Mareferans ma Mudimu ni Mashakamin ma In Kristu Mukand wa Chikumangan
© 2024 Watch Tower Bible and Tract Society of Pennsylvania
RUBING RA 4-10 NDOND WA 11
YOM YA USEY YIDA MU DIZU DA NZAMB KUSENG 105
“Ukat kuvurik mansuk mend chikupu”
Mutapu ik Tukutwisha Kukasikesh Ritiy Retu mu Kushilamu kwa Yehova Piur pa Ngand Yisu?
11 Shinshikin yom yimwing yashilayamu Yehova kud antu a pasak yading yimekena mud yikasiken kuwanyish. Wamuleja Aburaham ni Sara anch akuval mwan ku upal wau. (Dis. 17:15-17) Yehova wamuleja kand Aburaham anch ukez kayinkish antu a majuku mend ngand ya Kanan. Mu kusut kwa mivu yivud, antu a majuku ma Aburaham, in Isarel ashakama mu usuk mu Idjibit ni chafanyina kumekan mud kushilamu kwinoku kwafanyinap kuwanyin. Pakwez kwawanyina. Kupwa, Yehova wamuleja Elizabet mband wading wapamina kal anch ukaval mwan. Wamuleja kand Mariy, wading kajik, anch ukumuval Mwan wa Nzamb. Kusal mwamu kwafanyina kuwanyish kushilamu kwashilayamu Yehova mu tunan twa mivu mu chir cha Eden!—Dis. 3:15.
12 Anch twatongijokin piur pa kushilamu kwawonsu kwa Yehova kwakanay ni mutapu wawanyishay kushilamu kwinoku, tukat kuman chakin kamu anch ukwet dikand dipandakena. (Tang Joshua 23:14; Isay 55:10, 11.) Chinech chitukwashin kwirijek mulong wa kuyikwash antu akwau kwijik anch kushilamu kwa Nzamb piur pa ngand yisu chidap chilat. Piur pa diur disu ni divu disu, Yehova amwinend ulondin anch: ‘Mazu minam mad makin ni ma kuchingejin.’—Kuj. 21:1, 5.
it-2 paj 493
Dizu
Yitang yikweta mwom ni yakad mwom yikat kuziyin ku dizu da Nzamb, ni Nzamb ukutwish kuyisadin mulong wa kuwanyish rusot rend. (Kus 103:20; 148:8) Dizu da Nzamb did da kuchingejin; anch Nzamb wakan chom, ukat kuchivurik kand ni kuchiwanyish. (Kuv 9:5; Kus 105:42-45) Mud mulondinay amwinend, dizu dend “dishich chikupu”; dikutwishap kuchirik kud ndiy pakad kuwanyish yadilondinay.—Is 40:8; 55:10, 11; 1Pi 1:25.
Mapit ma mu Spiritu
w86 1/11 paj 19 par. 15
Chisend cha Ansand mu Dijuku Dikweta Musangar ni Dida mu Uumwing
15 “Amuteka [Josef] mend mwi mpompu, chad amuteka rubwambu mwi nshing, djat ni ku dichuku dashikena yom yalonday, chad dizu dia [Yehova diawanyina].” (Kuseng 105:17-19) Mu mivu 13, Josef wamana mar mud kabindj ni mud muntu wa rukan kushik ni pawanyina kushilamu kwa Yehova. Yom yiney yamushikena yamushitwisha. Ap anch Yehova kadingap musul wa yom yiney, walikidina anch yishiken mulong wa diyingishin kanang. Ov, Josef walama ruchingej rend mu “dizu dia [Yehova]” chikalap nchik mar mapendakena? Ov, mamushikija kuswish mikadil yend yiwamp, ni kukudish mikadil mud kushimpish muchim, kwikepish, usu wa mu spiritu, ni kukudish kutakaman kwafanyina kumukwash kuwanyish chisend chikash? Tukutwish kulond anch Josef wabudika mu chikokujol chinech mud or wengurilangau mu kasu—wading wa zwang ni wa usey nakash ku mes ma Nzamb, ni wamusadina mu mutapu upandakena kuwap mu kusut kwa machuku.—Disambishil 41:14, 38-41, 46; 42:6, 9.
RUBING RA 11-17 NGOND WA 11
YOM YA USEY YIDA MU DIZU DA NZAMB KUSENG 106
“Amuvuramena Nzamb Mupandish Wau”
‘Ov, Nany Uda ku Mutambu wa Yehova?’
13 In Isarel ova wom mulong wa mutapu ushimwokishena wamekeshay Nzamb usu wend, chawiy Moses waya ku Mukandu wa Sinay ni wambamba ni Yehova mulong wa awiy. (Kubudik 20:18-21) Pakwez mu kusut kwa chisu, Moses kachirikap swa mu chibeng mwadingau antu. Chimeken anch antu ading apatamen kal mwi mpay pakad ntakel wau. Chom ik chasalau? Chimeken anch in Isarel amuchingejina nakash ntakel wa chiwuntu, Moses. Iyakamisha nakash ni amuleja Aron anch: “Tusadilap [nzamb] chakwel atutakela etu kurutu, mulong Moses ndiy kamu muntu watudiosha etu ku Idjibit, kitwijap chom ik chamutanyina kal.”—Kubudik 32:1, 2.
