Kuvadik Muntu Musu Ov, Diawiy Dipandish?

UKWAKUL nchik ku chipul chinech: “Ov, wavadikin kal kwikal muntu musu?” Mamiliyon ma antu mu mangand mawonsu akwiling kamu nich usu wawonsu anch: “Mwaning!” Awiy itiyijining anch kuvadik kapamp kakwau chiding chijingidij cha in Kristu awonsu akin ni yawiy njil yimwing kusu ya dipandish. Itiyijin chitongijok cha amakurump a chirelijon mudi cha Robert C. Sproul, wileja teoloji, ni wafunda anch: “Anch muntu kavadikinap kwikal muntu musu, . . . komb kadiap mwin Kristu.”

Ov, udi umwing wa antu itiyijina anch, kuvadik kapamp kakwau kwawiy ku kukutwishikisha wikala mwinjil ya dipandish? Anch mwawiy, ukwidjidjekap kuyikwash anamakwey ni arund ney chakwel niyawiy ayimana njil yiney ni endinamu. Pakwez, chakwel anch niyawiy asala mwamu, aswirikedin kutesh kurumburik kwa kushalijan kudia pakach pa muntu uvadikina kapamp kakwau ni muntu wakad kuvadik kapamp kakwau. Chawiy lel, mutapu ik ukutwisha kuyirumburil chirumburikina kuvadik kapamp kakwau?

Antu avud itiyijining anch mazu “kuvadik kapamp kakwau” misambidin piur pa muntu washilamu kumusadil Nzamb ni Kristu ni, mudi chibudikin, ukupand ku rufu ra muspiritu ni wikal mwom muspiritu. Chakin kamu, ndinguril umwing wa katat umurumburil muntu wavadika kapamp kakwau mudi: “mwin Kristu wikadila kal muntu musu ni wakasikeshina kushilamu kwend kwa ritiy, pakampwil kupwa kwa kwikal nich ronganyin rijim ra relijon.”—Merriam-Webster’s Collegiate Dictionary—Eleventh Edition.

Ov, ukukashimuk anch wilej anch Bibil kitiyijinap yilondilay ndinguril winou? Ov, ukusot kwijik chom ik chakin chilejena Dizu dia Nzamb pa mulong wa kuvadik kapamp kakwau? Chakin kamu ukutaninamu anch washinshikin nawamp pa mulong winou. Mulong wak? Mulong kwovu kurumburik nawamp kwa chirumburikina kuvadik kapamp kakwau kukez kwikal nich usu pa mwom wey ni piur pa yom yiuchingejina mulong wa machuku ma kurutu.

Chom Ik Chifundishinay Bibil?

Ndond yimwing kusu mu Bibil mudia mazu “kuvadik kapamp kakwau” yidi mu Yohan 3:1-12, mwisambidinau minsamb yisangareshina yadingay nich Yesu ni mukurump wa relijon mu Yerusalem. Ukutan rusangu riner rawonsu mu mushet ulondwilaku ou. Tukwitin uritanga nawamp win kamu.

Mu rusangu riner, Yesu wakasikeshina mitapu kushalijan piur pa ‘kuvadik kand asu.’a Chakin, minsamb ya Yesu yitukwashin kwakul ku yipul ey yitan ya usey:

◼ Kuvadik muntu musu kukwet usey ik?

◼ Kuvadik muntu musu udi mupak wa muntu amwinend?

◼ Kuvadik muntu musu kukwet rutong ik?

◼ Mutapu ik uvadikiningay muntu musu?

◼ Kuletining kukarumuk kwa mutapu ik?

El tushinshikinany yipul yiney chimwing ni chimwing.

[Mazu madia kwishin kwa paj]

[Kamushet/​Chipich chidia pa paj wa 4]

“Uwapidilany Kuvadik Asu”

