Payau in kutentish a in Isarel mu musumb wa Yeriko, ashakama mu chikumbu cha mband utazukinau anch Rahab. Mwant wa Yeriko watuma amasalay ku chikumbu cha Rahab. Rahab wayijindjika in kutentish aad kwiur kwa chikumbu ni wayileja amasalay kuya mutambu windjing. Wayileja in kutentish anch: ‘Nikukukwashany mulong nij anch Yehova ud nen ni ukusheshany ngand yiney. Nilemb amboku nshilanyamu anch ukwimpandishany ni dijuku dam.’

In kutentish amuleja Rahab anch: ‘Twakushilamu kal anch kwikil muntu ap umwing ukwikala mukach mwa chikumbu chey ukufa.’ Alonda anch: ‘Kas mwoj usunz ou pa dididish dey ni dijuku dey kakudisalap uyimp.’

Rahab washirishina in kutentish ku mwoj wakasay pa dididish. In kutentish aya mu mikandu ni ajingama mu machuku masatu kurutu achirika kud Joshua. Kupwa in Isarel auka Wit wa Yordan ni irijeka mulong wa kukwat ngand. Yeriko wading musumb wa kusambish wakwatau. Yehova wayileja kunyingumuk musumb kapamp kamwing pa dichuku mu machuku musamban. Dichuku da sambwad, anyingumuka musumb tupamp sambwad. Chawiy in kupesh abulang mpuny jau, ni amasalay atoyang mazu piur. Mbumbu ja musumb jawa! Pakwez chikumbu cha Rahab chading ku rubumbu chawap. Rahab ni dijuku dend apanda mulong Rahab wamuchingejina Yehova.

Jinsang piur pa Yeriko japalangana ku michid yikwau mu Kanan. Ant au akwata mipak ya kuya pamwing mulong wa kuyirishikish in Isarel. Pakwez in Gabayon aya ni mupak windj. Aya kud Yoshua, adjit masun mapokina ni alonda anch: ‘Tudokil kwi ngand yilemp. Twateshin jinsang piur pa Yehova ni piur pa yom yakusadidinanay mu Idjibit ni mu Mowab. Tusukan nen manswik, ni tukwikal atushalapol en.’

Yoshua wayitiyija ni wakwata mupak wa kulik kuyirishikish. Kupwa kwa machuku masatu, wajingunina anch kadokilap kwi ngand yilemp. Adokil mwi ngand ya Kanan. Yoshua wayipula in Gabayon anch: ‘Mulong wak watudimbinanya?’ Amwakula anch: ‘Twading twovil wom! Twad twij anch Yehova Nzamb wen ukat kukurishinany. Twilemb amboku pikil watujipany.’ Yoshua wadandamena kulam kushilamu kwend ni kayijipap.

Pakad kulab, ant atan a mu Kanan ni amasalay au eza kuyirishikish in Gabayon. Yoshua ni amasalay end enda uchuku wa kabuj mulong wa kuyipandish. Njit jasambisha pamanch nakash. In Kanan achina mau apalangan. Kwawonsu kwachininau Yehova wayasa mayal majim. Chawiy Yoshua wamwita Yehova kwimik muten. Mulong wak wamwita Yehova kusal mwamu anch muten kand kal wimanangap? Mulong Yoshua wading umuchingejidin Yehova. Muten wandamap dichuku dinida kushik ni payiwininau ant a Kanan ni amasalay au kud in Isarel.