Mapit ma mu Spiritu
w06 1/9 paj 11 par. 9
Manans Majim ma Buku wa Kasatu ni wa Kanying wa Kuseng
Kuseng 106:36, 37. Maverse minam malondil anch kwifukwil akish kud chilik chimwing ni kuyilambul ayilembil. Chinech chimekeshin anch muntu ukata kusadil akish ukutwish kwikal ubachikinau kud usu wa ayilembil. Chawiy lel, Bibil ukasikeshin anch: “Iyepany, yichinany akish.”—1 Yohan 5:21.
RUBING RA 18-24 NGOND WA 11
YOM YA USEY YIDA MU DIZU DA NZAMB KUSENG 107-108
“Panany Kujikitish kudi [Yehova], Mulong Ndiy Udi Muwamp”
w07 1/5 paj 8 par. 2
Chikumangen Chimushimana Yehova
2 Chikumangen chidap kusu chisak cha antu akweta mulad kanang wa mwom. Chidap chisak cha arund asadining mujikit kanang muda antu a mikadil kampand ap akweta yisakin yimwing mu masengan ap mu kwipwish usweral pamwing. Pakwez, chikumangen chikwet cha kusambish rutong ra kumushiman Yehova Nzamb. Mwamu chidinga, mud muchilejenau mu buku wa Kuseng. Mu Kuseng 35:18 tutangin anch: “Nikakujikitishil mu kukumangan kujim, nikukushiman mukach mwa antu avud.” Chawiy chimwing kand, Kuseng 107:31, 32, utukasikeshin anch: “Amujikitish [Yehova] mulong wa rukat rend rudimukina, ni mulong wa yisalijok yend yikwamushena yayisadilay awiy. Chifanyidin amutumbisha mu kukumangan kwa antu, chifanyidin amushiman mu kukumangan kwa in kutakel.”
wp15 1/1 paj 8 par. 4
Mujikitishany Yehova ni Tambulany Yiyukish
4 Anch twasal usu wa kukudish mwikadil wa kujikitish ni kuulam mu muchim, tufanyidin kwitiy ni kutongijokin pa yiyukish yidiokila kud Yehova ni kushinshikin midimu yend yitentamina. Pasalay nfund a kuseng mwamu, washimoka mulong wa yom ya ufun yasalay Yehova.—Tang Kuseng 40:5; 107:43.
Mapit ma mu Spiritu
it-2 paj 303 par. 5
Mowab
Kupwa, pikalay David mwant, njit pakach pa in Isarel ni in Mowab jasambisha kand. In Mowab ayiyikela ni ading afanyidin kupan chitad kud David. Chimeken anch kupwa kwa kurish, yikunku yaad pa yisatu ya in Mowab yafa kwi njit. Pamwing ap David wayiladika pansh mu mulong wapimay kulep mulong wa kwijik uvud wa yikunku yaad pa yisatu yafanyinay kujip ni chikunku chimwing chafanyinay kusha. (2Sa 8:2, 11, 12; 1Jsng 18:2, 11) Pamwing ap pa chisu chinech pawiy ‘payijipau an amakundj aad a Ariyel mwin Mowab’ kud Benaja mwan ikundj wa Jehojada. (2Sa 23:20; 1Jsng 11:22) Kuyipandakan in Mowab kud David kwawanyisha uprofet walonday Balam wasambelay kulond kurutu kwa mivu 400 anch: “Katumbu ukez kabudik kud Jakob, mwant ukez kabudik mukach mwa in Isarel. Ndiy ukez kabuz mavumu ma in Mowab, ni kushesh an awonsu a in chisum.” (Kuch 24:17) Chimeken kand anch nfund a kuseng wisambina kuwin kwinoku palonday anch Nzamb wading umen Mowab mud ‘dilong dend da kwowadin.’—Kus 60:8; 108:9.
RUBING RA 25 NGOND WA 11–1 NGOND WA 12
YOM YA USEY YIDA MU DIZU DA NZAMB KUSENG 109-112
Mukwasha Mwant Yesu!
w06 1/10 paj 29 par. 6
Dizu dia Yehova Didi Diom
Manans Majim ma Buku wa Katan wa Kuseng
Kuseng 110:1, 2—Chom ik chadinga chisadilay Yesu Kristu ‘Nsalejend [a David],’ pashakamay ku chikas cha katatuku cha Nzamb? Kwinyim kwa kuvumbuk kwend, Yesu waya mwiur ni wachingela ku chikas cha katatuku cha Nzamb djat mu muvu wa 1914 pasambishay kuyikel mud Mwant. Pa chisu chinicha, Yesu wayiyikela in kwilej end azizidilau many, wayitakela mu mudimu wau wa kulejan ni wa kwikadish in kwilej pamwing ni kuyitenchik mulong wa kuyikel nend pamwing mu Want wend.—Mateu 24:14; 28:18-20; Luka 22:28-30.
w00 1/4 paj 18 par. 3
In Kumurishikish Nzamb Kakutwishap Kumupandakan!
