Yesu ni in kwilejend asutisha machuku masatu mu Betaniy padiolalau ku Yeriko. Mukwacha pamanch Diakaj kamu pa dichuku dia 10 ngond wa Nisan aya ku Yerusalem. Yesu wading wovil nzal nakash. Chawiy pamanay mutond wa nfung, waya kwinikwa chakwel amana anch kwading mabuj ma nfung.

Pa chisu chinicha wading ngond wa Kasatu, chawiy chisu cha kusong mabuj ma nfung chading ngond wa Musamban. Chisu chinicha chading chisu cha kusapurik mayij. Chawiy Yesu watonga anch mutond winou wafanyina kwikal ni mabuj. Pakwez katanapaku dibuj ap dimwing. Pakwez mayij madinga ku mutond mamekesha mudi kwading mabuj. Chawiy chalonday Yesu anch: “Kwikil muntu ukeza kudia kand mabuj mey chikupu.” (Marko 11:14) Pakad kulab mutond wasambisha kuum ni in kwilej afanyina kutesh kurumburik kwa mazu minam dichuku dikwambakenap.

Kupwa, Yesu ni in kwilejend ashika ku Yerusalem. Ndiy wandama mu tempel chisu cha urel mulong wa kushinshikin yom yading yisadikina. Pa dichuku dinidia, Yesu kasudenap kusu pa kushinshikin yom yading yisadikinamu pakwez wasala yom mudi yasalay pasut kal mivu yisatu pa chisu cha Pasak wa muvu wa 30 C.C. (Yohan 2:14-16) Pa chisu chinicha Yesu wayopata “in kuland ni in kulandish ading mu [tempel].” Kupwa wabumburola “mes ma in kuswimpish nfalang, ni yipwan ya in kulandish atwinkudimb.” (Marko 11:15) Ndiy kitiyap muntu ap umwing asutina mu rupang ra tempel mudi kajil ka rukatu mulong wa kutwal yom yend mutambu ukwau.

Mulong wak Yesu wakwata mupak winou ukash wa kuyopat antu ading aswipishina nfalang ni ading alandishina annam mu tempel? Ndiy walonda anch: ‘Ov kachifundinap anch ‘Chikumbu cham akez kachitazuk anch chikumbu cha kulembil cha michid yawonsu’? Pakwez en wachikarumwinany kal kwikal mandam mau ambwitan.’ (Marko 11:17) Diyingishin diasala anch ayitazuk antu inay anch ambwitan diading mulong antu inay ading kuyikaninishin usey antu alandang annam mulong wa kupesh. Yesu wamana chisal chinech anch chading chisal cha wimbwitan ni wij.

Chakin kamu, pateshau in kupesh ajim, alej a yijil ni antu akwau ading ni ntumb yom yalonday Yesu, asambisha kukimb mutapu wa kumujip. Pakwez pa chisu chinicha akanganya. Katwishap kumujip Yesu mulong antu avud ading akumanganang kal mulong wa kumutesh Yesu.

Chawiy, kadiap kusu ching in Yuda eza ku musambu wa Pasak, pakwez kweza kand antu akad kwikal in Yuda ni antakel a chirelijon in Yuda. Pakach pau pading in Grek eza mulong wa kusal musambu winou. Antu inay amutazuka Filip pamwing ap mulong wading ni dijin dia in Grek, chading mulong wa kumwipul mutapu ufanyidinau kumuman Yesu. Filip wamana anch mambamb minam mading ma usey, chawiy wamulejamu Andare. In kwilej inay aad amuleja Yesu mulong winou, pamwing ap Yesu wading uchid mu tempel.

Yesu wading wij anch kwamushal kal machuku makemp ni kufa, chawiy kakatap kuyisangaresh ap kukimb ntumb. Chawiy ndiy wayakula atwimbuy inay aad kusutin chishimu palonday anch: “Katat chisu chawanyin kal chakwel uyaj wakin wa Mwan a muntu ukez kumekan. Nakulejany chakin, anch rubut ra tidiku karukunyinap mu divu, rafa, rukwikal kwau rubut rumwing. Pakwez anch rafil mu divu, rukusong mabuj mavud.”—Yohan 12:23, 24.