“Katat kwading muntu wa Afaris, dijin diend Nikodemus, mukurump wa pa mitu ya Ayuda. Ndiy weza kudi Yesu uchuku wamwel anch: Mulej, etu twij anch ey udi mulej wadiokala kudi Nzamb; mulong kwikil muntu ukutwisha kusal yilay yiukata kusal ey ching anch Nzamb udi nend. Yesu wamwakul wamwel anch: Chakin chakin nakulej anch, Ching muntu wavadik musu, chamwamu kakutwiship kuman want wa Nzamb. Nikodemus wamwel anch: Muntu ukutwish nchik kumuval kand pakunanapay? Ndiy ukutwish kwandam kapamp ka chaad mwivumu mwa makwend ni kumuval kand? Yesu wakul anch: Chakin chakin, nalond kudi ey anch, Ching muntu wavadik ku mem ni [spiritu], chamwamu kakutwiship kwandam mu want wa Nzamb. Chivadikina kwi mbij chidi mbij, ni chivadikina ku [spiritu] chidi [spiritu]. Kangal washimok chinakuleja anch uwapidilany kuvadik asu. Rinkind rikat kupepitil kurusotila, ukat kwov chonyin chend, pakwez kiwijip kurikata kwez ap kurikata kuya; mwamu kand mudiay mwawonsu uvadikina ku [spiritu]. Nikodemus wamwel ndiy anch: Yom yiney yikwikal nchik? Yesu wamwakula wamwel anch: Ey yey mulej wa Isarel, ni yom yiney kiyikat kukurumburik kwey? Chakin chakin nakulej ey, Tukat kulond yitwija, ni kulejan yitwamana; en kiukat kwakanyip uman wetu. Anch nakulejany yom pansh en kiukwitiyanyip, ing ukwitiyany lel nchik anch nakulejany yom ya mwiur?”—Yohan 3:1-12.

Kuvadik Muntu Musu Kukwet Usey Ik?

MU MINSAMB yend yawonsu ni Nikodemus, Yesu wakasikeshina anch kuvadik muntu musu, ap anch kuvadik kapamp kakwau, kudi kwa usey nakash. Mutapu ik wachovikeshay zwang?

Shinshikin mutapu wakasikeshinay Yesu mu minsamb yend ni Nikodemus usey wa kuvadik kand muntu musu. Ndiy walonda anch: “Ching muntu wavadik musu, chamwamu kakutwiship kuman want wa Nzamb.” (Yohan 3:3) Mazu “ching” ni “chamwamu” makasikeshidin usey wa kuvadik muntu musu. Chilakej, anch muntu walond anch: “Ching anch muten wabudik, chamwamu kukwikalap kutok,” chirumburikin anch kubudik kwa muten kudi kwa usey chakwel kwikala kutok. Chawiy chimwing, palonday Yesu anch kuvadik kwikal muntu musu kudi kwa usey chakwel “kuman want wa Nzamb.”

Chawiy kand, mudi anch kusot kudiosh kwidjidjek piur pa mulong winou, Yesu walonda anch: “Uwapidilany kuvadik asu.” (Yohan 3:7) Choviken patok kukwatijan nich mazu minam ma Yesu, kuvadik kand muntu musu chidi chom chitinau—mulong wa “kwandam mu Want.”—Yohan 3:5.

Yesu wamana anch kuvadik muntu musu kudi kwa usey nakash, in Kristu afanyidin kwikal nich kashinsh anch ovil nawamp kurumburik kwa mulong winou. Chilakej, ov, utongin anch mwin Kristu ukutwish watond amwinend chakwel avadika muntu musu?

[Tablo wa jinsangu udia pa paj wa 5]

“Ching anch muten wabudik chamwamu kukwikalap kutok”

Kuvadik Muntu Musu Ov, Udi Mupak wa Muntu Amwinend?

OV, NANY ukata kusal chakwel muntu avadika musu? Padingay ni kuyikasikesh in kumutesh chakwel ikala in Kristu avadikina kwikal antu asu, in kulejan amwing ajimbwiling mazu malonday Yesu anch: “Uwapidilany kuvadik asu.” (Yohan 3:7) In kulejan inay akat kusadil mazu minam mu mutapu wa kushindil, alondininga anch, “Vadikany antu asu!” Chawiy, awiy alejening anch udi mulong wa muntu ni muntu witiyijina kumuziyil Yesu chakwel akwata mipak ya usey chakwel avadika muntu musu. Kukwatijan nich kutong kwinoku, kuvadik muntu musu udi mulong umutadila muntu ni muntu amwinend. Ov, chitongijok chinech chikwatijadin nich yom yamulejau Nikodemus kudiay Yesu?