3 Antu a Yehova ayirishikisha kusambish kamu kwinsambishil kwa yitot ya mivu 20. Mu jingand jivud, antu ading ni muchim uyimp asota kukangesh ap kujidik mudimu wa kulejan rusang ruwamp ra Want wa Nzamb. Mukankuny netu mujim Djabul ukata “kuzomb mudi ntambu wonyina ukata kukimb nany ukudiay” ndiy wayibachika kusal mwamu. (1 Pita 5:8) Papwa ‘chisu chayitekinau akamichid’ mu muvu wa 1914, Nzamb wamuteka Mwanend kwikal Mwant musu wa pa divu, ni wamwinkisha mbil anch: ‘Yang mukach mwa akankuny ney ukayiyikel.’ (Luka 21:24; Kuseng 110:2) Chawiy, Yesu wasadina usu wend mulong wa kumopat Satan mwiur, ni kumudjubul Satan pa divu. Mulong wij anch kumushadin ka chisu kakemp, Djabul ukat kuyimekeshin azizidilau many ni ambay nau ujim. (Kujingunik 12:9, 17) Kurishikish kwinoku kwamurishikishau Nzamb tupamp tuvud kwikala ni yibudikin ik?
be paj 76 par. 2
Sal Usu wa Kuya Kurutu
Kutukasikesh kusadin ukaliweny wetu, kukwet kand chitongijok cha kukwat mupak wa kusal chom kanang. Ov, wakwatinap kal mupak wa kutenchik kuya mu mudimu wa kulejan nau antu akwau? Ov, ukat kukimb mutapu wa kuyikwash antu ada asu mu chikumangen, ap ansand ni ayilim? Ov, ukat kwipan kwa kwisotin mulong wa kwinangish Chot cha Want ap kukwash mu mutapu kanang ku yitentam? Ov, ukat kwipan chisu ni chisu mulong wa kusal mud chibol nkwash? Ov, ukutwish kusal mud chibol wa rawonsu ap kuya kukwash chikumangen chikweta kuswir kwa ukwash? Anch ud mukadivar, ov, ukat kusal usu wa kuwanyish yom yitinau mu Mifund mulong wa kwikal nkwash a mudimu ap mukurump? Anch ukwet rusot ra kukwash ni kwitiy yisend, umekeshin anch uyil kurutu.—Kus. 110:3.
Mapit ma mu Spiritu
it-1 paj 80 par. 4
Mansuk
Mansuk Mulong wa Kwikal Mwin Kupesh Mud Melikisedek. Mansuk minam amisambidin mu Kuseng 110:4, ni mwin kufund wa buku wa Hebereu wamasadina piur pa Kristu mu Hebereu 7:1-3, 15-17. Mad mansuk masukay Yehova nend Yesu kusu kwapwa. Chimeken anch Yesu wading ulondin piur pa mansuk minam chisu chasukay mansuk mulong wa want pamwing nau in kwilej end. (Luk 22:29) Kusutin machip ma Yehova, Yesu Kristu, Mwan wa mwiur wa Nzamb wafanyina kwikal mwin kupesh mud mwadingay Melikisedek. Melikisedek wading mwant ni mwin kupesh wa Nzamb pa divu. Yesu Kristu wafanyina kusal mud Mwant ni Mwin Kupesh Mujim, kadap pa divu, pakwez mwiur. Watambula chisend chinech chikupu kupwa kwa kuchirik mwiur. (Heb 6:20; 7:26, 28; 8:1) Mansuk minam makusal chikupu, mulong Yesu ukusal mud Mwant ni Mwin Kupesh Mujim chikupu ni chikupu mwinshin mwa umutakel wa Yehova.—Heb 7:3.
RUBING RA 2-8 NGOND WA 12
YOM YA USEY YIDA MU DIZU DA NZAMB KUSENG 113-118
Mutapu ik Tukutwisha Kumujikitish Yehova?
w01 1/1 paj 11 par. 13
El Rukat Ritukasikeshany
13 Mazu ma Yesu mamekeshin kamu anch tufanyidin cha kusambish kamu kumukat Yehova. Pakwez, tukatap kuvadik nich rukat rakudina kal mulong wa Yehova. Chid chom tufanyidina kukudish. Kapamp ka kusambish twatesha piur pa Yehova, yom twatesha yawiy yatupwitina kuday ndiy. Pakemp pakemp, twileja mutapu warijekay divu mulong wa antu. (Disambishil 2:5-23) Twileja mutapu wayisadinay antu, kayidjubulap pandama chitil mu dijuku da antu, pakwez watenchika mutapu wa kuyikwol. (Disambishil 3:1-5, 15) Wayanakena antu ading amushinshamedina, ni kupwa wapana Mwanend kapokal mulond wa dilikishin da yitil yetu. (Yohan 3:16, 36) Padandamena ronganyin riner kukul, kujikitish kwetu kud Yehova kwadandamena nikwawiy kukul. (Isay 25:1) Mwant David walonda anch wading umukatin Yehova mulong wa kubangin kwend kwa rukat. (Kuseng 116:1-9) Nlel, Yehova ukat kutubangin, kututakel, ni kutukasikesh. Anch twadandamen kwilej piur pend, rukat retu mulong wendendiy rikukul.—Kuseng 31:23; Sofoniy 3:17; Rom 8:28.
