Kupwa kwa kumwopat Adam ni Ev mu chir cha Eden, avala an avud. Mwanau wakusambish, Kayin, wikala ndim, ni mwanau wa kaad, Abel, wikala kafung.

Dichuku dimwing, Kayin ni Abel apana milambu kud Yehova. Wij mulambu chom ik? Chid chipan chipandakena kuwap. Yehova wasangera mulambu wa Abel, pakwez kasangerap mulambu wa Kayin. Pamanay mwamu, Kayin wajimana nakash. Yehova wamubabesha Kayin anch ujim wend ukumushikij ku kusal chom chiyimp. Pakwez, Kayin kateshap.

Chawiy, Kayin wamuleja Abel anch: ‘Ez tuya ku chir.’ Padingau ayinau aad mu chir, Kayin wamumatikina mwanamakwend ni wamujipa. Chom ik chasalay Yehova pa mulong winou? Yehova wamupupa Kayin mu kumwauril kulemp ni dijuku dend. Kayin kelap kutwish kuchirik mu dijuku dau.

Chom ik twileja kal ku rusang riner? Tukutwish kusambish kwov ujim anch yom yisadikinap mu mutapu tukatina. Anch ujim wapam mu muchim wetu​—ap anch antu akwau atubabesh mulong amen ujim wetu—​tufanyidin kuwapish ni kushinshikin mwikadil wetu kurutu utushikija ku kusal yom yiyimp.

Mulong Abel wading umukatin Yehova ni kusal yom yiwamp, Yehova ukudandamen kumuvurik. Nzamb ukez kamuvumbul Abel, Pakezay kukarumun divu kwikal paradis.

Chisu chimwing, antu avulijana nakash pa mangand. Avud pakach pau ading antu ayimp. Ni angel amwing a mwiur ikala ayimp. Asha ndond yau mwiur ni eza pa divu. Wij mulong wak asala mwamu? Chakwel akarumuka kwikal antu ni ata amband.

Angel ni amband atau avala an. An inay apama, ikala ni usu ni ading ni dizaz. Ading kumeshan mar. Yehova kafanyinap kulik yom yiney yidandamen kusadik mwamu. Chawiy wakwata mupak wa kujip antu ayimp ku mabeb.

Pakwez kwading muntu umwing ushalijadina ni antu akwau. Wading umukatin Yehova. Dijin dend ndiy Now. Wading ukwet mband ni an asatu, Sem, Sham, ni Yafet, ni mwan ni mwan wading ni mukajend. Yehova wamuleja Now kusal waat ujim nakash, chakwel ndiy ni dijuku dend apanda ku Mabeb. Waat ud mushet ujim ukutwisha kupempam pa mem. Yehova wamuleja kand Now kwandjik annam mu waat chakwel niyau apanda.

Now wasambisha kusal waat pakad kulab. Mudimu winou ausala kudi Now ni dijuku dend mu mivu piswimp 50. Asala waat mud kamu mwayilejau kud Yehova kusal. Pa chisu chinicha, Now wayibabeshang antu mulong wa Mabeb. Pakwez kwikil muntu ap umwing wamutesha.

Kupwa, chisu cha kwandam mu waat chawanyina. El tushinshikin yom yashikena.