WA 12
YOM YA USEY YIDIA MU DIZU DIA NZAMB | JOB 20-21
“Kutentam Kwimedinap pa Mapit”
Ov, Udi “Mpich Kudi Nzamb”?
12 Mu mazu ma Yesu, kwikal mpich kudi Nzamb kupwitijadin nich kwisakin mapit kwa muntu ipend, ap kupit kwa muntu ipend yom ya ku mujimbu. Chad, Yesu walonda anch rutong retu ra kusambish mu mwom rifanyidinap kwikal ra kwiruzukin mapit ap kwisangaresh nich yom tukutwisha kwikal nich. Pakwez, tufanyidin kusadil mapit metu mulong wa kukudish ap kukasikesh urund wetu ni Yehova. Kusal mwamu kukez chakin kamu kutwikadish ampich kudi Nzamb. Mulong wak? Mulong ufungwil chis ku yiyukish yivud yidiokila kudi ndiy. Bibil utulejin anch: “Chiyukish cha [Yehova] chawiy chikata kulet dipit, ni Ndiy kakuwejangikup ushon.”—Jinswir 10:22.
Mapit ma mu Spiritu
w95-F 1/1 p. 9 par. 19
Tumupandakanany Satan ni Midimu Yend
19 Nich kashinshin tumen anch Job, kashalapol wa Nzamb, warisha ni “Yitongijok ya yishimushimu” ya Satan kusutil Elifaz ni Sofar. (Job 4:13-18; 20:2, 3) Yawiy yom yamushikija Job kwiyov anch ‘kakwetap usey’, ni kusambish kulond ‘mazu makad kutongijokin’ mulong wa ‘milong’ yading yirishinay nich mu manangu. (Job 6:2-4; 30:15, 16) Eliyu wamutesha kamu Job nawamp ni wamukwasha kwijik mutapu winding umenay Yehova yom kusutil manangu mend mapandakena. Chilik chimwing ni nlel, amakurump akat kuyitesh nawamp antu arishina ni milong akat kumekesh anch ayibangidin mu kulik “kuyitwik” yisend yilimina. Chinyim ni chinech, mud Eliyu, amakurump akat kuyitesh nich kushimpish muchim ni kuyipan many, madiokila mu dizu dia Nzamb. (Job 33:1-3, 7; Jakobu 5:13-15) Mu mutapu winou, mwin Kristu urishina ni yitongijok yikash, yakin ap yidia kwau mud yilat, ap muntu “uzadishinau kud yilat”, mud mutapu chamushikena Job, ukutwish kutan rongoj mu chikumangen kusutil Mifund.—Job 7:14; Jakobu 4:7.
Mapit ma mu Spiritu
w14 1/3 paj 12 par. 2-4
Mutapu ik Ukutwisha Kulam Chitongijok Chiwamp
RUBING RA 4-10 NGOND WA 12
YOM YA USEY YIDIA MU DIZU DIA NZAMB | JOB 22-24
“Ov, Nzamb Ukutwish Kumusadin Muntu?”
w14 1/3 paj 12 par.2-4
Mutapu ik Ukutwisha Kulam Chitongijok Chiwamp
Ap anch tukwet mayingish minam ma kwikal ni musangar, atushalapol ashinshamena a Nzamb adandamedin kurish ni yitongijok yiyimp yikwetau. Akutwish atong anch mudimu wau ukatau kumusadin Yehova ukwetap usey nakash ku mes mend. Mulong wa antu adandamedina kwikal ni yitongijok yiyimp, chitongijok cha ‘kusangar mulong wa yom yawonsu’ chikutwish kumekan mudi chamakasu. Mwom ukutwish kumekan mudi uyipin nakash.
Kudi akadivar ni anambaz amwing, yitongijok yiyimp yikutwish kulet kuziy, mayej, ap yom yimwing yikutwisha kuyijipish swa. (Kus. 71:9; Jinsw. 13:12; Mul. 7:7) Chikwau kand, in Kristu avud afanyidin kurish ni muchim ukata kudimban ni ukutwisha kuyifish nich ap anch Nzamb uyilikishin. (Jer. 17:9; 1 Yoh. 3:20) Djabul ndiy ukata kuyifund atushalapol a Nzamb. Ni antu akweta chitongijok cha Satan akutwish kutuyipish ni chitongijok mudi chapanay Eliphaz waburen ritiy walonda anch—tukwetap usey ku mes kwa Nzamb. Chitongijok chinech chading cha makasu pa chirung cha Job ni lel kand.—Job 4:18, 19.