w09 1/7 paj 30-31 par. 4-5
Itiyijany ni Kujikitish Panany ni Muchim Wen Wawonsu
Mwin kufund kuseng wadinga ni kutong anch: ‘Nikumuchirishin Yehova ik ku yom yawonsu yiwamp yansadilay?’ (Kuseng 116:12) Chom ik chataninayimu? Yehova wamukasikesha pachisu chadingay mu “mar mavud ni runeng.” Chawiy kand, Yehova “waukamunina mupim [wend] ku rufu.” Katat, ndiy ukat “kumuchirish” Yehova mu mutapu umwing ap ukwau. Chom ik chatwishay mwin kufund kuseng kusal? Ndiy walonda anch: “Nikamufut [Yehova] machip mam.” (Kuseng 116:3, 4, 8, 10-14) Ndiy wakwata mupak wa kulam ya kushilamu yawonsu yamushena yamukanay Yehova ni kuwanyish yom yawonsu yamwitay.
Ni yey ukutwish kusal mwamu. Mutapu ik? Mu kulondulang chisu chawonsu yijil ni mbil ya Nzamb mu mwom. Chawiy lel, ikal nich kashinsh anch difukwil diey kudiay Yehova dikwet usey ujim mu mwom wey ni anch spiritu wa Nzamb ukutakedil mu yom yawonsu usadila. (Mulej 12:13; Galatia 5:16-18) Chakin kamu, kwikil chiukutwisha kumusadil Yehova mulong wa yom yawonsu yakusadilay kal. Chikalap nchik mwamu, chikat ‘kuusangaresh muchim wa Yehova’ pa kuman anch ukat kwipan ni muchim wey wawonsu mu mudimu wend. (Jinswir 27:11) Kudi kwitapil dilau dijim mudi ik pa kumusangaresh Yehova mu mutapu winou!
Malejan Tukutwisha Kwilejin ku Mukand wa In Levi
9 Dilejan da kaad: Mulong tud in kujikitish chawiy tumusadidina Yehova. Ukwilej dilejan dined patushinshikidina yakupesh ya mulambu wa chisambu yapanangau in Isarel a pasak. Mu mukand wa In Levi, twilejin anch mwin Isarel wafanyina kupan yakupesh ya mulambu wa chisambu “mulong wa kujikitish.” (Lev. 7:11-13, 16-18) Wapanang mulambu winou, kadap mulong chading chimufanyidin kusal mwamu, pakwez mulong wading ukatin kusal mwamu. Chawiy wading mulambu wa kwisotil wapanangay muntu mulong wading umukatil Nzamb wend, Yehova. Muntu wapanang mulambu, dijuku dend ni in kupesh afanyina kuda mbij ja annam apeshilau. Pakwez yid yimwing ya nnam ayipeshang ching kusu kud Yehova. Yid ik?
10 Dilejan da kasatu: Rukat rawiy ritubachikina kumusadin Yehova nich muchim wawonsu. Yehova wamanang yises ya many ma nnam mud chikunku chiwamp nakash. Walonda kand anch yikunku yikwau ya nnam mud makund yading ni usey wa pakampwil. (Tang In Levi 3:6, 12, 14-16.) Chawiy Yehova wasangarang nakash anch mwin Isarel wapesh kwa kwikatin yid ya usey nakash ni yises ya many. Mwin Isarel wapeshang yom yiney wamekeshang anch wading ni impu ya kupan yom yend ya usey kud Nzamb. Chilik chimwing, Yesu wapana kud Yehova kwa kwikatin yom yend ya usey kusutil kumusadin nich muchim wend wawonsu mulong wading Umukatin. (Yoh. 14:31) Yesu wasangerang nakash kusal rusot ra Yehova; wading ukatin nakash yijil ya Nzamb. (Kus. 40:8) Yehova wasangara kamu nakash pa kumuman Yesu ukat kumusadil kwa kwikatin!
11 Mud muchading piur pa yakupesh ya mulambu wa chisambu, mudimu wetu kud Yehova ud wa kwisotin mulong wa kumekesh mutapu twiyovila piur pend. Tukat kumwinkish Yehova yom yetu ya usey, ni tukat kusal mwamu mulong tumukatin nich muchim wetu wawonsu. Musangar mud ik ufanyidinay kwikal nich Yehova pa kuman ma miliyon ma in kumwifukwil kwa kwisotil makat kumusadin mulong amukatin ni akatin jinjil jend! Tukutwish kwikal akasikeshinau kusutil kuvurik anch, Yehova umen ni ukwatin nich usey kadap ching kusu kwau yom yawonsu tusadina pakwez kand yibachikin yetu. Chilakej, anch wananapin kal ni utwishinap kand kusal yom yivud mud mutapu ukatina, ikal nich kashinsh anch Yehova umen mimbu yey. Pamwing ap wiyovil anch usadinap yom yivud mu mudimu wa Yehova, pakwez Yehova umen rukat rey rikurikina rikubachikina kusal yom utwishina kusal. Usangaredin yom yawonsu usadina kukwatijan ni usu wey.