Kutang nich kushinshikin nawamp mazu ma Yesu kulejen anch Yesu kalejanap anch udi mulong wa muntu ni muntu chakwel atonda amwinend anch usotil ap bwat kuvadik muntu musu. Ov, mulong wak tulondila mwamu? Mazu ma Grek makarumwinau anch “muntu wavadik musu” chitwishikin kand kumakarumun anch, “ufanyidin kuvadik mwiur.”a Chawiy lel, kukwatijan nich mutapu winou wa kaad wa kukarumun, kuvadik muntu musu kudiokiling “mwiur”—charumburik anch “kudiokal kudi Tatuku.” (Yohan 19:11; Yakob 1:17) Mwaning, Nzamb ndiy ukata kusalang chakwel muntu avadika musu.—1 Yohan 3:9.

Anch twavurik dizu kudiokal “mwiur,” chidiap chikasikena kutesh kurumburik mulong wak muntu kakutwishap wasal amwinend chakwel avadika musu. Tongin bil mutapu wavadika ku mujimbu. Ov, yey amwiney watonda chakwel ushikena ku kuvadik? Bwat! Wavadika chidi mulong tatukwey ndiy wasala anch uvadika. Chawiy chimwing, tukutwish twavadik asu ching anch Nzamb, Tatukwetu wa mwiur, wasal anch tuvadika muntu musu. (Yohan 1:13) Chawiy lel, kambuy Pita walonda nawamp anch: “Kuyuk kwikal kudi Nzamb ni Tatuku wa Nsalejetu Yesu Kristu! Ku riy rend rupandiken etu twavadika kand asu.”—1 Pita 1:3.

Ov, Kudi Kushindil?

Antu amwing akutwish atongin anch, ‘Anch chidi chakin anch kwikil muntu ukutwisha kwikwatin amwinend mupak chakwel avadika musu, ov, mulong wak Yesu walonda nich kushindil anch: “Uwapidilany kuvadik asu”?’ Chinech chidi chipul cha usey. Twamb oku twel oku, anch chakin kamu mazu ma Yesu madi ma kushindil, komb wading ni kutulej tusala chom chitwakad etu kutwish kuchisal. Chom chinech chovikenap. Chawiy lel, ov, mutapu ik lel tukutwisha kutesh nawamp kurumburik kwa mazu “uwapidilany kuvadik asu”?

Kushinshikin nawamp mufund winou mudi mwaulondau mu rudim ra kusambish kumekeshin anch kaulondap mu mutapu wa kushindil. Pakwez, mufund winou udi mu mutapu wa kulejan yom. Mu kulond kukwau, palonday Yesu anch: “Uwapidilany kuvadik asu,” ndiy wadinga ulondil chom chakin, kadingap ni kuyishindil. Ndiy walonda anch: “Chidi cha usey kudi en kuvadik mwiur.”—Yohan 3:7, Modern Young’s Literal Translation.

Chakwel kwilakej mulong winou nich kulond kwa kushindil, tutonginany bil pa chom chinech. Tulonda anch mu musumb mudia mashikol mavud. Yimwing yikweting chikumbu kushichingau ansand adia an a ngand, ap an a antu ashichinga kulemp ni musumb winou. Dichuku dimwing nsand umwing wakad kwikal mwan wa ngand wamulej mukurump wa shikol yiney anch, “Nisotil nilejina ku shikol yey.” Mukurump wamulej anch: “Uwapidil kwikal mwan a ngand chad wilejina kushikol yiney.” Chakin kamu, mazu ma mukurump kimadiap ma kushindil. Kamushindidinap nsand anch, “Ikal mwan a ngand!” Pakwez, ulondil anch: “Ufanyidin kwikal mwan a ngand chad wilejina kushikol yiney.” Mukurump ulondil kwend mudinga yom—chitinau chakwel lel kwilejin ku shikol yiney. Mutapu umwing, palonday Yesu anch: “Uwapidilany kuvadik asu,” ndiy wadinga ulondil kwend musadikininga yom—chitinau mulong wa “kwandam mu want wa Nzamb.”

Chitongijok chinech chansudiel—Want wa Nzamb—chikwet usu pa chom chikwau chitadila pa mulong wa kuvadik muntu musu. Chikwatin ku chipul, Kuvadik muntu musu kukwet rutong ik? Kutan chakul cha chipul chinech chidi chom cha usey nakash chakwel kutesh kurumburik kuwamp kwa chirumburikina kuvadik muntu musu.

[Mazu madia kwishin kwa paj]

[Chipich chidia pa paj wa 6]

Kufanikan ik kudia pakach pa kuvadik muntu musu ni kuvadik ku mujimbu?

