Amband inana nakash patanau nzay yamujikau Yesu yidi yamwamu! Mariy Mandalen waya mau kumulejamu “Simon Pita, ni mwin kwilej wading ukatilay Yesu”—kambuy Yohan. (Yohan 20:2) Pakwez amband akwau ashala amumana mwangel. Mukach mwa nzay ya chivurikish mwadinga mwangel mukwau “udjit nkandj mulemp mutok.”—Marko 16:5.

Mwangel umwing wayileja amband inay anch: “Kangal wovany wom. Am nij anch [umukimbinany] Yesu wapampilau ku mutond. Ndiy kadiap kunoku, wavumbukang kal kwikal kand mwom, mudi mwakulejanyay. Ezany, utalany ndond yadiau amutekil. Katat yangany swa, ukayilejany in kwilejend anch: ‘Ndiy wavumbukang kal, wikal kand mwom, watakelangaku kal kuya ku Galalia.” (Mateu 28:5-7) Amband inay “ova wom nakash, azalizala,” chawiy aya mau mulong wa kuyilejamu in kwilej.—Marko 16:8.

Pa chisu chinicha, Mariy wamutana Pita ni Yohan. Wading ukat kupimijan ni walonda anch: “Amudioshang kal Nsalejetu mwi nzay, kitwijap kwisu kwamutekangau kal!” (Yohan 20:2) Pita ni Yohan aya mau kwi nzay. Yohan wading ni mau nakash ni washika wa kusambish. Wazengama watal mwi nzay ni wamanamu ching yibel ya masun, pakwez kandamap mukach.

Chisu chashikay Pita, wandama kapamp kamwing mwi nzay. Wamanamu disun dia ndand muwamp diamuvungau Yesu ku mutu. Kupwa Yohan wandama ni witiya yom yayilejau kudi Mariy. Ap anch Yesu wasambela kuyilej yom yiney, kwikil mwin kwilej ap umwing watonga anch Yesu wavumbukang kal. (Mateu 16:21) Chawiy achiroka kwol kwau. Pakwez Mariy waswinkana kwi nzay, ni washakama kwinikwa.

Chikwau kand amband akwau aya kuyilejamu in kwilej anch Yesu wavumbukang kal. Pading payilau mulong wa kuyijikish in kwilej, Yesu wasankanijana nau ni wayela anch: “Wajingany!” Awiy aya amukwat ku mend yend chad ‘amwifukwila.’ Kupwa Yesu wayela anch: “Yangany, ukayilejany anamakwam in kwilej aya ku Galalia, chad kwinikwa kwawiy [tukumanijana nau].”—Mateu 28:9, 10, TMK.

Chisu chanyikeka divu ni chamekanau angel, amasalay ading kwi nzay “asambisha kuzalizal. Ikala mudi antu afanga kal.” Pamanau yom yiney, awiy aya mau mu musumb mulong wa “[kuyilej] amakurump au in kupesh yom yawonsu yamanau.” Kupwa in kupesh ayilejamu amakurump au in Yuda. Akwata mupak wa kuyikatul amasalay milamu chakwel kangal apalangesha rusangu riner ni ayileja kulond anch: “In kwilejend ezang uchuku, iy mujimbu wend pitwadia etu tulel tul.”—Mateu 28:4, 11, 13.

Amasalay in Rom afanyina kuyijip anch alal tul chisu chisadinau mudimu wa ukalam uchuku, chawiy in kupesh alonda anch: “Anch Pilat watesh rusangu riner [makusu madimbanau anch alalang tul], etu tukumurumburil nawamp anch, en kiukwetanyap kwen mulong, chakwel kangal akumeshany mar.” (Mateu 28:14) Amasalay itiya kuyikatul milamu ni itiya kusal yom yayilejau kudi in kupesh. Chawiy rusangu riner ra makasu rapalangana kudi in Yuda awonsu.

Mariy Mandalen wadandamena kudil kwi nzay. Pading patadinay mwi nzay, wamana angel aad adjita masun matok! Mwangel umwing wading ushich mutambu wadinga mutu wa Yesu ni mukwau mutambu wadinga mend ma Yesu. Angel inay amwipula anch: “Ov, mband ey, udidil yom ik?” Mariy wakula anch: “Amudioshang kal Nsalejam, kinijap kwamutekangau kal.” Pakarumukay, Mariy wamana muntu mukwau. Muntu winou wachirikina chipul chipulau angel ni walonda kand anch: “Ov, [umukimbin] nany?” Mariy watonga anch muntu winou wading kalam, chawiy chalonday anch: “Mwant, anch yey wadioshanga mujimbu wa Yesu, nleja kuwamutekanga chakwel niya ni kamusenda.”—Yohan 20:13-15.