Mapit ma mu Spiritu
w12 15/5 paj 22 par. 1-2
Yipul ya in Kutang
Nfund a kuseng umwing wapepilau wawanga anch: “Rufu ra in kwitiy rukwet usey kurutu kwa [Yehova].” (Kus. 116:15) Yehova ukwatin nich usey nakash mwom wa in kumwifukwil end akin. Pakwez, verse winou kisambidinap rufu ra muntu ni muntu panrend.
Anch asadin diskur da chidil, chiwanyidinap kusadin Kuseng 116:15 piur pa muntu wafang, ap anch muntu wafang mud kashalapol ushinshamena wa Yehova. Mulong wak? Mulong mazu ma nfund a kuseng marumburikin yom yivud. Marumburikin anch kud Nzamb, mwom ya atushalapol end ashinshamena awonsu yid ya usey nakash ni kakatap kukatish ap pakemp anch afa.—Tal Kuseng 72:14; 116:8.
RUBING RA 9-15 NGOND WA 12
YOM YA USEY YIDA MU DIZU DA NZAMB KUSENG 119:1-56
“Mutapu ik Ukutwisha Nsand Kulam Njil Yend Yishitwila?”
w87 1/11 paj 18 par. 10
Ov, Ushadinany Ishitwila mu Jinjil Jawonsu?
10 Paul wababeshana mu Efes 5:5 anch: ‘Mulong wijany chom chinech, wijany nawamp ayinen, anch kwikil muntu ukata kusal yisal ya masandj ap muntu wijondila ap mwin ris, charumburik anch mwin kwifukwil yirumbidij, ukuswana Want wa Kristu ni wa Nzamb.’ Pakwez, muvu ni muvu, akat kwopat tunan twa akadivar ni anambaz mulong wa yisal ya masandj, chitil cha ‘kurumbukin mijimbu.’ (1 Korint 6:18) Yisu yivud, yom yiney yid chibudikin cha kulik “kulam dizu da [Nzamb].” (Kuseng 119:9) Chilakej, akadivar avud akat kupipej kushinshikin mwikadil wau chisu cha konje. Akat kupipej yikumangan ni akat kuta urund wa piswimp ni antu akad kwikal atushalapol a Yehova, adau nau mu konje. Kusutin kutong anch antu inay ad ‘kwau antu awamp,’ in Kristu amwing ibomba nau mu mijikit yakad kuwanyin. Mutapu wawiy umwing, antu akwau apwil kal mwijidish nakash ni ambay nau a ku mudimu. Mukurump wa chikumangen umwing wata urund ni mbay nend wa mudimu mband, ni washikena kuchin dijuku dend mulong wa kuya kushakam ni mbay nend wa mudimu winou! Mud chibudikin, amopata mu chikumangen. Chakin kamu, mazu ma Bibil malondina anch: “Arund ayimp akat kuyipish yaku yiwamp” mad kamu makin!—1 Korint 15:33.
w06 1/7 paj 17 par. 1
“Malejan Mey Mawiy Musangar Wam”
YEHOVA wayinkisha antwend malejan mulong wa kuyikwash kurish ni yikokujol pa yisu yikash. Mamwing ma malejan minam makat kumekan pa chisu utangina Bibil, makwau makat kudokal ku yom uteshina ku yikumangan ap ku yakul ya akadivar nau anambaz. Yom yivud yitukata kutang ap kutesh pa yisu yiney yidingap yisu kud etu. Pamwing ap twashinshikidinap kal nsang ja mutapu winou. Pakwez, mulong tukat kuvuramenang, tuswirikedin chisu chawonsu kuvurish manang metu piur pa ntong ja Yehova, yijil yend ni malejan mend. Tufanyidin kusanger malejan ma Nzamb. Makat kutukasikesh kusutil kutukwash kudandamen kutek manang metu pa mayingishin makata kutubachik kwikal nich mwom ukwatijadina nich rusot ra Nzamb. Chawiy, nfund a kuseng wamuwangila Yehova anch: “Malejan mey mawiy musangar wam.”—Kuseng 119:24.
w10 1/4 paj 24 par. 2
Diosh Mes Mey Ku Yom Yamwamu!
2 Pakwez, yitutadina yikutwish kutusal nayimp. Urund udia pakach pa mes ni manangu metu udi ukash nakash chawiy lel yitumena yikutwish kutakel ap kukasikesh yitutongina ni yitusotina mu muchim wetu. Mulong tudi mu mangand mijondila ni makwisangarish matakedilau kudi Satan Djabul, utulejin yom ni jinsangu jikutwisha kutudiosh mwinjil yiwamp—ap anch tuyitadil kwetu kapamp kamwing. (1 Yoh. 5:19) Chidiap cha kushimok, pakuman mutapu nfund a kuseng wamulembilay Nzamb anch: “Ndioshap mes mam ku yom yamwamu, chakwel mwom wam wikala wa kwendil mwi njil yey.”—Kus. 119:37.