Chimeken anch rubut rumwing ra tidiku rading ra usey ukemp. Pakwez anch arukun “rafil mu divu” mudi rubut, rikutwish kuminy ni kupam kupwa rabudish ntit jivud. Chilik chimwing ni Yesu, ndiy udi muntu uwanyidina. Mulong ndiy washinshamana kudi Nzamb djat ni ku rufu rend, chawiy ukez kuyinkish antu awonsu akweta muchim wa kwipan mwom wa chikupu. Yesu walonda anch: “Muntu mwawonsu ukata kukat ching mwom wend kusu amwinend, kwinsudiel ukez kuushadish. Pakwez muntu mwawonsu wakad kukat ching mwom wend kusu amwinend pa mangand minam, kwinsudiel ukez kuulam djat ni kumwom wa chikupu.”—Yohan 12:25.

Yesu kitonginangap amwinend, chawiy chalonday anch: “Muntu mwawonsu usotila kwinsadil am, ufanyidin kwinlondul ikala mwin kwilej wam, chakwel kashalapol wam ukez kwikal pamwing ni yamam kwawonsu kunikwikala. Tatukwam ukez kumulimish muntu mwawonsu ukata kwinsadil.” (Yohan 12:26) Difut dijim mud ik dikezau kutambul antu inay! Antu alimishinau kudi Tatukwend akez kwikal pamwing ni Kristu mu Want .

Pading patonginay piur pa mar makash ni rufu risansena rading rumuchingedina, Yesu walonda anch: “Katat muchim wam wakam kal. Ov, chinfanyidin kulond anch: ‘Tatuku, mpandisha ku mar ma chisu chinech’?” Yesu kakimbap kukangesh rusot ra Nzamb riwanyina. Ndiy walonda kand anch: “Am neza pa mangand mulong wa kuman mar minam.” (Yohan 12:27) Yesu witiya anch rusot rawonsu ra Nzamb ruwanyina kuwejinaku rufu rend.

Yesu wisambidin piur pa rufu rend raseja kal piswimp ku tempel pa dichuku dia Kaj kamu 10 ngond wa Nisan. Patongay Yesu piur pa mutapu ukusaalau dijin dia Nzamb ndiy walonda anch: “Tatuku, tumbish dijin diey!” Dizu dikash diadokal mwiur dialond anch: “Naditumbish kal, nikez kaditumbish kand.”—Yohan 12:27, 28, TMK.

Antu ading pinipa akashimuka. Amwing atonga anch atesh kal chidjimin cha nzaj. Akwau alonda anch: “Udi mwangel walonda kal nend.” (Yohan 12:29, TMK) Pakwez Yehova ndiy walonda dizu dined! Ni kadingap kapamp ka kusambish kudi antu kutesh dizu dia Nzamb kusutin Yesu.

Mivu yisatu ni chikunku kupwa kwa kumubatish Yesu, Yohan Mubatish watesha mutapu walonday Nzamb kudi Yesu anch: “Ey udi Mwanam unikatila nakash. Am nikat kusangar mulong weyey.” Kupwa kwa musambu wa Pasak wa muvu wa 32 C.C., Yesu waswimpa chifu chend kurutu kwa Jakobu, Yohan ni Pita. In kwilej inay asatu atesha dizu dia Nzamb dalonda anch: “Winou udi mwanam unikatila, nikat kusanger mwi ndiy, muteshany!” (Mateu 3:17; 17:5) Pakwez kapamp kinak ka kasatu, Yehova walonda mu mutapu wasala anch antu avud atwisha kumutesh!

Yesu walonda anch: “Mazu minam kamalondilap mulong wamam, bwat, pakwez amalondil mulong wenen.” (Yohan 12:30) Mazu minam mamekesha patok anch ndiy udi Mwan a Nzamb, Mesia washilaumu.