Kuvadik Muntu Musu Kukwet Rutong Ik?

ANTU avud itiyijining anch muntu uswirikedining kuvadik musu chakwel apanda chikupu. Shinshikin yalonday Yesu amwinend piur pa rutong ra kuvadik muntu musu. Walonda anch: “Ching muntu wavadik musu, chamwamu kakutwiship kuman want wa Nzamb.” (Yohan 3:3) Chawiy, komb muntu uswirikedin kuvadik muntu musu chakwel andama mu Want wa Nzamb—chidiap mulong wa dipandish. ‘Pakwez,’ antu amwing alondining anch, ‘mazu minam maad—kwandam mu Want ni kutambul dipandish—malondil mulong wa difut dimwing?’ Bwat, kimwawiyap. Chakwel anch tutesha kushalijan kwinoku, el tushinshikinany bil chirumburikina mazu malondila anch: “Want wa Nzamb.”

Want udi mudi guvernema. Chawiy lel, mazu malondila anch: “Want wa Nzamb” marumburikin anch: “Guvernema wa Nzamb.” Bibil ulejen anch Yesu Kristu, “mwan a muntu,” ndiy Mwant wa Want wa Nzamb ni anch Kristu ukwet answan nend. (Daniel 7:1, 13, 14; Mateu 26:63, 64) Chikwau kand, chishimushimu chamanay Yohan chalejana anch answan pamwing ni Kristu adi antu atondau mu “antu a majuku mawonsu, ni jindim . . . ni michid,” ni ukez “kuyikadish kudi Nzamb wetu kwikal ant ni in kupesh; awiy aswanyin kal pansh.” (Kuburik 5:9, 10; 20:6) Dizu dia Nzamb dilejen kand anch antu inay akeza kuyikel mudi ant adi “chisak chikemp” cha antu 144000 “awiy kamu inang atondau kal kuyidiosh pansh.”—Luka 12:32, Manswik Masu; Kuburik 14:1, 3.

Kwisu kudia musumb ujim wa Want wa Nzamb? “Want wa Nzamb” autazukining kand anch “want wa mwiur,” chawiy chimekeshina anch Yesu ni ambay nend ant ayikedil mwiur. (Luka 8:10; Mateu 13:11) Chawiy, Want wa Nzamb udi guvernema wa mwiur usadilau kudi Yesu Kristu ni chisak cha ambay nend anyikel atondau mu michid.

Chad, chom ik chelay Yesu kulond, palonday anch chimuwapidil muntu kuvadik musu chakwel ‘andama mu want wa Nzamb’? Ndiy walonda anch muntu uswirikedin kuvadik musu chakwel ikala nyikel nend Kristu mwiur. Chawiy, mu kulond kuswapela kutesh, rutong ra kuvadik muntu musu ridi ra kurijek chisak chikemp cha antu chakwel akayikela mwiur.

Kwinsambishil kwin kamu, twamanang anch kuvadik muntu musu kudi kwa usey ujim nakash, Nzamb ndiy ukata kusal anch muntu avadika musu, ni kudi mulong wa kurijek chisak cha antu chakwel akayikela mwiur. Pakwez mutapu ik ukatay muntu kushiken ku kuvadik musu?

[Tablo wa jinsangu udia pa paj wa 7]

Rutong ra kuvadik muntu musu ridi ra kurijek chisak chikemp cha antu chakwel akayikela mwiur

[Chipich chidia pa paj wa 7]

Yesu Kristu ni chisak cha ambay nend anyikel atondau mu michid asadil Want wa Nzamb

Kuvadik Muntu Musu Kukata Kushiken mu Mutapu Ik?

YESU wisamba ni Nikodemus, kichadingap kusu ching pa usey ujim, muchidinga, ni pa rutong ra kuvadik muntu musu pakwez wisambina kand pa mutapu ukatay muntu kushiken ku kuvadik musu. Yesu walonda anch: “Ching muntu wavadik ku mem ni [spiritu, Les Saintes Écritures — Traduction du monde nouveau], chamwamu kakutwiship kwandam mu want wa Nzamb.” (Yohan 3:5) Chawiy lel, muntu ukuvadik musu kusutil ku mem ni spiritu. Pakwez “mem” ni “spiritu” yirumburikin ik?

“Mem ni Spiritu”—Yom ik?