Yehova ulondin patok mu Bibil anch ukwikal ni antu ‘endina mu ruwengil ra rufu.’ (Kus. 23:4) Mutapu umwing wa kwikal niyetwetu udi kusutil ku Dizu diend. Bibil udi ‘dikand dia Nzamb dia kubumon nich mpwembu jikash,’ mudi kukangany kutesh kurumburik nawamp kwa yom, ni yitongijok yiyimp. (2 Kor. 10:4, 5) Chawiy lel, tushinshikinany amboku piur pa mutapu tukutwisha kusadin Bibil chakwel atukwasha kukudish ni kulam chitongijok chiwamp. Ukutwish kutaninamu mu kusal mwamu, ni kuman mutapu uwamp wa kuyikwash antu akwau.
w95-F 15/2 p. 27 par. 6
Dilejan Piur pa Mutapu wa Kurish ni Yikokujol
Amakundj inay asatu amuziyisha murund nau Job kusutil kulond yitongijok yau pa ndond pa kwisambin yom yidiokila ku manangu ma Nzamb. Elifaz washikena kulond anch ‘Nzamb kayichingejidinap kwend atushalapol end’ ni Yehova kadingap ubangidina mulong wa kwijik anch Job wading muntu utentamina ap bwat. (Job 4:18; 22:2, 3) Ov, ukutwish kuman mutapu walondau yom yiziyishena ni ya makasu mud yiney! Chishimwokishenap kuman anch Yehova wamupupa Elifaz ni ambay nend mu kusut kwa machuku mulong wa kuswing kwinoku, palonday anch: ‘Mulong en kiwalondilanyap [kwen yom yiwamp piur pam.’ (Job 42:7) Pakwez kulond kutapina ku muchim nakash kwafanyina kushiken mu machuku ma kurutu.
Mutapu Ik Ukutwisha Kwikal Murund Nend A Nzamb?
Ukutwish kwilej yom ya usey kusutin ku yamushikena Job. Nlel unou, Satan utufukejidin anch tumusadidin Yehova mulong wa yom yitukutwisha kutambul kudiay ndiy. Mu Job 2:4, Satan walonda anch: “Yom yawonsu yikwetay muntu ukuyipan mulong wa kuchidij mwom wend!” Chawiy Satan ukat kuyifukejin amakundj ni amband awonsu anch akwet choy, kulik ching Job. Yitot ya mivu kupwa kwa Job kufa, Satan wadandamena kumusaal Yehova ni kuyifund atushalapol end. Chilakej, mu Jinswir 27:11, tutangin anch: “Mwanam ikundj, ikal mwin manangu chakwel wez usangarish muchim wam, mwamu ni yam nikez katwish kumwakul muntu ukwinsaala masaal.”
Ukutwish kutond kumuziyil Yehova ni kwikal murund nend ushinshamena, ni kumekesh anch Satan udi mukamakasu. Ap anch ufanyidin kuswimp nakash mu mwom wey mulong wa kwikal murund nend a Nzamb, udi mupak uwamp nakash ukutwisha kukwat! Mupak winou chidi chom cha usey nakash. Satan ulondin anch ey ukushalap ushinshamena kudi Nzamb anch ukwet milong. Ukat kusal usu wa kutudimb chakwel tulika kumushinshamen Nzamb. Mutapu ik?
Mapit ma mu Spiritu
w04-F 15/7 p. 21-22
Mutumbishany Sakatang wen Kusutin Kwitekin Ntong ja Mu spiritu
Tongijokinany mutapu watangay Yehova yom mu mangand ni mulong wa rutong rend piur pa divu. Mazu ‘dichuku dia muten ni mididim anch uchuku’ mamekeshin anch Yehova wateka chintamp cha yisu cha yom yatangay (Disambishil 1:5, 8, 13, 19, 23, 31). Pa chirung chin chawonsu, wadinga ni chitongijok cha yom ya kusal yading yifanyidinay kuwanyish pa chisu chinicha. Mu kusal mwamu, wawanyisha chitongijok chend cha kutang yom (Kujingunik 4:11). Nshankur Job walonda anch ‘[Yehova] ukat kusal chom chawonsu chisotilay kusal.’ (Job 23:13) Chading chimusangareshin Yehova nakash pamanay “yom yawonsu yatangay” ni palonday anch “yading yiwamp kamu”!—Disambishil 1:31.”!—Disambishil 1:31.