Chawiy, kushinshaman kwa Yesu kwasala anch antu ikala ni ruchingej ra kutambul mwom wa chikupu ni kwamekesha anch Satan Djabul ndiy ntakel wa mangand minam makusheshau. Yesu walonda anch: “Katat chidi chisu chakuyirumburish antu adia pa mangand. Katat ndiy ukez kumwopat mwin kutakel wa mangand minam.” Rufu ra Yesu rafanyinap kuletish usany pakwez rafanyina kuletish katumb. Mutapu ik? Ndiy warumburila anch: “Pakez kwinzambulau am piur, nikez kuyikumangejin antu awonsu kudi am.” (Yohan 12:31, 32) Kusutin ku rufu rend pa mutond, Yesu wayikumangejina antu awonsu kudi ndiy ni wayinkinsha antu mutapu wa kutambul mwom wa chikupu.

Palonday Yesu anch ‘akumuzambul piur,’ yisak ya antu yalonda anch: “Yijil yetu yitulejin anch, Kristu ukez kwikal mwom chikupu. Ov, ing, ey ukutwish nchik kulond anch: ‘Mwan a muntu akez kumuzambul piur?’ Ov, Mwan a muntu win [ndiy] nany?” (Yohan 12:34) Chilalap nchik uman ap dizu diateshau dia Nzamb amwinend, antu avud kamwitiyap chakin kamu Yesu anch udi Mwan a muntu, Mesia washilaumu.

Mudi mwasambelay kulond, Yesu walonda kand anch udi “chimunyik.” (Yohan 8:12; 9:5) Ndiy wayileja yisak ya antu anch: “ Katat chimunyik chichid mukach mwen chisu chikemp. Endanganany piuchikwetanya chimunyik, chakwel mididim kangal yez yakubwikany . . . Mwitiyijany ndiy ukuletidinanya kutok pachidiay mukach mwen, chakwel ukwikalany an ashicha mu chimunyik.” (Yohan 12:35, 36) Kupwa Yesu wachina, mulong kafanyinap kumujip pa dichuku dia 10 ngond wa Nisan. Dichuku dia 14 dia ngond wa Nisan dia musambu wa Pasak diawiy dichuku diafanyinau “kumuzambul piur”—kumupamp pa mutond.—Galatia 3:13.

Anch twashinshikin mudimu wawonsu wakulejan wasalay Yesu, chimeken patok anch uprofet wawanyina palikau in Yuda kutek ritiy rau mudiay Yesu. Isay wasambela kulond anch mes ma antu akez kumapuputish ni michim yau yikez kuchinchik ni chikez kukasikan kuyok. (Isay 6:10; Yohan 12:40) Chakin kamu in Yuda avud alika kwitiyij uman wawonsu wamekesha anch Yesu udi Mupandish wau washilaumu, njil ya mwom.

Nikodem, Josef wa ku ul wa Arimatey, ni antakel akwau avud “amwitiyija” Yesu. Pakwez, ov asala kukwatijan ni ritiy rau anch iziyisha mulong ova wom wa kuyopat mu sinagog ap mulong ading ‘akatin ntumb ya antu’?—Yohan 12:42, 43.

Yesu amwinend warumburila chirumburikina kutek ritiy mudiay ndiy palonday anch: “Muntu mwawonsu wingitiyijina am kangitiyijinap kusu amwinam, pakwez umwitiyijin kand ndiy wantuma am.” Uyakin wamulejau Yesu kudi Nzamb kufundish ni wadandamenay Yesu kufundish wading wa usey nakash, chawiy chalonday Yesu anch: “Muntu mwawonsu [ukwinlika] am ni kulik kuziyil ku yom yinikumuleja kusal, akez kumufish nich. Mazu mam minalonda mawiy makeza kumufish nich pa dichuku dia kwinsudien.”—Yohan 12:44, 45, 48.

Yesu walonda mazu ma nsudien anch: “Kinilondinap yom yiney ku ulabu wam amwinam, pakwez Tatuku wantuma am wanleja yom yinifanyidina kulond ni kulejan. Chawiy nij anch, malejan mend makat kulet mwom wa chikupu.” (Yohan 12:49, 50) Yesu wading wij anch kwamushal kal machuku makemp mulong wa kupan mwom wend mudi yakupesh mulong wa antu awonsu akuteka ritiy rau mudiay ndiy.—Rom 5:8, 9.