Jozef wading mwan mukemp pakach pa an a Yakob. Ayayend amana anch tatukwau wading umukatin Jozef nakash. Wij mutapu wiyovau mulong wa chom chinech? Amwovila Jozef mukau ni amukisa. Chisu chalatay Jozef yilat yadingay kandikal alatangap, wayilejamu ayayend yilat yiney. Atonga anch yilat yiney yirumburikin anch dichuku dimwing akez kamwasin manungin. Kudokal pinipa amukisa nakash!

Dichuku dimwing anamakwend a Jozef aya kulam amikoku piswimp ni musumb wa Sikem. Yakob wamutuma Jozef mulong wa kuya kuyital ayayend. Padingay Jozef kulemp amumana ni alonda anch: ‘Talany, sayilat wez kalee. El tumujipany!’ Amukwata ni amudjibwila mu dibuku dilemp. Pakwez yayend umwing Yuda, walonda anch: ‘Kangal kumujip! Tumulandishany mud muswik.’ Chawiy amulandisha Jozef kwi nfalang 20 ja utad wa argent kud in kwisak a ku Madian ading ayila mu Idjibit.

Kupwa, anamakwend a Jozef apana mash ma mpemb ku koch wend, ni amutwala kud tatukwau, ni alonda anch: ‘Ov, winou kadap koch wa mwaney Jozef?’ Chawiy Yakob watonga anch Jozef amujipang kal kud nnam wa chidany. Wova nayimp nakash. Kwikil muntu watwisha kumwongoj.

Jozef amulanda mud muswik mu Idjibit kud mukurump wa amasalay utazukinau anch Potifar. Pakwez Yehova wading pamwing ni Jozef. Potifar wamana anch Jozef wading muntu muwamp mulong wa kusal mudimu ni wamuchingejina. Kupwa amwinka Jozef chisend cha kulam yom yawonsu yadingay nich Potifar.

Mband wa Potifar wamana anch Jozef wading muntu muwamp ni ujikishina. Dichuku din dawonsu mband wa Potifar wamulejang anch asal nend masandj. Mutapu ik wasalay Jozef? Walika ni walond anch: ‘Bwat! Chiyipin kusal mwamu. Mukurump wam winchingejidining, ni ud mukajend. Anch nasal masandj niyeyey, nikusal chitil ku mes kwa Nzamb!’

Dichuku dimwing mband wa Potifar wamukwata Jozef chakwel asala nend masandj ku usu. Wamupwitamijana mu maswin, pakwez Jozef wachina mau. Pezay Potifar, mband wa Potifar walonda anch Jozef wamukwatang ku usu chakwel asala nend masandj. Kalondap win yakin. Potifar wajimana nakash, ni wamuteka Jozef mu rukan. Pakwez Yehova kamuvuramenap Jozef.

Chisu chadingay Jozef mu rukan, Farao, mwant wa mu Idjibit walata yilat yakanganyau antu awonsu kurumburil. Umwing wa atushalapol a Farao wamuleja anch Jozef ukutwish kurumburil yilat yiney. Farao watuma kapamp kamwing muntu mulong wa kumusend Yozef.

Farao wamwipula Yozef anch: ‘Ukutwish kurumburil yilat yam?’ Yozef wamwakula Farao anch: ‘Mu mivu sambwad mwi ngand ya Idjibit mukez kwikal yakuda yivud, chad mivu sambwad yilondwilaku yikwikal ya kabwakat. Katat chifanyidin Farao atonda muntu wa manang mulong wa kulam yakuda chakwel kangal antu ey ez afa nzal.’ Farao wamwakula anch: ‘Nakutond kal ey! Ukwikal muntu wa kaad wa usey nakash mu Idjibit!’ Mutapu ik wijikay Yozef kurumburik kwa yilat ya Farao? Yehova ndiy wamukwasha Yozef.

Kupwa kwa mivu sambwad yakumangejay Yozef yakuda, mivu sambwad yalondulaku, kwikala kabwakat mwi ngand yakabuj mud mwalonday Yozef. Antu adokalang jindond kushalijan mulong wa kuya kuland yakuda kud Yozef. Tatukwend, Yakob, watesha anch mu Idjibit mud yakuda yivud, chawiy watuma anend amakundj dikum mu Idjibit mulong wa kuland yakuda.

An inay a Yakob aya kud Yozef, ni Yozef wayijingunina kapamp kamwing. Pakwez anamakwend kijikap anch ndiy Yozef. Amwasina manungin mud kamu mwalatay padingay mwan mukemp. Yozef wakimba kwijik anch anamakwend achikwet michim yiyimp. Chawiy wayileja anch: ‘En wezinany kwendish ngand. Wezilany kwend mulong wa kwijik jindond jiziyila ja ngand.’ Amwakula anch : ‘Bwat amboku! Tud an 12 adokila mu Kanan. Chad mwanamakwetu umwing wafa, ni kasulansong washadin ni Tatuku.’ Chawiy Yozef walonda anch: ‘Yangan ukamuletan mwanchen, ni nikukwitiyijan.’ Chawiy achirika kud tatukwau.

Chisu chaburena kand dijuku yakuda, Yakob wayituma kand anend amakundj mu Idjibit. Payau, amusenda Benjamin. Mulong wa kuyipak anamakwend, Yozef wajindjika rupas ra utad wa argent mwi nsaak wa Benjamin mwadinga yakuda, kupwa wayela anamakwend anch awiy iya kal rupas. Patanau atushalapol a Yozef rupas mwi nsaak wa Benjamin, anamakwend aziya nakash. Amwilembina Yozef ayipup awiy pa ndond pa Benjamin.

Yozef wijika chad anch anamakwend aswimpin kal. Yozef katwishap kulam muchim wend chisu chilemp. Wasambisha kudil ni walond anch: ‘Yam mwanamakwen Yozef. Ov tatuku uchid kal mwom?’ anamakwend ashimoka nakash. Wayileja anch: ‘Kangal wovany nayimp mulong wa yom wansalanya. Nzamb wantuma kunoku mulong wa kukupandishany. Yangany mau umuletan tatuku kunoku.’

Aya amulej tatukwau rusang ruwamp ni amutwala mu Idjibit. Kupwa kwa mivu yivud, Yozef ni tatukwend ikala kand pamwing.