Chakin kamu Mariy wading wambambin ni Yesu wavumbukang kal, pakwez pa chisu chinicha ndiy kamujinguninap. Pakwez palonday Yesu anch “Mariy,” Mariy wajingunina anch muntu winou wading Yesu mulong wading wij nawamp mutapu wend wa kulond. Mariy wakula nich musangar anch “Raboni!” (charumburik anch “Mulej!”) Chikwau kand Mariy watonga anch Yesu ukimbin kuya mwiur, chawiy chayay mau mulong amukwata. Pakwez Yesu wamulikisha wamulej anch: “Kangal wankwataku, kand kal nichirika kudi Tatuku. Pakwez yang bil ukayilej in kwilejam anch, am nachirik kal kudi Tatukwam, ndiy kamu Tatukwau, ndiy Nzamb wam, udi kand Nzamb wau.”—Yohan 20:16, 17.

Mariy waya mau kwi ndond yading yikumangenau atwimbuy ni in kwilej akwau. Wayileja anch: “Namumanang kal Nsalejetu!” atwimbuy atesha rusangu riner ridia mudi rayilejau kudi amband akwau. (Yohan 20:18) Chikwau kand, nsangu jinej jamekana ‘mudi nsangu ja maswimbu.’—Luka 24:11.

Diarubing 16 ngond wa Nisan, in kwilej ading aziyin nakash. Kwovap kurumburik mulong wak nzay yamujikau Yesu yading yamwamu. (Mateu 28:9, 10; Luka 24:11) Urel, Kleopas ni mwin kwilej mukwau ading adiokil mu Yerusalem mulong wa kuya ku Emaus, pading akilometre 11.

Pading payilau ading isambidin piur pa yom yasadika. Kupwa muntu mukwau wayitana. Wayipula anch: “Ov, yom ik yiuyilanya ni kwambamb?” Kleopas wakula anch: “Ov, ey, yey kwey mweny umwing wa mu Yerusalem wakad kwijik yom yasutila mu machuku minam?” Mweny winou wayipula anch: “Yom ik?”—Luka 24:17-19.

Awiy amuleja muntu winou anch: “Yom yamusadilau Yesu wa ku Nazaret.” “Twadi tuchingejin anch, winou ndiy watondau kudi Nzamb mulong wa kuyikol in Isarel.”—Luka 24:19-21.

Kleopas ni murunend asambisha kumulej yom yasadika pa dichuku dinidia. Amuleja anch amband amwing ayang kwi nzay yamujikau Yesu atanang mwi nzay mudi mwamwamu, amband inay imenap ayinau yom yishimokishina nakash—amanang angel ayilejang anch Yesu udi mwom. Payilejawamu atwimbuy kudi amband inay, niyawiy aya kwi nzay ni ‘atana yom mudi mwayilejau kudi amband inay.’—Luka 24:24.

In kwilej inay aad kateshap kurumburik kwa yom yasadikang. Mweny winou wayileja nich ulabu wawonsu mulong wa kutenchik yitongijok yau yiyimp yadingau nich yayovisha ushon ni wayileja anch: “Ayisup en, ukwetany michim yichinchikina pa kwitiy yom yawonsu yalejanau a [profet] a Nzamb! Ov kichadiap chifanyidina Kristu kuman mar minam mawonsu chakwel andama mu uyaj wend?” (Luka 24:25, 26) Muntu winou wasambisha kuyilej kurumburik kwa Mifund kushalijan yimutadina Kristu.

Kupwa antu inay asatu ashika piswimp ni ul wa Emaus. In kwilej inay aad akimba kutesh Yom yivud, chawiy amuleja mweny winou anch: “Shakam ni yetwetu, mulong muten wandam kal, kusotil kujal.” Muntu winou witiya kushakam nau kupwa adia yakudia pamwing. Palembilay mweny winou, wanona mukat wauumbul kupwa wayinkisha, chawiy amujingunina pakwez ndiy wayishadika. (Luka 24:29-31) Chawiy ikala nich kashinsh anch Yesu udi mwom!