Nikodemus wadinga mulej wa relijon wa Ayuda, pakad kwidjidjek wadinga wij nawamp mutapu wadinga Mifund ya Hebereu ni kusadil mazu “mwiku [spiritu, NW] wa Nzamb”—usu wa kusadil wa Nzamb ukutwisha kuyisadish antu chakwel asala yom yamushena. (Disambishil 41:38; Kubudik 31:3; 1 Samwel 10:6, NW) Komb pasadilay Yesu dizu “spiritu,” Nikodemus wadinga ufanyidin kutesh anch udi mwiku utumbila, usu wa kusadish wa Nzamb.

Ov, chom ik chadinga chilondilay Yesu, pisambinay piur pa mem? Tushinshikinany yinship yasadinau kurutu ni kupwa kwa minsamb nenday Nikodemus. Yinship yiney yilejen patok anch Yohan Mubabatish nau in kwilej a Yesu adinga ni kubabatishan mu mem. (Yohan 1:19, 31; 3:22; 4:1-3) Chisal chinech chijikana nawamp mu Yerusalem. Chawiy lel, padingay Yesu ni kwisambin piur pa mem, Nikodemus wadinga ufanyidin kujingunin anch Yesu kadingap wisambidina piur pa mem ma chamwamu, pakwez wadinga wisambidin piur pa kubabatishiu mu mem.a

Kubabatishiu mu “Spiritu Utumbila”

Anch ‘kuvadik ku mem’ kwadinga kwisambidin piur pa kubabatishiu mu mem, ov, chadinga chirumburikin ik ‘kuvadik ku spiritu’? Kurutu Nikodemus isamba ni Yesu, Yohan Mubabatish wijikisha anch kichidiap kusu mem pakwez kand ni spiritu akez niyend kumusadil mu dibabatish. Ndiy walonda anch: “Am nikat kukubabatishilany mu mem, pakwez ndiy [Yesu] ukez kakubabatishilany mu [spiritu utumbila, NW].” (Marko 1:7, 8) Marko mwin kufund Evanjil wisambidin piur pa kapamp ka kusambish kasadika dibabatish dined. Ndiy ufundil anch: “Chimasuta machuku minima Yesu wadiokala ku Nazaret wa ku Galaliya, amubabatish kudi Yohan mu Yordan. Chatuntukay mu mem ndiy wamana maur manzurik, ni [spiritu, NW] wizeza mudi kankudimb, wawil pa mutu wend.” (Marko 1:9, 10) Pamuuchikau Yesu mu Yordan, amubabatisha nich mem. Pa chisu chatambulay spiritu wadiokala mwiur, amubabatisha nich mwiku utumbila.

Kupwa kwa mivu yisatu kudiosh pamubabatishinau, Yesu wayileja in kwilejend nich kashinsh anch: “Mu machuku makemp Nzamb ukukubatishany en ni [mwiku utumbila, NW].” (Midimu 1:5, MM) Chisu ik chasadika yom yiney?

Chadinga pa Pentakost mu muvu wa 33 C.C., piswimp in kwilej 120 a Yesu adinga mu chikumbu chimwing ku Yerusalem. “Kukashimuk kwez swa chonyin mwiur mudi kutut kwa rinkind mukash, wizwil chikumbu chawonsu chashichingau. Kudi awiy kwamekan jindim mudi kamu ja kasu . . . Awiy awonsu ayizwisha nich [spiritu utumbila, NW].” (Midimu 2:1-4) Pa dichuku dined, ayikasikesha antu akwau adinga mu Yerusalem chakwel ayibabatisha ku mem. Kambuy Pita wayileja antu anch: “Karumukany, en awonsu akukubabatishilany mu dijin dia Yesu Kristu ku dijimangeshil dia yitil yen; ni en ukez kwakany kupan kwa [spiritu utumbila, NW].” Antu asala nchik? “Awiy atambula dizu diend ayibabatisha; kudi awiy kwibomba dichuku dinidia mipim tunan tusatu.”—Midimu 2:38, 41.

