Mwi ngand ya Us mwading muntu umwing wamwifukwilang Yehova. Dijin dend Yobu. Wading mpich nakash ni wading ni dijuku dijim. Wading muntu muwamp, ni wayikwashang atuzwendj, adiaafu, ni an anshon. Ov, Yobu kadingap ni milong, mulong wasalang yom yiwamp?

Yobu kadingap kija chom, pakwez Satan Djabul wading umutadin. Yehova wamwipula Satan anch: ‘Ov wamumanangap kashalapol wam Yobu? Kwikil muntu uda mud ndiy pa mangand. Ukat kwintesh ni usadining yom yida yiwamp.’ Satan wakula anch: ‘Komb Yobu ukuziyididin chamwamu? Umuyukishin ni umukingin. Umwinkishin ngand nau annam. Mutambula yom yawonsu ni ukulik kukwifukwil.’ Yehova wamwakula anch: ‘Ukutwish kumupak Yobu. Pakwez kangal kumujip.’ Mulong wak Yehova wamulika Satan mulong amupak Yobu? Wading nich kashinsh anch Yobu ukujijaman.

Satan wasambisha kumupak Yobu nich yishiken yikash. Cha kusambish, watuma antu atazukinau anch a Sabe mulong wa kwiy angomb ni ayimbur a Yobu. Kupwa, kasu kwosha amikoku awonsu a Yobu. Chisak cha in kalideya iya atumel end. Atushalapol alamang annam inay ayijipa. Kupwa kwasadika yom yiyimp nakash. An a Yobu awonsu ading asadina musambu, chikumbu mwadingau chayiwila ni afa. Yobu wova nayimp nakash, pakwez kalikap kumwifukwil Yehova.

Satan wakata anch Yobu amana mar nakash, chawiy chasalay anch Yobu abudik makwalong ma yitat mujimbu wa kabuj. Yobu wamana mar nakash. Kijikap mulong wak yom yiney yawonsu yimushikedin. Pakwez, Yobu wadandamena kumwifukwil Yehova. Nzamb wamana yom yiney yawonsu, ni wasangara nakash mulong wa Yobu.

Kupwa, Satan watuma antu asatu kumupak Yobu. Amwela anch: ‘Wasadin kal yitil ni wayijindjik. Nzamb ndiy ukupupina.’ Yobu walonda anch: ‘Nasadinap chom chiyimp.’ Pakwez wasambisha kutong anch Yehova ndiy wading musul wa milong yiney, ni walonda anch Nzamb kadingap umubangidin.

Ikundj utazukinau anch Elihu wading uteshin nawamp mambamb minam pakad kulond. Kupwa watoya ni walond anch: ‘Yom yawonsu yiwalondanya kal yid yiyimp. Yehova ud mujim upandakenamu manang metu. Kakutwishap kusal chom chiyimp. Umening yom yawonsu ni uyikwashining antu akweta milong.’

Kupwa Yehova wamuleja Yobu anch: ‘Ov, ey wading kwisu pinatanga diur ni divu? Mulong wak ulondina anch nidap muntu muwamp? Ulondin, pakwez wijap mulong wak yom yikat kushiken.’ Yobu witiyina kurumbuk kwend ni walonda anch: ‘Nifil nich. Natesha piur peyey, pakwez katat nakwijik kal lel nawamp. Kwikil chom chikutwisha kukukasiken. Nikwet ushon mulong wa yom nalondina.’

Chisu chapwa kupak kwawonsu, Yehova wamuchirishina kand Yobu mujimbu uwamp ni wamwinkisha yom yivud kusutamu yom yadingay nich pakur. Yobu washakama machuku mavud nich mwom uwamp. Yehova wamuyukisha Yobu mulong wamuteshang ap anch chading chikasiken. Ov, niyey ukutwish kwikal mud Yobu ni kudandamen kumwifukwil Yehova chikalap nchik yom yikukushikena?

Mu Idjibit, dijuku da Yakob adijika mud in Isarel. Kupwa kwa rufu ra Yakob ni ra Jozef, mwadila Farao musu wasambisha kuyikel. Wading ni wom anch in Isarel akwikal ni usu nakash kusutamu in Idjibit. Chawiy Farao winou wayikadisha in Isarel asuk. Wayibudishang matafad ku usu ni kuyisadish midimu yikash ku yir. Ap anch in Idjibit ayisadishang in Isarel midimu ku usu, pakwez in Isarel adandamena kuvul nakash. Mulong Farao kadingap kakatina anch adandamena kuvul, chawiy chapanay mbil anch mwan ikundj ukuvadika wa in Isarel chifanyidin kumujip. Ukutwish kutong mutapu wovau in Isarel wom?

Mband mwin Isarel utazukinau anch Jokebed wavala mwan ikundj muwamp. Mulong wa kumuking, wamuteka mu musans ni wamujindjika mu disaz da Wit wa Nil. Mpanyend Miriam, wading ushich piswimp ni mwan winou chakwel atala yom yikusadika.

Mwan mband wa Farao weza mulong wa kowal mem ku wit ni wamana musans. Mukach mwa musans mwading mwan wadil lel, ni wamovila riy nakash. Miriam wamwipula anch: ‘Ov, nikutwish kuya kukimb mband ukutwisha kukwamwishinangay mwan winou?’ Pakulay mwan mband wa Farao anch yang, Miriam wachirika mau kumulej makwend a mwan, Jokebed. Mwan mband wa Farao wamuleja anch: ‘Musenda mwan winou, sambish kwingamwishinay, am nikukufut.’

Papamay mwan winou, Jokebed wamutwala kud mwan mband wa Farao ni wamupila anch Moses ni wamulila mud mwanend. Moses wapama mud mwan a mwant ni wading ni chom chawonsu chakimbangay. Pakwez Moses kamuvuramenap Yehova. Wading wij anch wading mwin Isarel, kadingap mwin Idjibit. Ni watonda kumusadin Yehova.

Pawanyishay mivu 40, Moses wakwata mupak wa kuyikwash antu end. Pamanay mwin Idjibit ukat kumubul musuk mwin Isarel, Moses wamubula mwin Idjibit nakash ni wamujipa. Moses wajindjika mujimbu wa muntu winou mu usukuril. Pajinguninay Farao yom yiney, wakimba kumujip Moses. Pakwez Moses wachinina mwi ngand ya Madian. Yehova wamulama kwinikwa.