Mapit ma mu Spiritu
w05 15/4 paj 10 par. 2
Chingejin mu Dizu da Yehova
2 Chitongijok chijim chida mu Kuseng 119 chimedin pa usey wa dizu da Nzamb. Pamwing ap chakwel antu atwisha kulam nawamp mu manang mazu ma kuseng winou, mwin kufund wamufunda mud muminy ufundinau kulondwish mutapu ulondulijadina mamuny ma alufabe. Ma verse mend 176 malondwil mutapu ulondulijadina mamuny ma alufabe wa Hebereu. Mu Hebereu wa pakur, yitongijok 22 ya kuseng winou ayilongin mu mifund 8 yisambishina ni dimuny da mutapu umwing. Kuseng winou wisambidin piur pa dizu da Nzamb, chijil, yivurish, jinjil, mbil, ni umutakel. Mu mutu wa mulong winou, ni ukwau ukwambakenap, tukwisambin Kuseng 119 kukwatijan ni dikarumun dilimishina Mifund ya Bibil ya Hebereu. Tukushinshikin yom yayishikena atushalapol a Yehova a pasak ni a chirung chetu, ni yom yiney yikutukwash kutesh chad nawamp muminy winou wapepilau, ni chinech chikutubachik kujikitish nakash mulong wa Dizu da Nzamb dafundau, Bibil.
RUBING RA 16-22 NGOND WA 12
YOM YA USEY YIDA MU DIZU DA NZAMB KUSENG 119:57-120
Mutapu wa Kujijamen Mar
w06 1/7 paj 12 par. 2
“A, Mudi Nikatila Yijil Yey!”
2 Ukutwish wiyipul anch, “Ov, mutapu ik chijil cha Nzamb chela kwikal musul wa rongoj kudiay nfund-a-kuseng?” Chom chamukwasha chadinga ruchingej anch Yehova ukat kumubangin. Kwisakin yiyukish ya kuziyil ku chijil chapanay Nzamb nich rukat kwamusangaresha nfund-a-kuseng, chikalap nchik mar mamumeshau kud akankuny nend. Ndiy wajingunina anch Yehova wadinga ni kumukwash. Chikwau kand, kusadil umutakel wa chijil cha Nzamb kwamwinkisha nfund-a-kuseng manangu kuyipandakanamu akankuny nend ni kwamupandisha. Kuziyil ku chijil kwamuletina chisambu ni kom katok.—Kuseng 119:1, 9, 65, 93, 98, 165.
w00 1/12 paj 14 par. 3
Ov, Ukatin Chipandakena Yivurish ya Yehova?
3 Nfund a kuseng umwing wading ukatin nakash yivurish ya Yehova, chawiy wawanga anch: “Niswakal kulam yijil yey, kinikulabab, bwat. Anch nafa mu mupit wa antu ayimp, kinikuvuramenap yijil yey.” (Kuseng 119:60, 61) Yivurish ya Yehova yikat kutukwash kujijamen kuzengol mulong tukwet kashinsh anch Tatukwetu wa mwiur ukutwish kukatul moj yitutidinau akankuny netu mulong wa kutuwish. Pa chisu chiwanyidina, ukat kutukamunin mu yikangesh yiney chakwel tutwisha kusal mudimu wetu wa Kulejan Want.—Marko 13:10.
w06 1/10 paj 30 par. 4
Manans Majim ma Buku wa Katan wa Kuseng
Kuseng 119:71—Ov, chitwishikin nchik kwikal chiwamp kuman mar? Mar makutwish kutulej mutapu wa kumuchingejin ching Yehova kusu, kumulembil nakash, ni kwikal nich mushiku nakash mu kwilej Bibil ni kusadil yilondilay. Chikwau kand, kwitiyij ap kulik mar kukutwish kujingunin yilim ya untu wakad kuwanyin yifanyidina kutenchik. Tukezap kwov kusansan kukash kwa mar anch twakulik kutuwapisha.
w17.07 paj 10 par. 3, 5
‘Dilany Nau Antu Adidina’
3 Tatukwetu wa ranaken Yehova, udi muntu ukata kutwinkish rongoj tuswirikedina. (Tang 2 Korint 1:3, 4.) Ndiy udia chilakej chijim cha ranaken, ni uyikanin antu end anch: “Am yam mwin kukwongojany.”—Isay 51:12; Kuseng 119:50, 52, 76.
5 Tukutwish kwikal kamu ni kashinsh anch Yehova ukutukwash. Tufanyidin kumulembil Yehova yisu yawonsu ni kumulej runeng ni ushon tukweta. Chikasikeshin mudi ik kwijik anch Yehova wij nawamp yovil yetu ni utwinkishin rongoj tuswirikedina! Pakwez mutapu ik usadiningay mwamu?
Mapit ma mu Spiritu
w06 1/10 paj 30 par. 5
Manans Majim ma Buku wa Katan wa Kuseng
Kuseng 119:96—Mazu ‘Nsudiel ya kuwanyin kwa yom yawonsu’ marumburikin ik? Nfund a kuseng wisambidin kuwanyin mu kuman kwa antu. Wadinga wij anch chitongijok cha muntu piur pa kuwanyin chikwet mimbu. Pakwez, yijidik ya Nzamb yikwetap mimbu. Umutakel way usadil ku milad yawonsu ya mwom. Bibil umwing (New International Version) ulondil mazu minam anch: “Namana nsudiel ya kuwanyin kwawonsu, pakwez yijidik yid yakad mimbu.”
