Izak wading ni mivu 40 chisu chamwatay Rebeka. Wading umukatin nakash. Kupwa, avala​—an ampamb amakundj.

Mukurump wading Esau, ni mwanikanch wading Yakob. Esau wading ukatin kuya mu masuku ni wading chibind muwamp wa annam. Pakwez Yakob wading ukatin kushal ku chikumbu.

Mu machuku minima, mwan ikundj mukurump ndiy wading ni mbil ja kuswan ngand ni mapit anch tatukwend wafa. Mwan winou amutazukang anch nswan. Mu dijuku da Izak, mu uswan mwading kand kwikal ni yom yamukanau Aburaham kud Yehova. Esau wapipeja kukan kwinoku, pakwez Yakob wading wij anch kukan kwinoku kwading kwa usey nakash.

Dichuku dimwing, Esau wachirika ku chikumbu waziyang kal nakash mulong wasutisha dichuku dakabuj mu kuzomb. Wova res ra yom yiwamp yading yisukinay Yakob ni wamwela anch: ‘Naziyang kal nakash! Nginkishap yakuda yiney yiwamp [ya sup musuz]!’ Yakob wamwakula anch: ‘Nikukwinkish anch wanlandish bil uswan wey wa kuvadik.’ Esau wakula anch: ‘Ye! Am nikimbin kufa, ing ya uswan kand wa kuvadik kud am ukwinsadil ik! Ukutwish kwey wasend. Nikwet kuswir kwa kuda.’ Ov, utongin anch chading chom cha manang kud Esau kusal mwamu? Bwat. Esau wapana chom cha usey nakash mulong kwau wa yakuda yiwamp.

Chisu chananapay Izak nakash, chadinga chisu cha kumuyukish mwanend ikundj mukurump. Pakwez Rebeka wasala anch Yakob mwanikanch atambula chiyukish. Chisu chijikay Esau mwamu wajimana nakash ni wakwata mupak wa kumujip mwanamakwend. Izak ni Rebeka akata kumuking Yakob ni amuleja anch: ‘Tumbuk, uchinyina kwa mwanamakwam Laban, kushik ni pakupwila ujim wa Esau.’ Yakob watesha chiyul cha anvajend ni waya kwinikwa mulong wa kwipandish.

Yehova wamukana Yakob anch ukumuchidij mudi mwamuchidijay Aburaham ni Izak. Yakob washakama mu ul utazukinau anch Haran, kwinikwa kwawiy kwatenay, wikala ni dijuku dijim, ni wikala mpich nakash.

Kupwa Yehova wamuleja Yakob anch: ‘Chirik kwey mwi ngand yey.’ Chawiy Yakob ni dijuku dend asala weny ulemp mulong wa kuchirik. Padingau mwi njil, antu amwing eza kumulej Yakob anch: ‘Mwanamakwey Esau wezin ni antu 400!’ Yakob wova wom anch Esau ukimbin kumusal nayimp ni dijuku dend. Wamulembila Yehova anch: ‘Nilemb amboku mpandishaku mu makas mwa mwanamakwam.’ Mu kwacha Yakob wamupanina Esau amikoku, ampemb, angomb, atumel, ni ayimbur.

Uchuku winiwa padingay Yakob amwinend wamumana kamu mwangel! Asambisha kutend ni mwangel. Arisha kushik ni pamanch. Ap anch Yakob wipusula pakwez kalikap. Mwangel wamuleja anch: ‘Nlikaku niya.’ Pakwez Yakob wamuleja anch: ‘Nikukulikapaku, ching wanyukish.’

Kupwa mwangel wamuyukisha Yakob. Chawiy Yakob wijika anch Yehova kafanyinap kumulik Esau amusala nayimp.

Pamanch pinipa, Yakob wamumana Esau ni antu 400 ad palemp. Yakob wasuta kurutu kwa dijuku dend ni wazengama kurutu kwa mwanamakwend tupamp sambwad. Esau waya mau kud Yakob ni wadjibula ut wend piswimp ni Yakob. Esau ni Yakob abwikatijana asambish kudil kupwa achirisha chisambu. Utongin nchik, mutapu ik wiyovay Yehova piur pa mutapu wapwishay Yakob mulong winou?

Kupwa, Esau wachirika kwol kwend, ni Yakob niyend wachirika kwol kwend. Yakob wading ukwet an amakundj 12. Majin mau mawiy am: Ruben, Simeyon, Levi, Yuda, Dan, Nefitali, Gad, Azer, Isakar, Zabulon, Jozef, ni Benjamin. Umwing wa an inay—Jozef—amusadina kud Yehova mulong wa kupandish antu End. Wij mutapu ik? El twijik mutapu wamusadinay.