Chisal cha Yibudikin Yaad

Mitapu yiney yaad ya dibabatish yilejen ik piur pa kuvadik muntu musu? Yilejen anch kuvadik muntu musu kusadikining kusutil ku chisal chimwing chikweta yibudikin yaad. Ijik anch Yesu amubabatisha bil chakusambish ku mem. Kupwa watambula spiritu utumbila. Chawiy chimwing kand, in kwilej a kusambish ayibabatisha bil ku mem (amwing kudiay Yohan Mubabatish), ni kupwa eza kutambul spiritu utumbila. (Yohan 1:26-36) Chawiy chimwing, antu 3000 akarumuka ayibabatisha bil ku mem, ni kupwa atambula spiritu utumbila.

Kuvurik mu manangu dibabatish diasadika pa Pentakost mu muvu wa 33 C.C., ov, mutapu ik tukutwisha kuchingejin kuvadik muntu musu nlel unou? Mudi muchadinga ku mutambu wa atwimbuy a Yesu ni in kwilej a kusambish. Cha kusambish, muntu wadinga ni kwit dilikishin dia yitil yend, wakarumuk kulik kwikal nich mashakamin mayimp, ukupan mwom wend kudi Yehova mulong wa kumwifukwil ni kumusadil, ni kumekesh kwipan kwend patok kusutil ku dibabatish dia mem. Kupwa, anch Nzamb wamutond chakwel eza ikal nyikel mu Want Wend, akumuzizil spiritu utumbila. Chikunku cha kusambish cha yibudikin yiney yaad (dibabatish dia ku mem) chidi muntu amwinend ndiy ukukata; pakwez chikunku cha kaad (dibabatish dia spiritu), Nzamb ndiy ukata kuchisal. Anch muntu amubabatish mu mitapu yiney yawonsu yaad, charumburik anch wavadik kal muntu musu.

Ov, mulong wak lel, mu minsamb yend ni Nikodemus, Yesu walonda anch: ‘Vadik ku mem ni spiritu’? Chadinga mulong wa kukasikeshin anch antu akezau kubabatish ku mem ni spiritu akez kushiken ku kuswimp kumwing kujim. Chawiy chom chisambidina muntu wa mulong wambakedinap ou.

[Dizu didia Kwishin kwa paj]

[Chipich chidia pa paj wa 9]

Yohan Mubabatish, wayibabatisha in Isarel nich mem

Kuvadik Muntu Musu Kuwanyishining Chom Ik?

MULONG wak Yesu wasadila dizu anch: ‘Kuvadik mu spiritu’ pisambinay piur pa dibabatish dia mwiku utumbila? (Yohan 3:5) Pakatau kudisadil dizu “kuvadik” mu kulond kwa chijingidij, dirumburikin “disambishil,” mudi mu kulond anch: “Kuvadik kwa muchid.” Chawiy lel, dizu ‘kuvadik muntu musu’ kulejen “disambishil disu.” Chawiy lel, mu kulond kwa chijingidij “kuvadik” ni ‘kuvadik muntu musu’ kukasikeshidin anch kukwikal disambishil disu piur pa urund wa Nzamb ni antu akubabatishau mu spiritu utumbila. Kuswimp kwinoku kujim kukuwanyish ik?

Parumburilay kambuy Paul piur pa mutapu uyirijekedinau antu kudiay Nzamb chakwel ayikela mwiur, ndiy wasadila chilakej cha mashakamin mu dijuku. Wayifundina in Kristu adingaku mu chirungu chend anch akwez “kuyilil mudi an atutumb” ni anch Nzamb, ukushakam nau “mudi anend.” (Galatia 4:5, NW; Hebereu 12:7) Chakwel kuman mutapu ukutwisha kutukwash chilakej chinech cha kumulil muntu mudi mwan akatumb kukutukwash kutesh nawamp kukarumuk kwa mutapu ik kusadikininga anch muntu amubabatish ku spiritu utumbila, tushinshikinany kand chilakej cha mwan wasota kwilejin ku shikol kukatau kwilejin an a ngand.

Kuswimp Kwezininga ku Kuliliu Mudi Mwan Akatumb

Mu chilakej chinech, nsand katwishinap kwilejin ku shikol yiney mulong kadiap mwan wa muntu udia mwan a ngand. Katat, tongin anch dichuku dimwing, kwikal kuswimp kujim. Amulil mudi mwan akatumb kukwatijan nich mbil kudi tatuku mwan a ngand ukweta dijuku. Chom chinech chikwikal nich usu ik pa nsand winou? Mwaning, mulong amulidil mudi mwan akatumb, katat wikal kal nich mbil yawiy yimwing mudi an a anangand ukwikal nich mbil ya kuya kwilejin ku shikol yiney. Kumulil kwinoku kwaswimp kal chakin kamu yom yiney yawonsu yadingay ni kuchingejin kusal.

