Mwant Wandamin Mu Yerusalem Udi Pa Mwan A Chimbur

Pikwacha diading Diarubing, dichuku dia 9 ngond wa Nisan, Yesu wadiokala pamwing ni in kwilejend mu Betaniy mulong wa kuya mu Yerusalem. Pasejau piswimp ni ul wa Betefaj ku Mukandu wa Mitond mudi ya Mpach Yesu wayileja in kwilejend aad anch:

“Yangany ku ul udia kurutu kwen. Piukushikanya kwinikwa, ukutanany chimbur amukasin udi ni mwanend. Yisurilany, uyinletilany. Anch muntu walond chom, mulejany anch: ‘Mwant uyiswiridin,’ chad ndiy ukuyipan swa.”—Mateu 21:2, 3.

In kwilej akanganya kujingunin anch yom yayilejau kudi Yesu ayilonda mu uprofet udia mu Bibil. Kupwa ashikena ku kujingunin kuwanyin kwa uprofet wa Zakariy. Zakariy wasambela kulond anch Mwant wakanau kudi Nzamb ukez kwandam mu Yerusalem “witudishin, wezidil pa chimbur, wezidil pa musamb a chimbur.”—Zakariy 9:9.

Pashikau in kwilej ku Betefaj mulong wa kusend chimbur pamwing ni mwanend, antu ading pinipa ayipula in kwilej anch: “Ov, mulong wak umusurilanya mwan a chimbur?” (Marko 11:5) Pakwez, pateshau anch nnam winou amusendin mulong wa kumutwal kudi Mwant wau, antu inay itiya chakwel in kwilej amutwadinay Yesu. In kwilej ala masum mau pa nyim ya chimbur ni ya mwanend, pakwez Yesu wakandama pa nyim ya musamb a chimbur.

Padingay Yesu ukat kwez mulong wa kwandam mu Yerusalem, kweza yisak ya antu. Antu avud ala masun mau mwi njil. Antu akwau abukuna “yifukis ya mitond ya mu yir” asambish kuyal. Asambisha kutoy anch: ‘Tupandishaku amboku! Wayuk kwend wezidina mu dijin dia Yehova! Wayuk Want ukweza wa Tatukwetu David!’ (Marko 11:8-10) Afaris ading mu chisak cha antu inay ajimana mulong wa mazu minam. Amwela Yesu anch: “Mulej, yileja in kwilejey anenet.” Yesu wayakula anch: “Nakulejany chakin, anch in kwilej anenet, mayal makez kubarik kwau dizu piur.”—Luka 19:39, 40.

Pamanay Yesu mutapu wadinga Yerusalem, ndiy wasambisha kudil ni walonda anch: ‘Anch ey wadi wijany yom yikata kulet chisambu—pakwez katat kiukutwishanyap kuyiman!’ Yerusalem wafanyina kufut usey mulong wa kubwambwil kwau kwa kwikatin. Yesu wasambela kulond anch: “Chisu chikat kwez chikez katungau akankuny nen chinanginang cha mavu kunyingumwish musumb wen bwalakan. Akez kukombanyamu, ni kukuwilany mitambu yawonsu. Akez kashesh musumb wen pamwing ni ayinen shutit. Kukez kushalap diyal ap dimwing pa ndond paditungilau.” (Luka 19:42-44) Kuwanyin kwa mazu malonday Yesu piur pa kusheshik kwa Yerusalem kwasadika kamu mu muvu wa 70 C.C.

Pandamay Yesu mu Yerusalem, ‘musumb wawonsu wanyikeka ni antu ipulijana anch: “Ov, winou nany?”’ Pakwez, yisak ya antu yadandamena kulond anch: “Udi Yesu, [muprofet] wa Nzamb, ndiy udiokil ku Nazaret mwi ngand ya Galalia!” (Mateu 21:10, 11) Antu amwing ading mu chisak chinech amana mutapu wamuvumbulau Lazar kudi Yesu asambisha kuyilej antu akwau piur pa chilay chinech. Afaris asambisha kwinan anch antu awonsu ayichina. Awiy asambisha kununganijan anch: “Talany kwa, antu awonsu akat kumulondul ndiy!”—Yohan 12:18, 19.

Mudi mwadinga chaku chend anch waya mu Yerusalem, Yesu waya mu tempel mulong wa kuyifundish antu. Mwinimwa wamwoka mputames ni chilim. Pamanau in kupesh ajim nau alej a yijil yom yading yisadinay Yesu ni pateshau anikanch ading mu tempel akat kutoy anch: ‘Tupandishaku amboku, Mwan a David’ awiy ajimana. Antakel a chirelijon amwipula Yesu anch: “Ov, ey kiwovilap kwey yom yilondilau?” Ndiy wayakuka anch: “Ov, en kand kal utanganyap mu mukand wa Nzamb anch: ‘Ey wayileja kal anikanch ni an a ku mayel kukushiman ey.’?”—Mateu 21:15, 16.

Yesu wading ushinshikidin yom yadinga mu tempel. Mulong chisu chading chasutang kal, chawiy Yesu waya pamwing ni atwimbuy end. Kurutu dichuku dia 10 dia ngond wa Nisan disambisha, ndiy wachirika ku Betaniy, kwinikwa kwawiy kwalalay Diarubing uchuku.