Anch tusotin kuwanyish ntong yetu, tufanyidin niyetu kusal usu wa kwikal ni rusot ra kujiwanyish. Chom ik chikutwisha kutukwash kusal mwamu? Padinga divu dichid kwau diamwamu, Yehova wading umen mutapu dikwikala: ndond yiwamp yikumuletina katumb ni kalimish. Chilik chimwing niyetu, tukutwish kukudish maku makuwanyish yom twatenchikina kal anch twatongijokin pa yibudikin ni yom yiwamp yikwikalaku. Yawiy yom yasalay Tony, wadinga ni mivu 19. Kandikal avuramenangap yom yamanay ku Betel dichuku diakusambish dayay kwendin mutiy wa Erop wa kurand wa Atuman a Yehova. Kudiosh kamu dichuku dinida, wiyipula anch: ‘Ov, mashakamin ni mudimu wam yikwikal nchik anch nashakam ndond mud yiney?’ Tony wadandamena kutongijokin pa yom yafanyinay kusal mulong wa kuwanyish mupak wend. Mu kusut kwa mivu Tony Wikala ni musangar nakash pamutazukau ku Betel.
RUBING RA 11-17 NGOND WA 12
YOM YA USEY YIDIA MU DIZU DIA NZAMB | JOB 25-27
“Chitinap Kwau Kwikal Uwanyidina Mulong wa Kumekesh Kujijaman”
Lam Kushinshaman Kwey!
10Mutapu ik wasalay Job ku kurishikish kwinoku kwawonsu? Kadingap muntu uwanyidina. Nich ujim, wayipupa in kumwongoj inay amakasu ni walonda yom yimwing yitiyinay kwinsudien anch yading yiyimp. Wakasikeshina nakash pa kutentam kwend pa ndond pa kukasikeshin pa kutentam kwa Nzamb. (Job 6:3; 13:4, 5; 32:2; 34:5) Chawiy, ap pa chisu chamanay mar nakash, Job kamulikap Yehova. Walika kwitiy makasu ma arunend ayimp asatu. Walonda anch: “Chakapul chaya mwa kinikutwishap kwitiy anch, mazu men madi makin, djat ni ku rufu ram nikudandamen kamu [kulaman kushinshaman kwam].” (Job 27:5) Mazu minam mamekeshin anch Job wading ni mupak wa kulam kushinshaman kwend chikalap nchik yom yikushikena. Job kaziyap; niyetu tufanyidin kumwimburij.
10 Chipul chalangwishay Satan pantaliken ni Job chikutadin mutapu ik? Chakin kamu ndiy walonda anch umukatinap kamu Yehova ni ukutwish kulik kumusadin mulong wa kwipandish amwiney, ni walonda anch kushinshaman kwey kudi kwau kwa makasu! (Job 2:4, 5; Kuj. 12:10) Mutapu ik wiyovila piur pa mazu minam? Makusadil kamu nayimp, ov, kimwawiyap? Chawiy tongijokin pa chom ech: Yehova ukuchingejidin nakash ni ukwinkishin mutapu wa kumekesh chiudia. Yehova ulikidil anch Satan apaka kushinshaman kwey. Yehova ukwet kashinsh anch ukudandamen kulam kushinshaman kwey ni chinech chikumekesh patok anch Satan udi mukamakasu. Ni ushidinamu anch ukukukwash chakwel usala mwamu. (Heb. 13:6) Dilau mud ik dia kwikal uchingejidinau kudi Mukaleng wa mangand mawonsu! Ov, waman kal kamu patok mulong wak kushinshaman kudi kwa usey nakash? Kutukwashin kumekesh patok makasu ma Satan ni kwishitwish dijin diwamp dia Tatukwetu ni kukwash mutapu wend wa kuyikel. Mutapu ik ukutwisha kukudish mwikadil winou wa usey?
Lam Kushinshaman Kwey!