Chilakej chinech chilejen yom yikata kuyishikenang anch antu akata kuvadik ikal asu. Tushinshikinany kufanikan kumwing kudiaku. Akutwish amwinkish nsand winou ndond ku shikol yiney pakwez ching anch wawanyish yitinau chadi lel andamaku—pakampwil, kwikal mwan a ngand. Pakwez, kakutwishap kuwanyish mbil yiney ndiy amwinend. Chawiy chimwing, antu amwing akezau kwinkish ndond mu Want wa Nzamb, ap anch mu guvernema wa mwiur, ching anch awanyish yitinau chakwel itiyika—charumburik ‘kuvadik muntu musu.’ Pakwez, awiy kakutwishap awanyish yitinau mulong kuvadik muntu musu udi mulong umutadila Nzamb.

Chom ik chaswimpa mwikadil wa nsand? Kulondul mbil yiwamp ya kumulil mwan akatumb. Chakin kamu, mbil yiney yikatap kuswimp chitangil cha nsand. Kupwa kwa kumwitiyij kumulil mudi mwan akatumb, ukushal ching nsand. Ap anch wawanyish mbil ya kumulil mudi mwan akatumb, nsand winou ukutambul mwikadil usu. Chakin kamu, ukwikal nich disambishil disu—kuvadik muntu musu, mu kulond kwa chinfan. Ukwikal mwan, chawiy chikumwinkisha mbil ya kwilejin ku shikol yiney ukwikal chid cha dijuku dia tatukwend wa kumulil.

Chawiy chimwing, Yehova ukat kuswimp mwikadil wa chisak cha antu akayitil kusutil ku kuyilil mudi an atutumb. Kambuy Paul, udia umwing wa mu chisak chinech, wayifundina ambay nend akaritiy anch: “Watambwilany muchim wa kwikal mudi an, kwawiy kutukata kudidil anch: Aba Tatuku! Spiritu amwinend ndiy kaman wa michim yetu anch tudi an Nzamb.” (Rome 8:15, 16) Mwaning, kusutil ku kuyilil kwinoku, in Kristu inay ikala yid ya mu dijuku dia Nzamb, ap anch “an a Nzamb.”—1 Yohan 3:1; 2 Korint 6:18.

Chakin, kuyilil kwinoku kudi Nzamb kuyiswimpinap mwikadil wa chivadik wa an inay alidinau, mulong adi kamu kwau akayitil. (1 Yohan 1:8) Ap mwamu, mudi mwalonday kand Paul, kupwa kwa kuwanyish yitinau kukwatijan nich mbil chakwel kumulil muntu mudi mwan akatumb, awiy atambula mwikadil usu. Pa chisu chinicha kand, spiritu wa Nzamb ukutek mu an inay alilau kashinsh anch awiy akez kushakam pamwing ni Kristu mwiur. (1 Yohan 3:2) Kashinsh kinak kakash kayinkishinau kusutil ku spiritu utumbila, kayinkishining mutapu ukwau usu wa kuman mwom. (2 Korint 1:21, 22) Mwaning, akusambish disambishil disu—charumburik anch kuvadik kusu, mudi mukwadinga.

Pisambidinay piur pa an atutumb a Nzamb, Bibil ulondil anch: “Awiy akez kwikal in kupesh a Nzamb ni a Kristu, akez kaswan nend mivu kanan.” (Kuburik 20:6) Pamwing ni Kristu, an inay atutumb a Nzamb, akez kuyikadish ant mu Want wa Nzamb, ap anch mu guvernema wa mwiur. Kambuy Pita wayifundina ambay nend akaritiy anch akez kutambul “ uswan wa chikupu, wakad kusheshikang, wakad kujiyang” wayitekilay mwiur. (1 Pita 1:3, 4) Uswan upandakena kuwap mudi ik!

Pakwez, mulong winou wa winyikel ulangwishin chipul. Anch antu avadikina ikal asu akez kuyikel mudi ant mwiur, akez kuyikel padiau antu ik? Chipul chinech chawiy chikushinshikinau mu mutu wa mulong ulondwilaku ou.

[Chipich chidia pa paj wa 10]

Chom ik chalonday Paul piur pa kumulil muntu mudi mwan akatumb?