In kwilej inay aad alonda nich musangar yom yamanau mwi njil anch: “Ov, michim yetu kiyaswanangap mwinvumu padingay ni kuturumburil mwi njil mazu ma Mikand ya Nzamb?” (Luka 24:32) Achirika mau ku Yerusalem mulong wa kuyitan atwimbuy ni antu akwau adinga kwinikwa. Kurutu Kleopas ni murunend asambisha kulejan rusangu riner, awiy atesha antu akwau akat kulond anch: “Chakin kamu, Nsalejetu wavumbukin, Simon wamumen!” (Luka 24:34) Kupwa awiy aad ayileja akwau mutapu wamumanangau Yesu. Chakin kamu antu inay amumana Yesu.

Pading pashimokinau—wayimekena mu chikumbu! Antu inay kovap kurumburik mutapu wandamay Yesu mulong yis yading ya kufung mulong ading ovil wom wa in Yuda. Pakwez Yesu wimana mukach mwau. Wayela anch: “Chisambu chikala niyenen.” Pakwez awiy ova wom nakash. Mudi mwatongau kand kapamp kakusambish, ‘atonga kand anch amuman kal mutar.’—Luka 24:36, 37; Mateu 14:25-27.

Mulong wa kumekesh patok anch kadingap mutar mudi mwatongau in kwilej, Yesu wading ni mujimbu wa mbij, chawiy chayilejay in kwilejend makas mend ni mend yend ni wayileja anch: “Ov, mulong wak wovilanya wom? Ov, mulong wak widjidjekinanya mu michim yen? Talany makas mam ni mend mam, shinshikany, yam kamu. Nkwatany, wijikany, mulong mutar kakwetap mujimbu ni mafup mudi muwimenanya am.” (Luka 24:36-39) Awiy asangara nakash ni ashimoka pakwez ading idjidjekinaku pakemp.

Mulong wa kuyikwash ijika chakin kamu anch ndiy, chawiy chayipulay anch: “Ov, ukwetanyap chom cha kudia?” Amwinkisha chikunku cha insh wa kukang kupwa wadia. Kupwa kwa kudia wayileja anch: “Yawiy yiney yom yinading ni kukulejany pinadinga ni yenen. Yom yawonsu yafundau mulong wamam mu Yijil ya Moses ni mu mikand ya a [profet] a Nzamb, ni mu Kuseng chifanyidin kuwanyin.”—Luka 24:41-44.

Yesu wamukwasha Kleopas ni murunend kutesh kurumburik kwa Mifund, kupwa wasala kand mwamu ni in kwilej akwau akumangana pamwing, wayileja anch: “Mu Mukand wa Nzamb afundil anch, Kristu ufanyidin kuman mar, ufanyidin kand kuvumbuk kupwa kwa machuku masatu. Chad chifanyidin kurumburil mu dijin diend kudi antu a michid yawonsu rusangu ra kukarumuk kudiokal ku yitil, ni ra dilikishin dia yitil. Chifanyidin kusambishin mu Yerusalem. En udiany atuman a yom yiney.”—Luka 24:46-48.

Mulong wa diyingishin kanang kambuy Tomas kadingap pamwing ni akwau. Kupwa kwa machuku makemp, atwimbuy akwau amuleja nich musangar anch: “Etu twamumanang kal Nsalejetu!” Tomas wakula anch: “Anch kinimenap yidur ya misumad mu makas mend, ni kutek muny wam pa ndond papampau misumad, ni kwandjik chikas cham mwi mbavu mwend, am kinikwitiyijap.”—Yohan 20:25.

Kupwa kwa machuku chinan, atwimbuy akumangana kand pamwing ni apata ku yis yau, chawiy pa chisu chinicha Tomas wading nau pamwing. Yesu wayimekena kand ni wimana mukach mwau, kupwa wayilangwisha anch: “Chisambu chikala kudi en.” Yesu wamutala Tomas wamwel anch: “Tek muny wey omu, tal makas mam, chad andjik chikas chey mwi mbavu mwam. Lik ntad jey, itiyij kwey.” Tomas wamwakula anch: “Ey udi Nsalejam, Nzamb wam!” (Yohan 20:26-28) Chakin kamu Tomas wijika anch Yesu udi mwom ni udi chakin muntu watumau kudi Yehova Nzamb.

Yesu wamuleja anch: “Ov, ey witiyij kal chiwanmana kal? Ayuk kwau antu akata kwitiyij wakad kwinman.”—Yohan 20:29.