3 Anch twisambin piur petwetu atushalapol a Nzamb, kushinshaman kurumburikin kukat nich muchim wawonsu, ni kwipan ni muchim umwing kudi Yehova, ni kusal anch rusot rend rikala pa ndond ya kusambish mu mipak yetu yawonsu tukwatina. El tushinshikinany yilakej yimwing. Mu Bibil dizu dia Hebereu dikarumwinau anch “kushinshaman” dirumburikin yom yiwanyidina, yakad ulim ap yidia yakabuj. Chilakej, in Isarel apanang milambu ya annam mulong wa kupesh kudi Yehova, ni Chijil chalonda anch annam afanyidin kwikal akad ulim. (Lev. 22:21, 22) Chawiy, atushalapol a Nzamb kafanyinap kulambul nnam wadinga uburedina chizakwal chimwing, ditu ap dis ap nnam wadinga uyedina. Chading cha usey nakash kumulambul Yehova nnam uwanyidina ni wakad ulim. (Mal. 1:6-9) Chawiy komb, tukutwish kwijik mulong wak Yehova ukatin anch twikal awanyidina ni akad ulim. Anch tuyil kuland chom, mudi mabuj, buku ap chom kanang, tukutwishap kusanger chom chikweta ulim ap chakad kuwanyin. Tukusanger chom chiwanyidina, chakad ulim ni chakabuj. Chilik chimwing, Yehova nindiy ukatining mwamu piur pa rukat ni kushinshaman kwetu mulong wendendiy. Kushinshaman kwetu kufanyidin kwikal kwa kabuj, kuwanyidina ni kwakan ulim.
Ov, tufanyidin kutong anch ching twikal antu awanyidina mulong wa kwikal ashinshamena? Tukutwish kuman anch tukat kurumbok nakash chawiy chikasikena kwikal antu ashinshamena. Shinshikin mayingishin maad mamekeshina mulong wak tufanyidinap kwov wom. Chakusambish, Yehova kakatap kushinshikin nakash pa kurumbok kwetu. Bibil utulejin anch: “Anch Ey wading ni kuvurik yisalijok yawonsu yiyimp, ing nany lel ukwimana kurutu kwey, A [Yehova]?” (Kus. 130:3, TMK) Ndiy wij nawamp anch tudi antu akad kuwanyin, akayitil, ni ukat kutulikishin kwa kwikatin. (Kus. 86:5) Cha kaad, Yehova wij mimbu yetu, chawiy utwitin kusal yom kukwatijan ni mimbu yetu. (Tang Kuseng 103:12-14.) Chawiy, mutapu ik tukutwisha kwikal awanyidina kamu ni akad ulim ku mes ma Yehova?
Mulong wa kwikal ashinshamena, atushalapol a Yehova afanyidin kumukat kamu Yehova. Rukat retu mulong wa Nzamb, ni kwipan kwetu nich kushinshaman kudiay Tatukwetu wa mwiur yifanyidin kwikal yakabuj, yiwanyidina ni yakad ulim. Anch rukat retu radandamen kwikal mwamu chikalap nchik yoziu, tukutwish kumekesh patok anch tudi ashinshamena. (1 Jsng. 28:9; Mat. 22:37) Tushinshikin kand chilakej cha Atuman asatu twajimbulang kwinsambishin. Mulong wak awonsu asala yom mu mutapu winiwa? Ov, changadim wova wom wa kumusip ku shikol ap ov, nsand wova usany wa kukokal ku chis ap ov, ikundj winiwa wading ukatin kushadish mudimu wend? Chakin kamu bwat. Pakwez ading ij anch Yehova ukwet mbil jitentamina ni ashinshikina pa yom yikutwisha kumusangaresh Tatukwau wa mwiur. Rukat rau mulong wa Nzamb rayibachika kumutek ndiy pa ndond ya kusambish mu mipak yakwatau. Mu kusal mwamu, amekesha patok anch adi antu ashinshamena.
Mapit ma mu Spiritu
w16.11 paj 12 par. 3
Atenchikinau Kukwatijan ni Buku wa Nzamb
3 Anch twatal yom yatangay Yehova, tumen patok anch Nzamb kakwetingap kanvundangesh. Ku “manangu mend kwawiy kwatangilay ngand. Ndiy watenchika maur nich ronganyin rend.” (Jinswir 3:19) Kudi yom yivud yitwakad kwijik yatangay Yehova. Pakwez, “niyetu tukat kutesh ching kusu mu kayauyau.” (Job 26:14) Pakwez yoviken nawamp kusutin yikemp twija piur pa diur mutapu uditenchikinau nawamp. (Kuseng 8:3, 4) Ma miliyon ma atutumb makat kushemunik mwiur mu mutapu uwamp pakad kububijan. Ni tong mutapu ukata ma planet kunyingumuk ku muten. Kutenchik kwinoku kushimokishena kuswapel mulong Yehova ndiy watenchika mutapu ukata ma planet ni atutumbu kushemunik. Anch twatong mutapu ‘watangay maur ku manangu mend’ ni divu, tufanyidin kumutumbish, kumwifukwil, ni kwikal ashinshamena kudi ndiy.—Kuseng 136:1, 5-9.