RUBING RA 23-29 NGOND WA 12
YOM YA USEY YIDA MU DIZU DA NZAMB KUSENG 119:121-176
Mutapu wa Kwipuk Kusansan kwa Chamwamu
El Yiyil ni Mbil ja Nzamb Jifumba Kom Key
5 Anch tusotin anch yijil ya Nzamb yitukwasha, tufanyidin kusal yivud kusutamu kwau ching kutang ap kwijik yiyil yiney. Tufanyidin kuyikat ni kuyilimish. Bibil utulejin anch: “Kisany yom yiyimp, katany yom yitentamina.” (Amos 5:15) Pakwez mutapu ik tukutwisha kusal mwamu? Tufanyidin kwilej kuman yom mud muyimeningay Yehova. Tong bil piur pa chom ech. Tong anch walalangap nawamp chad dokiter wey wakwinkish mbil anch ufanyidin kuda nawamp, kwiyijidish ni kuswimp yom yikwau mu mashakamin mey. Mu kusadin chiyul chend, waman kamu anch chakukwash kal! Mutapu ik ukumana mbil jikwinkishinau kud dokiter?
6 Chilik chimwing, Sakatang wetu watwinkisha yijil mulong wa kutuchidij ku yibudikin yiyimp ya chitil ni kuwapish mwom wetu. Chilakej, Bibil utufundishin anch tufanyidinap kudimban, kwiy ku shikol, kwiy, kusal masandj, kwikal ni chisum ap kwikal ni chom chin chawonsu chida mu umwing nau ayilembil. (Tang Jinswir 6:16-19; Kujingunik 21:8) Anch twaman yibudikin yiwamp yidokila ku kumuziyin Yehova, rukat retu mulong wendendiy ni mulong wa yijil yend rikat kupam.
w93 15/4 paj 17 par. 12
En Ansand—Yom ik Ukimbinanya mu Mwom?
12 Kupandakan yom yawonsu, ufanyidinany kwilej kukis yom yiyimp, kuyiman mud yitakanen. (Kuseng 97:10) Mutapu ik ukutwishanya kukis yom yimekena kwinsambishin anch yid yiwamp ap yisangareshina? Chid kusutin kutongijokin pa yibudikin yikutwisha kwikalaku! “Kangal kwidimbany ayinen, mulong kwikil muntu ukutwisha kumudimb Nzamb. Yikukunay muntu, yawiy yikez kwangulay. Anch muntu wakun yom ya rusot ra wuntu, ndiy ukez kwangul kusheshik.” (Galatia 6:7, 8) Anch choziu chakubachik kusangaresh maku ma mujimbu, tongijokin pa chibudikin chipandakena kujimb—mutapu ukumunenganesha Yehova Nzamb. (Ilakej ni Kuseng 78:41.) Tongijokin kand pa yibudikin mud madikaj makad kutongin, ap kand mayej, mud SIDA. Kupwa tongijokin pa yovil yisansena ukutwisha kwikal nich ni kwiyov mud muntu wa chamwamu. Kukutwish kand kwikal yibudikin yikutwisha kushal chisu chilemp. Mband umwing mwin Kristu ulondin anch: “Am ni nfumwam twalalijana kurutu kwa kwatijan. Ap anch etu awonsu tud in Kristu nlel, yom twasala yid katat musul wa kupwitamijan ni wa mukau mu uruw wetu.” Kangal kand wavuramen anch ukutwish kushadish yisend yey mu mudimu wa Nzamb, ap akutwish kukopat mu chikumangen cha win Kristu! (1 Korint 5:9-13) Ov, chid cha manang kwisangaresh mu kachisu kakemp mulong wa kwikal ni yibudikin yawonsu yiney?
Mapit ma mu Spiritu
w23 01 paj 2 par. 2
Ikal Nich Kashinsh Anch ‘Mazu ma Nzamb Miminy pa Uyakin’
2Mulong tud atushalapol end, tukwet kashinsh anch Yehova ud “Nzamb wa uyakin” ni ukatin chisu chawonsu kutusadin yom yiwamp. (Kus. 31:5; Isay 48:17) Twij anch tufanyidin kuchingejin yom yawonsu tutangina mu Bibil—mulong “mazu mawonsu [ma Nzamb] miminy pa uyakin.” (Tang Kuseng 119:160.) Twitiyijin yom yalonday mwin kwilej milong ya Bibil umwing anch: “Kwikil chom ap chimwing chalonday Nzamb chidia cha makasu ap chikulika kuwanyin. Antu a Nzamb itiyijin anch yom yalonday yid yakin, mulong Nzamb ndiy wapepila yom tutanina mu Bibil.”
