Mukand Udokila ku Chisak Chitakedila

Anamakwetu Akaritiy:

Pituda in kwifukwil a Yehova, tukatining Dizu dend Bibil. Tukwet kashinsh anch Bibil utulejining jinsang jida jakin, utwinkishin ukwash wakin mulong wa mashakamin, ni uman wa patok wa rukat ra Yehova piur pa antu. (Kuseng 119:105; Luka 1:3; 1 Yohan 4:19) Tukatining nakash kuyilej antu akwau piur pa uyakin wa usey uda mu Dizu da Nzamb. Pa chinech, tukwet musangar nakash wa kubudish buku, “Malejan Ukutwisha Kwilej mu Bibil.” El amboku tukulej yom yikemp piur pa buku winou.

Buku winou amufundin, nakash mulong wa anikanch. Pakwez, ukutwish kand kuyikwash amakurump akatina kwilej yom yivud piur pa Bibil. Mulong Bibil ud buku wa antu awonsu, pakad kwidjidjek etu awonsu tukutaninamu mu kwilej malejan mend makutwisha kutukwash twikala ni musangar wakin.

Pakwetay jinsang ja mu Bibil, buku winou ulejen jinsang ja antu kudokal payitanginau. Twasadin usu wawonsu mulong wa kulejan jinsang ja mu Bibil mu mutapu wovikena ni uswapela, kulondwish mutapu jasadika.

Pakwez, buku winou ulejen yom yivud kusutamu kwau ching kurumburil jinsang. Yom yifundinawamu ni yipich yidamu ayitenchikin mu mutapu wa kumekesh anch jinsang ja mu Bibil jisadikin katat ni mulong wa kwijik mutapu wading wiyovilau antu isambidinau.

Buku winou utukwashin kwijik mutapu ulondinay Bibil jinsang ja antu​—amuziyina Yehova ni alika kumuziyin. Ni utukwashin kwilejin ku yilakej yau. (Rom 15:4; 1 Korint 10:6) Buku winou amwangen mu yikunku 14. Kwinsambishin kwa chikunku chin chawonsu, kud mazu mafundinau mu winswimp mulong wa malejan tukwileja.

Anch ud nvaj, ufanyidin kutang dilejan pamwing ni mwaney ni kwisambin yipich. Kupwa en awonsu aad ukutangany mifund ya Bibil mudoshinau dilejan dined. Mukwasha mwaney amana kutanijan kuda pakach pa yom yitanginay mu Bibil ni malejan mada mu buku. Mutapu winou ud kand wa usey piumukwashina muntu mukurump chakwel ova kurumburik kwa uruu wa mu Bibil.

Tukwet ruchingej anch buku winou ukuyikwash antu awonsu akweta michim yiwamp​—anikanch ap amakurump—​kwilej Dizu da Nzamb ni kusadin malejan minam mu mwom yau. Mud chibudikin, akutwish niyau kumwifukwil Yehova mud antu a mu dijuku dend dikatinay.