RUBING RA 18-24 NGOND WA 12
YOM YA USEY YIDIA MU DIZU DIA NZAMB | JOB 28-29
“Ov, Ukwet Katumb Mud Kadingay Nich Job”
lfb paj 44 par. 1, tal chipich cha pa chibur
Job Wading Nany?
Mwi ngand ya Us mwading muntu umwing wamwifukwilang Yehova. Dijin diend Job. Wading mpich nakash ni wading ni dijuku dijim. Wading muntu muwamp, ni wayikwashang atuzwendj, adiaafu, ni an anshon. Ov, Job kadingap ni milong, mulong wasalang yom yiwamp?
it-2-F p. 1144 par. 10
Masun
Kud yom yivud yikatau kufanakeshau nich masun. Chilakej kud masun mamwing makatau antu kudjal mulong wa kumekesh anch ad chisak kanang ap anungin chikas mu mutambu kanang wa chipolitik, chilik chimwing kand pasak, masun mamekeshang ndond yadingay nich muntu kanang ap midimu kanang yasalangay, chid kand mwamu piur pa masun ma uruw misambinay Yesu. (Mt 22:11, 12; tal COIFFURE; SANDALE.) Mu Kujingunik 16:14, 15, Nsalejetu Yesu Kristu uyibabeshin in Kristu piur pa ubaj wa kuzel tul twa mu spiritu chakwel kangal ashala kanzikis mulong ad atuman a Nzamb wakin. Chinech chikutwish kwikal cha ubaj “pa dichuku dijim dikurumburishay Nzamb Mwin Dikand.”
w09-F 1/2 p. 15 par. 3-4
Dijin Dirumburikin Ik?
Twijingap kamu chom piur pa dijin diatupilau chisu twavadika. Pakwez, tukutwish twatond ayinetu katumb tukutwisha kwikal nich. (Jinswir 20:11) Ukutwish kwiyipul anch: ‘Anch Yesu nau atwimbuy end ayikinsha chisend cha kutupil dijin, ov, dijin ik diafanyidinau kutupil? Ov, dijin ik diafanyinau kumekesh mikadil yam ap katumb kam?’
Chipul chinech chid kamu cha usey. Mulong wak? Mulong Mwant Salomon mwin manangu wafunda anch: “Dijin dilimina dipandiken dipit dijim.” (Jinswir 22:1) Chakin kamu, anch tukwet katumb ap dijin diwamp kud antu, chid chom cha usey. Pakwez chidia cha usey nakash kud kwikal ni dijin diwamp ku mes ma Nzamb, anch twasal mwamu tukwikal ni mapit ma chikupu. Mutapu ik? Mulong Nzamb utukanin anch dijin dietu ukudifund mu ‘mukand wend wa yivurikish’ mukwikala majin ma antu amwovila wom, ni uyinkish mwom wa chikupu.—Malakiy 3:16; Kujingunik 3:5; 20:12-15.
Mapit ma mu Spiritu
g00-F 8/7 p. 11 par. 3
Kusip—Chid Chom Chiwamp Mulong wa Ukash wa Mujimbu!
Ov, kusip kukutwish kwaswimp chom mu mwom? Ov, uvurikin chisu chimwing chasalang anch masip ma muntu kanang makwongoja ni wiyova kamu pee? Ap kuburen masip kwasala anch wiyova nayimp ap mud ud kwey amwiney? Chakin kamu, masip mading ma usey nakash kud muntu umusipishina mukwau ap kud muntu usipishinau. Kukwatijan ni Bibil, Job walonda piur pa akankuny nend anch: ‘Rumwemu ra ku kan kwam rayiletilangap antu ruchingej, chitokish cha mpal yam chayinkishang ruchingej ram.’ (Job 29:24) ‘Chitokish’ cha mpal chisambinay Job chasota kumekesh pamwing ap musangar wend.
RUBING RA 25-31 NGOND WA 12
YOM YA USEY YIDIA MU DIZU DIA NZAMB | JOB 30-31
“Mutapu Washalay Job Wishitwila”
w10 1/4 paj 25 par. 8
Diosh Mes Mey Ku Yom Yamwamu!
