Nzamb Watanga Diur ni Divu

Yehova Nzamb ud Sakatang wetu. Watanga yom yawonsu, yimekena ku mes ni yakad kumekan. Kurutu atanga yom yimekena ku mes, watanga angel avud nakash. Angel ading mutapu ik? Angel ad antu atangay Yehova ada mud amwinend. Tukutwishap kuyiman, mulong tukutwishap kumuman Nzamb. Mwangel wa kusambish watangay Yehova wikala nkwash wend. Mwangel winou wamukwasha Yehova kutang atutumbu, ma planet, ni yom yikwau yawonsu. Umwing wa ma planet minam utazukinau anch divu, yid ndond yetu yiwamp ya kushakam.

Chawiy Yehova warijeka divu mulong annam ni antu ashakamap. Watanga muten mulong wa kulet chitokish ni chirungul pa divu. Watanga mikandu, aturung ni atuwit.

Yom ik yasalay kand? Yehova walonda anch: ‘Nikimbin kutang maswuk ni mitond yikata kusong ntit, ni yikata kusong mabuj.’ Mitapu kushalijan ya mitond yikata kusong mabuj, ya maswuk, ni ya yisalamb yaminya. Yehova watanga kand annam​—annam akata kutwik, akata kwisay, annam akata kwend, ni akata kwikak pansh. Watanga annam akemp akemp mud atutwiy, ampuku, ni watanga kand ajim ajim mud andjamb. Nnam ik ukatining nakash?

Chad Yehova wamuleja mwangel wakusambish anch: ‘El tutang muntu.’ Antu afanyina kushalijan nau annam. Antu afanyina kusal yom yivud. Afanyina kulond, kusip, ni kulembil. Afanyina kulam divu ni annam. Wij anch nany wading muntu wa kusambish? El tumanany.