RUBING RA 30 NGOND WA 12–5 NGOND WA 1
YOM YA USEY YIDA MU DIZU DA NZAMB KUSENG 120-126
Akuna Nich Mansoj, Pakwez Angula Nich Musangar
w04 1/6 paj 16 par. 10
Ayukina Ad Antu Akata Kumutumbish Nzamb
10 Pitukata kusend mpand ya in kwilej a Yesu, tukat kurish ni Satan. Jakobu 4:7 ukanin anch: “Rishany nend Sakudimban, chad ndiy ukukuchinany kulemp.” Chinech chirumburikinap anch kusal mwamu kuswapel. Kumusadin Nzamb kwitin usu nakash. (Luka 13:24) Pakwez Bibil uletin kushilamu oku mu Kuseng 126:5 anch: “Antu akata kukun nich mansoj, akwangul nich miminy ya musangar.” Chakin kamu, tumwifukwidinap Nzamb wakad kujikitishang. Mulong “ukat kufutan kuwap kudi antu awonsu akata kumusurab,” ni ukat kuyiyukish antu akata kumutumbish.—Hebereu 11:6.
Mutapu ik Ukutwisha Kukasikesh Ritiy Rey?
17 Ov, ud mu chidil cha mukatish ney wafila? Itekina chisu cha kukasikesh ritiy rey mu ruchingej ra divumbuk, kusutin kutang nsang ja Bibil ja antu avumbulau. Ov, unenganen mulong wa mwanamakwey wa mu dijuku wopatinau? Ileja chakwel wikal nich kashinsh anch mutapu wa kupup wa Nzamb uding yisu yawonsu uwamp. Chikalap nchik mulad wa mar urishina nich, sadin chishiken chinech mulong wa kukasikesh ritiy rey. Mufungwila Yehova muchim wey. Kangal wiyauril nau akadivar ni anambaz ney. (Jnsw. 18:1) Ipana mu midimu yikutwisha kukukwash kujijaman, ap anch chikwitin kusal mwamu ni mansoj ku mes. (Kus. 126:5, 6) Lam chaku chey cha kukumangan, kwipan mu mudimu wa kulejan, ni kutang Bibil. Ni dandamen kushinshikin pa yiyukish yipandakena kuwap yakukaninay kal Yehova. Piumena mutapu ukukwashinay Yehova, ritiy rey muday ndiy rikukasikan.
w01 15/7 paj 18-19 par. 13-14
Dandamenany mu Mudimu wa Kwangul!
13 Mazu mada mu Kuseng 126:5, 6 makat kuyikasikesh in kwangul a Nzamb, nakash pa chisu chiyizengodinau. Ulondin anch: “Antu akata kukun nich mansoj, akwangul nich miminy ya musangar. Antu akata kuya nich mansoj ku mes pa kusend mbut ja kukun, akuchirik nich miminy ya musangar pakwangulau.” Mazu ma nfund a kuseng misambidina piur pa kukun ni kwangul makwatijadin ni yom yasalay Yehova pakur mulong wa in Yuda ashalaku abudika mu winkwal mu Babilon. Ap anch asangara mulong ayikola, pamwing ap in Yuda adilang mansoj padimangau yiputu yashala yakad kudim mu mivu 70 yasalau mu winkwal. Pakwez, antu adandamena mudimu wa kukun ni wa kutunguril ikala ni musangar pamanau yibudikin yiwamp ya mudimu wau ukash.
14 Tukutwish kupwekish mansoj ku mes chisu turishina ni chikokujol ap chisu tumena etu ni ambay netu mar mulong wa kutentam. (1 Pita 3:14) Kwinsambishin kwa mudimu wetu wa kwangul, tukutwish kuman anch chitukasikedin anch twaman mud usu tusadina ud kwau wa chamwamu. Pakwez anch twadandamen kukun ni kwichil mem, Nzamb ukupamish, ni yisu yivud mu mutapu twakad kuchingejin. (1 Korint 3:6) Wawiy uyakin umekena kusutin yibudikin ya mudimu wa kupalangesh Bibil ni mikand yimedina pa Bibil.
Mapit ma mu Spiritu
Usu wa Kuchidij—“Nzamb Ndiy Kwikang Kwetu”
15 Tushinshikinany chakusambish mulong utadina diking dia kumujimbu. Chitudia in kwifukwil a Yehova, tukutwish kuchingel diking dia mutapu winou mu chikumangen chetu chawonsu. Chikwau, tufanyidin kwikal tayad chakwel tulembilang mulong wa Satan. Tutongijokinany bil pa mulong winou: Satan, “mwin kutakel wa mangand minam,” usotin kusal chom kanang cha- kwel ashesha difukwil diakin. (Yohan 12:31; Kujingunik 12:17) Maguvernema mamwing masutinamu usu panap pa mangand malikisha mudimu wetu wa kulejan ni mapakisha kutushesh shitit. Chikalap nchik mwamu, etu atushalapol a Yehova twajijamana ni twadandamena kulejan pakad kulik! Ov, mulong wak michid yatwishap kwimik mijikit yiney ya in Kristu akemp chisu chamekanau anch aburedin diking dia chikumangen cha in Kristu? Mulong Yehova watukinga mu rikibu rend ra usu!—Kuseng 17:7, 8.