8 In Kristu akin niyawiy akutwish kuwil mu maku ma mes ni ma mujimbu. Chawiy lel, Dizu dia Nzamb ditukasikeshin tusadila kwikand kwa muntu ipend kwambatan nich yitutadina ni yitusotina. (1 Kor. 9:25, 27; tang 1 Yohan 2:15-17.) Job muntu utentamina witiyija urund ukash udinga pakach pa kutal ni kusot. Ndiy walonda anch: “Nichipa machip ni mes mam, kinikutalap kand mes kudi amband.” (Job 31:1) Job kalikap kumukwat mband kusu nich chitongijok cha masandj pakwez walika kand kulam yitongijok ya masandj mu manangu mend. Yesu walejana anch manangu mafanyidin kwikal zwang makad yitongijok ya masandj palonday anch: “Wawonsu ukutala padiay mband ni kumwovil upwepu, ndiy wasotan kal mu muchim wend kwapwa kal.”—Mat. 5:28.
‘Chinany Masandj!’
Salomon wafunda anch: “Kupandikan yom yawonsu, lam muchim wey, mulong mwawiy mudia misul ya mwom.” (Jinswir 4:23) “Muchim” wetu udi muntu udia mukach mwetu, muntu ukatay Yehova kuman. Yom tukata kutal yikutwish kwikal ni usu padi etu mu mutapu upandakena. Job muntu ushishamena walonda anch: “Nachipa machip ni mes mam, kinikutalap kand mes kudi amband?” (Job 31:1) Mudi Job, tufanyidin kushinshikin ni kutongin pa yom tutadina. Mudi kand nfund a kuseng, tulembil anch: “Ndioshap mes mam ku yom yamwamu, chakwel mwom wam wikala wa kwendil mwi njil yey.”—Kuseng 119:37.
w10 1/11 paj 5-6 par. 15-16
Ansand—ikalany Atakedilau Kudi Dizu Dia Nzamb
15 Ov, chisu ik utongininga anch kushinshaman kwey kudi Nzamb akez kukupak mu mutapu upandakena—piudia ni antu akwau anch piudia amwiney? Chakin, piudia ku shikol ap ku mudimu, mwikadil wey wa kwichidij muspiritu ufanyidin kwikal mudi ulankining. Uding ubabeshinau pantaliken ni ubaj wa muspiritu ukutwisha kukushiken. Pakwez, pa chisu cha kupim, pawiy ukat kukangany kurish ni kuburen usu wa kujijaman mu yoziu piur pa yijil yey.
16 Ov, mulong wak ufanyidin kusot kuziyil kudi Yehova ap anch udi amwiney? Vurik anch: Ukutwish kumwovish Yehova ushon ap kusangaresh muchim wend. (Dis. 6:5, 6; Jinsw. 27:11) Yehova ukwachikin ni yisal yey mulong “ukat kukulamany.” (1 Pita 5:7) Ndiy usotin anch ey umutesha chawiy lel ukutwisha kutaninamu. (Isay 48:17, 18) Mu Isarel wa pasak, pa chisu chavuramenau atushalapol a Yehova chiyul chend, awiy amunenganesha. (Kus. 78:40, 41) Chikwau kand, Yehova wamukata muprofet Daniel nakash, mulong mwangel umwing wamuleja anch “Nzamb ukukatil.” (Dan. 10:11) Mulong wak? Mulong Daniel kamekeshap kushinshaman kudi Nzamb ching kusu padingay pakach pa antu, pakwez wakumekesha kand padingay amwinend.—Tang Daniel 6:10.
Mapit ma mu Spiritu
Dandamen Kumekesh Rukat Rikata Kukasikesh
Ikal mwin kutesh muwamp. (Jakobu 1:19) Tukat kumekesh rukat anch twamutesh muntu nich ranaken. Ipul yipul yiwamp yikutwisha kukukwash kutesh nawamp mutapu wiyovilay mukadivar ney. Ndiy ukuman anch umubangidin, ap kusutin mutapu udia chifu chey. Chisu ulondina, shimpish muchim ni mulika akuleja pakad kumukaturij. Kusutin kwikal mwin kutesh muwamp, ukutwish kumutesh nawamp nakash ni chinech chikumukwash akuchingejin. Mwamu chikumuswapel chad ndiy kutesh yom ulondina piusadina usu wa kumukwash. Anch wayibangin antu akwau nakash, ukutwish kwikal mwin kuyongoj muwamp.